Lajmet
Intervistë me kryetarin e Komunës së Leposaviqit, Lulzim Hetemi
Lulzim Hetemi, kryetar i Komunës së Leposaviqit, ofron një pasqyrë të thellë dhe të ndërlikuar të ndryshimeve që ka sjellë në këtë komunë dhe përpjekjeve të tij për të ndërtuar një administratë funksionale dhe të qëndrueshme në një zonë të ndjeshme. Me një ton të qartë dhe reflektues, Hetemi flet për transformimin e situatës, duke theksuar përmirësimet e dukshme që kanë ndodhur që nga ardhja e tij në këtë post. Ai diskuton sfidat që ka hasur, nga protestat dhe kërcënimet deri tek mungesa e stafit dhe mbështetje e kufizuar nga institucionet shtetërore.
Përgjatë intervistës, Hetemi tregon për angazhimin e tij dhe përpjekjet për të ofruar shërbime të barabarta për qytetarët e Leposaviqit, pavarësisht pengesave dhe presioneve. Ai gjithashtu kritikon qasjen e ndërkombëtarëve dhe përmend vështirësitë që ka hasur në përpjekjet për të përmirësuar infrastrukturën dhe për të siguruar mbështetje më të mirë për komunën.
Hetemi përmend angazhimin e tij të vazhdueshëm për të përmirësuar gjendjen e përgjithshme dhe për të krijuar një ambient të sigurt dhe funksional për të gjithë qytetarët, duke u përpjekur të ndryshojë perceptimet dhe të tregojë se puna dhe përkushtimi mund të sjellin rezultate të prekshme dhe të rëndësishme për komunitetin.
Me ardhjen tuaj si kryetar i Komunës së Leposaviqit, cilat situata kanë ndryshuar për mirë?
Lulzim Hetemi: Situata e përgjithshme ka ndryshuar për mirë, si nata me ditën. Kur kemi ardhur këtu, kemi ardhur me polici; vetëm për gjysmë ore ka qenë e mbushur me qytetarë, me sirena, me probleme. Tani e keni parë situatën kur jeni ardhur dhe si keni hyrë. Komuna është e hapur dhe funksionon për qytetarët e Leposaviqit, të cilët shërbehen me të gjitha dokumentet e nevojshme, si çdo qytetar tjetër në komunat e tjera.
Në hyrje të komunës, pamë aparaturën që ishte e funksionalizuar dhe në gjuhën shqipe. A mund të na shpjegoni si funksionon komuna dhe mënyrën e përdorimit të kësaj aparature?
Lulzim Hetemi: Ka një javë që kur kemi vendosur aparatin në gjuhën shqipe; besoj se do ta vendosim edhe në gjuhën serbe dhe do të funksionalizohet në dy gjuhët. Në këtë institucion kemi të gjitha shenjat e Republikës së Kosovës. Shumica e punonjësve të punësuar këtu janë serbë, diku rreth 180 persona. I kemi pasur diku rreth 260 veta në kontratë mbi vepër, kështu që kemi filluar të marrim me konkurs punonjësit që na nevojiten në sektore të ndryshme, që nuk i kemi të çertifikuar. Po ashtu, kemi një marrëveshje me komunën e Podujevës, ku pagesat kryhen përmes kësaj komune.
Jemi te pika kthesë, kur Kosova çohet në këmbë për të parë se çka po ndodhë në Leposaviq. Si u funksionalizua komuna pas protestave të shumta dhe kundërshtimeve të serbëve lokalë për të qenë ju bartës i institucionit?
Lulzim Hetemi: Në fillim, kur kemi ardhur këtu, jemi vendosur në komunë me policinë e Kosovës. Kemi pasur mbrojtjen e afërt të gjashtë personave; këtu ka qenë njësia elitare e Republikës së Kosovës, FITI, NJRSH – Gjilan, dhe NJSO – Mitrovicë. Fillimi ka qenë i tmerrshëm, vetëm me protesta gjatë natës dhe ditës; na kanë sharë, na kanë fyer, na kanë maltretuar, dhe nuk na kanë lënë as të flejmë. Kështu që vendosmëria ime, e shtetit dhe vendosmëria e Policisë së Kosovës kanë qenë kjo kthesë e madhe që ka sjellë sot këtë gjendje të qetë që kemi tani në veri, ku po funksionon komuna si çdo komunë tjetër në Republikën e Kosovës.
Si keni komunikuar me pjesën e jashtme, përfshirë institucionet, familjarët dhe qytetarët?
Lulzim Hetemi: Dy-tre ditë komunikimi ka qenë në rregull, por pas tri ditësh, përmes listës serbe, kriminelëve, na e kanë ndërprerë çdo lidhje me Telekomin e Serbisë—as televizion e as komunikim. I vetmi komunikim që kemi pasur ka qenë këtu nga lartë në zyrën e kryetarit, disa shkrime që na kanë dërguar për të treguar nëse jemi mirë ose jo. Pas dy muajsh protestash, bisedimesh me KFOR-in amerikan, dhe ardhjes së stafit tim nga Mitrovica, tri-katër vajza shqiptare me blinda i kanë sjellë policia e Kosovës. Fillimisht kanë ardhur diku rreth 45 persona serbë në punë. Krejt këto sakrifica kanë qenë që qyteti të jetë siç është sot; vendosmëria ka bërë që Leposaviqi dhe veriu të jenë kështu.
