Aktorja Anne Hathaway ka folur për rikthimin e saj në një film të regjisorit Christopher Nolan, plot 12 vjet pas bashkëpunimit të fundit në “Interstellar”.

Gjatë promovimit të filmit “The Odyssey”, Hathaway tha se Nolan ka mbetur po aq i përkushtuar dhe i përgatitur sa gjithmonë, duke vlerësuar profesionalizmin dhe respektin e tij ndaj ekipit.

“Chris është një njeri jashtëzakonisht i qëndrueshëm. Mënyra se si i qaset punës, përgatitja dhe kujdesi për çdo detaj nuk kanë ndryshuar aspak,” u shpreh aktorja.

Megjithatë, ajo pranoi se ndryshimi më i madh ka ndodhur tek vetja, duke theksuar se është rritur si artiste dhe si njeri që nga bashkëpunimet e tyre në “The Dark Knight Rises” dhe “Interstellar”.

Hathaway e cilësoi atmosferën në sheshet e xhirimit të Nolan si të pakrahasueshme.

“Nuk ka asgjë tjetër si kjo. Të duket sikur po kthehesh në shtëpi, sepse ai është në kulmin e asaj që bën,” tha ajo.

Nga ana e tij, Christopher Nolan u shpreh i lumtur që Hathaway iu bashkua sërish projektit, duke vlerësuar përkushtimin e saj gjatë xhirimeve.

Në filmin “The Odyssey”, Hathaway interpreton Penelopën, ndërsa Matt Damon luan rolin e Odiseut. Aktorja tha se e ndërtoi personazhin duke u fokusuar te dashuria e thellë dhe besnikëria e Penelopës ndaj bashkëshortit të saj.

Sipas saj, historia e çiftit legjendar nuk flet vetëm për pritjen, por për një dashuri të rrallë që i reziston kohës dhe largësisë./A.K/

Filmi më i ri i regjisorit fitues të çmimit “Oscar”, Christopher Nolan, “The Odyssey”, ka marrë vlerësime të jashtëzakonshme nga kritika ndërkombëtare, vetëm pak para premierës së tij zyrtare.

I bazuar në poemën epike të Homerit, filmi është projekti i parë i Nolanit pas suksesit të “Oppenheimer”, i cili fitoi çmimin “Oscar” për filmin më të mirë në vitin 2023.

Kritikët nuk kanë kursyer lëvdatat. The Telegraph e ka cilësuar “filmin e vitit”, The Times e përshkroi si “një kryevepër në çdo aspekt”, ndërsa Metro shkroi se filmi “do ta ndryshojë kinemanë përgjithmonë”. Edhe The Standard e cilësoi atë si “një vepër kolosale kinematografike”.

Në rolet kryesore interpretojnë Matt Damon, Zendaya, Tom Holland, Robert Pattinson, Anne Hathaway, Charlize Theron dhe Lupita Nyong’o.

Filmi ndjek rrugëtimin e Odiseut (Matt Damon), mbretit të Itakës, në përpjekjen për t’u kthyer në shtëpi pas Luftës së Trojës dhe për t’u ribashkuar me bashkëshorten dhe djalin e tij. Gjatë udhëtimit ai përballet me krijesa mitologjike dhe sfida të shumta, ndërsa rivali Antinous synon të marrë fronin dhe zemrën e mbretëreshës.

Sipas kritikëve, “The Odyssey” sjell skena spektakolare dhe një vizion ambicioz që e vendos filmin mes produksioneve më të vlerësuara të viteve të fundit. Filmi pritet të dalë në kinematë e Mbretërisë së Bashkuar të premten./A.K/

Këngëtarja me famë botërore, Dua Lipa, ka shprehur mbështetjen e saj për protestat në Shqipëri kundër projektit luksoz të zhvillimit turistik në ishullin e Sazanit dhe gadishullin e Zvërnecit, të mbështetur nga Ivanka Trump dhe Jared Kushner.

Në episodin më të fundit të podcastit të saj Service95 Book Club, Dua Lipa e cilësoi si shqetësues vendimin e qeverisë shqiptare për të ndryshuar ligjin që mbronte zonat e ndjeshme mjedisore, pa konsultim publik.

“Ajo që më shqetëson është parimi që qeveria mund ta ndryshojë ligjin për të hequr mbrojtjen mjedisore pa asnjë lloj konsultimi publik”, u shpreh artistja.

Protestat, të cilat kanë zgjatur më shumë se gjashtë javë dhe janë quajtur “Revolucioni i Flamingove”, kundërshtojnë projektin prej rreth 1,400 hektarësh në ishullin e Sazanit dhe investimin prej 4.7 miliardë dollarësh që parashikon ndërtimin e 10 mijë vilave në gadishullin e Zvërnecit.

Organizatat mjedisore kanë ngritur shqetësime se punimet kanë nisur para përfundimit të procedurave ligjore dhe pa një vlerësim të plotë të ndikimit në mjedis.

Nga ana tjetër, Qeveria e Shqipërisë e konsideron projektin si një investim strategjik që synon të nxisë turizmin dhe të mbështesë rrugën e vendit drejt anëtarësimit në Bashkimin Evropian./A.K/

Këngëtarja shqiptare me famë botërore, Dua Lipa, ka publikuar episodin e plotë të podcastit Service95 Book Club, ku zhvillon një bisedë me autoren dhe akademiken shqiptare Lea Ypi për librin e saj të vlerësuar ndërkombëtarisht “Free”, i cili është përzgjedhur si leximi i muajit korrik.

Duke prezantuar librin, Dua Lipa kujtoi se Lea Ypi ishte vetëm 11 vjeçe kur ra komunizmi në Shqipëri dhe se në fëmijëri ajo e kishte parë figurën e liderëve të regjimit përmes këndvështrimit të një fëmije, me një besim të plotë ndaj sistemit të kohës.

Libri “Free” sjell historinë e një Shqipërie të izoluar politikisht, përmes kujtimeve të Ypit nga fëmijëria dhe periudha e tranzicionit pas rënies së komunizmit. Në rrëfim përfshihen edhe momente simbolike të jetës së përditshme, si historia e një kanaçeje Coca-Cola, e cila në atë kohë shihej si një simbol i rrallë i Perëndimit.

Megjithatë, vepra nuk fokusohet vetëm në kujtimet e fëmijërisë, por edhe në sfidat që solli periudha e pas-komunizmit: mbylljen e fabrikave, humbjen e vendeve të punës, ndarjet familjare dhe trazirat shoqërore të tranzicionit.

Gjatë bisedës në podcast, Dua Lipa dhe Lea Ypi trajtojnë tema si historitë familjare të pathëna, mbikëqyrja shtetërore, protestat, ndryshimet politike dhe ndikimi i sistemeve shoqërore në jetën e njerëzve.

“Free më zbuloi gjëra për një vend që e njoh dhe e dua shumë. Historia është kaq e afërt, por përvoja e jetuar ka ndryshuar kaq shumë brenda vetëm një brezi”, ka shkruar Dua Lipa.

Përzgjedhja e librit “Free” në Service95 Book Club ka rikthyer vëmendjen ndërkombëtare te një rrëfim shqiptar që përmes historisë personale ngre një pyetje universale: çfarë do të thotë në të vërtetë të jesh i lirë?/A.K/