Lajmet

Hungaria – “portë hyrëse” e Kinës në Evropë

Published

5 years ago

May 23, 2021

Betim Gashi

Një projekt kundërthënës për një universitet kinez ka rikthyer shqetësimet për rritjen e ndikimit të Pekinit në Hungari dhe ka risjellë në qendër të vëmendjes lidhjet e ngushta të kryeministrit hungarez, Viktor Orban, me Kinën.

Muajin e kaluar, Hungaria ka nënshkruar një marrëveshje strategjike me Universitetin Fudan, për hapjen e një kampusi në Budapest, më 2024.

Marrëveshja do ta sjellë universitetin e parë kinez në Bashkimin Evropian, e për të cilin Qeveria hungareze thotë se do t’i rrisë standardet e arsimit në Hungari.

Por, mungesa e transparencës për projektin dhe zbulimi se Qeveria hungareze po planifikon të marrë një hua të madhe kineze për të ndërtuar kampusin, kanë shkaktuar polemika.

Kryetari i Budapestit, Gergely Karacsony.

“Derisa Qeveria të sigurojë zbulimin e plotë të të gjitha detajeve të projektit, ne nuk kemi asgjë për të negociuar, që do të thotë se ne nuk do ta japim pëlqimin për ndërtimin e universitetit kinez”, tha për Radion Evropa e Lirë kryetari i Budapestit, Gergely Karacsony.

Karacsony është një nga kritikët më të zëshëm të projektit. Sipas tij, kampusi i planifikuar vë një barrë të padrejtë financiare mbi taksapaguesit, ndërsa qeveria refuzon t’i zbulojë të gjitha “vendimet, kontratat e lidhura ose në përgatitje, si dhe marrëveshjet strategjike” për planet me Fudanin në Budapest.

Dokumentet e siguruara në fillim të prillit nga Direkt36 – një medium hungarez i gazetarisë hulumtuese – tregojnë se kostot paraprake të ndërtimit të kampusit Fudan janë 1.8 miliard dollarë – më shumë sesa shpenzimet e Qeverisë hungareze për të gjithë sistemin e saj të arsimit të lartë në vitin 2019.

Shteti planifikon të financojë rreth 20 për qind të projektit nga buxheti i tij qendror, ndërsa pjesa tjetër e parave do të sigurohet nga një hua prej 1.5 miliard dollarësh nga një bankë kineze.

Sipas dokumenteve, ndërtimi do të kryhet duke përdorur kryesisht materiale dhe punëtorë kinezë.

Universiteti Fudan, po sipas dokumenteve, ka rënë dakord që Korporata Inxhinierike e Ndërtimit e Kinës – kompania më e madhe e ndërtimit në botë – të konkurrojë për kontratën fitimprurëse.

Zona ku qeveria dëshiron të ndërtojë Universitetin Fudan është zgjedhur më herët për të ndërtuar një Qytet Studenti, që do të siguronte strehim dhe lehtësira të tjera për studentët hungarezë.

Karacsony tha se ai dhe zyrtarë të tjerë të lartë të qytetit planifikojnë të organizojnë një referendum për të bllokuar ndërtimin e universitetit.

“[Marrëveshja e bashkëpunimit strategjik] i jep Kinës ndërtesa të mëdha falas. Ajo i shërben zgjerimit të kompanive kineze në Evropë”, tha Karacsony.

Kampusi i propozuar i Universitetit Fudan është manifestimi i fundit i zgjerimit të Kinës në Hungari – gjë që ka nisur prejse Orban është kthyer në pushtet në vitin 2010 dhe ka nisur politikën “Hapja Lindore”

Me këtë politikë synohet kultivimi i lidhjeve të ngushta me Pekinin dhe Moskën, që do të krijonin investime dhe mundësi të reja për Hungarinë, pas krizës globale financiare.

Investimet kineze në Hungari dhe në Evropën Qendrore, në përgjithësi, janë materializuar ngadalë, por Orban ka kultivuar një marrëdhënie të fortë me Pekinin gjatë viteve.

Presidenti i Kinës, Xi Jinping, ka folur me Orbanin në telefon, më 29 prill. Xi e ka vlerësuar udhëheqësin nacionalist për politikat e tij miqësore ndaj Kinës dhe bashkëpunimin e thellë gjatë pandemisë së koronavirusit, si dhe e ka ftuar atë të vizitojë Pekinin.

“Hungaria është – dhe do të mbetet – pjesa kryesore për angazhimin kinez në Evropën Qendrore dhe kjo është bërë edhe më e vërtetë gjatë pandemisë”, tha për Radion Evropa e Lirë Paul Stronski, nga Instituti Carnegie Endowment për Paqen Ndërkombëtare.

“Për kinezët, Hungaria është porta hyrëse për në pjesën tjetër të Evropës”, tha ai.

Një hapje e re

Gjetja e balancës së duhur midis gjesteve miqësore ndaj Pekinit dhe ruajtjes së besimit të aleatëve perëndimorë ka qenë një tipar unik i politikës së jashtme të Hungarisë.

Por, ecja nëpër këtë litar të hollë është bërë gjithnjë e më e vështirë për Budapestin gjatë pandemisë.

Vendimi i Qeverisë së Orbanit për të ecur përpara me kampusin Fudan ka ngjallur shqetësime në Uashington. Ambasada e SHBA-së në Budapest ka shprehur rezerva për projektin.

“Hapja e mundshme e kampusit të parë të Universitetit Fudan në Evropë është arsye për shqetësim, pasi Pekini ka një histori të dëshmuar të shfrytëzimit të institucioneve të arsimit të lartë për të fituar ndikim dhe për të ngufatur lirinë intelektuale”, ka thënë Ambasada amerikane në një deklaratë për gazetën hungareze Magyar Hang.

Budapesti gjithashtu e ka gjetur veten në qendër të disa incidenteve me BE-në.

Pas sanksioneve të dyanshme në mars midis Kinës dhe BE-së për abuzime të të drejtave të njeriut në rajonin kinez Ksinjiang, ministri i Jashtëm i Hungarisë, Peter Szijjarto, i ka cilësuar masat si “të pakuptimta” dhe “të dëmshme”.

Disa ditë më vonë, ministri kinez i Mbrojtjes, Wei Fenghe, ka qëndruar në Budapest dhe ka shfrytëzuar rastin për t’i dënuar sanksionet e BE-së dhe për të vlerësuar qasjen pajtuese të Hungarisë, duke thënë se Pekini “gjithmonë e ka konsideruar Hungarinë si një vëlla të mirë”.

Budapesti gjithashtu raportohet se ka bllokuar një deklaratë të BE-së në muajin mars, që kritikonte ligjin e ri të sigurisë në Hong Kong.

Hungaria është po ashtu i vetmi vend anëtar i BE-së që nuk ka pranuar shqetësimet e mundshme për sigurinë, që paraqesin kompanitë kineze, si Huawei, për rrjetet mobile 5G

Në Budapest ndodhet baza më e madhe e prodhimit e Huaweit jashtë Kinës dhe një qendër e re rajonale e kompanisë për kërkime dhe zhvillim.

Politikanët e opozitës në Hungari kanë shprehur shqetësime për kampusin e propozuar të Universitetit Fudan, duke vënë theksin mbi problemet e mundshme të borxhit dhe mungesën e mundshme të lirisë akademike në institucion.

Katalin Cseh, anëtare e Parlamentit Evropian nga Lëvizja Momentum e Hungarisë, i tha Radios Evropa e Lirë se ajo i ka kërkuar shefit të politikës së jashtme të BE-së, Josep Borrell, të parandalojë krijimin e kampusit në Budapest, për shkak të rreziqeve më të gjera që mund të paraqesë ai për bllokun.

“Pekini ka nevojë për ‘kuaj të Trojës’ brenda BE-së dhe Qeveria hungareze e ofron Hungarinë vullnetarisht për këtë rol”, tha Cseh.

