Lajmet

Holanda dhe Luksemburgu të gatshme për të ndihmuar Kosovën në de-eskalimin e situatës

Ndërkaq, Kurti deklaroi se është bërë gabim i madh kur nuk është nënshkruar marrëveshja bazë.

Published

2 years ago

July 4, 2023

UBT news

Holanda e Luksemburgu kanë shprehur gatishmërinë që të ndihmojnë Kosovën në deeskalimin e situatës. Homologët e kryeministrit Albin Kurti, nuk kanë bërë fajtorë asnjërën palë për këtë situatë, veçse kanë deklaruar se duhet të zbatohet udhërrëfyesi i Bashkimit Evropian. Mark Rutte dhe Xavier Bettel thanë se duhet të ketë fokus në procesin hap pas hapi dhe se nuk do të ketë fitues në fund, në rast të konflikteve.

Kryeministri Albin Kurti deklaroi se është bërë gabim i madh kur nuk është nënshkruar marrëveshja bazë, për çka konsideroi se kjo ka hapur derën për shkelje dhe mosimpelementim marrëveshja e 27 shkurtit dhe aneksi i 18 marsit.

“Lajmi i mirë është se kemi një marrëveshje dhe kjo duhet të vlerësohet sepse kjo është mundësuar nga BE, nën patronatin dhe ndërmjetësimin e Bashkimit Evropian, Komisionit Evropian dhe kemi arritur një marrëveshje, ishte e paimagjinueshme dy vite më parë… Çdo student që studion shkenca politike ose marrëdhënie ndërkombëtare i lexon këto 11 pika të marrëveshjes bazë do të vijnë në përfundim që kjo është një njohje de-facto. Gjithsesi, vështirësitë që kemi është mungesa e implementimit dhe besoj se mungesa e implementimit të fillojë duke lënë këtë proces të kalojë pa nënshkrim nga të dyja palët. Ky është një gabim i madh sepse mosnënshkrimi i marrëveshjes e ka hapur derën për shkeljen apo implementim. Çka duhet është implementim i shpejt i të gjitha pikave, pa parakushte apo vonesa”, deklaroi Kurti para gazetarëve.

Kryeministri holandez, Mark Rutte theksoi se nuk duhet të drejtohet gishti tek fajtori për tensionimet mes Kosovës dhe Serbisë. Ai shtoi se të dyja palët duhet t’i përmbahen udhërrëfyesit të BE-së.

“Nuk e di nëse duhet ta drejtojmë gishtin tek fajtori, Kosova apo Serbia. Sepse kjo nuk ndihmon situatën. Dëshirojmë të jemi ndihmues dhe të kthehemi tek hapat e mërzitshëm, tek qasja hap pas hapi. Në shkurt kemi pasur një marrëveshje, të ndërmjetësuar nga Gjermania dhe Franca dhe Komisioni Evropian dhe të punojmë në të gjithë ata hapa. Duhet të sigurojmë që të gjitha palët do të përmbushin propozimet e veta. Pajtohem me ju se çdo gjë nuk është implementuar”, tha kryeministri holandez.

Rutte shtoi se kanë pasur diskutime të gjata në Beograd dhe Prishtinë për deeskalimin e situatës. Po ashtu, theksoi se janë të gatshëm që të ndihmojnë në Kosovën.

“Ne jemi të gatshëm të ndihmojmë nëse mundemi, në të ardhmen e afërt por aspekti kryesor duhet të udhëhiqet nga Borrell. Isha shumë i lumtur në shkurt kur me pjesëmarrjen e Gjermanisë dhe Francës arritëm një marrëveshje bazë, si të lëvizim përpara dhe bazuar në të ishim në Maqedoninë Veriore kur u vendos për implementimin e saj. Por, që nga atëherë tensionet janë ngritur ende dhe duhet të fokusohemi në çështjen e deeskalimit dhe në udhërrëfyesin e BE-së dhe besoj që kjo është më e mira. Duhet të kthehemi në proces, një proces hap pas hapi dhe ndoshta duket i mërzitshëm por pjesa e mërzitshme… duhet të implementohet hap pas hapi dhe në mënyrë te përpiktë dhe të punojmë në mënyrë të drejtë. Në udhërrëfyesin evropian duhet të merren nga të dyja palët dhe deeskalimet duhet të jenë nga të dyja palët. Jam optimist se mendjet e ftohta do të mbizotërojnë”, tha ai.