Sa dhe si e kanë pritur këtë veprim, këtë lëvizje, serbët që kanë qenë duke punuar në komunë? A kanë qenë ata të përfshirë brenda institucionit?
Lulzim Hetemi: Në atë periudhë, serbët lokalë në zonë nuk e kanë pritur mirë situatën dhe kanë qenë të shtyrë dhe të manipuluar gjoja se ja kemi nxënë, ja kemi marrë komunën, i kemi lënë pa vende të punës. Janë munduar përmes amerikanëve dhe bisedimeve me ta, se dëshirojnë të hyjnë 100- 200 persona këtu dhe nuk i kemi lejuar sepse nuk e dinin se me çfarë prapravije politike po vepronin. Kështu që nuk i kemi lejuar kurrë që të vijnë në punë stafin e mëhershëm që kanë qenë aty.
Cila është sfida më e madhe që po përballeni aktualisht?
Lulzim Hetemi: Situata më e vështirë që po përballem sot është stafi i mëhershëm. Nuk kemi staf të mëhershëm në prokurim, financa, dhe çdo gjë që ne bëjmë kalon përmes komunës së Podujevës, për të cilën kemi marrëveshjen.
E kuptojmë kompleksitetin e situatës me serbët lokalë, por sa shpesh jeni përballur me kundërshtime nga shqiptarët që nuk e kanë dashur, pranuar pozitën tuaj?
Lulzim Hetemi: Nuk e di, por kur kam qenë këtu i mbyllur për 7 muaj, kam pasur mesazhe, që më kanë thënë ‘kryetari lësho komunën’, duke pyetur çfarë po bëja dhe duke thënë se po përdorem nga qeveria dhe Vetëvendosja. U befasova, por tani po tregojmë me punë. Po i tregojmë edhe kundërshtarëve se nuk e kishin menduar se do të përballeshin me këtë situatë. Nganjëherë flasim me qeveritarët, por ne na duhet të punojmë dhe jo të flasim. Puna dhe rezultatet tregojnë vetë.
Çfarë e mban gjallë motivin tuaj për të vazhduar punën dhe për të kontribuar në këtë vend dhe institucion?
Lulzim Hetemi: Motivi është që edhe ata që vijnë pas nesh, duhet të punojmë mirë për të treguar qytetarëve të Leposaviqit se ne jemi më të mirë se ata 10 që kanë qenë më herët. Qytetarit serb nuk i intereson se kush është kryetar – a është shqiptar, serb apo ndonjë tjetër. Qytetarëve u interesojnë shërbimet që tani i marrin, si ndërrimi i patentave, regjistrimi i automjeteve, pasaportat, leternjoftimet, dhe çdo gjë tjetër që ka qenë në zyrat e fshatrave. Ne i kemi sjellë këto shërbime këtu në komunë. Për këtë komunë kemi luftuar që të jetë në funksion. Kur kam ardhur këtu, shumica kanë qenë të ardhur. Ka qenë komunë e Republikës së Serbisë dhe tani është komunë e Republikës së Kosovës.
Qytetari serb është i interesuar të jetojë i lirë. Qytetarët na kanë thënë që na keni çliruar nga bandat. Është e vërtetë që me ardhjen tonë i kemi çliruar. Para dy javësh, qytetari i Suçanicës mori përurimin e nënstacionit, një ngjarje e jashtëzakonshme për shkak të distancës së madhe nga Suçanica në Leposaviq. Shumë herë kanë ardhur te kryetari dhe komandanti i policisë për të bërë patrullime edhe natën në Suqanicë dhe në qytet e Leshakut. Siguria dhe liria janë gjithçka. Kulmi i gjithçkaje është liria.
Sa është mbështetja nga institucionet qendrore dhe a keni kontakt të përditshëm me ta?
Lulzim Hetemi: Sa kam qenë këtu në komunë, komunikimi dhe vizitat i kanë bërë disa figura kryesore të qeverisë. Kam komunikuar gjithmonë me ministrat dhe me Xhelalin. Kam komunikuar me kryeministrin Albinin dy herë në javë, online, derisa kemi vendosur të dalim prej këtu.
Kur kam qenë në komunë i mbyllur, vizitat dhe takimet janë bërë nga disa figura kryesore të qeverisë. Kur u aktivizuan të gjitha dhe i sollëm të gjitha zyrat këtu, qytetarët serbë filluan të vinin dhe të merrnin shërbime. Vendosa të dal dhe kisha bindjen se as amerikanët nuk do të kishin ndonjë problem, edhe nëse kthehesha këtu. Kështu që e bëra një test. Ditën që i kam bërë 7 muaj këtu, dolëm nga këtu me mbrojtjen e afërt, shkuam në Mitrovicë, pimë kafe, shkova në shtëpi dhe u kthyem përsëri këtu. Përkrahja nga institucionet shtetërore është, por nuk është e kënaqshme. Kam pritur më shumë nga institucionet e shtetit, veçanërisht disa ministri si ajo për rrugë dhe bujqësi. Nuk kemi staf dhe të gjitha punët që duhet të finalizohen na duhet t’i realizojmë përmes komunës së Podujevës, dhe nuk jam i kënaqur me sa kam pritur. Kam pritur që të aktivizohen disa ministri të infrastrukturës, bujqësisë dhe pushtetit lokal. Kemi përkrahje, por jo të kënaqshme.