“Është një rrezik i madh kur një vend i vendos interesat e Kinës mbi interesat e komunitetit evropian, ose mbi interesat e veta”, shtoi ajo.

Midis Kinës dhe BE-së

Tamas Matura, profesor në Universitetin Corvinus në Budapest dhe themelues i Qendrës së Evropës Qendrore dhe Lindore për Studime Aziatike, tha se këto veprime duhen parë si gjeste politike ndaj Pekinit dhe jo si ndryshime substanciale politike.

“Në kuadër të betejës së Orbanit me BE-në, ai ka nevojë për një vëlla të madh si Kina”, tha Matura për Radion Evropa e Lirë.

Orbani ka përkrahur atë që e quan “demokraci joliberale” në Hungari. Organizata për të drejtat e njeriut, Freedom House, në raportin vjetor të publikuar në muajin prill, e ka veçuar Budapestin për një “përkeqësim të pashembullt të demokracisë gjatë dekadës së fundit”.

Partia Fidesz e Orbanit është pezulluar nga Partia Popullore Evropiane e Parlamentit të BE-së. Dhe, pas kritikave dhe shqetësimeve të BE-së për sundimin e ligjit në Hungari dhe keqpërdorimin e fondeve të bllokut, vëzhgues si Matura thonë se kryeministri po i përdor marrëdhëniet e tij me Kinën për qëllime të brendshme.

“Asnjë nga këto ide nuk vijnë nga Kina, ato vijnë nga ana e Hungarisë, por natyrisht se Pekini është i lumtur me to”, tha Matura.

Në vitin 2020, Hungaria ka marrë nga Kina një hua 20-vjeçare, në vlerë prej 1.9 miliard dollarësh, për të ndërtuar një hekurudhë, që do të lidhte Budapestin me Beogradin, por projekti mbetet i diskutueshëm, për shkak të vonesave dhe mungesës së transparencës.

Në prill të vitit 2020, Parlamenti i Hungarisë ka votuar për t’i dhënë qeverisë kompetenca të jashtëzakonshme, mbi premisën e luftimit të pandemisë, por institucioni ligjvënës po ashtu ka votuar për t’i mbajtur të gjitha detajet e projektit hekurudhor si të klasifikuara, duke thënë se një gjë e tillë është e domosdoshme për të siguruar kredinë nga Banka Export-Import e Kinës.

Kjo ka bërë që disa kritikë në Hungari t’i vënë në dyshim përfitimet e vërteta nga projekti.

Shqetësimet janë rritur edhe më shumë, pasi kontrata për punën ndërtimore i është dhënë një konsorciumi në pronësi të miliarderit Lorinc Meszaros, njeriut më të pasur të Hungarisë dhe mikut të Orbanit që nga fëmijëria.

Hungaria është vendi i vetëm anëtar i BE-së që ka miratuar edhe vaksinën kineze kundër koronavirusit Sinovac dhe atë ruse Sputnik V, edhe pse këto dy vaksina nuk kanë marrë dritën jeshile nga Agjencia Evropiane e Barnave.

Ky veprim duket se i është shpaguar Orbanit, i cili po përpiqet të rrisë mbështetjen përpara zgjedhjeve parlamentare të vitit 2022

Deri më 2 maj, Hungaria ka vaksinuar plotësisht 21.5 për qind të popullsisë – gati dyfishin e mesatares së BE-së – dhe ka nisur t’i lehtësojë kufizimet nga koronavirusi.

“Mund të ketë një ndjenjë të kënaqësisë tani me Qeverinë hungareze”, tha Matura.

“Një kënaqësi që lidhjet me Pekinin janë shpaguar, kur atyre u është dashur ndihmë për të luftuar pandeminë…”, shtoi ai.

Marrëveshja strategjike me Universitetin Fudan ka përkuar gjithashtu me ndryshimet e fundit në menaxhimin e universiteteve hungareze, të cilat jo vetëm që transferojnë miliarda në asetet shtetërore të të afërmve me kryeministrin, por gjithashtu mund t’i lejojnë Orbanit dhe mbështetësve të tij të ushtrojnë kontroll afatgjatë mbi arsimin publik në vend.

Njoftimi për Fudanin është bërë edhe pasi Universiteti i Evropës Qendrore – i themeluar nga miliarderi George Soros dhe i konsideruar si një nga institucionet kryesore pasuniversitare të Hungarisë – është detyruar të mbyllet në vitin 2018, pas miratimit të amendamenteve të Ligjit për arsimin e lartë.

Gjykata Evropiane e Drejtësisë ka thënë në tetor të vitit 2020 se veprimi kundër universitetit shkel angazhimet e Hungarisë nën Organizatën Botërore të Tregtisë dhe shkel dispozitat e Kartës së BE-së për të Drejtat Themelore, sa u përket lirive akademike.

Pavarësisht këtij vendimi, Universiteti i Evropës Qendrore mbetet i vendosur në Vjenë.

E gjithë kjo e lë Hungarinë në një kryqëzim derisa përgatitet për zgjedhjet e vitit të ardhshëm, tha Stronski.

Ndryshimet në politikat e brendshme dhe të jashtme të Hungarisë, gjatë dekadës së fundit, janë udhëhequr kryesisht nga Orban dhe nëse ai dhe partia e tij Fidesz humbin në vitin 2022, shumë prej këtyre ndryshimeve mund të përmbysen shpejt.

“Të qenët e Orbanit në detyrë gjatë dekadës së fundit i ka lejuar kinezët të investojnë në të dhe po ashtu në elitën hungareze”, tha Stronski.

“Nëse qeveria i ndërron duart, nuk ka siguri që kjo politikë e Kinës do të mbetet kështu”.

“Nuk ka shumë mbështetje në Hungari për këto politika pro-kineze, përtej Qeverisë aktuale të Orbanit”, tha Stronski.

Kujtesë

DITARI: Çfarë lajmesh kemi lexuar në çdo 26 prill, në vitet nëntëdhjetë

Published

3 hours ago

April 26, 2026

UBTNews

26 prill 1993

Lajm i plotë:

Papa Gjon Pali i Dytë dje vizitoi Shqipërinë

Shqipëria dhe shqiptarët vizitën e Papa Gjon Palit të Dytë e përjetuan si ditë të madhe në historinë e tyre. Qëndrimi i Atit të Shenjtë në Shqipëri, zgjoi interesim të jashtëzakonshëm në Shqipëri, Kosovë, në trojet e tjera etnike shqiptare në Ballkan dhe në mesin e shqiptarëve në diasporë. Vizita e Papa Gjon Palit të Dytë Tiranës dhe Shkodrës zgjoi interesim edhe në qarqet fetare, diplomatike e politike të vendeve ballkanike, evropiane dhe më gjerë.

Në Aeroportin e Rinasit në Tiranë, Papa Gjon Palin e Dytë e pritën dhe i dëshiruan mirëseardhje presidenti i Shqipërisë dr.Sali Berisha, Pjetër Arbnori, Aleksandër Meksi dhe shumë personalitete të tjera shtetërore, politike, fetare e kulturore të Shqipërisë dhe të Kosovës. Në Aeroportin e Rinasit, Papa Gjon Palit të Dytë mirëseardhje i dëshiruan edhe Nënë Tereza dhe imzot Ivan Dias.

Në pritjen e Atit të Shenjtë, morën pjesë edhe kryetari i Republikës së Kosovës, dr.Ibrahim Rugova dhe kryetari i Qeverisë, dr.Bujar Bukoshi, si dhe përfaqësues të shumë partive politike e të asociacioneve tjera shqiptare në Kosovë e Maqedoni. Po ashtu, ishte i madh numri i qytetarëve shqiptarë nga Kosova, Maqedonia e Mali i Zi, që shkuan në Shqipëri për të nderuar Papa Gjon Palin e Dytë.