Edhe kryeministri i Luksemburgut, Xavier Bettel u shpreh se duhet të fillohet të punohet në udhërrëfyesin e BE-së.

“Stabiliteti është në interes të të gjithëve. Unë mund të përkrah kryeministrin Kurtin, presidenten Osmanin, zotëri Vuçiq dhe zonjën Bërnabiq që t’i përmbahen këtij udhërrëfyesi të BE-së. Nuk do të ketë fitues në fund nëse ka konflike”, u shpreh ai.

Kryeministri Albin Kurti do të takohet gjatë pasdites me emisarin evropian, Miroslav Lajçak.

Lajmet

Von der Leyen: Kosova të vazhdojë të ndërtojë institucione të forta

Published

13 hours ago

October 15, 2025

UBTnews

Presidentja e Komisionit Evropian Ursula von der Leyen ka thënë se Kosova duhet të vazhdojë që të ndërtojë institucione të forta.

Ajo në një postim në rrjetin X, pas takimeve me presidenten Vjosa Osmani dhe kryeministrin në detyrë Albin Kurti, ka thënë se Kosova duhet të finalizojë hapat e nevojshëm për të përfituar nga Plani i Rritjes.

“Ne mbetemi të përkushtuar ndaj një të ardhmeje ku të gjashtë partnerët e Ballkanit Perëndimor jenë pjesë e Unionit tonë. Për këtë, është e rëndësishme që Kosova të vazhdojë të ndërtojë institucione të forta”, ka shkruar ajo duke përmendur edhe rëndësinë e uljes së tensioneve në vend.

Plani i Rritjes prej 6 miliardë eurosh përfshin investime dhe reforma si pjesë e agjendës reformuese për periudhën 2024-2027, prej tyre dy miliardë janë në formë granti, ndërsa katër miliardë janë në formë kredie me këste të favorshme.

Kosova nuk ka përfituar nga ky Plan, pasi për shkak të mungesës së krijimit të institucioneve deri më tani nuk janë miratuar marrëveshje të rëndësishme ndërkombëtare./D.B/KP

Lajmet

Ambasadori i ri gjerman: Kosova është partnere e rëndësishme për Gjermaninë

Published

13 hours ago

October 15, 2025

UBTnews

Ambasadori i ri i Gjermanisë në Kosovë, Rainer Rudolph, përmes një videoje është prezantuar në marrjen e detyrës.

Ai në një video-mesazh në Facebook, tha se për gjermanët Kosova është një mik i mirë dhe një partner i rëndësishëm, raporton KosovaPress.

“Ne kemi qenë krenarë që e kemi mbështetur Kosovën si një komb të pavarur dhe sovran për një kohë të gjatë. Unë dua të mbështes integrimin ndërkombëtar të Kosovës, veçanërisht rrugën e saj drejt Bashkimit Evropian. Dhe mbi të gjitha, pres me padurim t’ju njoh të gjithëve juve e këtë vend të bukur dhe ushqimin e tij të mrekullueshëm”, tha diplomati i ri gjerman.

Ambasadori Rainer Rudolph ishte zëvendëskryetar i Konferencës së Sigurisë së Mynihut (MSC).

Ai është diplomat gjerman dhe zëvendës shef i Misionit në Ambasadën Gjermane në Vjenë deri në vitin 2023. Më parë, ai ishte i emëruar në Përfaqësinë e Përhershme të Gjermanisë në Bashkimin Evropian në Bruksel dhe në ambasadat Gjermane në Varshavë dhe Uashington. Në Berlin, ai punoi dy herë në Kancelarinë Federale, përfshirë si shef i divizionit përgjegjës për marrëdhëniet e jashtme të BE-së, zgjerimin e BE-së dhe marrëdhëniet me shtetet anëtare të BE-së.

