Deputetët e Kuvendit të Kosovës kanë shpenzuar afro 40 mijë euro gjatë vitit 2024 për mbushje telefonike nga kompania publike “Vala”, një shifër që mbulohet nga buxheti i shtetit, pra nga taksat e qytetarëve.

Sipas të dhënave zyrtare të siguruara nga “Interaktiv Talks”, shuma e përgjithshme e këtyre shpenzimeve ka arritur në 38,190 euro, vetëm gjatë këtij viti.

Në krye të listës së shpenzuesve është nënkryetari i Kuvendit nga radhët e PDK-së, Enver Hoxhaj, i cili ka shpenzuar mbi 1,000 euro për mbushje, duke e tejkaluar edhe kufirin mujor prej 100 euro që u takon deputetëve.

Në mesin e atyre që kanë shpenzuar më së shumti janë edhe Mimoza Kusari-Lila nga Lëvizja Vetëvendosje, Besnik Tahiri nga AAK dhe Arben Gashi nga LDK, me nga 720 euro secili.

Edhe Valon Ramadani, deputeti i VV-së që njihet për pasurinë e tij milionëshe, ka përfituar 480 euro mbushje telefonike nga Kuvendi.

Ndërkohë, mbetet për t’u parë kush ka qenë deputeti më kursimtar dhe cilët liderë politikë kanë pranuar ose kanë refuzuar përfitimin e kësaj mbështetjeje telefonike nga Vala.

Shefja e diplomacisë e Bashkimit Evropian, Kaja Kallas, tha se Rusia “s’ka shanse” kundër NATO-s, por aleanca duhet “të qëndrojë e bashkuar” përballë një Moske armiqësore.

Duke folur para mbajtjes së samitit të NATO në Holandë, ku anëtarët e aleancës janë në presion nga Shtetet e Bashkuara për të rritur shpenzimet për mbrojtje, Kallas paralajmëroi se vetëm rritja e shpenzimeve për mbrojtje nuk mjafton për të frenuar Kremlinin.

“Sot, kundër NATO-s dhe BE-së, Rusia s’ka shanse. Por, ne duhet të qëndrojmë të bashkuar”, tha Kallas para Parlamentit Evropian në Strasburg.

“Kur udhëheqësit e NATO-s të takohen javën e ardhshme, mbajtja e unitetit në aleancë është prioritet më i madh sesa rritja e shpenzimeve për mbrojtje”, shtoi kryediplomatja evropiane.

Udhëheqësit e NATO-s po synojnë që të arrijnë pajtim për rritjen e buxheteve për ushtritë kur të takohen në Hagë javën e ardhshme.

Por, aleanca – ku nga 27 vendet anëtare, 23 prej tyre janë shtete të BE-së – po përballet me dilema sa i përket përkushtimit të SHBA-së ndaj mbrojtjes së Evropës.

Presidenti i Turqisë, Recep Tayyip Erdogan, ka shprehur mbështetjen e tij “për të drejtën e Iranit për vetëmbrojtje” në konfliktin me Izraelin në Lindjen e Mesme, duke dënuar ashpër sulmet izraelite dhe heshtjen ndërkombëtare ndaj tyre.

Gjatë një takimi të Grupit Parlamentar të Partisë për Drejtësi dhe Zhvillim (AK Parti) në Ankara, Erdogan u shpreh se Irani ka të drejtë legjitime dhe natyrore për t’u mbrojtur nga “banditizmi dhe terrorizmi shtetëror” i Izraelit. Ai kritikoi ashpër udhëheqjen izraelite, duke vënë në dukje se kryeministri Benjamin Netanyahu ka tejkaluar në krimet e tij gjenocidale edhe diktatorin Hitler.

Presidenti turk theksoi gjithashtu rolin pasiv dhe heshtjen e Organizatës së Kombeve të Bashkuara dhe institucioneve të tjera ndërkombëtare, si dhe shteteve që nuk reagojnë ndaj dhunës. Ai paralajmëroi se përgjegjës për gjakun e civilëve të pafajshëm, përfshirë fëmijët dhe foshnjat, janë jo vetëm agresorët, por edhe ata që heshtin para kësaj dhune.

Duke iu përgjigjur shqetësimeve për stabilitetin rajonal, Erdogan bëri me dije se Turqia po monitoron nga afër zhvillimet dhe është në gatishmëri të plotë për pasojat që mund të kenë sulmet izraelite ndaj Iranit në rajon. Ai shtoi se autoritetet turke kanë bërë dhe po bëjnë përgatitje për çdo skenar të mundshëm negativ.

Ky qëndrim i Presidentit Erdogan pasqyron tensionet në rritje në Lindjen e Mesme, ndërsa Izraeli intensifikon sulmet ndaj Iranit dhe aleatëve të tij në rajon.

Eksportet japoneze ranë në maj për herë të parë në tetë muaj, duke reflektuar një rënie të ndjeshme të dërgesave të makinave për shkak të tarifave të reja të Shteteve të Bashkuara të Amerikës, treguan të dhënat qeveritare sot.

Eksportet e Japonisë ranë 1.7 për qind në maj nga një vit më parë, në 8.1 trilionë jen. Ato ishin rritur 2 për qind në prill.

Importet ranë edhe më ndjeshëm, deri në 7.7 për qind, pothuajse katër herë më shumë se muajin e kaluar, duke rënë në 8.8 trilionë jen.

Kështu, Japonia regjistroi një deficit prej 637.6 miliardë jenësh në tregtinë e saj me botën në maj, treguan të dhënat zyrtare, raporton KosovaPress.

SHBA-të mbetën destinacioni kryesor i eksportit të Japonisë në maj, por me një vlerë dërgesash prej 11.1 për qind më të ulët se në të njëjtën periudhë të vitit të kaluar. Dërgesat e makinave ranë 24.7 për qind, dhe dërgesat e pjesëve të makinave 19 për qind për shkak të tarifave të reja prej 25 për qind të SHBA-së për atë kategori produktesh.

Vëllimi i eksporteve të makinave në tregun amerikan ra vetëm 3.9 për qind, duke treguar se shumica dërmuese e eksportuesve kryesorë japonezë nuk e kanë kaluar koston e tarifave te klientët e tyre.

Kina ishte destinacioni i dytë më i madh i eksportit të Japonisë në maj, me dërgesa që ranë me 8.8 për qind.