Pas ceremonialit të pritjes në Aeroportin e Rinasit, Papa Gjon Pali i Dytë, vizitoi Shkodrën. Në katedralën e Shkodrës, që ka nam në Ballkan, në Evropë dhe më gjerë, Papa Gjona Pali i Dytë mbajti Meshën e Shenjtë dhe bëri shugurimin e katër ipeshkvijve shqiptarë. Pas përfundimit të Meshës së Shenjtë në Shkodër, Papa Gjon Pali i Dytë iu drejtua qytetarëve të shumtë të Shkodrës.

Në mbrëmje, presidenti i Shqipërisë dr.Sali Berisha dhe Ati i Shenjtë Papa Gjon Pali i Dytë, në sheshin “Skënderbej” të Tiranës, folën para dhjeta mijëra qytetarëve nga Shqipëria e Kosova, nga trojet etnike shqiptare dhe nga diaspora, që ishin tubuar për të pritur dhe për të nderuar mysafirin e lartë nga Vatikani.

Jehona e Papa Gjon Palit të Dytë në shtypin e huaj

Mjetet botërore të informimit i kushtuan vëmendje të theksuar vizitës së Papa Gjon Palit të Dytë në Shqipëri. Pothuaj të gjitha gazetat e kryeqendrave evropiane, këtë vizitë e çmuan si tejet të rëndësishme edhe për faktin se Shqipëria është vend i parë ballkanik, që vizitoi Papa Gjon Pali i Dytë.

Gazeta e njohur e Parisit “Le Monde”, pasi konstaton se 70 për qind të banorëve të Shqipërisë konsiderohen myslimanë, afër 20 për qind ortodoks dhe 10 për qind katolikë, përkujton se Selia e Shenjtë rivendosi marrëdhëniet diplomatike me Tiranën në korrik të vitit 1991 dhe caktoi një nuns, imzot Ivan Dias, një indian. Gazeta tjetër e Francës, “Le Figaro”, në artikullin “E diela shqiptare e Papës”, thekson se Papa Gjon Pali i Dytë, është gati ta përkrah një vend që sapo ka dalë nga diktatura komuniste.

Kjo gazetë, vizitën e Papa Gjon Palit të Dytë në Shqipëri, e vë në kuadër të gjendjes aktuale në Ballkan, me theks të veçantë të gjendjes pothuaj dramatike në Kosovë. “Udhëheqësi i Lidhjes Demokratike të Kosovës, Ibrahim Rugova, konstaton “Le Figaro”, njoftoi se pelegrinë të shumtë do të shkojnë në Shqipëri për të takuar, Papa Gjon Palin e Dytë, duke shpresuar se do të mbështesë dëshirat e tyre për pavarësi”.

Numri i shqiptarëve që do të marrin pjesë në pritjen e Papës në Shqipëri, megjithatë mbetet i pasigurtë, pasi varet nga dëshira e mirë e autoriteteve serbe, konstaton gazeta “Le Figaro”.

Lajme të tjera:

Dr.Zekeria Cana përsëri në burg

Në Prishtinë policia serbe rrahu Jeton Surdullin

U bastis një familje në Vushtrri

Në Ferizaj policia serbe arrestoi tre persona

Në Zhubel të Gjakovës u arrestua Mehmet Syla

Afrim Hyseni u varros dje në Velikorekë të Podujevës

Paralajmërohet përvetësimi i tokës së shqiptarëve në Gllogovc

Në Prishtinë iu shpërndanë armë serbëve

Ushtria serbe ndjek mbi 30 mijë të rinjë shqiptarë

Përfaqësuesit e SHBA-ve dhe një aksion parandalues në Kosovë

Partia komuniste dhe Enver Hoxha e kishin shitur Kosovën

Kufitarëve që u kruhen gishtërinjtë

26 prill 1994

Lajmet kryesore:

Presidenti Berisha: Nëse provokohet masakra në Kosovë, do të ketë luftë totale

Fregata amerikane në portin e Durrësit

Një delegacion ushtarak amerikan në Shqipëri

Represioni në Kosovë

Një i ri nga Skënderaji u dërgua me dhunë në ushtrinë serbe

Policia serbe i plaçkiti një të riut nga Skëndaraj 3.000 DEM

Delegacioni i UP-së mori pjesë në Konferencën e Rektorëve të Europës në Selanik

Beogradi akuzoi Shqipërinë për keqësimin e marrëdhënieve me fqinjët

Më 2 e 3 maj shkollat në Kosovë pushojnë

Në vend për plaçkitje u arrestua për keqpërdorim të detyrës

Poezi të B. Çapriqit në “Pen International”

Prishtinë, 26 prill 1995

Lajmet kryesore:

Kryetari Rugova arriti për vizitë në Suedi

Kryeministri Bujar Bukoshi u takua me ministrin e Punëve të Jashtme të Luksemburgut

Udhëheqës të partive e deputetë të Kosovës u takuan me delegacionin e Kongresit Amerikan

Protesta të shumta në Kosovë kundër procesit ndaj rektorit Sylejmani

“Bujku” nuk u botua as sot

Dhuna e përditshme në Kosovë

Serbët njoftojnë për plagosjen e dy policëve serbë në Isniq të Deçanit

Kryeministri Bukoshi u takua me ministrin e Punëve të Jashtme të Luksemburgut

Udhëheqës të partive e deputetë të Kosovës u takuan me delegacionin e Kongresit Amerikan

Konferencë për gazetarë në BSPK

Edhe në Prizren u pengua mësimi në gjuhën shqipe

Situatë e nderë në komunën e Deçanit

Katër shqiptarë u dënuan për armë në Prizren

Filloi gjykimi kundër policit Peroviq në Gjilan

Gjendje e vështirë në Mihjen Sipërfaqësore të Bardhit

Terror i shtuar i policisë në Mitrovicë

Policia ndërhyri në lokalet e Degës së LDK-së në Vushtrri

Policia keqtrajtoi rëndë një anëtar të Kryesisë së Degës së LDK-së në Deçan

Shoqata zvicerane për refugjatë vlerëson se regjimi serb në Kosovë është okupues

Mërgimtarët në Londër tubuan rreth 2300 funta për Kosovën

Tribunë e Fakultetit Filologjik të Prishtinës për Faik Konicën

SHBA-të përshëndetën fillimin e hetimeve kundër Karaxhiqit dhe Mlladiqit

26 prill 1997

Lajmet kryesore:

Kryetari Rugova mori pjesë në takimin me kryetarët e degëve të LDK-së

Rudolf Perina: S’mund të bëhet fjalë për ndonjë ndryshim në politikën amerikane ndaj Kosovës

Ramajli: Mirëkuptim i plotë i qytetarëve, organeve shtetërore e i partive në Shqipëri ndaj kosovarëve

Fehmi Agani: Tryeza e Nju Jorkut ishte e suksesshme për Kosovën

Abaz Ermenji: Jemi në një mendje me kosovarët për pavarësinë e Kosovës

Në Prishtinë policia pengoi organizimin e garave republikane të recitatorëve

Në Samitin Ministror të BE për Ballkanin diskutohet edhe për Kosovën

Lagja “Avalla” në Prishtinë tash pesë ditë pa ujë të pijshëm

Policia keqtrajtoi rëndë dy të rinjë nga Prishtina

Shqipëri: Mesatarisht nga 10 veta në ditë vriten me armë zjarri

Lajm i plotë:

Nga sëmundja e fruthit në Kosovë deri tash vdiqën 2 fëmijë

Që nga muaji janar i këtij viti e deri dje, në Klinikën Infektive në Prishtinë u hospitalizuan mbi 50 të sëmurë nga fruthi të moshave prej 6 muaj deri në 30 vjeç, nga të cilët dy fëmijë nën moshën dyvjeçare vdiqën, njofton “Bujku” i sotëm.

