Punonjësit e ndërmarrjes publike “Ibër-Lepenci”, të asistuar nga Policia e Kosovës, po vazhdojnë që nga orët e mëngjesit të zhvillojnë një aksion në zonën e Ujmanit, ku është rrethuar me shirit sigurie moteli “Jezero”, me qëllim lirimin e pronave të uzurpuara.

Faruk Mujka, kryeshef ekzekutiv në Ndërmarrjen Hidro-Ekonomike “Ibër-Lepenc” tha për Telegrafin se po vazhdojnë me aksione për lirimin e objekteve të uzurpuara.

“Është duke u zhvilluar rrënimi i objektit në fjalë. Sot vetëm ky aksion besoj që do zhvillohet, për objektet e tjera po trajtihet dokumentacioni”, tha Mujka.

Ndërkaq, edhe zëvendësdrejtori i Policisë së Kosovës për rajonin e veriut, Veton Elshani, ka konfirmuar për Telegrafin se Policia është duke asistuar në këtë aksion, i cili po zhvillohet në bashkëpunim me institucionet përkatëse.

Elshani ka bërë të ditur se Policia po e asiston ndërmarrjen “Ibër-Lepenci”, si dhe Ministrinë e Mjedisit, Planifikimit Hapësinor dhe Infrastrukturës gjatë këtij procesi.

Aksioni është ndërmarrë pasi ka skaduar afati i vendosur nga “Ibër-Lepenci” për shfrytëzuesit e objektit që ta lirojnë pronën, për të cilën ndërmarrja pretendon se është uzurpuar.

Në zonën e Ujmanit janë parë të angazhuar punonjës të “Ibër-Lepencit” dhe zyrtarë policorë, ndërsa objekti është rrethuar me shirit sigurie.

Ndërmarrja publike “Ibër-Lepenci” kishte njoftuar më herët për kërkesën për lirimin e pronës, duke pretenduar se bëhet fjalë për shfrytëzim të paautorizuar të saj. /A.K/

Asamblistët e Lëvizjës Vetëvendosje në Prishtinë kanë dorëzuar kallëzim penal në Prokurorinë Speciale ndaj kryetarit të Komunës së Prishtinës, Përparim Rama, dhe zyrtarëve të lartë të kabinetit të tij, pas një sinjalizimi anonim që, sipas tyre, përmban pretendime për legalizime të jashtëligjshme dhe shuma të mëdha parash, raporton Ekonomia Online.

Asamblistja e VV-së në Komunën e Prishtinës, Berita Abazi, tha se sinjalizimi është pranuar të mërkurën në mbrëmje nga një grup asamblistësh.

“Ne sot jemi këtu para Prokurorisë Speciale për të dorëzuar një kallëzim penal ndaj zyrtarëve të lartë të kabinetit të Përparim Ramës dhe vetë Përparim Ramës, për shkak të një sinjalizimi të cilin e kemi pranuar mbrëmë pasdite nga një sinjalizues anonim. Mbrëmë kemi pranuar – një grup i asamblistëve të Prishtinës – e kemi pranuar një mesazh, një email sinjalizues, ku kemi parë mesazhe të shumta ku flitet për legalizime të jashtëligjshme dhe shuma të mëdha parash”, tha ajo.

Abazi tha se, sipas përmbajtjes së mesazheve, në komunikim përmendet shefi i kabinetit të kryetarit të Prishtinës, kompani ndërtimi, objekte dhe shuma parash.

“Në këto mesazhe, personi i cili komunikon me një person tjetër anonim është pikërisht shefi i kabinetit të kryetarit Përparim Rama. Në këto biseda, personi në fjalë përpos që përmend kompani ndërtimi, përmend objekte ndërtimi, ai përmend edhe shuma, si dhe vetë pretendon se këto legalizime janë tërësisht të jashtëligjshme. Marrë parasysh këtë sinjalizim dhe rëndësinë e trajtimit të kësaj teme, ne sot jemi këtu përpara Prokurorisë Speciale të Republikës së Kosovës që të dorëzojmë zyrtarisht kallëzimin penal në prokurori dhe të kërkojmë nga prokuroria veprim dhe hetim të menjëhershëm”, tha ajo.

Sipas saj, pretendimet e ngritura në sinjalizim përbëjnë një çështje serioze që kërkon hetim nga organet e drejtësisë.

“Kjo është një skandal i madh. Këto keqpërdorime, këto legalizime të jashtëligjshme, janë kriminalitet i nivelit të lartë. Në këtë drejtim, është detyrë e prokurorisë që të hetojë dhe të vërtetojë nëse këto pretendime të sinjalizuesit janë të vërteta. Ajo çka për ne është jashtëzakonisht shqetësuese është fakti sepse flitet për ndërtues, flitet për objekte të cilat lehtë janë të verifikueshme. Pra, ka bazë të mjaftueshme për ngritjen e aktakuzës ndaj kryetarit dhe ndaj zyrtarëve të lartë të kabinetit të Përparim Ramës”, tha ajo./A.K/

Në Rahovec është arrestuar një person pasi dyshohet se, së bashku me familjarët e tij, ka sulmuar fizikisht zyrtarët policorë gjatë një intervenimi.

Sipas Policisë, të dyshuarit nuk i kanë respektuar urdhrat e zyrtarëve policorë dhe më pas kanë ndërmarrë sulm fizik ndaj tyre.

I dyshuari është arrestuar dhe me vendim të prokurorit është dërguar në mbajtje. Rasti po hetohet./A.K/