Lajmet

Ibrahimi: Mjetet për investime kapitale do të shkojnë për zbatim të kontratës kolektive, komunat dëmtohen miliona euro

Ibrahimi ka thënë se nëse zbatohet ky mendim juridik, komunat e vogla dhe të mesme do të dëmtohen tej mase.

Published

3 years ago

on

Drejtori i Asociacionit të Komunave të Kosovës, Sazan Ibrahimi, ka thënë se vendimi i Gjykatës Supreme do t’i dëmtojë komunat me dhjetëra miliona euro. Sipas mendimit juridik të dhënë në tetor të këtij viti, komunat detyrohen t’i kompensojë mësimdhënësit mbi bazën e kualifikimit (licencimit), për kompensim sipas inflacionit dhe periudha kohore në të cilën zbatohet Kontrata Kolektive e Arsimit në Kosove.

Ibrahimi ka thënë se nëse zbatohet ky mendim juridik, komunat e vogla dhe të mesme do të dëmtohen tej mase, pasi mjetet e dedikuara për investime kapitale do të merren nga Thesari i Shtetit për këtë vendim.

Krahas dëmtimit për investime kapitale, Ibrahimi ka thënë se komunat nuk do të mund të garojnë më për skemën e Grantit të Përformancës.

“Në takimin e fundit të Këshillit të Kryetarëve që u mbajt para disa ditëve, një nga temat kryesore dhe një nga brengat kryesore të komunave ishte edhe mendimi juridik i dhënë nga Gjykata Supreme në muajin tetor të këtij viti. Nëse zbatohet ky mendim juridik, disa komuna do të gjinden para kolapsit total sepse nëse zbatohet ky mendim juridik, komunave padrejtësisht do u merren mjetet financiare nga investimet kapitale për zbatimin e këtij vendimi që ka thënë se ‘mësimdhënësit duhet të kompensohen sa i përket licencimit dhe inflacionit’ për periudhën gjatë viteve 2021-22”, ka thënë Ibrahimi.

Ibrahimi ka thënë se nënshkrues të kontratave kolektive janë niveli qendror dhe sindikata dhe se kjo barrë nuk duhet t’i vihet komunave.

“Në bazë të shënimeve të Asociacionit që jemi duke i grumbulluar nga drejtorët financiarë komunalë, del që me dhjetëra miliona euro do të merren komunave dhe zakonisht në zbatimin e kontratave kolektive e cila ka ndodhur me nënshkrimin e nivelit qendror me sindikatat përkatëse, në kurriz të komunave do të dëmtohen me dhjetëra miliona euro, e sidomos komunat e mesme dhe të vogla do të pësojnë më së shumti sepse nëse në një komunë të mesme apo të vogël do t’i merren me qindra mijëra euro apo miliona euro, atëherë nuk do të kenë mundësi të kenë mjete financiare për zbatimin e projekteve kapitale”, u shpreh Ibrahimi.

Duke folur për këtë vendim të Supremes, Ibrahimi ka thënë se komunat do të kenë mendim kritik edhe nga auditori i përgjithshëm, pasi nuk kanë qenë nënshkrues të kontratës kolektive.

“Komuna po dëmtohen drejtpërdrejtë duke u marrë mjetet financiare padrejtësisht nga investimet kapitale. Komunat përveç që nuk do të kenë mundësi që të zbatojnë projekte kapitale, gjithashtu do të kenë mendimin kritik edhe nga auditori i përgjithshëm sepse komunat nuk kanë qenë nënshkruese të kontratave kolektive dhe me automatizëm auditori i përgjithshëm po konstaton se këto mjete po i merren komunave pa nënshkrimin e tyre. Pra do të kemi mungesë të investimeve kapitale në komunat e Kosovës dhe komunat do të kritikohen përse po i merren këto mjete financiare edhe pse e kemi potencuar si dhe disa komuna nuk do të mund të garojnë për skemën e Grantit të Përformancës sepse nuk do të kenë investime kapitale në nivelin e kërkuar”, ka thënë tutje Ibrahimi.

Kritika për këtë vendim ka edhe për mosqartësim të këtij vendimi të Gjykatës Supreme. Ai konsideron se ky institucion ka kërkuar zbatim e duke mos e qartësuar se kush duhet ta bëjë këtë vendim.

