Presidenti i FIFA-s, Gianni Infantino tha të hënën se klubet e futbollit në Amerikë duhet të nënshkruajë më shumë lojtarë kryesorë për të rritur profilin e sportit në Shtetet e Bashkuara. Infantino duke folur në një konferencë në Los Anxhelos, tha se ai u tha zyrtarëve të MLS së fundmi se sjellja e lojtarëve më të mirë në botë do ta çonte futbollin në një nivel tjetër.

“Unë u thashë atyre që duhet të jeni pak më të guximshëm, pak më shumë të përfshirë në lojë. Sillni lojtarët më të mirë”, tha Infantino në Konferencën Globale të Institutit Milken.

Infantino tha se nënshkrimi i Lionel Messit nga Inter Miami dhe blerja nga klubi i lojtarëve të tjerë me emra të mëdhenj, si Luis Suarez dhe Sergio Busquets, kishin dëshmuar kërkesën për goditje të mëdha në mesin e tifozëve amerikanë.

“Efekti i Messit” nëse duam ta quajmë kështu, ju shihni Messin dhe Inter Miami duke mbushur stadiumet, dhe jo stadiumet e MLS, por stadiumet e NFL”, tha Infantino.

Tri klube të nivelit të lartë të hënën i kërkuan Federatës së Futbollit të Brazilit të pezullojë ndeshjet e tyre të ligës kombëtare për 20 ditët e ardhshme për shkak të përmbytjeve të rënda. Internacional, Gremio dhe Juventude janë të vendosura në shtetin e Rio Grande do Sul, i cili është shkatërruar nga përmbytjet që nga java e kaluar.

Autoritetet thonë se të paktën 83 persona kanë vdekur gjatë shtatë ditëve të fundit në rajon dhe 111 të tjerë janë raportuar të zhdukur.

Stadiumet e Internacionalit dhe Gremios në kryeqytetin e shtetit Porto Alegre janë përmbytur dhe dëmtuar rëndë nga uji.

“Prioriteti absolut në këtë moment është të mbështesim mijëra njerëz që janë goditur”, tha Internacional në një deklaratë. “Kërkojmë mirëkuptim, solidaritet, ndjeshmëri dhe mbështetje në një moment kaq delikat dhe të jashtëzakonshëm”.

Të tri klubet i pezulluan ndeshjet e fundjavës në raundin e pestë të ligës braziliane. Internacional është në pozitën e nëntë me shtatë pikë, tri prapa liderit Athletico Paranaense. Gremio është në pozitën e 11-të me gjashtë pikë, ndërsa Juventude ka pesë pikë.

Konfederata e futbollit të Brazilit tha se do ta shqyrtonte kërkesën.

Dëmet nga shirat kanë detyruar më shumë se 80,000 njerëz të largohen nga shtëpitë e tyre. Përafërsisht 15,000 janë strehuar në shkolla, gjimnaze dhe strehimore të tjera të përkohshme.

Presidenti i Brazilit Luiz Inácio Lula da Silva vizitoi Rio Grande do Sul për herë të dytë të dielën, i shoqëruar nga Ministri i Mbrojtjes José Múcio, Ministri i Financave Fernando Haddad dhe Ministrja e Mjedisit Marina Silva, ndër të tjera. Lideri i majtë dhe ekipi i tij vëzhguan rrugët e përmbytura të Porto Alegre nga një helikopter.

Sot (e diel) do të zhvillohen pesë ndeshje në kuadër të Albi Mall Superligës së Kosovës.

Java e 32-të e kampionatit fillon me duelin ndërmjet Dritës dhe Fushë Kosovës, e cila zhvillohet në qytetin e Gjilanit. Skuadra e drejtuar nga trajneri Zekirija Ramadani kërkon fitoren pas gabimit ndaj Dukagjinit javën e kaluar, në mënyrë që të mbetet ende në garën për titull.

Ndërkaq kampioni në fuqi dhe lideri i tabelës, Ballkani, e pret në shtëpi skuadrën e Dukagjinit. Klinasit do të jenë një kundërshtarë mjaft i vështirë për skuadrën e Ilir Dajës, e cila me çdo kusht dëshiron fitorën në mënyrë që ta ruaj pozitën e parë në renditje.

Në ndeshjen e radhës, skuadra e Gjilanit udhtëton te Malisheva, ku pritet në stadiumin “Liman Gegaj”. Pas humbjes ndaj Ballkanit, gjilanasit synojnë një fitore e cila do të ishte shumë e rëndësishme dhe do t’i ndihmonte ata për të ikur nga zona e barazhit.

Teksa, Llapi i Tahir Batatinës pret në “Zahir Pajaziti” Feronikelin ’74. Skuadra nga Podujeva do të tentoj fitoren duke mos i lënë hapsira liderit aktual të shmanget tutje.

Krejt në fund, Prishtina udhëton drejt Prizrenit, ku pritet nga Liria në stadiumin “Përparim Thaqi”. Pavarësisht se prizrenasit edhe matematikisht kanë rënë nga Superliga, ata po zhvillojnë ndeshje të mira dhe nuk do të jetë aq e lehtë sa duket për kryeqytetasit.

Të gjitha përballjet pritet të zhvillohen me fillim nga ora 15:00./UBTNews/

Kampionati tanimë ka përfunduar për Interin pesë javë para fundit të sezonit në Serie A. Përveç festës, drejtuesit e klubit zikaltër kanë filluar të mendojnë për sezonin e ardhshëm.

Deri tash, skuadra e Simone Inzaghit ka konfirmuar afrimin e sulmuesit, Mehdi Taremi dhe mesfushorit Piotr Zielinski, të cilët vijnë me parametra zero.

Ndërkaq sipas raportimeve të mediave italiane, bëhet e ditur se përveç afrimeve, Interi ka në listë disa futbollistë të cilët duket se do të largohen në fund të sezonit nga kampioni i Serie A.

Bëhet fjalë për Alexis Sanchez, Juan Cuadrado e Stefano Sensi të cilëve ju skadon kontrata në fund të këtij edicioni dhe si duket zikaltërit nuk kanë ndërmend ta vazhdojnë bashkëpunimin me ta.

Me ardhjen e Taremit te Interi, Sanchez nuk do të ketë minutazh të mjaftueshme dhe largimi i tij është i pashmangshëm.

Cuadrado nuk përmbushi pritshmëritë pas lëndimeve të shpeshta, teksa edhe i është komunikuar vendimi për të mos rinovuar kontratën e cila skadon më 31 maj, shtuar faktin që tashmë në skuadër bën pjesë edhe kanadezi Tajon Buchanan.

Në anën tjetër, Sensi nuk bën pjesë në planet e trajnerit, ndaj nuk do të rinovojë. Në të njëjtën rrugë është edhe Davy Klassen, që ka një kontratë 1+1, me Interin që ka në dorë opsionin e rinovimit, por duket se nuk do ta përdorë, duke qenë se futbollisti bindi Inzaghin.

Ndërkohë në dyshim është edhe portieri Audero, i cili ka qenë zgjedhja e dytë gjatë këtij sezoni. E ardhmja e tij varet nga braziliani Bento, të cilin Interi po provon ta sjellë në Milano. Nëse arrihet marrëveshja me Benton, atëherë Audero do të kthehet te Sampdoria, për t’i lënë vendin brazilianit./UBTNews/