Botë

I akuzuar për abuzim me të mitur, kërkohet hetim për kryeprokurorin e Trump

Published

on

Senatori republikan Markwayne Mullin i bëri thirrje Dhomës së Përfaqësuesve të dielën që të shpërndajë raportin e papublikuar të etikës mbi dyshimet për abuzim seksual në lidhje me një vajzë 17-vjeçare nga Matt Gaetz, i emëruar nga Presidenti i zgjedhur Donald Trump për postin e prokurorit të përgjithshëm.

Zoti Gaetz, 42 vjeç, dha dorëheqjen të mërkurën nga detyra e ligjvënësit në Dhomën e Përfaqësuesve me shumicë republikane, disa orë pasi Presidenti i zgjedhur Trump njoftoi emërimin e tij dhe dy ditë përpara se Komisioni i Etikës i Dhomës së Përfaqësuesve pritej të publikonte raportin e tij, që shqyrtonte edhe akuzat për përdorim të paligjshëm të drogës. Zoti Gaetz mohon të ketë bërë ndonjë shkelje.

Senatori Mullin tha për emisionin “Meet the Press” të kanalit televiziv NBC, se Senati, i cili ka autoritetin për të konfirmuar ose rrëzuar emërimet e Presidentit të zgjedhur Trump të zyrtarëve të lartë, duhet të njihet me raportin.

Senati duhet të ketë qasje tek kjo”, tha senatori Mullin. “A duhet të publikohet apo jo? Kjo mendoj se do të jetë pjesë e negociatave”.

Zoti Gaetz është një nga disa emrat e propozuar javën e kaluar nga Presidenti i zgjedhur Trump për anëtarë të kabinetit, të cilëve u mungojnë biografitë që zakonisht kanë kandidatët për postet e nivelit të lartë të administratës. Për t’u konfirmuar në detyrën e prokurorit të përgjithshëm, atij do t’i duhet të marrë miratimin e Senatit – ku republikanët do të kenë një shumicë prej të paktën 52 nga 100 vende. Një numër i vogël senatorësh kanë shprehur tashmë skepticizëm për këtë përzgjedhje.

Kryetari republikan i Dhomës së Përfaqësuesve Mike Johnson tha të premten se Komisioni i Etikës nuk duhet ta publikojë raportin e tij. Ai e përsëriti qëndrimin e tij të dielën.

Kryetari i Dhomës së Përfaqësuesve nuk ka autoritetin të ndalojë publikimin e një raporti nga Komisioni i Etikës, por unë thjesht thashë atë që besoj se është një pikë e qartë, se ne nuk duam të shkojmë në atë drejtim”, tha kryetari Johnson për kanalin televiziv CNN.

Senatori Mullin e ka cilësuar më parë zotin Gaetz si joparimor dhe ai tha të dielën se “e shkuara e Matt Gaetzit ka rëndësi”.

Por, ai tha se nuk kishte marrë një vendim nëse do të votonte pro ose kundër emërimit të zotit Gaetz.

Do t’i jap atij një mundësi të drejtë, ashtu si çdo individi”, tha senatori Mullin.

Departamenti i Drejtësisë bëri hetime ndaj zotit Gaetz për gati tre vite mbi akuzat për abuzim seksual në lidhje me një adoleshente. Zyra e zotit Gaetz tha në vitin 2023 se atij i ishte thënë nga prokurorët se nuk do të përballej me akuza penale.

Avokati i vajzës bëri thirrje të enjten që raporti të bëhet publik.

Senatori Mullin gjithashtu u shfaq i hapur ndaj idesë për t’ia lejuar Presidentit të zgjedhur Trump ta anashkalojë plotësisht Senatin, si një “masë e fundit” nëse ligjvënësit nuk arrinin dakordësi. Mekanizmi, i njohur si “emërimet gjatë pushimeve”, i lejon Presidentit të bëjë emërime gjatë periudhës që Senati nuk është në sesion pune, duke shmangur autoritetin e dhomës së lartë të legjislativit për të bllokuar emërimin e zyrtarëve politikë. Presidenti i zgjedhur Trump ka bërë thirrje publikisht që ligjvënësit republikanë t’ia lejojnë përdorimin e këtij mekanizmi, që do t’i jepte atij një liri të jashtëzakonshme për të emëruar këdo që dëshiron.

