Ish-mesfushori i njohur gjerman, Toni Kroos, ka dalë hapur në mbështetje të Cristiano Ronaldos pas vendimit të kyçit portugez për të refuzuar një ndeshje lamtumirëse të propozuar nga Federata e Futbollit e Portugalisë.

Kroos ka kritikuar ashpër mënyrën se si po trajtohet pesë herë fituesi i “Topit të Artë” nga rrethi i kombëtares, përfshirë trajnerin dhe disa nga bashkëlojtarët.

“Jam i lumtur me vendimin e Cristiano Ronaldos. Sinqerisht, pas gjithçkaje që ka arritur për Portugalinë, nuk mendoj se ai i detyrohet dikujt një ndeshje lamtumirëse. Ajo që më zhgënjen është se si dikush që i ka dhënë kaq shumë vendit të tij mund të përfundojë duke u ndier i parespektuar nga njerëzit që duhet ta vlerësojnë”, deklaroi Kroos.

Gjermani nënvizoi se sakrificat dhe arritjet historike të Ronaldos me përfaqësuesen portugeze, duke rikujtuar trofetë e fituar dhe ndikimin e tij te brezat e rinj.

“Cristiano ka bërë sakrifica gjatë karrierës së tij, ka thyer rekorde dhe e ka udhëhequr Portugalinë në momente të vështira. Nuk mund t’i fshish të gjitha ato kontribute për shkak të një mosmarrëveshjeje apo sepse disa njerëz në dhomat e zhveshjes nuk e shohin më në të njëjtën mënyrë. Ajo që e kam të vështirë ta kuptoj është qëndrimi i disa njerëzve rreth kombëtares, përfshirë trajnerin dhe disa lojtarë. Respekti nuk duhet të varet kurrë nga fakti nëse je titullar apo qëndron në stol”, shtoi tutje ai.

Sipas Kroos, refuzimi i ceremonisë festive është një mesazh i fuqishëm nga ana e sulmuesit portugez.

“Mendoj se refuzimi i ndeshjes lamtumirëse dërgon një mesazh të fuqishëm. Cristiano nuk ka nevojë për një ceremoni nga njerëzit që e kanë bërë të ndihet i padëshiruar. Po të isha në vendin e tij, ndoshta do të merrja të njëjtin vendim. Portugalia duhet të jetë mirënjohëse për gjithçkaje që ai ka bërë, në vend që ta bëjë të ndihet sikur duhet të lutet për t’iu njohur meritat”, përmbylli Kroos. /E.A/

Albi Mall Superliga e Kosovës rikthehet sot me sfidën hapëse të xhiros së 13-të, ku Dukagjini pret Llapin në stadiumin “18 Qershori” në Klinë, me fillim nga ora 17:00.

Të dyja skuadrat hyjnë në këtë përballje me synime të qarta për të marrë pikët e plota. Klinasit synojnë të shfrytëzojnë faktorin e fushës vendase për rezultat pozitiv, ndërsa llapjanët udhëtojnë me ambicie për t’u kthyer me pikë nga ky transfer i vështirë.

Kjo është e vetmja ndeshje e programuar për ditën e premte, ndërsa xhiroja e 13-të vazhdon gjatë fundjavës me takimet e tjera:

E shtunë:

Feronikeli ’74 – Ballkani (13:00)

Gjilani – Malisheva (16:00)

E diel:

Vushtrria – Prishtina (13:00)

Drenica – Drita (13:00)

Vendimi i Cristiano Ronaldos për t’i dhënë fund karrierës me Kombëtaren e Portugalisë ka nxitur reagime të shumta nga figura të njohura të futbollit, ish-bashkëlojtarë dhe institucione sportive.

Në moshën 41-vjeçare, Ronaldo i jep fund një kapitulli të jashtëzakonshëm 23-vjeçar me fanellën e Portugalisë, duke u larguar si futbollisti me më së shumti paraqitje dhe gola në historinë e futbollit ndërkombëtar të meshkujve, me 234 ndeshje dhe 146 gola.

Ndër reagimet e para ishte ai i yllit brazilian Neymar, i cili komentoi në publikimin e Ronaldos me një fjalë të vetme: “Lenda” (Legjendë).

Një mesazh emocional erdhi edhe nga Pepe, ish-bashkëlojtari dhe miku i tij i ngushtë te Portugalia dhe Real Madridi. Ish-mbrojtësi portugez e përshkroi rrugëtimin e tyre të përbashkët me fjalët: “Ishte më shumë se futboll. Faleminderit për gjithçka, Cris”.

Edhe Manchester United, klubi ku Ronaldo shkroi një pjesë të rëndësishme të historisë së tij, i kushtoi një mesazh të veçantë, duke e uruar për karrierën e jashtëzakonshme me përfaqësuesen portugeze.