Te kush është faji?
Lulzim Hetemi: Nuk e di ku është faji. Siç thotë populli, duket se “po lihet në asgjë”. Disa shtëpi janë ndërtuar në disa fshatra në Mitrovicën e Veriut, dhe gjithçka është në rregull. Si kryetar i komunës, në komisionin ku jam, jam i zhgënjyer sepse po ndërtohen shtëpi për disa persona që nuk janë duke jetuar aty. Problemi është që duhet të dihet se kujt po i ndihmohet me ndërtimin e shtëpive, e jo të ndërtohen vikendica.
Ne e kuptojmë që ura e Ibrit është një shqetësim për Mitrovicën, por a vërehen kundërshtimet e shumta të serbëve që shfaqen aty edhe në komunën tuaj?
Lulzim Hetemi: Unë besoj dhe jam i bindur që me qendrimin tim gjatë këtyre shtatë muajve, e di se çfarë duan dhe çfarë mendojnë edhe ndërkombëtarët. Nuk kam pasur probleme me KFOR-in; problemi është që nuk kam shkuar në takim me Hovenierin. Amerikanët më kanë kërkuar të dal prej këtu, por u kam thënë jo derisa të funksionalizohet komuna, dhe ashtu ka ndodhur. Në fund, më kanë sjellë gjeneralin nga Bondsteeli, dhe i kam thënë të njëjtat fjalë, dhe më kanë lënë në qetësi.
Edhe për urën e Ibrit dhe për gjithçka tjetër, qytetari i thjeshtë serb i veriut, jo i Leposaviqit por i veriut në përgjithësi, nuk e intereson më se kush është. Atij i intereson që të mos mashtrohet dhe të mos vidhet; ai dëshiron liri dhe këta nuk e kanë pasur. Serbët e veriut nuk kanë pasur liri prej vetes.
Nuk e di çfarë është bërë me urën e Ibrit dhe pse është politizuar. Sikur të isha kryetar i komunës së veriut, do të kisha marrë një vendim dhe nuk do të kisha bërë telashe as për qeverinë dhe as për kryeministrin. Si kryetar i komunës, do ta kisha larguar atë, ditën që asambleja ka miratuar heqjen e blloqeve nga aty. Ku është problemi? Ne në Leposaviq, çfarë thellësie kemi dhe nuk kemi fare probleme. Tani është bërë një problem për amerikanët, evropianët dhe ndërkombëtarët, në mes të Kosovës. Çfarë është ky simbol? Kujt i shkon për shtati ky simbol? Vetëm Serbisë dhe Vučićit, sepse ai e sheh si simbol të ndarjes së Kosovës dhe nuk e intereson shumë për qytetarin serb të veriut apo të Leposaviqit.
Situata më e vështirë në të cilën gjendet sot Kosova?
Lulzim Hetemi: Situata më e vështirë, sipas meje, është që ne nuk jemi përballë Serbisë dhe nuk jemi të koordinuar mes veti. Kur jemi 50-50, gjysma këtej e gjysma andej, është normale që edhe ndërkombëtarët na kthejnë kundër. Ku është logjika e evropianëve që të vendosin sanksione ndaj nesh? Sikur të isha unë kryeministër, nuk do të kisha biseduar me ta; për çfarë të bisedohej? Na kanë lënë në një situatë ku duhet të marrim veprime në shtëpinë tonë, në shtetin tonë, dhe ua kanë lënë Serbisë në bisedime.
Çfarë kuptimi kanë këto bisedime? Çfarë kuptimi ka Asociacioni? Sikur të isha në qeveri dhe kryeministër, nuk do ta isha krijuar kurrë Asociacionin. Evropianët janë këtu dhe bota është këtu; le të shohin si po jeton qytetari serb që nuk gjen askund tjetër në botë kaq të lirë si këta. Çfarë kompetencash u kemi dhënë?
A keni hasur në kërcënime të ndryshme kohët e fundit? Nëse po, mund të na përshkruani me detaje llojet e kërcënimeve që keni marrë dhe natyrën e tyre?
Lulzim Hetemi: Kërcënimet as nuk i kam vërejtur dhe as nuk kam ditur t’i ndiej fort; as nuk më kanë interesuar as më parë. Kur kam ardhur këtu në fillim, kam ditur që do të përballemi me kërcënime, probleme dhe telashe. Por unë kam pasur një qëllim, si ai që vrapon dhe arrin në finish dhe ndalet. Ne kemi vrapuar deri në Jarinje dhe jemi ndalur aty, sepse është toka jonë, është e bekuar dhe nuk më ka interesuar asnjë punë tjetër.
