Në kuadër të aktiviteteve të Akademisë Verore të Fakultetit të Sistemeve të Informacionit, e organizuar në kuadër të Global UBT Fest 2026, studentët morën pjesë në ligjëratën me temën “Transformimi Digjital në Industrinë e Pijeve: Sistemet e Informacionit, Analitika e Shitjes dhe Menaxhimi i Brendeve”, të mbajtur nga Dr. Shqipërim Jashari, Menaxher i Marketingut në kompaninë Royal Beverage.

Përmes prezantimit të rasteve konkrete nga industria, pjesëmarrësit u njohën me mënyrën se si sistemet e informacionit mbështesin proceset e prodhimit, analizën e shitjeve, gjurmueshmërinë e produkteve (LOT Traceability), menaxhimin e brendeve dhe vendimmarrjen strategjike të bazuar në analiza të avancuara të të dhënave.

Gjatë ligjëratës u diskutua edhe rëndësia që transformimi digjital ka për kompanitë moderne, duke u theksuar se përdorimi i teknologjive të avancuara dhe i sistemeve inteligjente të informacionit është shndërruar në një faktor kyç për rritjen e efikasitetit, konkurrueshmërisë dhe zhvillimit të qëndrueshëm të bizneseve.

Ky aktivitet u ofroi studentëve mundësinë të lidhin njohuritë akademike me praktikat reale të industrisë, duke krijuar një urë bashkëpunimi ndërmjet universitetit dhe sektorit privat. Diskutimet interaktive dhe shembujt praktikë kontribuan në zgjerimin e njohurive të tyre mbi rolin gjithnjë e më të madh të sistemeve të informacionit në transformimin digjital të bizneseve.

Akademia Verore e Fakultetit të Sistemeve të Informacionit vazhdon të sjellë aktivitete që fuqizojnë kompetencat profesionale të studentëve dhe promovojnë bashkëpunimin me industrinë, duke i përgatitur ata për sfidat dhe kërkesat e tregut bashkëkohor të teknologjisë dhe inovacionit.

Fakulteti i Biokimisë Mjekësore dhe Bioteknologjisë në UBT ka hapur punimet e Akademisë Verore, me temën “Shkenca moderne, inovacioni dhe praktika klinike në funksion të së ardhmes së shëndetësisë”.

Në hapje të këtij aktiviteti, dekani i Fakultetit, Prof. Dr. Fisnik Laha, theksoi se e ardhmja e shëndetësisë nuk ndërtohet vetëm duke mësuar atë që tashmë dihet, por duke krijuar hapësirë që studentët, studiuesit dhe profesionistët të sfidojnë kufijtë e dijes. Ai shtoi se UBT po ndërton pikërisht urën që lidh shkencën moderne me diagnostikën, praktikën laboratorike dhe nevojat reale të pacientëve.

Ky aktivitet katërditor përfaqëson një platformë të integruar akademike dhe profesionale, e cila bashkon ekspertizën klinike, kërkimin shkencor, teknologjitë e reja, inteligjencën artificiale, gjenetikën molekulare dhe praktikën intensive laboratorike. Programi është konceptuar në mënyrë që pjesëmarrësit të kalojnë nga bazat e diagnostikës dhe analiza e rasteve klinike, drejt biologjisë së së ardhmes, teknologjive inovative dhe zbatimit praktik të njohurive në avancimet më të fundit shkencore.

Programi katërditor përfshin tema që shtrihen nga biokimia e organizmave me bazë silikoni dhe sistemet alternative biologjike, deri te përdorimi i modeleve të mësimit të thellë (deep learning) për parashikimin e gjenomeve minimale, ndikimi i ndotjes së ajrit në parametrat fiziologjikë, si dhe editimi i gjeneve dhe aplikimet e tij në mjekësinë moderne.

Shkolla Verore e këtij viti ka bërë bashkë profesorë dhe studiues të UBT-së, profesionistë nga klinikat publike të QKUK-së, ekspertë të biokimisë, neonatologjisë, ekologjisë dhe biologjisë molekulare, si dhe ligjërues e hulumtues të njohur ndërkombëtarë, duke krijuar një platformë për shkëmbimin e njohurive dhe përvojave ndërmjet akademisë dhe praktikës profesionale.

Përmes një programi që ndërthur shkencën, praktikën klinike, teknologjinë, laboratorin dhe bashkëpunimin ndërkombëtar, Fakulteti i Biokimisë Mjekësore dhe Bioteknologjisë në UBT konfirmon edhe një herë përkushtimin e tij për ofrimin e arsimit bashkëkohor, zhvillimin e kërkimit shkencor me ndikim dhe përgatitjen e profesionistëve të aftë për t’iu përgjigjur sfidave të së ardhmes së shëndetësisë.