Bëhet e ditur se në komunën e Istogut rastet e sëmundjes së fruthit janë shpeshtuar, ndërsa deri tash janë evidentuar rreth 30 raste. Në komunën e Istogut kjo sëmundje po i prek fëmijët më të rritur, të cilët nuk janë vaksinuar nga kjo sëmundje.

Edhe në komunën e Malishevës bëhet e ditur se deri tash janë evidentuar 37 raste të sëmundjes së fruthit. Dr. Nijazi Gashi, pediatër, thekson se shifra e lartshënuar nuk mund të jetë e saktë, për shkak se shumë prindër fëmijët e tyre nuk i kanë sjellë në ambulancë për shërim, me shpresë se kjo sëmundje do t’u kalojë. Në komunën e Malishevës sëmundja e fruthit i ka prekur fëmijët prej moshës 1-5 vjeç.

Lajm i plotë:

Në Qerret të Kavajës u vra një shqiptar nga Kosova

Prishtinë, 26 prill (QIK)

Në Qerret, fshat në mes Kavajës e Durrësit, më 20 prill u vra me armë zjarri Faik Hasani (53), i lindur në Stroc të Vushtrrisë, me banim të përhershëm në Lagjen Kodra e Trimave në Prishtinë, njofton Zyra e Republikës së Kosovës në Tiranë.

Njoftimin për vrasjen e dha vajza e tij Minirja e cila së bashku me nënën dhe tetë fëmijët tjerë të të ndjerit jetojnë në Qerret në një shtëpi i ndjeri e kishte ndërruar me një të afërm të tij me një pasuri që kishte në Kosovë. Motivet e vrasjes nuk janë sqaruar krejtësisht, por thuhet se dorasin e ka burgosur policia.

Nga mbi 400 viktima sa morën trazirat e muajve të fudnit në Shqipëri, z. Hasani është qytetari i parë kosovar që humbi jetën.

Kavaja është një ndër rrethet të prekura më së paku nga trazirat e fundit. Qerreti është fshat i banuar nga shqiptarë të shpërngulur nga fshatrat Peran e Repë të Llapit, në periudhën menjëherë pas shpalljes së Pavarësisë së Shqipërisë.

26 prill 1998

Edicioni i parë (Ora 10:30)

Lajmet kryesore:

Në orën 16:00 bëhet varrimi i të vrarëve nga ushtria e Beogradit

Këshilli i Lartë i Mbrojtjes i Shqipërisë analizoi situatën në kufirin Kosovë-Shqipëri

SHBA-të mund ta braktisin Grupin e Kontaktit për shkak të Kosovës

Ministri i Jashtëm norvegjez do të vizitojë Shqipërinë

Minisitrat maqedon e grek biseduan për çështjen e Kosovës

Edicioni i dytë (Ora 14:00)

Lajm i plotë:

U identifikuan 19 të vrarët nga ushtria serbe

Veprimtarët e LDK-së në Gjakovë, arritën sot në fshatin Hereq dhe identifikuan 9 viktima nga fshati Hereq dhe një nga fshati Dujakë i kësaj komune. Këta janë:

Shefqet Selim Alijaj, 25. I. 1969, Hereq – Gjakovë
Bekim Sali Aliaj, Hereq
Skender Qazim Hajdaraj, 15. V. 1969, Hereq
Gazmend Hasan Ramaj, 24. IX. 1972, Hereq
Ukë Misin Shabani, 17. VII. 1970, Hereq
Hasan Bajram Tahiraj, Hereq
Sadik Lush Alijaj, 13. X. 1961, Hereq
Hajdar Ramadan Thaqi, 1972, Hereq
Vebi Asllan Hasanaj, 14. XII. 1967, Hereq
Veli Noci, Dujakë – Gjakovë

Komisioni për Informim i Degës së LDK-së në Deçan njoftoi sot se nga fshati Sllup i Deçanit janë vrarë:

Selman Brahim Lokaj,
Imer Isuf Lokaj,
Hajdar Ramadan Lokaj,
Beqë Binak Lokaj,
Tahir Abaz Mazrekaj,
Xhemajl Sejdi Mazrekaj,
Bekim Shefqet Mazrekaj,
Bekë Sefer Mazrekaj dhe
Astrit Xhafer Hadërgjonaj.

Varrimi i viktimave nga fshati Sllup pritet të bëhet sot në orën 16:00, kurse varrimi i të vrarëve nga Hereqi dhe Dujaka bëhet nesër në orën 13:00 në fshatin Hereq.

Lajm të tjera:

Vazhdojnë të shtënat në afërsi të Cërmjanit – rruga për Hereç plotësisht e bllokuar

Në Siçevë të Klinës dje u granatuan dy shtëpi

Të shtëna gjatë natës në Llaushë – u qëllua shtëpia e Xhavit Spahiut

Forcat serbe granatuan Hereqin – dy të plagosur

Podujevë: Mbrëmë u dëgjua një shpërthim dhe të shtëna në afërsi të motelit “Besiana”

Rugova: Incidentet në zonën kufitare Kosovë-Shqipëri, vepër e shërbimit sekret serb

Nano: Rezistenca e armatosur në Kosovë, veprim vetëmbrojtës ndaj dhunës patologjike serbe

Tiranë: Stacionim i forcave të mëdha serbe në kufirin me Shqipërinë

Dita e shtatëmbëdhjetë e shetitjeve protestuese

Edicioni i tretë (Ora 15:00)

Lajm i plotë:

Katër shqiptarë të plagosur në Burojë

Mbrëmë në fshatin Burojë është plagosur rëndë Avni Feriz Shala (36), i cili gjendet në spital.

Duke iu referuar burimeve të PNDSH-së në Skënderaj, Komisioni për Informim i Degës së LDK-së në Mitrovicë njoftoi se është plagosur edhe i vëllai i Avniut, Besimi (24), një grua 45-vjeçare dhe një fëmijë 9-vjeçar, emrat e të cilëve nuk janë bërë të njohur.

Burimet e LDK-së në Skënderaj as burimet tjera nuk kanë dhënë hollësi të tjera lidhur me incidentin.

Lajme të tjera:

Xhemail Mustafa: Beogradi po e sfidon me arrogancë bashkësinë ndërkombëtare me luftë në Kosovë

Polici civil provokoi shetitjen protestuese në Kaçanik

Mitrovicë: Lëvizje të forcave serbe

Edicioni i katërt (Ora 19:00)

Lajm i plotë:

Me nderime e dhembje të madhe u varrosën 9 të rinjtë e Sllupit të Deçanit

Sot në varrezat e fshatit Sllup të Deçanit, me nderime e dhembje të madhe u bë varrimi i Selman Brahim Lokajt, Hajdar Lokajt, Bekë Hadërgjonajt, Astrit Hadërgjonajt, Tahir Mazrekajt, Gjemajl Mazrekajt, Bekim Mazrekajt, Beqë Lokajt dhe Imer Isuf Lokajt, që të gjithë nga fshati Sllup, të cilët u vranë mizorisht nga ushtria serbe më 23 prill.

Në varrim morën pjesë rreth 10. 000 qytetarë nga komuna e Deçanit dhe anë të ndryshme të Kosovës që arritën në Sllup përkundër shtetrrethimit të hekurtë të forcave serbe në një pjesë të Deçanit, njofton Komisioni për Informim i LDK-së në Deçan.

I fundit nga të ndjerët u nda Musa Berisha, kryetar i Nënkëshillit të KMDLNJ-së në Deçan.