A do të kandidoni përsëri për kryetar të komunës apo për deputet?
Lulzim Hetemi: Nuk besoj që do të kandidoj as për kryetar të komunës e as për deputet; si Lulzim Hetemi, jam i bindur për këtë.
Jam i bindur, dhe këtë e vlerësojnë edhe qytetarët, se e kam kryer punën time. Pra, shtetit i mbetet që, edhe pasi të dalim nga këtu, duhet të bëjë disa rregullore dhe ligje që të mos guxojë askush të prekej simbolet e shtetit ose të mos dalë në zgjedhje fare. Ligje që nuk guxon të preket flamuri, as presidenti, as vula që e kemi këtu.
Ne kemi gjetur që miliona janë lëshuar pa vulë, vetëm me një nënshkrim, dhe tani na sulmojnë dhe na vijnë auditorë. Duhet të dinë pak më shumë se ku jeton kryetari Hetemi. Ne nuk kemi problem me Listën Serbe këtu në Leposaviq; problemi në Leposaviq e Veri është me BIJA-Serbe, me Republikën e Serbisë që i ka njerëzit këtu. Lista Serbe për shtetin e Kosovës është shumë e vogël, një pikë uji në oqean. Kur duan të thonë se janë të gatshëm për zgjedhje për postin e kryetarit të Leposaviqit dhe për komunën e Leposaviqit, jemi të gatshëm jo vetëm unë si kryetar, por edhe shteti dhe qeveria, por ata nuk e duan askënd.
A është e arsyeshme që një kryetar shqiptar të udhëheqë një komunë me shumicë të popullsisë serbe?
Lulzim Hetemi: Krahasimi i Luginës së Preshevës me veriun është si nata me ditën. Është interesante se këtu kanë liri dhe është më mirë me kryetarin Hetemi sesa me Sllavishin, Petkoviqin dhe ‘dreqin e të birin’ ata i kanë vjedhur, i kanë rrahur dhe nuk kanë pasur ku të ankohen. Kryetari Hetemi nuk i vjedh dhe nuk i mashtron; ne po mundohemi të punojmë për të mirën e shtetit të Kosovës dhe për të mirën e qytetarëve serbë të veriut.
Si do ta gjejmë komunën pas një viti, kur nuk do të jeni kryetar?
Lulzim Hetemi: Jam i bindur që shteti i Kosovës dhe qeveria duhet të kenë kujdes për ata që vijnë këtu dhe të ndryshojnë disa ligje dhe mendësi që kemi si shqiptarë, dhe të bashkëpunojnë më mirë.
Nuk e di ku është problemi me ndërhyrjet në shtëpi; nuk e di që ka diçka të tillë në botë. Thonë “miku thyej kryet për muri”, por kjo është e paimagjinueshme. Miku duhet të pritet si mik dhe të diskutohet si mik.
Rasti im është konkretisht kur kam kundërshtuar ambasadorin amerikan dhe amerikanët këtu që më kanë sjellë probleme. Ne kemi problem me vetveten; ku ndërkombëtarët krahasojnë Leposaviqin dhe veriun e Kosovës me Graçanicën, e cila është me simbole të Republikës së Serbisë dhe struktura paralele. Shko, vendos një flamur atje në Preshevë dhe shiko, pse shqiptarët e Maqedonisë nuk krijojnë probleme atje? Edhe ata kanë pasur probleme me maqedonasit dhe mund të kishin kërkuar një autonomi, një asociacion, madje atyre u takon më shumë se atyre që po kërkojnë për Serbi. Ne nuk kemi kërkuar kurrë ndonjë gjë; pse shqiptarët e Malit të Zi nuk kërkojnë asgjë? A është kjo Evropa? A janë këto amerikanët? Po nëse ne do të ngriheshim dhe të kërkonim për shqiptarët në Greqi? Ne duhet të ndryshojmë që të ndryshojë edhe miku, dhe Evropa e Amerika.
Çka ju mbeti peng e që nuk realizuat deri tani si kryetar?
Lulzim Hetemi: Peng është që nuk kemi staf për të punuar disa rrugë dhe për të investuar në bujqësi. Kur qytetari dhe bujk i shkreti në thellësi të fshatrave të Leposaviqit janë pa rrugë dhe pa asgjë, askush nuk e ka parë këtë. Lista Serbe me Hetemin i ka dhënë vetëm njerëzve të vet. Këtu është një varfëri e jashtëzakonshme për popullin serb; këtë nuk e kam ditur. Kam menduar që ata marrin buxhetin në të gjithë sektorët dhe kam menduar se nuk ka qytetarë të varfër në Leposaviq. Ata i kishin lënë në tmerr. Nëse do të kisha staf tim për të punuar dhe për t’i treguar se kryetari Hetemi është më i mirë se 10 serbët./UBTNews/
Gazetare: Dionesa Ebibi
UBT ka tashmë mbi një dekadë që jep çmimet “Honorary Degree – Excellence in Leadership” dhe “Leadership Excellence Award” për personalitete të rëndësishme, vendore e ndërkombëtare, që kanë dhënë kontribut, në fusha të ndryshme, për Republikën e Kosovës.
