Dje, në moshën 71-vjeçare, u nda nga jeta një prej figurave më të mëdha të artit dhe kulturës shqiptare, aktori, regjisori dhe profesori Enver Petrovci.

Lajmi i ndarjes së tij nga jeta ka sjellë dhimbje dhe pikëllim të madh jo vetëm për komunitetin artistik, por edhe për publikun e gjerë që e ka ndjekur në teatër, film dhe televizion për dekada me radhë.

Ceremonia e varrimit do të zhvillohet sot, duke filluar nga ora 17:00, në varrezat e qytetit të Prishtinës, ku familja, miqtë, kolegët dhe dashamirët e artit do t’i japin lamtumirën e fundit.

Në një njoftim zyrtar të publikuar nga Teatri Kombëtar i Kosovës, është bërë e ditur se homazhet për Petrovcin do të mbahen nga ora 13:30 deri në 15:30, ku qytetarët dhe figura të njohura të artit do të kenë mundësinë të shprehin respektin dhe mirënjohjen e tyre.

Pas homazheve, në orën 15:30, zhvillohet mbledhja komemorative, e cila pritet të jetë një përkujtim solemn i jetës dhe veprës së tij të pasur.

Enver Petrovci ka lënë gjurmë të pashlyeshme në kulturën shqiptare. Ai ishte ndër themeluesit e Teatrit Kombëtar të Kosovës dhe një personalitet që kontribuoi fuqishëm në zhvillimin e artit dramatik.

Përveç roleve të paharrueshme, Petrovci ka ndikuar edhe në breza të tërë aktorësh përmes punës si pedagog dhe regjisor. Ikja e tij la një boshllëk në kulturën shqiptare, por trashëgimia artistike e tij do të mbetet gjithmonë frymëzim për brezat që vijnë. /A.Z/UBT News/

Ministria e Kulturës ka reaguar me rastin e vdekjes së aktorit dhe regjisorit, Enver Petrovci duke e vlerësuar figurën se Petrovcit si një emër të madh të skenës sonë.

“Me dhimbje të thellë morëm lajmin për ndarjen nga jeta të aktorit dhe regjisorit të shquar, Enver Petrovci. Ai ishte më shumë se një emër i madh i skenës sonë: ishte zëri, fytyra dhe shpirti i shumë roleve që shënjuan teatrin, filmin dhe kujtesën kulturore të vendit tonë. Jeta e tij ishte e lidhur ngushtë me artin dhe publikun. Përmes talentit të pashtershëm, ai i dhuroi gjeneratave të tëra emocione, reflektim dhe dashuri për kulturën”, thuhet në telegram ngushëllimin e MKRS-së.

Sipas kësaj ministrie, aktori Enver Petrovci ka lënë pas një trashëgimi që do të frymëzojë përherë.

“Në emër të Ministrisë së Kulturës, dhe në emrin tim personal, shpreh ngushëllimet më të sinqerta për familjen Petrovci, miqtë, kolegët dhe gjithë komunitetin artistik. Kujtimi për të dhe vepra e tij do të mbeten të gjalla përjetësisht. Qoftë i përjetshëm kujtimi të”, thuhet në telegram.

Enver Petrovci ka ndërruar jetë në moshën 71 vjeçare./S.K/KP/

Për herë të parë, veshjet tradicionale shqiptare u prezantuan në Oktoberfest të Mynihut, duke i dhënë një ngjyrë të veçantë festivalit më të madh të birrës në botë.

Ky parakalim historik u bë të dielën, më 21 shtator 2025, dhe u shoqërua me entuziazmin e shqiptarëve që jetojnë në Gjermani, si dhe me kureshtjen e mijëra vizitorëve nga e gjithë bota që marrin pjesë çdo vit në këtë festë.

Në kuadër të parakalimit të Oktoberfest, i cili njihet për shfaqjen e kostumeve popullore nga vende të ndryshme, përfaqësues të komunitetit shqipfolës parakaluan krenarë me veshje tradicionale, kostume të burrave dhe grave nga treva të Shqipërisë, Kosovës dhe viseve shqiptare.