Lajme të tjera:

Sot në fshatin Dujakë u varros Veli Noci

Delegacioni i LDK-së vizitoi familjet e viktimave të terrorit serb në Hereç e në Dujakë

Forcat serbe granatuan dje dhe sot disa fshatra në Klinë

Nuk dihet asgjë për fatin e Xhavit Alijajt

Katër orë u rrah taksisti nga Gjakova

Të shtënat e fuqishme u dëgjuan në Gjakovë

Policia kindnapon dhe arreston fshatarët e Jabllanicës

Shtatë punëtorë në ujësjellësin e Radoniqit mbahen në vend të punës qe 48 orë

Hollësi lidhur me plagosjen e dy nxënësve Berisha nga Kliçina

U vendos një postbllok në objektin privat stomatologjik në Bishtazhin

Në komunën e Gjilanit edhe një shkollë e re

Foto: Papa Gjon Pali i Dytë

Vendi

FSK dërgon ekip në Gaza për vlerësimin e zonës së operimit

Published

5 hours ago

April 26, 2026

UBTNews

Forca e Sigurisë së Kosovës (FSK) ka dërguar një ekip në Gaza për të bërë vlerësimin e terrenit ku do të operojnë trupat e saj në kuadër të një misioni paqeruajtës ndërkombëtar.

Vendimi për dërgimin e ekipit është marrë nga komandanti i FSK-së, Bashkim Jashari, i cili ka autorizuar këtë vizitë me qëllim përgatitjen e terrenit për dislokimin e kontingjentit kosovar.

Sipas njoftimit, gjatë qëndrimit në Gaza, ekipi i FSK-së do të bëjë vlerësimin paraprak të kushteve në terren dhe do të koordinojë aktivitetet që lidhen me vendosjen e trupave. Kontingjenti i FSK-së pritet të operojë në kuadër të misionit paqeruajtës të Forcave Stabilizuese Ndërkombëtare (ISF).

Gjatë vizitës, delegacioni ka zhvilluar takime me autoritete lokale përgjegjëse për administrimin e Gazës, si dhe me përfaqësues të Qendra Koordinuese Civilo-Ushtarake, e cila vepron nën mbikëqyrjen e strukturave ndërkombëtare të paqes, në përputhje me rezolutat e Kombeve të Bashkuara.

Në këto takime është diskutuar për integrimin e kontingjentit të FSK-së në operacionet ndërkombëtare, zhvillimin e misioneve të përbashkëta, si dhe koordinimin e mbështetjes logjistike.

FSK ka theksuar se mbetet e përkushtuar për të kontribuar në paqe dhe stabilitet global, në bashkëpunim të ngushtë me aleatët ndërkombëtarë, në veçanti me Shtetet e Bashkuara të Amerikës, duke synuar forcimin e partneriteteve strategjike dhe promovimin e sigurisë kolektive.

Lajmet

REL: Të shtëna në darkën e korrespondentëve të Shtëpisë së Bardhë: Trump evakuohet, i dyshuari arrestohet

Published

5 hours ago

April 26, 2026

UBTNews

Paniku shpërtheu në darkën vjetore të Shoqatës së Korrespondentëve të Shtëpisë së Bardhë në mbrëmjen e 25 prillit, pasi u dëgjuan të shtëna pranë një pike sigurie jashtë sallës së banketit, duke detyruar evakuimin e presidentit Donald Trump dhe qindra të ftuarve të profilit të lartë.

Agjentët e shërbimit sekret amerikan e larguan me shpejtësi Trumpin nga skena, ndërsa forcat e rendit vërshuan në vendngjarje me armë në duar.

Të pranishmit, të veshur me rroba formale, u panë duke u fshehur nën tavolina në një gjendje të mbizotëruar nga hutimi dhe frika.

Autoritetet konfirmuan se një i dyshuar u arrestua pranë zonës kryesore të kontrollit. Presidenti më vonë e identifikoi atë si një burrë 31-vjeçar nga Kalifornia, që besohet të ketë vepruar i vetëm.

Kaos në “Nerd Prom”

Ngjarja ndodhi pak pas fjalëve hapëse dhe gjatë shërbimit të darkës, pak përpara se Trump ta mbante fjalimin kryesor në këtë gala, një ngjarje e rëndësishme në kalendarin politik dhe mediatik të Uashingtonit.

Një reporter i Radios Evropa e Lirë në vendngjarje përshkroi se kishte dëgjuar disa shpërthime të forta, të ndjekura nga thirrje “të shtëna me armë”, gjë që shkaktoi panik në gjithë sallën.

Derisa Policia e rrethoi hotelin, helikopterët fluturonin mbi të dhe njësitë taktike siguruan perimetrin.

Në një deklaratë në vonë në Shtëpinë e Bardhë, Trump tha se kishte dashur të qëndronte në darkë, por ishte lejuar nga sigurimi.

Ai konfirmoi se i dyshuari ishte i armatosur me disa armë dhe se të paktën një oficer policie u qëllua, por shpëtoi falë jelekut antiplumb.

“Ai u qëllua nga një distancë shumë e afërt me një armë shumë të fuqishme, por jeleku e kreu punën e vet”, tha Trump, duke e përshkruar gjendjen e oficerit si stabile dhe me “gjendje të mirë shpirtërore”.

Hetimi

Zyrtarët thanë se një hetim është duke u zhvilluar, dhe se agjentë federalë që po i marrin në pyetje dëshmitarë dhe po kontrollojnë banesën e të dyshuarit.

Ushtruesi i detyrës së prokurorit të përgjithshëm, Todd Blanche, tregoi se ngritja e aktakuzës së shpejti, ndërsa drejtori i FBI-së, Kash Patel, tha se hetuesit po punojnë për të ndërtuar një pasqyrë të plotë të ngjarjes.

Trump tha se autoritetet besojnë që i dyshuari ishte veproi i vetëm dhe se nuk ka shenja të menjëhershme për ndonjë komplot më të gjerë apo lidhje të huaja.

Të shtënat shtojnë shqetësimet e vazhdueshme për dhunën politike në Shtetet e Bashkuara.

Trump u ka mbijetuar më parë tentativa për atentat, përfshirë një atentati gjatë një tubimi të fushatës në Pensilvani në vitin 2024.

Pavarësisht ndërprerjes, presidenti tha se darka do të riplanifikohet brenda një muaji./REL/

Lajmet

DITARI: Çfarë lajmesh kemi lexuar në çdo 25 prill, në vitet nëntëdhjetë

Published

1 day ago

April 25, 2026

UBTNews

25 prill 1994

Lajm i plotë:

Forcat serbe vranë Naim Bajramin në Miratoc të Preshevës

Naim Bajrami (1969) nga fshati Llashticë i komunës së Gjilanit, u vra mbrëmë nga forcat serbe në afërsi të fshatit Miratoc të Preshevës.

Tash për tash nuk dihen detaje të tjera rreth vrasjes.

Në Komisionin për Informim të Degës së LDK-së në Gjilan thonë se Naim Bajrami para disa ditësh kishte dorëzuar një revole në policinë serbe për të shpëtuar babain e tij, Rrahmanin, i cili po torturohej nga policia.

Javën që shkoi policia sërish e bastisi shtëpinë e të ndjerit, mirëpo nuk gjeti kurrëfarë arme.

Në fshatin Llashticë gjatë aksionit të bastisjeve e torturimeve nën pretekst të mbajtjes së armëve pa leje, janë rrahur shumë persona.

Besohet se Naim Bajrami deshi të ikte nga Kosova nga frika e arrestimit dhe e torturimit në polici.

I ndjeri nuk kishte pasaportë.

Supozohet se ai u vra në përpjekje për ta kaluar kufirin e Serbisë me Maqedoninë.

Kufoma e të ndjerit është dërguar mbrëmë vonë në Qendrën Mjekësore në Gjilan, e cila po mbahet nën kontroll të rreptë nga policia.

Naim Bajrami ishte i martuar dhe baba i dy fëmijëve.

Kjo është viktima e dytë në këtë vendkalim kufitar në dy vitet e fundit. Më 1992 ishte gjetur i vrarë Nazim Hajdari nga fshati Stubëll e Ultë i Vitisë, ndërsa rrethanat e vrasjes së tij nuk janë sqaruar ende.