Në këtë plan, si edhe në shumë fusha të tjera, UBT është një hap para institucioneve shtetërore, duke hapur shtigje bashkëpunimi, por edhe duke nderuar të gjithë ata që meritojnë më shumë se nderim, respekt e falënderim të përhershëm.
Po përkujtojmë në këtë shkrim çmimet që UBT ka dhënë në dhjetë vitet e fundit.
Më 21 maj të këtij viti, UBT ndau çmimin më të lartë institucional “Honorary Degree – Excellence in Leadership” për liderin dhe politikanin e njohur kanadez, Tony Clement.
Ky çmim i veçantë vjen si njohje për kontributin e tij të jashtëzakonshëm në fushën e udhëheqjes, inovacionit politik dhe bashkëpunimit ndërkombëtar.
Rektori i UBT-së, Prof. Dr. Edmond Hajrizi tha se ky çmim përfaqëson një nderim të veçantë për një personalitet me një përvojë të thellë në lidership dhe, njëkohësisht, për një mik të çmuar të Kosovës.
“Përmes këtij çmimi ne po nderojmë jo vetëm një personalitet me përvojë të pasur në lidership, por edhe një mik të Kosovës, i cili ka mbështetur vazhdimisht avancimin e vlerave demokratike dhe zhvillimin ndërkombëtar”, tha Rektori Hajrizi.
Politikani i njohur kanadez, Tony Clement, gjatë fjalës së tij, theksoi se ndjehej veçanërisht i nderuar për çmimin nga një institucion që përfaqëson përparimin, edukimin cilësor dhe të ardhmen. Ai vlerësoi Kosovën dhe UBT-në si shembuj të përkushtimit të sinqertë ndaj zhvillimit dhe integrimit ndërkombëtar, duke shprehur bindjen se këto vlera janë themeli i një bote më të bashkuar dhe të drejtë.
Në vitin 2024, UBT ndan çmimin “Leadership Excellence Award” për kryetarin e Bashkisë së Portos, Rui Moreira.
Në një ceremoni organizuar më 20 qershor, Rektori Edmond Hajrizi theksoi rëndësinë e kontributit të liderëve në përmirësimin e jetës shoqërore dhe zhvillimin e komuniteteve. Ai vuri në dukje se kontributi i kryetarit Moreira ka qenë thelbësor për zhvillimin e qytetit të Portos dhe ka shërbyer si një model frymëzimi për liderët e tjerë në Evropë dhe më gjerë.
Kryetari Rui Moreira, duke pranuar çmimin, shprehu mirënjohjen e tij dhe theksoi rëndësinë e bashkëpunimit ndërmjet institucioneve akademike dhe autoriteteve lokale.
Po më 2024, më 30 prill, UBT ndau çmimin më të lartë institucional për Rektorin e Trakya Üniversitesi, Prof. Dr. Erhan Tabakoğlu.
“Kemi kënaqësinë që në një ceremoni të veçantë, në emër të UBT-së, të ndajmë çmimin më të lartë institucional për Rektorin e Universitetit Trakya, Prof. Dr. Erhan Tabakoğlu, për kontributin e tij të jashtëzakonshëm në afirmimin, konsolidimin e vlerave, standardeve, si dhe lidershipin e treguar në promovimin dhe integrimin e universiteteve të Ballkanit”, tha në ceremoni Rektori Hajrizi.
Rektori Tabakoğlu falënderoi Rektorin Hajrizi për ndarjen e këtij çmimi, duke theksuar se, ndër të gjitha çmimet që ka marrë, ky çmim është më i rëndësishmi për të. Ai theksoi se, nga ky moment, Rektori Hajrizi është vëllai i tij, ndërsa UBT dhe Universiteti Trakya janë vëllazëruar.
Ndërsa, më 20 mars 2024, UBT nderoi z.David Phillips me çmimin më të lartë institucional “Leadership Excellence Award”
Çmimi iu nda David Phillips për kontributin e tij të jashtëzakonshëm në avancimin e partneritetit strategjik mes Kosovës dhe Shteteve të Bashkuara të Amerikës, si dhe për përpjekjet e vazhdueshme për të promovuar paqen, stabilitetin dhe zhvillimin në Kosovë.
Duke i bërë nder, Rektori Hajrizi e përshkroi David Phillips si një figurë jashtëzakonisht të rëndësishme në skenën ndërkombëtare, një diplomat dhe studiues i njohur për kontributin e tij të shquar në shumë fusha, sidomos në politikën ndërkombëtare dhe në promovimin e vlerave demokratike dhe të drejtave të njeriut.
Po kështu, më 17 shkurt, UBT nderoi me Çmimin Tradicional Honor Degree “Leadership Excellence Award”, Dr. Ernesto Madeo, kryetarin e Bashkisë së Shën Mitër Koronës (San Demetrio Corone), njëherit kryetar i Fondacionit të Institutit Rajonal të Komunitetit Arbëresh të Kalabrisë.