Flamuri kuqezi dhe motivet kombëtare e bënë edhe më të dukshme dhe mbresëlënëse pjesëmarrjen shqiptare në këtë ngjarje prestigjioze.

Ky prezantim nuk ishte i rastësishëm, u mundësua falë përkushtimit të “Iliria München”, e cila prej vitesh punon në ruajtjen dhe promovimin e kulturës shqiptare në Gjermani. Përmes këtij organizimi, shoqata jo vetëm që arriti të vendosë shqiptarët në skenën ndërkombëtare të kulturës popullore, por edhe të krijojë ura miqësie mes komunitetit shqiptar dhe atij gjerman.

Sipas raportimit të Deutsche Welle, pjesëmarrja e shqiptarëve në këtë parakalim u prit me shumë interes nga publiku, duke e kthyer momentin në një festë të vërtetë të identitetit dhe krenarisë kombëtare.

Për shqiptarët që jetojnë në diasporë, ky ishte një rast i veçantë për të treguar se traditat dhe kultura shqiptare janë të gjalla dhe të denja për t’u prezantuar në skenat më të mëdha botërore.

Me këtë pjesëmarrje, shqiptarët shkruan një kapitull të ri në historinë e prezantimit të kulturës së tyre, duke e bërë Oktoberfest-in e këtij viti një ngjarje që do të mbahet mend gjatë.

Veshjet tradicionale, muzika dhe simbolet kombëtare sollën një aromë Ballkani në zemër të Gjermanisë, duke dëshmuar se kultura shqiptare është pjesë e mozaikut të pasur kulturor evropian. /A.Z/UBT News/

Baleti Kombëtar i Kosovës është duke hyrë në një kapitull të ri artistik me premierën e katërt të vitit 2025, të titulluar “Bach Alaturka & Bolero”, e cila do të prezantohet më 23 tetor 2025.

Ky projekt shënon një tjetër hap të rëndësishëm për ansamblin, duke sjellë një kombinim unik të muzikës klasike dhe moderne përmes një qasjeje koreografike të freskët dhe dinamike.

Shfaqja është e strukturuar në dy pjesë, ku muzika e Johann Sebastian Bach-ut interpretohet në frymë orientale përmes pjesës “Bach Alaturka”, ndërsa pjesa e dytë, “Bolero”, mbështetet mbi ritmin hipnotizues të kompozitorit francez Maurice Ravel.

Ky ndërthurim synon të krijojë një përvojë estetike të pazakontë për publikun, duke sjellë kontraste, energji dhe emocione të forta në skenë.

Në qendër të krijimit qëndron koreografi Mehmet Balkan, një emër i lidhur ngushtë me Baletin Kombëtar të Kosovës për më shumë se 15 vjet.  Përkrah tij, në procesin e provave dhe realizimit artistik, është edhe Lale Balkan, asistente dhe bashkëpunëtore e rregullt, e cila po ndihmon trupën e baletit të arrijë nivelin e lartë të interpretimit që kërkon ky projekt.

Ky bashkëpunim i ri pason sukseset e mëparshme të BKK-së, duke e vendosur trupën në një rrugëtim artistik gjithnjë në rritje.

Produksionet si “Lidhja”, “Dasma”, “Ngjyrat e Vallëzimit”, “Rite of Spring” e “Sisters” kanë dëshmuar profesionalizmin dhe përkushtimin e balerinëve, duke fituar vlerësime nga publiku dhe kritika.

Me premierën “Bach Alaturka & Bolero”, Baleti jo vetëm që vazhdon traditën për të sjellë krijime me standard të lartë, por forcon rolin si institucion kulturor i rëndësishëm, që ndërthur trashëgiminë muzikore botërore me vizionin e tij modern dhe inovativ. /A.Z/UBT News/