Lajm i plotë:

Klinton: Na brengos statusi i shqiptarëve në Kosovë

Me rastin e vizitës së kryeministrit grek, Andreas Papandreu, në Uashington, në një knferencë për gazetarë në Shtëpinë e Bardhë të premten e kaluar, një gazetar grek i shtroi pyetjen presidentit të SHBA, Bill Klinton, për pozitën e minoritarëve grekë në Shqipëri, përkatësisht të tensionit midis Shqipërisë dhe Greqisë që u ngrit pas vrasjes kriminale të dy ushtarëve shqiptarë nga komandosët që hyn nga territori i Greqisë.

“Çfarë mendoni për çështjen e tensionit midis Greqisë dhe Shqipërisë dhe a keni diskutuar (gazetari grek mendon për takimin me Papandreun – v.j.), çështjen e statusit të minoritarëve grekë në Shqipëri dhe, siç po thuhet, shkeljen e të drejtave të njeriut?”.

Megjithëse pyetja ishte për minoritarët grekë në jug të Shqipërisë, presidenti amerikan tërhoqi vëmendjen për statusin e shqiptarëve në Kosovë. Duke iu përgjigjur pyetjes, presidenti Klinton tha:

“Së pari mendoj se Greqia po tregon një vetëpërmbajtje dhe një gjykim të arsyeshëm. Natyrisht se përcjellim pozitën e minoritetit grek, por jemi të brengosur për statusin e shqiptarëve në Kosovë”, njofton “Bujku” i sotëm.

Presidenti i SHBA më tej tërhoqi vërejtjen për rrezikun e shpërthimit të një konflikti në rjaonin e tensionuar dhe theksoi se në përputhje me situatën janë ndërmarrë masa nga mekanizmat ndërkombëtare për izolimin e konfliktit aktual në Bosnjë, që ai të mos zgjerohet. Ai po ashtu bëri thirrje që të ulen tensionet dhe të ketë një mbikëqyrje të të drejtave të minoritaëve.

“I gjithë ky rajon është një bombë e kurdisur për ç’arsye ia kemi kushtuar kujdesin e deritashëm brenda autorizimeve të Kombeve të BAshkuara dhe të NATO-s në mënyrë që ta izolojmë konfliktin. Mendoj se duhet që të ftohen gjakrat dhe retorika e nxehtë dhe të vëgzhgohen të drejtat e minoritetit në mënyrë që të mos lejohet që lufta që po zhvillohet në Bosnjë të bartet në rajonet përreth ku tensionet po thellohen”, tha presidenti Klinton.

Lajme të tjera:

Planifikohet regjistrimi i 25 000 nxënësve në shkollën e mesme

Në Prishtinë ndiqen të rinjtë për rekrutim

U meremetua rruga dhe u hap një ambulancë në lagjen “Emshiri” të Prishtinës

Një ish-inspektor shqiptar i sigurimit u rrah në SPB-në e Pejës

Policia serbe u largua nga objekti në Bellaqevc të Madh

U ngrit akuza kundër Ramiz Alisë

Bashkësia Shqiptare protestoi përballë ambasadës greke në Bruksel

U përurua fusha e futbollit në lagjen Kodra e Trimave

Në Prizren policia plaçkiti tregun e plaçkave

Shkatërrim total gjyqeve serbe në Kosovë

25 prill 1995

Lajmet kryesore:

Gjyqi penal ndërkombëtar për krime në ish-Jugosllavi njofton për hetimet ndaj Karaxhiqit, Mlladiqit dhe Stanishiqit

Klaus Kinkel: Nuk bën ta harrojmë Kosovën dhe Maqedoninë

Arrin në Kosovë një delegacion i Kongresit Amerikan

Suzane Auer vizitoi PFK-në

Mësimi u pengua në disa shkolla në Prizren, Pejë dhe Prishtinë

Policia pengoi një manifestim në Përlepnicë të Gjilanit

Policia kërcënoi pronarin e shtëpisë-shkollë

Udhëheqësit e Kaçanikut vazhdojnë të mbahen në paraburgim

Në Tetovë mbahet nesër protestë kundër procesit të montuar ndaj rektorit Sylejmani

“Bujku” nuk u botua as sot për shkak të shantazheve të serbëve

Në Klinikën e Gjinekologjisë dhe të Akusherisë shtohet numri i vdekjeve

Dhuna e përditshme në Kosovë

Bashkëfshatarët e Vrapçanit në Prishtinë përkrahin protestën në Tetovë

NATO u propozua për çmimin Nobel

Lajm i plotë:

Në kufirin ndërmjet Shqipërisë dhe Malit të Zi u vra edhe një shtetas shqiptar

Në zonën kufitare mes Shqipërisë e Malit të Zi, gjegjësisht në rajonin e quajtur Brigje (Malësi e Madhe), më 23 prill 1995, rreth orës 03,05, patrulla e ushtrisë së Jugosllavisë së vetëshpallur, vrau shtetasin shqiptar Kolë Lekë Ivanaj (27) nga fshati Vrrakë i rrethit të Shkodrës.

Komisioni i përbashkët i Shqipërisë dhe Malit të Zi për zgjidhjen e incidenteve kufitare, nga vendi i ngjarjes konstatoi se tre shtetas shqiptarë paskan kaluar kufirin në mënyrë të paligjshme në këtë sektor dhe se rojet kufitare paskan shtirë në ta, derisa po tentonin të ktheheshin në territorin shqiptar, më ç’rast u vra Kolë Ivanaj, njofton TVSH.

25 prill 1997

Lajmet kryesore:

Konferencë për gazetarë e kryetarit të Republikës së Kosovës, dr. Ibrahim Rugova

Dr. Zejnullah Rrahmani: Vonesat e pagave pasojë edhe e përplasjeve politike

Adem Demaçi bisedoi me diplomatin gjerman Prygel

Sali Berisha: Grupet rebele dhe aleanca e PS me to – pengesë kryesore për zgjedhje

Azem Hajdari: Ministri Vukaj të distancohet nga “komitetet e shpëtimit”

Banda e armatosur sulmoi komesariatin e policisë në Elbasan

Leka Zogu vizitoi Vlorën

Abaz Ermenji: “S’mund të ketë zgjedhje kur jehojnë armët”

Për armëmbajtje u dënua me 5 muaj burg

U lirua nga burgu Muhamet Latifi

Dhuna e përditshme në Kosovë

Kërkohet Afrim Mustafa nga Gjilani

Lajm i plotë:

Dy të vrarë në Përmet

Prishtinë, 25 prill (QIK)

Dje në mengjes në qytetin e Përmetit u gjetën të vrarë nga armë zjarri dy persona, at e bir, 60 dhe 40 vjeç.

Burime të komisariatit të policisë së rrethit, konfirmuan se personat në fjalë janë qëlluar me armë zjarri. Ende nuk dihen motivet dhe autorët e këtij krimi.

Nga fillimi i trazirave në këtë reth janë vrarë 16 vetë dhe janë plagosur 75 të tjerë.

Ndërkaq, disa kilometra larg pikës kufitare të Kakavijës, një grup personash të armatosur kanë sulmuar një autobus që udhëtonte në drejtim të Tiranës dhe kanë vrarë një banor të fshatit Selenicë të rrethit të Vlorës, njofton ATSH.

Lajm i plotë:

U maltretua në polici pse u gjet në kafenenë ku u vra zv/ministri serb i policisë

Prishtinë, 25 prill (QIK)

E pajisur me autoblinda, një ekspeditë e policisë serbe ndërhyri më 22 prill në shtëpinë e Rexhep Rexhepit në fshatin Peran, njofton KI i Degës së LDK-së në Podujevë.

Rexhepi u dërgua në stacionin e policisë në Podujevë dhe u maltretua rreth tri orë. Pretekst për këtë ishte se ai kishte qenë rastësisht në lokalin “Mama mia” në Beograd në momentin kur u vra zëvendësministri serb i policisë Radovan Stojiçiq.

Policia e urdhëroi atë të mos largohej nga shtëpia, sepse do ta marrë sërish në pyetje.