“Gjykata Supreme ka thënë se kjo duhet të zbatohet por nuk janë qartësuar se kush duhet ta zbatojë, mirëpo logjikisht nënshkruesit e kontratës duhet ta marrin edhe përgjegjësinë. Këtë kontratë e ka nënshkruar niveli qendror dhe barrën financiare duhet ta marrë niveli qendror e jo kjo të zbatohet në kurriz të komunave sepse po shkakton dëme kolaterale. Do të ketë mungesë të investimeve kapitale dhe në disa komuna nuk do të ketë investime të reja kapitale dhe tash shto edhe barrën e zbatimit të këtij vendimi, atëherë komunat e mesme dhe të vogla do të gjenden në një situatë të palakueshme”, u shpreh Ibrahimi.

Related Topics:
Continue Reading

lajme

Shkarkohet Blerim Isufaj nga posti i Kryeprokurorit të Prokurorisë Speciale

Published

2 hours ago

on

October 2, 2026

By

Kryeprokurori i Prokurorisë Speciale, Blerim Isufaj, është shkarkuar të premten nga Këshilli Prokurorial i Kosovës (KPK), ka mësuar KOHA.

Gjatë ditës ishte bërë e ditur se KPK-ja do të mblidhej në një takim të jashtëzakonshëm, ku në rend dite ishte diskutimi për performancën e Isufajt.

Isufaj ishte zgjedhur për herë të parë në krye të Prokurorisë Speciale në vitin 2019, ndërsa ishte rizgjedhur në këtë pozitë në vitin 2023.

Gjatë mandatit të tij, Isufaj ka qenë një prej figurave më të kritikuara në sistemin prokurorial nga Lëvizja Vetëvendosje. Ai ishte votuar edhe nga Këshilli Prokurorial për pozitën e Kryeprokurorit të Shtetit, por procesi kishte mbetur pezull dhe nuk ishte dekretuar nga ish-presidentja Vjosa Osmani.

Kryeministri Albin Kurti kishte deklaruar më herët se në sistemin prokurorial “shumica e problemeve kanë emër të përveçëm”, duke iu referuar Isufajt.

Më 2 shtator, Isufaj pati një përplasje me disa anëtarë të Këshillit Prokurorial të Kosovës. Përplasjet u zhvilluan gjatë shqyrtimit të raportit të punës së Prokurorisë Speciale për vitin 2025, i cili më pas u rrëzua nga KPK-ja.

D.L

Continue Reading

Aktualitet

Nis takimi mes Kurtit dhe Hamzës

Published

2 hours ago

on

October 2, 2026

By

Ka nisur takimi mes kryeministrit Albin Kurti dhe kryetarit të Partisë Demokratike të Kosovës (PDK), Bedri Hamza.

Në takim pritet të diskutohen çështja e zgjedhjes së presidentit të ri dhe ndryshimet e mundshme në Ligjin për Dhomat e Specializuara të Kosovës.

Hamza është parë duke hyrë në objektin e Qeverisë i shoqëruar nga deputeti i PDK-së, Rrahman Rama.

Kuvendi i Kosovës ka afat deri më 6 tetor për zgjedhjen e presidentit të ri. Nëse presidenti nuk zgjidhet brenda këtij afati, vendi shkon në zgjedhje të reja.

D.L

Continue Reading

lajme

“Jo në emrin tim” para Ministrisë së Drejtësisë “Voto Ligjin”, kërkohet miratimi i ligjit për mbrojtjen e UÇK-së

Published

3 hours ago

on

October 2, 2026

By

Protestuesit e iniciativës “Jo në emrin tim” kanë zhvilluar sot një aksion simbolik para Ministrisë së Drejtësisë, ku kanë vendosur një baner me mbishkrimin “Voto Ligjin”, duke kërkuar procedimin dhe miratimin e ligjit për mbrojtjen e UÇK-së.

Aktivisti Rron Kafegjolli deklaroi se qytetarët prej 17 ditësh po kërkojnë miratimin e këtij ligji, duke e cilësuar vonesën si të papranueshme.