Në mesin e reagimeve ishte edhe ai i FIFA-s, përmes platformës së Kupës së Botës, e cila e falënderoi portugezin për kontributin e tij në skenën më të madhe të futbollit. Ndërkohë, ish-bashkëlojtari i tij te Manchester United, Rio Ferdinand, rikujtoi shifrat mbresëlënëse të Ronaldos: 234 paraqitje dhe 146 gola me Portugalinë.

Një reagim i veçantë erdhi edhe nga Federata Portugeze e Futbollit (FPF), e cila e cilësoi Ronaldon si lider frymëzues, shembull të përkushtimit dhe simbol të shpirtit të përfaqësueses portugeze.

Federata ka bërë të ditur se dëshiron të organizojë një ceremoni të veçantë nderimi për kapitenin historik, duke theksuar se lamtumira e tij nuk duhet të kalojë pa homazhin që meriton.

Gjatë aventurës së tij me Portugalinë, Ronaldo ishte protagonist i disa prej sukseseve më të mëdha në historinë e futbollit portugez. Ai e udhëhoqi përfaqësuesen drejt triumfit në Kampionatin Evropian të vitit 2016, si dhe në dy edicione të Ligës së Kombeve, më 2019 dhe 2025.

Përveç trofeve, ai vendosi edhe një rekord të veçantë, duke shënuar gola në gjashtë edicionet e Kampionatit Botëror në të cilat mori pjesë.

Cristiano Ronaldo nuk ishte thjesht një futbollist për Portugalinë. Për më shumë se dy dekada, ai ishte figura që mbante mbi supe pritshmëritë, presionin dhe shpresat e një kombi të tërë. Fanella me numrin 7 u shndërrua në një simbol të njohur në mbarë botën, ndërsa emri i tij u bë sinonim i një epoke të artë të futbollit portugez.

Tashmë, ai largohet nga përfaqësuesja duke lënë pas një trashëgimi të jashtëzakonshme, rekorde që vështirë se do të thyhen dhe momente që do të mbeten gjatë në kujtesën e tifozëve. Fanella mund t’i kalojë brezit të ardhshëm, por kontributi i Cristiano Ronaldos do të mbetet përgjithmonë pjesë e historisë së Portugalisë.

D.L

Ylli i futbollit botëror, Cristiano Ronaldo, ka njoftuar zyrtarisht të enjten pensionimin e tij nga Kombëtarja e Portugalisë në moshën 41-vjeçare, duke i dhënë fund një karriere të jashtëzakonshme 23-vjeçare në arenën ndërkombëtare.

Vendimi i portugezit vjen pas tensioneve të fundit me shtabin teknik gjatë ndeshjeve të Ligës së Kombeve, ku Ronaldo e braktisi grumbullimin pasi nuk u inkuadrua ndaj Norvegjisë, ngjarje që u pasua me një dënim simbolik financiar prej 255 eurosh nga Federata e Futbollit të Portugalisë.

Përmes një letre emocionale të publikuar në rrjetet sociale, CR7 konfirmoi se ka ardhur koha për t’ia dorëzuar fanellën me numrin 7 gjeneratave të reja.

Ka ardhur dita që unë të dorëzoj fanellën me numër 7 të ekipit tonë kombëtar. Nuk kam ndier kurrë se më përkiste vetëm mua, por për 23 vjet pata privilegjin dhe përgjegjësinë ta vishja, ta mbroja dhe ta mbaja me vete në stadiume anembanë botës. Sot, ka ardhur koha ta kaloj atë në të ardhmen,” ka shkruar ai.

Sulmuesi pranoi se ky vendim nuk ishte i lehtë, por shprehu krenari të madhe për trashëgiminë e lënë pas: “Nuk ishte vendim i lehtë. Një udhëtim që filloi në gusht të vitit 2003 dhe ndryshoi jetën time përgjithmonë ka marrë fund. Kur shikoj prapa, nuk shoh vetëm ndeshjet, golat apo rekordet. Shoh miliona portugezë që u bënë pjesë e jetës sime. Futbolli është shumë më i madh se një lojë – ka të bëjë me njerëzit”.

Që nga debutimi i tij në gusht të vitit 2003, Ronaldo e transformoi Portugalinë në një nga fuqitë më të mëdha të futbollit botëror. Në 234 paraqitje zyrtare, ai realizoi 146 gola – duke mbetur golashënuesi më i mirë në historinë e futbollit të kombëtareve.

Si kapiten i Portugalisë, Ronaldo udhëhoqi kombëtaren e tij drejt triumfit historik në Kampionatin Evropian “Euro 2016”, si dhe lartësoi dy trofe të Ligës së Kombeve në vitet 2019 dhe 2025.