25 prill 1998

Edicioni i parë (Ora 12:30)

Lajm i plotë:

Rifilloi sulmi kundër Baballoqit

Gjendja në territorin e komunës së Deçanit po rëndohet nga dita në ditë. Mbrëmë forcat ushtarko-policore kanë shtëna nga armët e lehta edhe nga artileria e rëndë. Si pasojë e kësaj, prej dje edhe fshati Baballoç ka mbetur pa rrymë elektrike nga se forcat serbe kanë granatuar trafon e këtij fshati. Pas prishjes së trafos, është dëmtuar dukshëm edhe rrjeti i tensionit të lartë të rrymës elektrike. Kjo ka futur shqetsim tek qytetarët që kanë mbetur në mbrojtje të fshatit, e po ashtu të njëjtit kanë mbetur edhe pa informim.

Nga disa persona që kanë dalë nga shtetrrethimi i fortë ushtarako-policor, njoftohet se deri dje janë dëmtuar pjesërisht rreth 20 shtëpi të fshatit. Ata kanë treguar se në bregoren e fshatit që konsiderohet si pikë strategjike, vazhdimisht po gjuajnë snajpersitët serbë, ndërsa në Sukën e Baballoçit është vendosur një top me tytë të kthyer në drejtim të fshatit dhe 4 kamionë ushtarakë.

Gjatë ditës së djeshme në këtë anë kanë shkuar përforcime ushtarake, por edhe përkundër kësaj, burrat dhe popullata po i mbrojnë pragjet e shtëpisë së vet.

Fshati Baballoq u sulmua edhe sot që nga ora 4,10 minuta, me të shtëna nga të gjitha llojet e armëve.

Forca të shumta ushtarake gjenden në zonën kufitare mes Kosovës e Shqipërisë, të cilat që nga mëngjesi po shtinë edhe me armë të rënda, njofton KI i LDK-së në Deçan.

Lajm i plotë:

Shumë deçanas në mesin e të ekzekutuarve nga ushtria jugosllave

Në mesin e 23 të vrarëve nga ana e ushtrisë jugosllave në kufirin shqiptaro-shqiptar, dyshohet se ka edhe të vrarë nga komuna e Deçanit. Për numrin dhe identitetin e tyre edhe më tutje nuk ka të dhëna nga pamundësia e qarkullimit të njerëazve dhe të informatave nga vendi i ngjarjes, njofton KI i LDK-së në Deçan.

Lajm i plotë:

Qelë Deskun, nuk e vrau UÇK siç pretendon Beogradi, por policia serbe

Qelë Shaban Desku (41) nga Kliçina u vra dje nga policia serbe. KI i Degës së LDK-së në Pejë njofton se me rastin e ndërhyrjes së policisë në këtë fshat, Qela u plagos rëndë derisa po dilte për të parë se ç’po ndodhte me nxënësit që gjendeshin në shkollë. Një gjysmë orë pasi u qëllua me armë nga policia, ai vdiq, pasi për shkak të bllokadës së policisë, askush nuk pati mundësi t’i jipte asnjë ndihmë.

Në këtë mënyrë hidhen posht pretendimet e mediumeve dhe të policisë serbe se kinse Qelë Deskun e vranë dje terroristët shqiptarë për shkak se ai ishte lojal ndaj Serbisë dhe pse ai kishte marrë pjesë në referendumin serb kundër ndërmjetësuesve ndërkombëtarë në zgjidhjen e çështjes së Kosovës.

Dëshmitarët nga Kliçina dhe Jabllanica thonë se trupin e pajetë të Qelë Deskut, baba i pesë fëmijëve, e mori një automobil i ndihmës së shpejtë dhe atë deri sot paradite ende nuk e ka marrë familja.

Në këtë njoftim jipen detaje të ndërhyrjes së mbi 100 policëve gjatë ditës së djeshme në Kliçinë, Jabllanicë dhe Rosujë. Gjatë ndërhyrjes policia plagosi nxënësit Afrim H. Berishën (17) e Burim A. Berishën (17). Afrimi u plagos në dorën e majtë, ndërsa i dyti në këmbën e majtë.

Policia shtiu me armë edhe kundër Naim B. Abazit (22) dhe Jeton M. Abazit (17) nga Jabllanica. Këta të dytë pasi u kapën nga policia, u rrahën në vend dhe pastaj u dërguan në postkomandën e policisë, ku sërish u keqtrajtuan rëndë fizikisht, e pastaj u liruan.

Gjatë aksionit serb u bastisën shtëpitë e Ramiz e Mehmet Zogajt në Kliçinë, ndërsa në Jabllanicë të Leshanit u bastisën shtëpitë e Tahir e Ramë Abazit, Zenel Atashit, Hamdi Senikut dhe Haxhi Berishës, në të cilat u demolan shumë orendi.

U rrah nga policia edhe Fekë B. Atashi nga Jabllanica, i cili, në të kthyer nga Peja, u ndalua para postkomandës në Kliçinë dhe u keqtrajtua në prani të anëtarëve të familjes që po udhëtonin me të.

Gjatë ndërhyrjes në këto fshatra, që zgjati nga ora 12 deri në orën 15, forcat policore serbe shtinë pandërprerë me armë zjarri, duke rrezikuar banorët e pafajshëm. Ndërsa, nxënësit e shkollës fillore, që nuk mundën të largohen nga shkolla, u strehuan deri në fund të aksionit në një shtëpi në afërsi.

Lajm të tjera:

Policët malazezë paralajmërojnë tërheqjen nga policia serbe në Deçan

Paralizim i furnizimit me bukë e gjëra ushqimore

Ali Hasani i kindnapuar u paraqit nga Prizreni

Vërshim i ushtrisë jugosllave në Gjakovë dhe rrethinë

Regjimi serb dhe ushtria jugosllave duan të mbajnë të fshehura aksionet kriminale në Deçan dhe në Gajkovë

Në vendet e sulmuara nuk ka shkuar ende asnjë përfaqësues republikan

MPJ e Shqipërisë: “Incidentet kufitare të pretenduara nga qeveria e Beogradit – krejtësisht të pavërteta”

Territori i Klinës po mbahet i rrethuar nga forcat ushtarake e policore serbe

U arrestua kryetari i Degës së LDK-së në Klinë

Policia rrahu dhe plaçkiti një qytetar shqiptar

Edicioni i dytë (Ora 15:00)

Lajmet kryesore:

Përforcime të vazhdueshme të forcave ushtarake e policore në Gjakovë

Forca ushtarake vazhdojnë të vijnë nga Serbia në Kosovë

Vushtrri: Ilir Merovci u plagos në afërsi të stacionit të policisë në fshatin Druar

Rubin: Situata në Kosovë nuk mund të durohet

SHBA-të do të angazhohen për forcimin e sanksioneve ndaj Beogradit

Deklaratë e presidencës së UE-së për Kosovën

Vedrin: “Arsyetim i pasuksesshëm i autoriteteve në Beograd”

Qëndrimi italian për çështjen e Kosovës

Turqia e gatshme të dërgojë trupat në forcat eventuale ndërkombëtare në Kosovë

Ushtria e Shqipërisë në gjendje gatishmërie

Një shtab i posaçëm orerativ shqiptar vepron në zonat kufitare

Kukës: Ushtria jugoslave i solli nga fshatrat e Deçanit dhe i ekzekutoi në Kosharë shqiptarët

Kryetari Rugova mori pjesë në takimin me kryetarët e degëve të LDK-së

Armatosen edhe serbët e Klinës

Në Kamenicë serbëve u shpërndahen armë dhe uniforma

Në Suharekë armatosen civilët serbë

Në Gazimestan të Prishtinës u vendosën forca të mëdha ushtarako-policore

Paramilitarët serbë të Istogut thërrasin për mobilizim

Stërvitje të ushtrisë në fshatrat e Vushtrisë

Ushtarët serbë provokuan dy qytetarë shqiptarë

Edhe sot, forca të shtuara të policisë në Mitrovicë

Civilë të shumtë serbë po armatosen në Gjilan

Forca ushtarake në Bërnicë – vazhdojnë të digjen malet në Barilevë

Në Shtime prani e madhe e policisë serbe

Në njësinë speciale të policisë në Hajvali është vërejtur edhe krimineli serb Arkan