Senatorët demokratë kanë shprehur kundërshtim të gjerë ndaj përzgjedhjes së zotit Gaetz.

“Senati ka një rol kushtetues”, tha senatori demokrat Chris Coons në kanalin televiziv Fox News. “Është roli ynë për të dhënë këshilla dhe pëlqimin, për t’u siguruar që një president i zgjedhur të marrë përgjithësisht zyrtarët që dëshiron … por nuk vendos njerëz që janë të pakualifikuar, ose që nuk kanë karakterin dhe aftësitë e nevojshme, për të drejtuar një agjenci tepër të rëndësishme si Departamenti i Drejtësisë”.

Botë

​Trump vendos tarifë 100% për ilaçet që importohen në ShBA

Published

on

Shtetet e Bashkuara të Amerikës do të vendosin një tarifë prej 100 për qind për të gjitha produktet farmaceutike të markës ose të patentuara që hyjnë në vend nga 1 tetori 2025.

Presidenti amerikan Donald Trump ka bërë të ditur se masa nuk do të zbatohet për kompanitë që ndërtojnë fabrika prodhimi ilaçesh në SHBA.

Kujtojmë se në vitin 2024 në ShBA pothuajse ishte trefishuar importi i barërave farmaceutike./S.K/KP/

Continue Reading

Botë

​Trump i kërkon Erdogan që Turqia të ndalojë blerjen e naftës ruse

Published

on

Presidenti i SHBA-së, Donald Trump, i ka kërkuar Turqisë të ndalojë blerjen e naftës nga Rusia si pjesë e një përpjekjeje më të gjerë për të ndërprerë financimin e energjisë nga Moska.

Duke folur përkrah Presidentit turk Rexhep Tajip Erdogan në Shtëpinë e Bardhë, Trump tha se ndalimi i këtyre importeve do të ishte gjëja më e mirë që mund të bënte homologu i tij turk.

Takimi në Zyrën Ovale përfundoi pa ndonjë angazhim të fortë për të hequr sanksionet e SHBA-së ndaj Turqisë ose për të shitur avionë luftarakë të përparuar F-35, megjithëse Trump shprehu optimizëm për të dyja çështjet, shkruan BBC.

Turqia për vite me radhë është penguar të blejë avionë F-35 të SHBA-së.

Në vitin 2019, ajo u përjashtua nga një program ku prodhonte pjesë për aeroplanin luftarak pasi bleu sisteme të mbrojtjes ajrore nga Rusia.

Gjatë një sesioni të shkurtër pyetje-përgjigjesh përkrah Erdoganit në Zyrën Ovale të enjten, Trump tha se do të donte që Turqia të ndalonte blerjen e naftës nga Rusia, ndërsa Rusia vazhdon sulmet e saj kundër Ukrainës.

“Gjëja më e mirë që ai mund të bënte është të mos blinte naftë dhe gaz nga Rusia. Nëse ai do ta bënte këtë, kjo do të ishte gjëja më e mirë”, tha Trump

Trump shtoi se beson që Erdogani respektohet si nga Presidenti ukrainas Volodomyr Zelensky ashtu edhe nga Presidenti rus Vladimir Putin, që do të thotë se ai mund të ketë një ndikim të madh në luftë nëse dëshiron.

