Lajmet

Haradinaj për takimin në Bruksel: Improvizime të Qeverisë, Serbia po krijon epërsi

Kreu i AAK-së thotë se si shkak i këtyre veprimeve, aleatët e Kosovës janë “hidhëruar” dhe se vonesat për këtë çështje shkojnë në dobi të Serbisë.

Published

on

Kryetari i Aleancës për Ardhmërinë e Kosovës, Ramush Haradinaj i ka quajtur “improvizime të Qeverisë” bisedimet e Kosovës e Serbisë në Bruksel për çështjen e dinarit serb.

Kreu i AAK-së thotë se si shkak i këtyre veprimeve, aleatët e Kosovës janë “hidhëruar” dhe se vonesat për këtë çështje shkojnë në dobi të Serbisë.

“Nuk është diçka e re për fat të keq këto janë improvizime kryesisht të Qeverisë pra nuk janë diçka serioze dhe nuk po sjellin rezultatin e duhur pra po e shihni se kemi një hidhërim ndryshe thënë me fjalë të popullit të të gjithë aleatë tanë me Kosovën pikërisht për shkak të këtyre veprimeve të Qeverisë”, thotë Haradinaj.

Haradinaj thotë se Kosova duhet të fokusohet në implementimin e planit franko-gjerman dhe se çështja e dinarit krijon epërsi për Serbinë.

“Besoj se duhet me u fokusu tek tema kryesore që është implementimi i marrëveshjes së njohur si plani franko-gjerman, kuptohet me obligimet që janë marrë sepse nëse i implementojmë këto obligime të Këshillit të Evropës të kandidaturës për BE drejt NATO-s, ngecja në çështjen e dinarit janë çështje një nga një na kthen prapa na vonon dhe kuptohet po i krijon epërsi Serbisë. Realisht Serbia po i shfrytëzon kundër Kosovës këto”, u shpreh Haradinaj.

Zëvendëskryeministri i Kosovës, Besnik Bislimi, ka thënë se janë pajtuar me propozimin e Lajçakut, ndërsa Serbia nuk ishte e gatshme të bënte kompromis, por që Bislimi nuk bëri të ditur se për çfarë lloj propozimi bëhet fjalë.

Lajmet

Fëmijët përdorues të substancave narkotike ndër kategoritë më të cenuara

Published

on

By

Vitet e fundit fëmijët dhe të rinjtë përdorues të substancave narkotike janë përfshirë ndër kategoritë më të cenuara. Derisa sfida për një komunitet pa varësi është e madhe, porse kërkon qasje gjithëpërfshirëse.

Kështu u tha në Konferencën Nacionale “Një komunitet pa varësi”, në partneritet me Koalicionin e OJQ-ve për Mbrojtjen e Fëmijëve, Trust Circle Foundation dhe organizatën Labyrinth, e organizuar nga Zyra për Qeverisje të Mirë në kuadër të Zyrës së Kryeministrit.

Kryeministri në detyrë i Kosovës, Albin Kurti tha se një komunitet pa varësi është mision kombëtar për të gjithë, pa përjashtim.

Sipas tij, lufta kundër varësisë kërkon qasje gjithëpërfshirëse dhe të bashkërenduar.

Kurti shtoi se Qeveria është e përkushtuar në zbatimin e Strategjisë Shtetërore Kundër Drogave 2024–2028 dhe se po fuqizohet policia në luftën kundër shpërndarjes së substancave narkotike.

Sfida është e madhe, por nuk mund të pranojmë që varësia të bëhet realitet i hidhur. Bëjmë thirrje për një front të bashkuar dhe të palëkundur kundër varësisë,” theksoi Kurti.

Ndërkaq, presidentja e Koalicionit të OJQ-ve për Mbrojtjen e Fëmijëve – KOMF, Remzije Krasniqi, tha se vitet e fundit fëmijët dhe të rinjtë përdorues të substancave narkotike janë përfshirë ndër kategoritë më të cenuara.

Ajo theksoi se kjo situatë është evidentuar si prioritet për veprim nga organizata, por edhe si thirrje për institucione të tjera.

Sipas saj, rritja e rrezikut kërkon ndërhyrje të menjëhershme, duke përfshirë ngritjen e vetëdijesimit, shtimin e investimeve dhe zgjerimin e shërbimeve mbështetëse.

Drejtori i Klinikës së Psikiatrisë në Qendrën Klinike Universitare të Kosovës, Fatoj Kutllovci tha se ka një rritje shqetësuese të abuzimit me substanca psikoaktive në Kosovë.

Ai potencoi se më të prekurit janë të rinjtë dhe adoleshentë e moshave 15-25 vjeq. Po ashtu, abuzim me substanca narkotive, Kutllovci tha se janë shënuar edhe fëmijët.

Ndër substancat më të përdorura sipas Kutllvocit janë kanabisi, alkooli, qetësuesit, stimulantët si kokaiba e të tjerë.

