Deri më tani, komitetit të Kongresit që hetonte sulmin e 6 janarit në Kapitol i mungonte një pjesë kyçe e enigmës – dëshmia e dikujt që mund të ofronte një përshkrim të dorës së parë të situatës në Shtëpinë e Bardhë në orët para dhe gjatë sulmit.

Cassidy Hutchinson, një ish ndihmëse e lartë e shefit të stafit të Shtëpisë së Bardhë, Mark Meadows, plotësoi boshllëqet. Ajo ka pikturuar një pamje shkatërruese, duke përfshirë një pretendim, të cilin Trump e mohon, se ai u përpoq të kapte timonin e makinës me të cilën po udhëtonte dhe u përlesh me një oficer të Shërbimit Sekret në një përpjekje për të devijuar autokolonën e tij në Kapitol, ku mbështetësit e tij po mblidheshin.

Një kërcënim për dhunë u shpërfill

Shumë herët, komiteti bëri përpjekje për të përcaktuar se si Shtëpia e Bardhë dhe vetë presidenti, e dinin se ekzistonte një kërcënim shumë real për dhunë më 6 janar – dhe nuk bënë asgjë për ta ndaluar atë.

Zonja Hutchinson dëshmoi se zoti Meadows i tha asaj se ai mendonte, disa ditë para sulmit, se gjërat “mund të bëhen në të vërtetë shumë keq”.

Ajo foli sesi zyrtarët e Shtëpisë së Bardhë u paralajmëruan për potencialin e dhunës. Dhe, ndoshta në dëshminë më të keqe deri më tani, ajo tha se Donald Trump e dinte personalisht se anëtarët e turmës në tubimin e tij të mëngjesit pranë Shtëpisë së Bardhë ishin të armatosur – dhe gjithsesi i drejtoi në Kapitol.

“Nuk më intereson që ata kanë armë. Ata nuk janë këtu për të më lënduar”, tha zonja Hutchinson se e dëgjoi të thoshte presidentin. “Lëri njerëzit e mi të hyjnë. Ata mund të marshojnë drejt Kapitolit që këtu”.

“Një president i tërbuar”

Ajo tregoi se si një zyrtar i Shtëpisë së Bardhë i tha asaj se presidenti kishte këmbëngulur të udhëtonte në Kapitol pas tubimit të tij në Shtëpinë e Bardhë – diçka që ai tha se do ta bënte gjatë fjalimit të tij. Kur mësoi se autokolona po kthehej në Shtëpinë e Bardhë, ai u përpoq të kapte timonin dhe u përlesh me një oficer të Shërbimit Sekret.

“Unë jam presidenti” tha Trump, sipas Hutchinson. “Më çoni në Kapitol tani”.

Që nga dëshmia e zonjës Hutchinson, një burim i afërt me Shërbimin Sekret i ka thënë CBS News se agjenti dhe shoferi që udhëtonin në makinë me Trump ishin të gatshëm të dëshmonin nën betim se ish-presidenti nuk sulmoi fizikisht asnjërin prej tyre dhe nuk u përpoq kurrë të kap timonin.

Më vonë gjatë ditës, Hutchinson tregoi se kishte dëgjuar Meadows të thoshte se, pasi mësoi se protestuesit po bënin thirrje për varjen e Zëvendës Presidentit, Mike Pence, Trump shprehu miratimin.

“Ai mendon se Mike e meriton atë”, tha ajo se dëgjoi të thoshte shefi i saj. “Ai nuk mendon se ata po bëjnë ndonjë gjë të gabuar”.

Në një gjykatë, prova të tilla do të konsideroheshin thashetheme dhe do të trajtoheshin me skepticizëm. Në sallën e dëgjimit, megjithatë, kjo ishte bombastike – dhe do të përdoret nga komiteti për të ushtruar presion ndaj zyrtarëve të lartë të Trump, të cilët deri më tani kanë refuzuar të dëshmojnë, si avokati kryesor i Shtëpisë së Bardhë, Pat Cipollone, që të dalin përpara dhe të vërtetojnë ose të përgënjeshtrojnë rrëfimet e saj.

“Nëse e dëgjuat këtë dëshmi sot dhe papritur ju kujtoni gjëra që nuk mund t’i mbanit mend më parë, ose zbuloni një guxim që e kishit fshehur diku, dyert tona mbeten të hapura”, tha kryetari i komitetit Bennie Thompson në përfundim të seancës dëgjimore.

Dëshmitari “misterioz”

Komiteti i 6 janarit, me njoftimin e tij të befasishëm për një dëshmitar misterioz dhe prova të reja të zbuluara, vuri në qendër të vëmendjes znj. Hutchinson gjatë dëshmisë së saj personalisht të martën.

Për një 25-vjeçare, e cila katër vjet më parë ishte një praktikante kolegji në Shtëpinë e Bardhë, ajo e përballoi jashtëzakonisht mirë presionin.

Ajo iu përgjigj pyetjeve të komisionit me një zë të qetë dhe metodik, duke vënë në dukje se si dhe në çfarë rrethanash e merrte informacionin që po tregonte. Komiteti tregoi se si zyra e zonjës Hutchinson ishte vetëm pak dyer më poshtë nga Zyra Ovale e presidentit.

Kujtimet e saj të përpikta të ngjarjeve sugjerojnë se ajo mund të ketë mbajtur një regjistrim të ngjarjeve gjatë kohës së saj në Shtëpinë e Bardhë ose, të paktën, ka një regjistrim elektronik të teksteve dhe emaileve që mbështesin pretendimet e saj.

Përgënjeshtrimi i Donald Trump

Ndërsa Hutchinson dëshmonte, Trump hyri në platformën e tij të mediave sociale dhe filloi të përpiqej të zvogëlonte pretendimet e saj.

Pjesa më e madhe ishte tipike për mënyrën se si ai u është përgjigjur kritikëve të kaluar, duke thënë se ai vështirë se e njeh Hutchinson, por dëgjon gjëra “shumë negative” për të. Ai e quajti atë hipokrite dhe një “zbuluese informacionesh” dhe sugjeroi se ajo ishte e hidhëruar sepse ai nuk i dha asaj një punë pas largimit nga Shtëpia e Bardhë.

Ai vazhdoi të mohonte shumë nga gjërat e përshkruara nga Hutchinson dhe, edhe një herë, vuri në dukje se ai tha në fjalimin e tij në tubim se turma duhet të marshonte në Kapitol “në mënyrë paqësore”./UBTNews/