Lajmet

Haxhiu e Vitia përplasen për vaksina

Published

4 years ago

July 7, 2021

Betim Gashi

Deputeti i PDK-së, Bekim Haxhiu, në seancën e sotme ka ngritur çështjen e skadimit të afatit të vaksinave të ardhura si donacion nga Norvegjia. Ai ka kërkuar sqarime nga ministri i Shëndetësisë se përse e kishte pranuar këtë donacion, kur ishte në dijeni se afati i këtyre vaksinave ishte deri në qershor dhe korrik.

Për të ruajtur shëndetin, Haxhiu i ka ftuar qytetarët të shikojnë mirë afatin para vaksinimit.

“Për të mbrojtur shëndetin e tyre, i ftoj qytetarët e Republikës së Kosovës që para vaksinimit të shikojnë mirë datën e prodhimit të vaksinave, çdo vaksinë e prodhuar në procedurë emergjente afatin e skadimit e ka 6 muaj”, theksoi Haxhiu.

Ministri i Shëndetësisë, Arben Vitia, i ka quajtur të pandershme akuzat e deputetit Haxhiu, derisa tha se të gjitha vaksinat e ofruara deri më tani, janë të sigurta dhe për këtë ai garantoi të gjithë qytetarët.

“Çdo thirrje tjetër është absolutisht e pandershme, çdo hezitim që mundohen të bëjnë individë të caktuar është e pandershme, çdo thirrje e qytetarëve për këtë hezitim është një abuzim në detyrën të cilën e kanë dhe sinqerisht kërkoj që në këtë drejtim së paku të jemi të bashkuar për ruajtjen e shëndetit publik pa i thirrur qytetarët që t’i kenë dyshimet e veta, sepse ju garantoj, edhe MSH, edhe qeveria, por edhe ligjet të cilat janë të aplikueshme në asnjë moment nuk na lejojnë, dhe nuk do ta bëjmë që t’i rrezikojmë qytetarët me vaksina ashtu siç pretendohet, sepse të gjitha janë EMA dhe FDA. Të gjitha vaksinat janë të sigurta, qytetarë të nderuar. Asnjë efekt anësor deri tani. Vaksinohuni , sepse është për të mirën tonë të përbashkët dhe për shëndetin e secilit qytetarë. Kurse, për ju individ të caktuar nëse nuk mund apo nuk doni të na ndihmoni, së paku në këtë proces kaq delikat mos u mundoni të na bëni dëme, sepse këto dëme nuk ia bëni as MSH-së, qeverisë, jeni duke i dëmtuar qytetarët e Republikës”, theksoi Vitia.

Ndërsa, Bekim Haxhiu replikoi duke insistuar në skadimin e afatit të vaksinave të pranuara si donacion nga Norvegjia.

“Ministër Vitia, dua ta rikujtoj që këtu je në Parlamentin e Kosovës, këtu ka deputetë, përfaqësues të popullit, i vetmi individ këtu mundeni me qenë ju, që udhëheq me Ministrinë e Shëndetësisë, dhe atë duke dështuar në procesin e vaksinimit. Kosova është vendi i fundit në rajon dhe në Evropë me procesin e vaksinimit. Deri më tani keni vaksinuar vetëm 52 mijë qytetarë me të dy dozat. Dhe vaksinimi nuk konsiderohet i përfunduar dhe i mbrojtur qytetari nga pandemia COVID-19 nëse nuk ka marrë të dy dozat. Shqetësimet tona janë, sepse ju nuk keni lexuar Ligjin për pajisjet e produkteve medicinale kur keni pranuar donacionet nga Norvegjia. Ju keni rrezikuar shëndetin e qytetarëve dhe rrezikoni që këto vaksina të asgjësohen në Kosovë dhe nuk do të mund të përdoren. Kjo është përgjegjësi e juaja. Bekim Haxhiu nuk e ka ngritur këtë shqetësim bazuar në intuitën e tij”, theksoi Haxhiu.

Duke iu përgjigjur deputetes së AAK-së, Time Kadrijaj për mungesë të insulinës, ministri Vitia shpreson se javën e ardhshme do të shpërndahen insulinat nëpër të gjitha Qendrat Kryesore të Mjekësisë Familjare.

Rajoni

Rektori Hajrizi viziton UniMarconi në Romë

Published

5 hours ago

November 8, 2025

Driton Iseni

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Lajmet

Bellingham dhe Foden rikthehen në kombëtaren e Anglisë

Published

22 hours ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Sport

Vdes në moshën 24 vjeçare lojtari i Cowboys, Marshawn Kneeland

Published

23 hours ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Rajoni

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

23 hours ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.