Drejtori i Psikiatrisë, Faton Kutllvoci theksoi se ndër faktorët që ndikojnë në rritjen e numrit të personave që abuzojnë me substanca psikoaktive janë ata familjarë sic është mungesa e kujdesit prindëror, pastaj ai social duke përfshirë papunësinë.

Faktorë të tjerë, Kutllovci përmend faktorët ekonomik, ankthin, depresionin dhe qasjen e lehtë në substabca psikoativve.

Ndërkaq, drejtori i qendrës Labyrinth, Safet Blakaj tha se duhet insistuar që programi për parandalimin gjeneral të racionalizohet edhe më shumë./D.B/KP

Continue Reading

Lajmet

Aktakuzë ndaj Faruk Mujkës nën dyshimin për keqpërdorim të detyrës

Published

on

By

Prokuroria Speciale e Kosovës ka ngritur aktakuzë ndaj Faruk Mujkës – kryeshef i ndërmarrjes “Ibër Lepenci”, nën dyshimin për keqpërdorim të detyrës zyrtare në kohën sa ka qenë nënkryetar i Komunës së Mitrovicës. Aktakuzë është ngritur edhe ndaj një personi tjetër me inicialet H.M.

Sipas aktakuzës, Faruk Mujka, në pozitën e nënkryetarit të komunës së Mitrovicës së Jugut, dhe H.M. si Drejtor i Drejtorisë për Gjeodezi, Kadastër dhe Pronë në të njëjtën komunë, me dashje dhe duke shfrytëzuar detyrën zyrtare, kanë tejkaluar kompetencat me qëllim të përfitimit të dobisë pasurore të kundërligjshme për persona të tretë dhe në dëm të pronës publike.

Sipas aktakuzës, më 25.04.2021, të pandehurit, duke qenë në dijeni se Kuvendi i Komunës kishte marrë dy herë vendim për shpalljen me interes të posaçëm publik të një prone të paluajtshme, “i paraqitën po këtij Kuvendi një Propozim-Vendim për këmbimin e të njëjtës prone, duke e paraqitur atë si pronë komunale, duke i shkaktuar dëm të konsiderueshëm prej 125,100.00 euro Agjencisë Kosovare të Privatizimit (AKP)”.

Ndërkohë, Mujka akuzohet edhe për veprën penale “Mosraportimi ose raportimi i rremë i pasurisë, të ardhurave, dhuratave, dobisë tjetër materiale ose detyrimeve financiare”.

Në kuadër të aktakuzës, PSRK ka propozuar shqiptimin e dënimeve plotësuese ndaj të pandehurve./D.B/KP

Continue Reading

Bota

Franca përfshihet nga kaosi dhe trazirat, shpërthejnë protestat anti-Macron

Published

on

By

Franca po përgatitet për një ditë trazirash intensive, pasi protestat “Blloko gjithçka” pritet të ndërpresin transportin dhe shërbimet thelbësore në shenjë proteste ndaj masave shtrënguese të qeverisë.

Lëvizja “Bloquons tout”, e cila u shfaq në mediat sociale gjatë verës dhe mbështetet nga disa sindikata dhe e majta radikale, ka bërë thirrje për një mbyllje mbarëkombëtare duke filluar nga sot.

Rreth 80,000 policë dhe oficerë të xhandarmërisë janë vendosur në të gjithë Francën, ku po zhvillohen dhjetëra protesta anti-Macron. Më shumë se 100,000 njerëz pritet të marrin pjesë në protesta, të cilat do të variojnë nga bllokime rrugësh deri te tubime.

Autoriteti i Aviacionit Civil parashikon probleme dhe vonesa në të gjitha aeroportet franceze. Në rajonin Ile-de-France, priten vonesa në shumë linja treni, ndërsa një forcë e madhe policore është vendosur në stacionin Gare du Nord në Paris, pasi konsiderohet një objektiv i mundshëm për protestuesit.

Që nga mëngjesi i së mërkurës, përleshje midis protestuesve dhe policisë kanë ndodhur në disa zona të Parisit dhe qyteteve të tjera, ndërsa janë bërë më shumë se 100 arrestime. Në Paris, rreth orës 10:00 të mëngjesit të së mërkurës, trafiku ishte “pothuajse normal” në rrjetet e metrosë dhe autobusëve, ndërsa pati probleme në linjën B të hekurudhës rajonale RER, pasi dy nga tre trenat kalojnë në të. Linja B e RER kalon rajonin e Parisit nga veriu në jug, duke kaluar nëpër qendrën e kryeqytetit dhe duke i shërbyer aeroportit Paris Charles de Gaulle.

Autoritetet në kryeqytetin francez u përleshën me studentët jashtë shkollës së mesme Hélène-Boucher. Kosha plehrash u përmbysën dhe u hodhën drejt automjeteve të policisë, ndërsa të rinjtë që morën pjesë në trazira hodhën gjithashtu objekte drejt policisë.

