Barcelona dhe Bayern Munichu kanë shprehur interesim për mesfushorin e ri zviceran, Johan Manzambi, i cili po tërheq vëmendjen me paraqitjet e tij te Aston Villa, raporton gazeta spanjolle Marca.

Futbollisti 21-vjeçar është vënë në radarët e disa prej klubeve më të mëdha evropiane, ndërsa skautët po e përcjellin nga afër zhvillimin dhe potencialin e tij.

“E dimë se skautët e disa prej klubeve më të mëdha evropiane janë impresionuar nga paraqitjet e Manzambit, me disa prej tyre që e konsiderojnë një superyll të së ardhmes”, ka deklaruar gazetari Graeme Bailey për TEAMtalk.

I lindur në Gjenevë në vitin 2005, Manzambi përfaqëson Zvicrën në arenën ndërkombëtare dhe dallohet për aftësitë teknike, depërtimet me top dhe krijimin e rasteve për shënim.

Bayern Munichu kishte nisur ta përcillte mesfushorin që gjatë periudhës së tij te Freiburgu, ku regjistroi shtatë gola dhe nëntë asistime në 47 paraqitje.

Sipas raportimeve, pas transferimit te Aston Villa për 60 milionë euro, Manzambi ka vazhduar me paraqitje të mira nën drejtimin e trajnerit Unai Emery, duke kontribuar me gola ose asistime në ndeshjet e zhvilluara.

Mesfushori zviceran është dalluar edhe në arenën ndërkombëtare, ku, sipas raportimit, realizoi tre gola dhe dy asistime në katër ndeshje të Kupës së Botës, përpara se një lëndim ta pengonte të vazhdonte garën.

Interesimi i Barcelonës dhe Bayern Munichut pritet ta vendosë Manzambin në qendër të vëmendjes gjatë afatit të ardhshëm kalimtar, ndërsa mbetet të shihet nëse ndonjëri prej klubeve do të ndërmarrë hapa konkretë për transferimin e tij.

Presidenti i Barcelonës, Joan Laporta, ka vlerësuar përballjen mes Paris Saint-Germainit dhe Barcelonës si një nga ndeshjet më të rëndësishme të futbollit evropian, duke theksuar se vëmendja e skuadrës duhet të jetë plotësisht te kjo sfidë.

Pavarësisht afrimit të përballjes me Real Madridin në kampionatin spanjoll, Laporta ka bërë të qartë se prioritet mbetet ndeshja ndaj kampionit francez.

“Gjëja më e rëndësishme është ndeshja e radhës. Për momentin, mendoj se kjo është ndeshja më e mirë që mund të luhet në Evropë”, deklaroi Laporta.

I pyetur nëse këtë përballje e konsideron edhe më të mirën në botë, presidenti i katalanasve u përgjigj pozitivisht, duke vlerësuar cilësinë e të dy skuadrave.

Sipas tij, talenti i futbollistëve, cilësitë individuale dhe prania e dy trajnerëve të nivelit të lartë e bëjnë këtë takim një spektakël të veçantë futbollistik.

Laporta foli gjithashtu për mungesat në repartin mbrojtës të Barcelonës, duke shprehur besim te trajneri Hansi Flick dhe mundësitë e skuadrës për t’i përballuar ato.

“Kjo ndodh gjithmonë dhe nuk ka justifikime. Të dyja ekipet kanë skuadra mjaftueshëm të forta për të kompensuar këto pengesa”, theksoi ai.

Presidenti i Barcelonës nënvizoi se mungesat e lojtarëve të rëndësishëm nuk duhet të shërbejnë si arsyetim për rezultatin, pasi beson në aftësinë e trajnerit për ta përshtatur skuadrën.

“Sot do të shohim ndeshjen më të mirë në botë. Është një ditë për të shijuar futbollin”, përfundoi Laporta.

D.L

Sulmuesi shqiptar Ernest Muçi është shprehur i kënaqur me fitoren e Trabzonsporit ndaj Beshiktashit, duke vlerësuar rëndësinë e tri pikëve dhe potencialin e skuadrës për këtë sezon.

Trabzonspori triumfoi të hënën mbrëma me rezultatin 2:0 ndaj Beshiktashit, në ndeshjen e vlefshme për xhiron e tetë të Superligës së Turqisë.

