Edhe sot në Dhomat e Specializuara të Kosovës në Hagë, po vazhdon procesi i gjykimit ndaj ish-krerëve të UÇK-së, Hashim Thaçit, Kadri Veselit, Jakup Krasniqit e Rexhep Selimit.

Sipas DhSK-së, seanca nis nga ora 09:00, teksa parashihet të vazhdojë deri pasdite, në ora 16:30.

Procesi zgjedhor në Kosovë po hyn në një fazë vendimtare, pasi sot (e martë) nis numërimi i votave për kandidatët për deputetë. Komisioni Qendror i Zgjedhjeve (KQZ) ka njoftuar se pas përfundimit të numërimit të votave për subjektet politike, tani fokusi zhvendoset tek votat individuale të kandidatëve për Kuvendin e Kosovës.

Sipas KQZ-së, ky proces përfshin verifikimin dhe përpunimin e të dhënave në përputhje me Rregulloren Zgjedhore për Qendrat Komunale të Numërimit. Gjithashtu, pas numërimit të votave për kandidatët, do të nisë edhe përpunimi i votave nga diaspora, votave me kusht dhe atyre të personave me aftësi të kufizuara.

Deri më tani, KQZ-ja ka procesuar 99.17% të vendvotimeve. Nga 2,533 vendvotime në të gjithë Kosovën, janë numëruar 2,512, duke ofruar një pasqyrë të qartë të rezultateve preliminare.

Nga rezultatet e deritanishme të publikuara nga KQZ-ja, Lëvizja Vetëvendosje kryeson me 40.83% të votave, duke konfirmuar një epërsi të konsiderueshme ndaj rivalëve të saj politikë. Në vend të dytë radhitet Partia Demokratike e Kosovës (PDK) me 22.15%, ndërsa Lidhja Demokratike e Kosovës (LDK) mban vendin e tretë me 17.59% të votave.

Koalicioni AAK-Nisma-Konservatorët-Intelektualët ka siguruar 7.47% të votave, ndërsa Lista Serbe ka marrë 4.43%. Nga ana tjetër, Koalicioni për Familjen ka arritur të sigurojë 2.26% të votave.

Vlen të theksohet se këto rezultate janë ende preliminare, pasi në to nuk janë përfshirë votat me kusht, votat e personave me aftësi të kufizuara dhe votat e diasporës. Këto kategori votash mund të sjellin ndryshime në përbërjen përfundimtare të Kuvendit të Kosovës, veçanërisht në raport me shpërndarjen e mandateve individuale për kandidatët që synojnë ulëse në parlament.

KQZ-ja ka bërë thirrje për durim dhe mirëkuptim, duke theksuar se procesi i numërimit dhe verifikimit do të kryhet me transparencë të plotë dhe në përputhje me standardet demokratike.

Zhvillimet e mëtejshme priten në orët dhe ditët në vijim, teksa procesi i numërimit të votave të kandidatëve do të japë një pasqyrë më të qartë për përfaqësimin në Kuvendin e Kosovës./UBTNews/

Komisioni Qendror i Zgjedhjeve (KQZ) sot në Qendrat Komunale të Numërimit, do të fillojë procesin e numërimit të votave të kandidatëve për deputetë.

Valmir Elezi, zëdhënës i KQZ-së, tha se gjatë këtij procesi, ashtu siç parashihet edhe me Rregulloren Zgjedhore të KQZ-së 16/2024 për Qendrat Komunale të Numërimit, do të bëhet verifikimi i rezultateve të subjekteve politike.

“Pas përfundimit të këtyre procedurave, numërimit të votave jashtë Kosovës, votave me kusht, votave të personave me nevoja të veçanta dhe aspekteve tjera që parashihen me Ligjin për Zgjedhjet e Përgjithshme, KQZ do shpall rezultatet përfundimtare për subjektet politike dhe kandidatët për deputetë”, tha Elezi për EO.

Ka përfunduar numërimi i të gjitha votave në vendvotimet e kryeqytetit.

Sipas rezultateve preliminare nga Komisioni Qendror i Zgjedhjeve, në Prishtinë parti e parë është Lëvizja Vetëvendosje me 54.696 vota apo 46.91 për qind.

Në vendin e dytë është Lidhja Demokratike e Kosovës me 25.63% apo 29,889 të votave.

Ndërsa PDK radhitet e treta me 18.29% apo 21,326 vota.