Mijëra qytetarë morën pjesë edhe në ditën e gjashtëmbëdhjetë të manifestimeve protestuese

Oficeri franzez, i akuzuar për spiunazhë, udhëhoqi trupat franceze gjatë operacioneve paqësore në Shqipëri

Manipulime të mëdha me numrin e votuesve në referendumin serb në Kosovë

Një qytetari shqiptar nga Pozhorani policia ia plaçkiti 7. 000 DM

Edicioni i tretë (Ora 15:45)

Lajm i plotë:

Ushtria jugosllave njofton emrat e dhjetë shqiptarëve të vrarë në Kosharë

Në një njoftim me titull “Identifikohen trupat e dhjetë terroristëve”, agjencia serbe e lajmeve Tanjug transmeton sot një kumtesë të gjyqit ushtarak të Nishit në Serbi, përmes së cilës njoftohen emrat e dhjetë shqiptarëve të vrarë gjatë aksionit të ushtrisë jugosllave më 23 prill në karakollin e Kosharës mes Kosovës e Shqipërisë.

Në kumtesë thuhet:

“Gjyqtari hetues i Gjyqit ushtarak në Nish, nënkoloneli Radenko Miladinoviq, ka kumtuar sot se menjëherë pas incidentit kufitar në rajonin e karakollit ‘Kosharë’ më 23 prill, ka dalë në vendin e ngjarjes dhe ‘në rajonin e gjerë’ në mes gurëve kufitarë C-3 dhe C-2/10 në kufirin jugosllavo-shqiptar, me hetimin e terrenit dhe ka gjetur 19 kufoma dhe një sasi të madhe armësh, municioni dhe pajisjesh ushtarake të prodhimit të huaj.

Në kumtesë thuhet se me njohjen nga ana e personave të arrestuar dhe në bazë të letërnjoftimeve të gjetura u vërtetua se bëhet fjalë për këta të vrarë:

Shefqet Selim Aliaj, nga fshati Hereç i Gjakovës, i lindur më 1969;
Bekim Sali Aliaj, nga fshati Hereç;
Hasan Bajram Tahiraj, nga fshati Hereç;
Skender Qazim Hajdaraj, nga fshati Hereç, i lindur më 1969;
Gazmend Hasan Ramaj, nga fshati Hereç, i lindur më 1972;
Ukë Misin Shabani, nga fshati Hereç;
Sadik Lush Alijaj, nga fshati Hereç, i lindur më 1961,
Hasan Tahir Dinaj, nga fshati Hereç;
Hajdar Ramadan Taçaj (ndoshta Thaçaj), nga fshati Hereç, i lindur më 1972;
Vehbi Asllan Hasanaj, nga Hereçi.

Në kumtesë thuhet se gjatë shikimit në vendin e ngjarjes janë gjetur edhe letërnjoftimet e këtyre personave:

Gëzim Shefqet Haredinajt, i lindur më 1976, nga fshati Sllup i Deçanit,
Arben Bajram Hadërgjonaj, nga fshati Sllup, i lindur më 1978,
Beqë Binak Lokaj, nga fshati Sllup, i lindur më 1968,
Imer Isuf Lokaj, nga fshati Sllup, i lindur më 1970,
Bekim Shefqet Mazrekaj, nga Deçani, i lindur më 1976,
Xhemajl Sejdi Mazrekaj, nga Deçani, i lindur më 1969.

Në kumtesë thuhet se është e mundshme që këta persona të jenë vrarë në ngjarjen e përmendur. Puna e identifikimit vazhdon.

Në kumtesë thuhet se janë arrestuar Gazmend Mustafë Tahiraj, profesor i gjuhës angleze nga fshati Hareç, i lindur më 1970 dhe Ibër Sherif Metaj, bujk, nga fshati Hereç i lindur më 1961.

Këta dy persona janë trajtuar nga pikëpamja kriminalistike dhe kundër tyre është në proces procedura penale në Gjyqin ushtarak në Nish.

Gjyqtari ushtarak ka saktësuar se në rastin e shikimit në vend të ngjarjes janë gjetur këto armë, municione dhe pajisje ushtarake të prodhimit të huaj: 7 pushkomitralozë të kalibrit 7,62 mm, 5 pushkë gjysmautomatike të kalibrit 7,62 mm, 5 pushkë automatike të kalibrit 7,62 mm, 2 minahedhës dore, 2 mitralozë PKT, 67 bomba dore, 123 ndezës të bombave, 16 granata të minahedhësve, mbi 20 mijë copë municon të kalibrave të ndryshëm, 1 shtrat për minahedhës 60 mm dhe arkëz për pushkomitraloz.

Për shkak se ngjarja ka ndodhur në një hapësirë të gjerë dhe vështirë të kalueshme, po vazhdohet me gjurmimin e terrenit, thuhet në kumtesë.

Siç shihet, në këtë kumtesë nuk figuron askund emri i Naim Malokut, i vetmi emër që është përmendur në të gjitha njoftimet e Beogradit, e nuk përmenden as emrat e disa ish-eprorëve ushtarakë shqiptarë në ushtrinë e ish-Jugosllavisë, për të cilët ka barë zhurmë të madhe propaganda serbe pas incidentit në Kosharë.

Lajme të tjera:

Forca të mëdha policore serbe shkuan nga Klina drejt Skënderajt

“Frankfurter Algemaje Cajtung”: I domosdoshëm intervenimi ushtarak në Kosovë

Kinkel: “Milosheviqin do ta detyrojmë të hyjë në dialog”

Përfaqësuesit e LRDK-së u takuan me diplomatë të huaj

Edicioni i katërt (Ora 19:00)

Lajmet kryesore:

Kryetari Rugova priti diplomatë të lartë italianë

Dëshmi: Shqiptarët u ekzekutuan në Zharet e Batushës, 4 km në brendësi të Kosovës

Forcat ushtarako-policore serbe sulmuan sot Morinën

Trupat e viktimave të vrarë u dërguan nga Gjakova në Hereç

Në Prizren rafale armësh dhe mobilizim i serbëve

Në Prizren vazhdojnë shëtitjet protestuese

Edicioni i pestë (Ora 20:10)

Lajm i plotë:

Forca të shumta ushtarake arrijnë në mbrëmje në Deçan

Forca të mëdha të ushtrisë jugosllave kanë arritur sonte në mbrëmje në Deçan, njofton Komisioni për Informim i Degës së LDK-së në Deçan.

Rreth orës 18:00 nëpër qendër të Deçanit parakaluan 12 tankse dhe disa autoblinda të ushtrisë jugosllave dhe duke kënduar me megafon këngë çetnike, si këngën famëkeqë “Marsh në Drinë”, shkuan në manastirin e Deçanit.

Në orën 19:30 nëpër qendrën e qytetit parakaluan edhe 13 tankse dhe 40 kamionë me ushtarë. Konvoji shkoi e u vendos në karakollin e ushtrisë në Hulaj, afër Deçanit.

Ndërsa në drejtim të Gjakovës shkoi një autoblindë, dy tankse dhe disa automjete të tjera.

Gjatë ditës së sotme, në Baballoq pati sulme të herëpahershme me armë të ndryshme.

Nga Deçani njoftohet se sot në Gjakovë policia kindnapoi Hysen Çallakajn nga Baballoqi dhe Hysen Kasumajn, Mehmet Agajn e Gani Rexhajn. Për ta nuk dihet asgjë.

Rreth orës 12:00 policia ka rrahur Demë Halil Cacajn dhe Muharrem Bajramajn.

Foto: Presheva