Muçi theksoi se fitorja në shtëpi, para tifozëve të skuadrës, kishte rëndësi të veçantë, duke pasur parasysh forcën e kundërshtarit.

“Jam i lumtur që fituam këtë ndeshje në shtëpi, para tifozëve tanë”, deklaroi Muçi.

Sulmuesi 25-vjeçar shprehu besimin se Trabzonspori ka potencialin për të arritur objektiva të mëdha gjatë këtij edicioni.

“Çdo ndeshje është një mundësi e veçantë për ne. Megjithatë, besoj se kemi një ekip që do të arrijë suksese të mëdha këtë vit”, u shpreh ai, raportojnë mediumet turke.

Muçi është një prej futbollistëve të rëndësishëm të Trabzonsporit, ku këtë edicion ka regjistruar dy gola dhe tri asistime në dhjetë ndeshje të zhvilluara në të gjitha garat.

D.L

Erik ten Hag ka deklaruar se Cristiano Ronaldo e zhgënjeu ekipin dhe atë personalisht gjatë periudhës kur të dy punonin te Manchester Unitedi. Trajneri holandez ka folur gjithashtu për premtimet e parealizuara nga drejtuesit e klubit, të cilat, sipas tij, ndikuan në largimin e tij në tetor të vitit 2024.

Ronaldo u rikthye te Manchester Unitedi në gusht të vitit 2021, ndërsa Ten Hag mori drejtimin e skuadrës një vit më vonë, duke pasuar Ole Gunnar Solskjaerin.

Megjithatë, marrëdhënia mes tyre u përkeqësua brenda një kohe të shkurtër. Në tetor të vitit 2022, portugezi refuzoi të futej në lojë si zëvendësues në fitoren ndaj Tottenhamit, ndërsa më vonë kritikoi publikisht klubin në një intervistë televizive. Si pasojë, kontrata e tij u ndërpre me marrëveshje të dyanshme në nëntor të po atij viti.

Në një intervistë për gazetën The Athletic, pjesë të së cilës i kanë publikuar disa mediume angleze, Ten Hag shpjegoi arsyet që e shtynë të merrte vendime të vështira për sulmuesin portugez.

“Ai e zhgënjeu ekipin dhe më zhgënjeu edhe mua, pasi kishim bërë plane duke llogaritur në të”, deklaroi Ten Hag.

“Ai është një nga më të mirët në historinë e futbollit. E kam respektuar shumë. Por në atë kohë, si trajner, duhej të merrja një vendim racional dhe të mbaja lojtarët që vlerësoja”, shtoi holandezi.

Ten Hag tregoi gjithashtu se Ronaldo nuk e kishte përfunduar vrapimin e plotë të kërkuar nga lojtarët pas humbjes 4:0 ndaj Brentfordit, në fillim të periudhës së tij si trajner i Unitedit.

“E vura përballë këtij fakti. Shpesh i thosha: ‘Ronnie, të gjithë duan të punojnë për ty, të të vendosin në pozitën e duhur, por nëse nuk arrin të futesh vetë në zonën e rreptësisë, nuk mund të shënosh’”, rrëfeu ai.

Përveç marrëdhënies me Ronaldon, Ten Hag foli edhe për pakënaqësitë e tij ndaj drejtuesve të Manchester Unitedit. Holandezi u shkarkua në tetor të vitit 2024, vetëm pesë muaj pasi kishte fituar Kupën FA dhe kishte nënshkruar vazhdimin e kontratës.

Sipas tij, drejtuesit e klubit nuk i përmbushën zotimet për besnikëri, mbështetje dhe komunikim. Një nga vendimet që e zhgënjeu më shumë ishte shitja e mesfushorit Scott McTominay te Napoli, pavarësisht kundërshtimit të trajnerit.

“Më premtuan besnikëri, më premtuan mbështetje, më premtuan komunikim që të jemi në të njëjtën linjë. Diskutuam për çështjet në fjalë. Por premtimet nuk i mbajtën. Unë thashë: ‘Scott McTominay nuk shitet’. E në fund e shitën. Natyrisht, isha shumë i zhgënjyer”, përfundoi Ten Hag.

D.L