NATO ka publikuar deklaratën përfundimtare të Samitit të mbajtur në Ankara, në të cilën liderët e vendeve anëtare riafirmojnë angazhimin e tyre për mbrojtjen kolektive, forcimin e Aleancës dhe mbështetjen afatgjatë për Ukrainën.

Në komunikatë, krerët e shteteve dhe qeverive ritheksuan përkushtimin ndaj Nenit 5 të Traktatit të Uashingtonit, duke përsëritur se “një sulm ndaj njërit është sulm ndaj të gjithëve”.

Rusia përshkruhet si “kërcënimi afatgjatë” për sigurinë dhe stabilitetin euroatlantik, ndërsa liderët theksuan se Aleanca do të vazhdojë të forcojë aftësitë e saj mbrojtëse përballë sfidave të sigurisë dhe kërcënimit të terrorizmit.

Në deklaratë thuhet se gjatë vitit 2025, aleatët evropianë dhe Kanadaja kanë rritur investimet në mbrojtje me më shumë se 139 miliardë dollarë, ndërsa në Samitin e Ankarasë u shpallën mbi 50 miliardë dollarë prokurime të reja ushtarake dhe angazhime për zgjerimin e kapaciteteve të industrisë së mbrojtjes.

Liderët theksuan gjithashtu synimin për të ndërtuar “një Evropë më të fortë brenda një NATO-je më të fortë”, duke investuar në kapacitete moderne, përfshirë mbrojtjen ajrore dhe raketore, sistemet pa ekuipazh, teknologjitë e avancuara, si dhe aftësitë në hapësirë dhe fushën kibernetike.

Një pjesë e rëndësishme e deklaratës i kushtohet Ukrainës. NATO thekson se Kievi kontribuon në sigurinë transatlantike dhe se aleatët mbeten të bashkuar në mbështetjen për mbrojtjen e lirisë, sovranitetit dhe integritetit territorial të saj.

Për vitin 2026, vendet anëtare janë zotuar të ofrojnë 70 miliardë euro ndihmë ushtarake, pajisje dhe trajnim për Ukrainën, ndërsa kanë konfirmuar se mbështetja do të vazhdojë në të paktën të njëjtin nivel edhe gjatë vitit 2027.

Në deklaratën përfundimtare, NATO trajton edhe sfidat më të gjera të sigurisë globale, duke ritheksuar se Irani nuk duhet të zotërojë armë bërthamore dhe duke i bërë thirrje Teheranit të respektojë plotësisht lirinë e lundrimit në Ngushticën e Hormuzit./A.K/

Kryeministri i Shqipërisë, Edi Rama, ka konfirmuar zyrtarisht se samiti i radhës i NATO-s do të zhvillohet në Tiranë, duke hedhur poshtë të gjitha zërat dhe raportimet e fundit që ngrinin dyshime mbi këtë organizim.

Përmes një videoje të shpërndarë në rrjetet sociale nga Ankaraja, ku po mbahet samiti i sivjetmë i aleancës veriatlantike, Rama ka ironizuar me skeptikët dhe ka theksuar se ka perënduar koha kur të tjerët vendosnin për vendin. “Po si thanë që samiti nuk do të bëhet në Shqipëri? Kështu thanë, ë? Epo, ka ikur ajo kohë kur të tjerë bënin ç’të donin me Shqipërinë. Tash, Shqipëria bën atë që thotë dhe thotë atë që bën… kështu që samiti i ardhshëm do të jetë në Tiranë”, deklaroi Rama.

Përveç kreut të qeverisë shqiptare, mbajtjen e samitit në Shqipëri e ka konfirmuar edhe Sekretari i Përgjithshëm i NATO-s, Mark Rutte.

Ky reagim i prerë vjen pasi një javë më parë agjencia e lajmeve “Reuters” raportoi se organizimi i kësaj ngjarjeje të madhe në Tiranë ishte në pikëpyetje. Sipas asaj periudhe, dyshimet lidheshin me shpenzimet e ulëta për mbrojtjen nga disa vende anëtare dhe synimin e aleancës për të shmangur një përplasje të mundshme me presidentin amerikan, Donald Trump. Sidoqoftë, me konfirmimet e fundit nga samiti i Ankarasë, Tirana mbetet zyrtarisht nikoqirja e radhës e liderëve të NATO-s. /E.A/