Aloe njihet si bima e përjetësisë dhe simbol i parajsës. Vlerat e saj janë të mrekullueshme, këtë bimë mund ta kultivoni edhe në shtëpinë tuaj dhe ta keni gati për urgjenca si gërvishtje, çarje apo djegie.

A e dini se nga kjo bimë mund të përfitoni shumë edhe nëse e pini?

Aloe Vera përmban mbi 200 përbërës biologjikisht aktivë si polisakaride, vitamina, enzima, amino acide dhe minerale që promovojnë përthithjen sa më të mirë të ushqyesve për të cilat trupi ka aq shumë nevojë.

Llojet më të mira të bimës së Aloe Verës

Në botë, gjenden mbi 400 varietete të bimës së saj, por jo të gjitha janë të mira dhe të vlefshme për konsum nga njerëzit.

Shumica e këtyre varieteteve shërbejnë për dekorim, dhe vetëm pak prej tyre kanë efektet çudibërëse për mirëqenien e njeriut. Sipas një publikimi të Medical Plants of the World, varietetet më të mira të Aloe Verës janë:

Aloe Barbadensis, të cilën mund ta gjeni edhe me emrin Aloe Sabila

Aloe Arborescens

Aloe Saponaria, që mund të gjendet edhe me emërtimin Aloe Maculata

Aloe Ferox

Të dhënat e publikuara nga “The Journal of Environmental Science and Health”, tregojnë se Aloe Vera ka vlera të fuqishme në betejën kundër baktereve, virozave dhe mykut. Këto veti e bëjnë të dobishme në pastrimin e organizmit nga toksinat, në fuqizimin e sistemit imunitar. Nëse konsumoni ose përdorni Aloe Vera, do të përmirësoni disponibilitetin e vitaminës B12 në organizëm.

Kjo do të thotë se trupi do ta përthithë dhe përdorë më mirë këtë vitaminë të nevojshme.

Ajo përmban vitaminat A, C, E, acid folik, si edhe vitaminat B1, B2, B3 dhe B6. Kjo bimë e mrekullueshme përmban 20 nga 22 amino acidet esencialë për të cilat ka nevojë organizmi i njeriut, por edhe acid salicilik që lufton inflamacionin dhe bakteret.

Përveç rolit të pastrimit të organizmit, Aloe Vera përqendrohet tek largimi i toksinave nga stomaku, veshkat, shpretka, tëmthi dhe mëlçia.

Ndihmon me tretjen, ulçerën dhe inflamacionin në stomak, forcon sistemin tretës dhe ofron alternativë të shëndetshme për ata që vuajnë nga artriti. Mënyra më e rekomandueshme është të pini lëngun e bimës, të cilën mund ta rrisni vetë në shtëpi.

Kombinoni xhelin në lëngjet e preferuara të frutave dhe perimeve ose pijeni veçmas. Përdorni xhel të pastër që nxirret nga pjesa e brendshme e gjetheve të bimës. Shija mund të jetë pak e athët dhe e hidhur, përzieni me pak mjaltë dhe të përfitoni vlera të shumëfishta.