Në një ceremoni solemne, Rektori i UBT-së, Prof. Dr. Edmond Hajrizi ndau çmimin “Leadership Excellence Award”, për Dr. Ernesto Madeo, për të vlerësuar kontributin e tij dhënë në ruajtjen e traditës, të kulturës, të gjuhës dhe të identitetit kombëtar shqiptar, me theks të veçantë në Kalabri, por edhe ndër gjithë arbëreshët e Italisë.
Në dhjetor të vitit 2023, në bazë të vendimit të Këshillit Akademik, Presidenti i UBT-së, Prof. Dr. Edmond Hajrizi, ndau çmimin e nderit “Leadership Excellence Award”, për ish-presidentin e Republikës së Bullgarisë, Rosen Plevneliev.
Në fjalën e tij, Rektori Hajrizi falënderoi ish-presidentin Plevneliev për kontributin e tij, lidershipin e treguar në konsolidimin e brendshëm socio-ekonomik, si dhe në avancimin e shtetit të së drejtës.
“Kemi kënaqësinë të kemi sot, ish-presidentin e Republikës së Bullgarisë në Kosovë, në UBT, për t’i dhënë çmimin e nderit “Leadership Excellence Award”, gradën më të lartë që ka UBT. Ndarja e këtij çmimi për ish-presidentin Plevneliev është edhe një mesazh për të nderuar kontributin e tij të jashtëzakonshëm në avancimin e shtetit të së drejtës dhe lidershipin e treguar në konsolidimin e brendshëm socio-ekonomik”, tha Rektori Hajrizi.
“Nuk i harroj ndjesitë e mia të para në Kosovë. Janë kujtime shumë të mira dhe të jashtëzakonshme. Kosova gjithmonë ka qenë në zemrën time. Një popull aq i mrekullueshëm, punëtor, pozitiv. Unë vij gjithmonë këtu me zemrën plot. Dhe këtu ndihem si në shtëpi, e dua Kosovën. Ju falënderoj për nderimin me çmimin më të lartë universitar, dhe ju prezantoni institucioni më të mirë në Ballkan”, u shpreh Plevneliev.
Më 22 korrik 2023, UBT ndau çmimin “Leadership Excellence Award” për Dr. Judithanne Scourfiled Mclauchlan, në njohje të përkushtimit të saj në promovimin e shtetit të së drejtës dhe demokracisë.
Në ceremoni, Rektori Hajrizi vlerësoi lart kontributin e Dr. Judithanne Scourfiled Mclauchlanl në fushën e shkencave politike dhe për promovimin e vlerave demokratike dhe të angazhimit qytetar.
Dr. Judithanne Scourfield McLauchlan është profesoreshë e asociuar e Shkencave Politike dhe Drejtoreshë Themeluese e Qendrës për Përputhshmëri Qytetare në Universitetin e South Florida St. Petersburg, ku mëson lëndë të Qeverisjes Amerikane dhe Ligjit Publik.
Ndërsa më 19 maj 2023, UBT ndau çmimin Leadership Excellence Award për Damën e Luksemburgut, Tessy Antony de Nassau.
Këtë çmim rektori Hajrizi, i ndau Damës së Luksemburgut, Tessy Antony de Nassau për kontributin, përkushtimin dhe qëndrueshmërinë e madhe, si një avokate e zëshme për të drejtat e grave dhe një ambasadore e të drejtave të njeriut.
“Përkushtimi i Tessy Antony de Nassau për kauzat humanitare shërben si një motivim i madh, duke fuqizuar të drejtat e grave dhe fëmijëve, si dhe duke avokuar në barazitë shoqërore. Ne vendosëm të japim dhe të shpërblejmë me gradën e nderit – çmimin e ekselencës së lidershipit, si një mirënjohje ndaj angazhimit dhe punës së Dame Tessy Antony de Nassau në nisma të ndryshme sociale”, tha rektori Hajrizi.
Ndërsa, më 22 shkurt 2023, UBT dha Çmimin “Leadership Excellence Award” për Universitetet e Shqipërisë, për kontributin e pamohueshëm për krijimin e kuadrove profesioniste të Kosovës.
“Kontributi i Shqipërisë për arsimimin dhe edukimin e të rinjve nga Kosova është i pamohueshëm. Kujtojmë këtu vitin 1941, kur nga Shqipëria në Kosovë erdhën mbi 400 mësimdhënës dhe hapën shkolla shqipe e shpërndanë dituri, në një kohë kur analfabetizmi në Kosovë ishte shumë i lartë. Në kohët më të vështira, Universitetet e Shqipërisë përgatitën kuadro profesionale për Kosovën. Ky është një kontribut i paçmueshëm dhe që do të vlerësohet gjithmonë në Kosovë”, tha rektori Hajrizi.
Për këtë vlerësim të UBT-së, në emrin e universiteteve shqiptare, kryetari i Konferencës së rektorëve në Shqipëri, Artan Hoxha, u shpreh falënderues dhe mirënjohës ndaj UBT-së, duke theksuar nevojën e rritjes së bashkëpunimeve të reja në mes institucioneve arsimore në Kosovë dhe Shqipëri.