Rudolph u diplomua në Universitetin e Tübingenit me një diplomë në Histori dhe Letërsi Gjermane. Ai është një Bashkëpunëtor i Asociuar në Këshillin Gjerman për Marrëdhënie me Jashtë (DGAP).

Diplomati gjerman u emërua ambasador i ri i Gjermanisë në Kosovë në shtator të këtij viti, pas skadimit të mandatit të paraardhësit të tij në këtë detyrë Jorn Rohde./D.b//KP

Lajmet

Pakistani e Afganistani pajtohen për armëpushim

Published

13 hours ago

October 15, 2025

UBTnews

Pakistani dhe Afganistani ranë dakord sot për armëpushim 48-orë pas përleshjeve përgjatë kufirit të tyre të përbashkët, thanë deklaratat zyrtare nga të dyja palët.

Ministria e Jashtme e Pakistanit tha se armëpushimi hyri në fuqi duke filluar nga ora 18:00, raporton KosovaPress.

Të dyja palët, tha deklarata pakistaneze, do të përpiqen “sinqerisht” ta zgjidhin këtë çështje “të ndërlikuar, por të zgjidhshme” përmes negociatave konstruktive.

Zabihullah Mujahid, zëdhënës i administratës së përkohshme afgane, konfirmoi gjithashtu se Kabuli kishte arritur një armëpushim me Islamabadin. Ai shtoi se Kabuli “i ka drejtuar të gjitha forcat e tij të respektojnë armëpushimin … përveç nëse ndodh ndonjë agresion”.

Ky është armëpushimi i dytë që nga kjo fundjavë, pasi të dyja palët u përleshën të shtunën në mbrëmje, por u ndalën pas ndërmjetësimit nga Katari dhe Arabia Saudite.

Zhvillimi i fundit vjen pas përleshjeve të reja kufitare midis palëve që nga nata e së martës. Në mëngjesin e sotëm, Kabuli tha se 12 shtetas afganë ishin vrarë në përleshje me forcat pakistaneze.

Dhjetëra ushtarë dhe civilë u vranë gjatë fundjavës në disa nga përleshjet më vdekjeprurëse midis dy palëve që nga viti 2021, kur talebanët afganë u rikthyen në pushtet në Kabul.

Tensionet e fundit filluan javën e kaluar kur Kabuli akuzoi Islamabadin për shkelje të një armëpushimi afgan, transmeton Anadollu./D.b/KP

Lajmet

Osmani pranoi letrat kredenciale nga ambasadori i ri i Gjermanisë

Published

13 hours ago

October 15, 2025

UBTnews

Presidentja Vjosa Osmani, pranoi sot letrat kredenciale nga ambasadori i ri gjerman Rainer Rudolph, të cilit i uroi suksese në angazhimin diplomatik në Kosovë, duke shprehur mirënjohje për mbështetjen e pandërprerë të Gjermanisë në shtet-ndërtimin dhe forcimit të pozitës ndërkombëtare të vendit tonë.

Në këtë kontekst, presidentja Osmani theksoi se Gjermania ka qenë dhe mbetet një aleate e fuqishme e Kosovës dhe një mbështetëse e palëkundur në procesin e anëtarësimit të Kosovës në Bashkimin Evropian dhe NATO, raporton KosovaPress.

Gjatë takimit, u theksua rëndësia e forcimit të mëtejshëm të bashkëpunimit ekonomik, si dhe kontributi i çmuar i mërgatës sonë në Gjermani, e cila përmes angazhimit dhe investimeve të saj po forcon lidhjet mes dy vendeve dhe popujve tanë.

Osmani shprehu bindjen se partneriteti i ngushtë ndërmjet dy vendeve do të vazhdojë të thellohet në fusha të ndryshme me interes të ndërsjellë gjatë mandatit të ambasadorit./D.B/KP