Sipas Kafegjollit, bazuar në deklarimet e kryeministrit Albin Kurti, ligji po mbahet i bllokuar në Ministrinë e Drejtësisë dhe Ministrinë e Financave.

“Ky nuk është një udhëzim çfarëdo që mund ta kaloni lart e poshtë nëpër zyra. Sepse bëhet fjalë për ligjin që mbron të vërtetën e UÇK-së dhe ne nuk do të lejojmë zvarritjen e tij”, u shpreh ai.

Kafegjolli kritikoi ministren Donika Gërvalla dhe ministrin Hekuran Murati, duke kërkuar nga institucionet që të veprojnë në përputhje me kërkesat e qytetarëve.

“Institucionet e këtij shteti nuk mund të mbeten peng i inateve apo bindjeve personale të ministres Gërvalla dhe ministrit Murati. Shteti nuk është pronë private e dikujt”, tha Kafegjolli.

Duke iu referuar afatit për zgjedhjen e presidentit, i cili skadon më 6 tetor, ai i bëri thirrje Qeverisë që të mos e zvarrisë më tej procesin e miratimit të ligjit.

“Qeveria duhet ta dijë se rinia po ju vëzhgon dhe 6 tetori po afron me shpejtësi. Mos e provokoni durimin tonë”, deklaroi ai.

Kafegjolli e përmbylli fjalimin duke i bërë thirrje Qeverisë që ta dëgjojë zërin e protestuesve dhe të veprojë lidhur me kërkesën për miratimin e ligjit.

D.L

Continue Reading

Lajmet

Master në Gjuhë, Media dhe Komunikim në UBT: Formimi profesional për liderët e së ardhmes

Published

3 hours ago

on

October 2, 2026

By

Në një epokë ku media dhe komunikimi po transformohen me ritme të shpejta, profesionistët e së ardhmes kanë nevojë për njohuri të avancuara, mendim kritik dhe aftësi praktike.

Pikërisht për këtë, UBT ofron programin Master në Gjuhë, Media dhe Komunikim, të konceptuar për të përgatitur profesionistë të aftë për të udhëhequr në sektorin e medias, komunikimit dhe marrëdhënieve me publikun.

Programi Master në Gjuhë, Media dhe Komunikim ndërthur në mënyrë strategjike shkencat sociale, teknologjinë e informacionit, gazetarinë, Marrëdhëniet me Publikun (PR) dhe krijimin e përmbajtjes digjitale.

Përmes kombinimit të njohurive teorike me përvojën praktike dhe hulumtimin shkencor, studentët zhvillojnë kompetenca të avancuara për t’u përballur me kërkesat e tregut modern të punës, si në Kosovë ashtu edhe në tregun global.

Një rëndësi e veçantë i kushtohet etikës profesionale, mendimit kritik dhe aftësisë për të analizuar, interpretuar dhe menaxhuar komunikimin dhe imazhin e institucioneve dhe organizatave.

Kjo e bën programin një mundësi të përshtatshme për të gjithë ata që synojnë të avancojnë profesionalisht në media, gazetari, komunikim strategjik, PR, marketing dhe përmbajtje digjitale.

Përveç mundësisë për të ndjekur një program Master të orientuar drejt zhvillimit profesional, UBT ofron edhe një mbështetje të rëndësishme financiare për studentët. Përmes bursës Engaged Scholarship, studentet që janë pjesë e kësaj fushe përfitojnë 20% zbritje në tarifën e studimeve gjatë gjithë periudhës së programit Master.

Kjo bursë përfaqëson një mundësi konkrete për studentët që duan të investojnë në arsimimin e tyre të avancuar, duke pasur njëkohësisht mbështetje financiare gjatë gjithë rrugëtimit akademik.

Master në Gjuhë, Media dhe Komunikim në UBT është një mundësi për të zgjeruar njohuritë, për të zhvilluar kompetenca profesionale dhe për të ndërtuar bazat e një karriere të suksesshme në një sektor që ndryshon vazhdimisht.

Apliko në programin Gjuhë, Media dhe Komunikim -Master dhe përfito 20% bursë përmes Engaged Scholarship.

Continue Reading

Të kërkuara