Ndërsa, në maj 2022, UBT ndau çmimin “Honor Degree – Leadership Excellence Award” për dy personalitetet e shquara, Christopher Hyland dhe Jim Xhema.
Në prani të shumë mysafirëve nga institucionet vendore dhe ndërkombëtare, përfaqësuesve të Rrjetit të Bizneseve të Diasporës Shqiptare, si dhe profesorëve dhe studentëve të UBT-së, rektori Hajrizi ndau këtë çmim për kontributin dhe përkrahjen e jashtëzakonshme dhënë popullit të Kosovës për liri dhe pavarësi, konsolidimin e miqësisë mes dy kombeve dhe shteteve, si dhe për ngritjen e vlerave shqiptare në Shtetet e Bashkuara të Amerikës.
“Kosova pati fatin që në ditët e vështira të kishte miq si Jim Xhema dhe Christopher Hyland, që i dhanë mbështetje të padiskutueshme aspiratës së kombit për liri, pavarësi dhe dinjitet kombëtar. Pjesë e rëndësishme e lidhjes mes Kosovës dhe Amerikës ishin zotëri Hyland dhe zotëri Xhema, të cilët me angazhimin e tyre kontribuuan që kjo miqësi të ishte e përhershme mes dy vendeve tona, e cila më vonë kulmoi me ndërhyrjen e NATO-s për lirinë e Kosovës, gjë që ishte e pamundur pa ndihmën e Shteteve të Bashkuara të Amerikës”, ka potencuar rektori Hajrizi.
Christopher Hyland është shprehur shumë i nderuar me vlerësimin që i ka bërë UBT dhe rektori Hajrizi, duke thënë se ndihet shumë i lumtur që sot Kosova ka institucionet të tilla të arsimit të lartë, që po nxjerrin gjenerata të reja, të cilat po kontribuojnë në zhvillimin e shtetit për të cilin ai ishte shumë i zëshëm për pavarësinë dhe lirinë e tij.
“Si universitet, UBT shërben si një pikëmbështetje e jashtëzakonshme e energjisë, duke ndërmarrë mijëra iniciativa, nga ku me anë të çdo të diplomuari kontributi i UBT-së është i lartë në secilën fushë. Kjo e bën të realizueshme angazhimin e secilit studentë në fushën e teknologjisë, inovacionit, shkencës, diasporës dhe në politikën e jashtme, kështu duke gjeneruar një shoqëri të begatë”, ka thënë Hyland.
Ndërsa, në dhjetor 2021, UBT nderoi kontributin e KFOR-it në Kosovë me çmimin “Excellence Leadership Award”.
Në motivacion thuhej se çmimi ndahet për kontributin e shquar në sigurimin e paqes dhe lirisë në vend, kjo falë edhe rezistencës dhe sakrificës së popullit shqiptar, si dhe kontributit të komunitetit ndërkombëtar, rolin gjatë vitit 1999 dhe këtej, mbështetjen e pareshtur të institucioneve të vendit dhe qytetarëve të saj, si dhe misionin human në Kosovë, UBT i ka ndarë çmimin “Excellence Leadership Award”, misionit paqeruajtës të NATO-s në Kosovë, KFOR.
Ndërsa, në dhjetor 2021, për kontributin dhe krijimtarinë e tij në kulturë, në ruajtjen dhe ngritjen e vlerave kombëtare, si dhe për veprimtarinë artistike, UBT i ka ndarë çmimin “Excellence Leadership Award”, kolosit të këngës së mirëfilltë shqipe, kantautorit Ilir Shaqiri.
Me këtë rast, rektori i UBT-së, Prof. Dr. Edmond Hajrizi, ka vlerësuar lartë veprën e kantautorit Shaqiri, duke thënë se përmes këngëve të tij është dhënë një kontribut i madh në promovimin e vlerave patriotike të kombit shqiptar.
Në dhjetor 2020, me çmimin “Excellence Leadership Award”, UBT nderoi drejtoreshën e Qendrës për Rehabilitimin e Viktimave të Torturës në Kosovë, Feride Rushiti.
Çmimi është ndarë nga rektori i UBT-së, Prof. Dr. Edmond Hajrizi, me rastin e 20-vjetorit të themelimit të UBT-së, dhe në kuadër të përmbylljes së vitit 2020. Ai tha se këtë çmim institucioni e jep për të nderuar personalitetet e ndryshme për kontributin e dhënë në sfera të ndryshme të jetës, sikurse Feride Rushiti.
Në shkurt 2020, me qëllim të vlerësimit të atributeve dhe ndihmës së dhënë Kosovës në aspektin akademik dhe jo vetëm, njëherësh respektimit të veprave të tij si profesor dhe si rektor, UBT ka vendosur ta nderojë rektorin e Universitetit “Fan S. Noli”, nga Korça, Ali Jashari, me çmimin “Excellence Leadership Award”.
Çmimi është ndarë nga rektori i UBT-së, Prof.Dr Edmond Hajrizi, me rastin e 12-vjetorit të Pavarësisë së Kosovës.
Profesori Jashari theksoi se ndjehet i nderuar me këtë çmim, ndonëse sipas tij, respekti i shprehur ndaj tij do të jetë një shtysë që ta mbajë edhe më të fuqishëm bashkëpunimin me UBT-në dhe Kosovën.