Krahas Indisë dhe Kinës, Turqia është ndër klientët më të mëdhenj të Moskës për eksportet e naftës dhe gazit, dhe të dhënat tregojnë se vëllimi i gazit rus që arriti në Evropë përmes Turqisë u rrit me mbi 26% në fillim të këtij viti./S.K/KP

 

Continue Reading

Botë

Shkalla e ulët e lindjeve në Angli mund të detyrojë mbylljen e 800 shkollave fillore deri në vitin 2029

Published

on

Rënia e lindjes së numrit të fëmijëve në Angli mund të çojë në mbylljen e deri në 800 shkollave fillore deri në vitin 2029, sipas një studimi nga Instituti i Politikave të Arsimit (EPI).

Instituti i atribuoi rënien kombëtare të nxënësve të shkollave fillore shtetërore kryesisht rënies së nivelit të lindjeve.

Gjithashtu, Instituti paralajmëroi se rënia e numrit të nxënësve mund t’i vërë shkollat nën presion të rëndë financiar, me shumë këshilla lokale që tashmë po përpiqen të mbajnë operacionet.

Raporti gjithashtu vuri në dukje se faktorë përtej nivelit të lindjeve, të tilla si kostot e larta të strehimit, po formësojnë vendimet familjare se ku të jetojnë dhe ku t’i dërgojnë fëmijët e tyre.

Trendi është më i theksuar në Londër mbetet ku familjet po zhvendosen jashtë kryeqytetit ose po zgjedhin shkolla private, thuhet në raport.

Regjistrimi në shkollat fillore kombëtare arriti kulmin në rreth 4.5 milionë në 2018-19, por që atëherë ka rënë me gati 2%.

Kjo rënie parashikohet të bjerë edhe me 4% gjatë pesë viteve të ardhshme, duke përfaqësuar një humbje prej 162,000 nxënësish,  ekuivalent i 800 shkollave fillore./S.K/KP/The Guardian.

Continue Reading

Botë

​Rritja ekonomike e SHBA-së rishikohet në rritje për shkak të shpenzimeve të konsumatorëve

Published

on

Sipas të dhënave të reja qeveritare, ekonomia amerikane u rrit më shpejt nga sa mendohej më parë, sepse ishte e nxitur nga shpenzimet e forta të konsumatorëve dhe rënia e importeve.

Produkti i brendshëm bruto (PBB), i cili mat prodhimin e mallrave dhe shërbimeve, u rrit me një normë vjetore prej 3.8% në periudhën nga prilli deri në qershor nga vlerësimi i mëparshëm prej 3.3%.

Rritja e tremujorit të dytë, ritmi më i shpejtë në gati dy vjet  pasoi një tkurrje në fillim të këtij viti.

Ekonomistët thanë se ekonomia amerikane po shkonte mjaft mirë, por disa pasiguri mbeten. Shpenzimet e konsumatorëve u rritën me 2.5% në vitin deri në fund të qershorit, nga një vlerësim i mëparshëm prej 1.6%.

Në tre muajt e parë të vitit 2025, ekonomia amerikane u tkurr me një normë prej 0.6%, ndërsa kompanitë nxituan në importe për të kapërcyer tarifat e Presidentit të SHBA-së Donald Trump, të cilat ulën PBB-në.

Konsumatorët amerikanë, motori i ekonomisë më të madhe në botë, kanë mbetur të qëndrueshëm përballë tarifave dhe pasigurisë ekonomike.

Punëdhënësit shtuan vetëm 22,000 vende pune në gusht, më pak se sa pritej, ndërsa shkalla e papunësisë u rrit nga 4.2% në 4.3%, sipas Departamentit të Punës.

Ekonomistja e lartë në EY-Parthenon, Lydia Boussour tha se momenti ekonomik mbeti i qëndrueshëm në gjysmën e parë të vitit pavarësisht vështirësive politike në rritje.

Por, ajo paralajmëroi se me ndikimin e tarifave dhe pasigurisë politike që po bëhet gjithnjë e më e dukshme, rritja më e ngadaltë e SHBA-së dhe inflacioni më i lartë janë ende në horizont./S.K/KP/

Continue Reading

Të kërkuara