Gaz lotsjellës u përdor për të shpërndarë turmën e protestuesve, shumica e të cilëve kishin fytyrat e mbuluara. Sipas mediave franceze, incidente të izoluara kanë ndodhur edhe në Lion, Marsejë dhe Bretanjë.

Në prefekturën e Bretanjës, Ile-et-Vilaine , ndodhën përleshje midis protestuesve dhe policisë në një rrugë kryesore dhe një autobus u përfshi nga flakët.

Gjithashtu në Tuluzë (jugperëndim), rreth 200 protestues bllokuan një kryqëzim për më pak se një orë me gardhe dhe goma. U var edhe një banderolë e zezë me mbishkrimin “Shpërthimi i Macron”.

Disa shohin në këtë mobilizim, të nxitur nga shkurtimet fiskale që qeveria e dorëhequr kishte dashur të impononte, rikthimin e mundshëm të një vale zemërimi të ngjashme me atë të “jelekëve të verdhë” që tronditën vendin në vitet 2018 dhe 2019.

Dje, në prag të demonstratave dinamike në të gjithë vendin dhe një ditë pas rënies së qeverisë Bayrou, Emmanuel Macron emëroi ministrin e Mbrojtjes Sébastien Lecorni, bashkëpunëtorin e tij të besuar, që vjen nga sfera e krahut të djathtë, si Kryeministër. Le Corneille bëhet kryeministri i shtatë nën Macron, i pesti që nga fillimi i mandatit të tij të dytë pesëvjeçar në vitin 2022. Kjo është e paprecedentë në Republikën e Pestë Franceze, e cila ka hyrë në një krizë të paprecedentë që nga shpërbërja e Asamblesë Kombëtare në qershor 2024./D.B/EO

Continue Reading

Bota

​Polonia kërkon aktivizimin e Nenin 4 të Traktatit të NATO-s

Published

on

By

Kryeministri polak Donald Tusk tha se ushtria polake regjistroi 19 ndërhyrje me dronë në hapësirën ajrore të vendit gjatë natës. Duke folur para parlamentit polak, Tusk tha se tre – ose ndoshta katër – dronë u rrëzuan nga avionë polakë dhe të NATO-s që u ngritën në ajër për t’u përballur me kërcënimin.

Tusk thotë se një numër i konsiderueshëm dronësh fluturuan në vend nga Bjellorusia. Droni i fundit që u rrëzua ishte në orën 06:45 sipas orës lokale, tha ai.

Duke folur para deputetëve në parlament, kryeministri polak Donald Tusk tha: “Nuk ka dyshim se ky provokim është pakrahasueshëm më i rrezikshëm nga pikëpamja e Polonisë sesa ato të mëparshmet”.

Tusk tha se Polonia ka kërkuar aktivizimin e Nenit 4 të traktatit të NATO-s.

Palët do të këshillohen bashkërisht kurdoherë që, sipas mendimit të cilësdo prej tyre, kërcënohet integriteti territorial, pavarësia politike apo siguria e cilësdo prej palëve”, thotë neni 4 i Traktatit.

Më pas mbahen konsultime për të përcaktuar nëse integriteti territorial, pavarësia politike ose siguria e një vendi anëtar është kërcënuar.

Tusk tha se pret mbështetje më të madhe gjatë këtyre konsultimeve, raporton BBC.

Kjo nuk është vetëm një luftë për ukrainasit. Kjo është një përballje që Rusia ka shpallur kundër të gjithë botës së lirë“, tha ai.

Gjatë natës, një “numër i madh” dronësh rusë u rrëzuan mbi hapësirën ajrore polake, tha kryeministri i vendit. Duke folur përpara një takimi urgjent, Donald Tusk tha se ishte hera e parë që dronë rusë u rrëzuan mbi Poloni.

Polonia mbylli përkohësisht hapësirën e saj ajrore dhe filloi një operacion ushtarak, të cilit iu bashkuan avionë të NATO-s dhe holandezëve. Qytetarëve në tre rajone polake përgjatë kufirit ukrainas iu tha të qëndronin në shtëpi.

Një operacion ushtarak ka përfunduar pasi avionë polakë dhe të NATO-s u vendosën dhe shumica e aeroporteve janë rihapur.

Rusia ende nuk ka komentuar rreth kësaj.

Dronët që hynë në Poloni ishin pjesë e sulmit të fundit të madh ajror ndaj Ukrainës, ku Rusia lëshoi 415 dronë gjatë natës.

Presidenti i Ukrainës Zelensky thotë se “të paktën tetë dronë sulmues” ishin të drejtuar drejt Polonisë, duke e quajtur përshkallëzimin një “precedent jashtëzakonisht të rrezikshëm për Evropën”./D.B/KP

Continue Reading

Të kërkuara