Ndërsa, në vitin 2018, UBT nderoi me Çmimin “Excellence Leadership Award” drejtoreshën e programeve për Evropë në Radion gjermane Deutsche Welle, për kontributin e saj të çmuar në fushën e gazetarisë, me theks të veçantë për ndikimin e saj në hapjen e shërbimit në gjuhën shqipe në Deutsche Welle.
Një vit më herët, më 25 tetor 2017, UBT nderoi me Çmimin “Excellence Leadership Award”, z. Jamie Shae.
“Suksesi me i madh për mua nuk është pavarësimi, por momenti kur pavarësimi të arrihet në tërësi, me integrimin e plotë të Kosovës në institucionet dhe ky është një proces i pandalshëm për Kosovën. Kosova ka potencial të madh, por ky potencial është i pashfrytëzueshëm nëse nuk e zhvilloni tutje, sepse e ardhmja është edhe në duart tuaja”.
Këtë mesazh dhe porosi e dha Zëvendësndihmës Sekretari i Përgjithshëm për Sfidat në Ardhje të Sigurisë në shtabin e NATO-s, njëherësh ish-zëdhënës i NATO-së gjatë bombardimeve të vitit 1999, në Kosovë, dr Jamie Shae, me rastin e mbajtjes së konferencës: “E ardhmja euroatlantike e Kosovës”, të organizuar nga UBT, me ç’rast edhe nga rektori i UBT-së, Prof. Dr Edmond Hajrizi, iu nda Çmimi “Excellence Leadership Award”, çmim me të cilin UBT nderon personalitet më të njohura vendore e ndërkombëtare për kontributin e tyre në sfera të ndryshme të jetës.
Po këtë vit, UBT e nderon me çmimin “Excellence Leadership Award”, selektorin e reprezentacionit të xhudos së Kosovës, Driton Kuka.
Ndë, më 14 dhjeto 2017, Çmimi “Excellence Leadeship Award” iu nda profesoreshës së Universitetit të Floridës së Veriut dhe ish-togeres së Trupës së Infermierëve në Ushtrinë Amerikane, Linda Connelly.
Ajo u nderua me këtë çmim për hir të kontributit të dhënë për UBT-në dhe studentët e këtij institucioni dhe për të nderuar personalitetin dhe kontributin e saj jetësor në profesionin e infermierisë.
Connelly tha se ndjehet e nderuar dhe e lumtur për marrjen e këtij çmimi dhe se i tërë ky respekt i shprehur ndaj saj do të jetë një shtysë që ta mbajë edhe më të fuqishëm bashkëpunimin me UBT-në dhe Kosovën.
Ndërsa, në vitin 2016, UBT e nderoi me “Excellence Leadership Award” humanisten austriake, Dr. Marianne Graf.
Dr. Graf, pos aktiviteteve të shumta në Kosovë, ka treguar lidership edhe për ndihmën ndaj komuniteteve të tjera në nevojë. Qysh në vitin 1992, duke parë varfërinë në Shqipëri dhe duke dashur t’i ndihmojë njerëzit atje, bashkë me bashkëshortin e saj, Wilhelm Graf, ka themeluar shoqatën e partneritetit, Shqipëri-Austri.
Ka zhvilluar mbi 100 projekte, si ndërtimi i shkollave, ambulancave shëndetësore, kopshteve të fëmijëve, banesave sociale, qendrave të edukimit, urave etj. Në Shqipëri ka shpërndarë mbi 30 mijë paketa familjare, veshmbathje e ushqime, për familjet e varfra.
Çmimet ndërkombëtare të UBT-së, një traditë mirënjohjeje e repsekti
Gol emocionues i Dembele, dedikim për Jota pas humbjes tragjike
Dështoi edhe tentimi i 42-të, Kuvendi ende pa kryeparlamentar
Gashi: Kryetari i Kuvendit duhet të zgjidhet me votim të hapur
Çitaku: Edhe më të rrezikshme se kërcënimi me bombë janë prirjet totalitare të LVV-së
Jamal Musiala pëson lëndim të rëndë në ndeshjen Bayern – PSG
Haradinaj reagon për deklaratën e Bekë Berishës: Do ta shohim kur të vijë momenti
Zemaj: Besojmë që VV do të gjejë mirëkuptimin për zgjedhjen e kryetarit të Kuvendit
Bogujevci: Votimi është obligim, opozita nuk duhet ta bllokojë procesin
-
Lajmet nga UBT2 months agoProfesori, Arsim Hajdari, doktoron me temën “New Perspective of Biological Therapy in Treatment of Age-Related Macular Degeneration”
-
Lajmet3 months agoStudentët e Psikologjisë në UBT zhvilluan një vizitë studimore në qendrën psikologjike “Radix” dhe Asociacionin Kosovar për Psikoterapi Trupore
-
Lajmet nga UBT4 weeks agoUBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT1 month agoUBT – Institucioni privat me më së shumti programe të akredituara nga Agjencia e Akreditimit të Kosovës