Sulmuesi kosovar Edon Zhegrova dyshohet se është përballur me fyerje nga tifozët e Lecces gjatë nxehjes para ndeshjes, të cilave u është përgjigjur me një gjest provokues.

Sipas mediumit italian “Passione Juve24”, tifozët vendas kanë drejtuar kore fyese ndaj futbollistit të Juventusit, duke nxitur reagimin e tij në drejtim të tribunave.

Ngjarja ndodhi para përballjes që Juventusi e fitoi me rezultat 2:0 ndaj Lecces, takim në të cilin Zhegrova nuk pati mundësi të aktivizohej.

Pavarësisht mungesës së dy futbollistëve në pozitën e tij, trajneri Luciano Spalletti vendosi ta linte kosovarin në bankën rezervë gjatë gjithë ndeshjes.

Deri më tani, Zhegrova nuk ka bërë ndonjë deklaratë publike lidhur me incidentin.

Me këtë fitore, Juventusi arrin në kuotën e 14 pikëve dhe renditet në pozitën e shtatë, tetë pikë prapa liderëve Inter dhe Lazio.

D.L

Fituesi i edicionit 2026 të “Topit të Artë” do të shpallet të hënën mbrëma, në një ceremoni që nis nga ora 21:00 në Londër. Gara për çmimin më prestigjioz individual në futboll mbetet e hapur, me disa prej yjeve më të mëdhenj që synojnë trofeun.

Harry Kane, Kylian Mbappe dhe Lamine Yamal konsiderohen tre favoritët kryesorë, ndërsa në mesin e kandidatëve përmenden edhe Lionel Messi, Michael Olise dhe Khvicha Kvaratskhelia.

Sulmuesi i Bayern Munichut, Harry Kane, ka zhvilluar një sezon të jashtëzakonshëm, duke realizuar 73 gola në edicionin 2025/26. Anglezi kontribuoi në fitimin e tripletës vendore nga Bayerni, ndërsa me përfaqësuesen e Anglisë siguroi medaljen e bronztë në Kupën e Botës 2026.

Në anën tjetër, Kylian Mbappe ka shkëlqyer në aspektin individual, duke u dalluar si golashënues në La Liga, Ligën e Kampionëve dhe Kupën e Botës. Megjithatë, mungesa e trofeve me Real Madridin dhe Francën mund të ndikojë në garën e tij për këtë çmim.

Një tjetër kandidat serioz është talenti 19-vjeçar i Barcelonës, Lamine Yamal. Spanjolli fitoi titullin në La Liga dhe Kupën e Botës me Spanjën, duke vazhduar ngritjen e tij në futbollin botëror. Në nivel klubesh, ai realizoi 24 gola në 45 paraqitje, por eliminimi i Barcelonës në gjysmëfinale të Ligës së Kampionëve mund të ndikojë në vlerësimin përfundimtar.

Nga gara nuk përjashtohet as Lionel Messi, tetë herë fitues i këtij çmimi. Argjentinasi pati një tjetër sezon të suksesshëm me Inter Miamin, ndërsa udhëhoqi Argjentinën deri në finalen e Kupës së Botës, duke realizuar tetë gola gjatë turneut.

Nëse triumfon, Messi do ta fitonte për herë të nëntë “Topin e Artë”, duke zgjeruar rekordin e tij historik.

Ndërkohë, Harry Kane synon të bëhet anglezi i pestë që e fiton këtë çmim, pas Stanley Matthews, Bobby Charlton, Kevin Keegan dhe Michael Owen.

Ceremonia e këtij viti do të mbahet në Londër, në nderim të Stanley Matthews, fituesit të parë të “Topit të Artë” në vitin 1956.

Çmimi organizohet nga “France Football” dhe UEFA, ndërsa fituesi përcaktohet përmes votave të gazetarëve nga 100 vendet e para në renditjen e FIFA-s.

Përveç çmimit kryesor, gjatë mbrëmjes do të ndahen edhe çmime të tjera për më të dalluarit e futbollit botëror.

D.L

Real Madridi ka shënuar një fitore të rëndësishme ndaj Barcelonës, duke triumfuar me rezultat 2:1 në “Camp Nou”. Kjo ishte vetëm fitorja e dytë e madrilenëve në tetë përballjet e fundit me rivalin e përjetshëm.

Rikthimi i Jose Mourinhos në “El Clasico” rezultoi i suksesshëm, duke dëshmuar se skuadra e tij është e gatshme të sfidojë dominimin e Barcelonës në La Liga.

Në përballjen e parë të periudhës së tij të parë si trajner i Real Madridit, Mourinho kishte pësuar humbje të thellë 5:0 ndaj Barcelonës. Megjithatë, këtë herë strategjia e portugezit dha rezultat.

Pavarësisht se Barcelona dominoi në posedimin e topit, pasimet dhe goditjet në portë, Real Madridi u tregua më efikas dhe më i organizuar në aspektin taktik.

Pas ndeshjes, Mourinho vlerësoi paraqitjen e futbollistëve të tij, duke theksuar organizimin, përqendrimin dhe guximin për të përballuar presionin e kundërshtarit.

Një nga lojtarët më të dalluar ishte Federico Valverde, i cili, pavarësisht problemeve fizike, zhvilloi një paraqitje të shkëlqyer në pozitën e mbrojtësit të djathtë.

Kapiteni madrilen dëshmoi përkushtim dhe disiplinë taktike, duke luajtur një rol të rëndësishëm në suksesin e skuadrës.

Mourinho theksoi se fitorja ndaj Barcelonës është e rëndësishme për moralin e ekipit, por objektivi kryesor mbetet titulli kampion.

Portugezi paralajmëroi se triumfi në “Camp Nou” nuk do të kishte vlerë nëse skuadra do të humbiste pikë në ndeshjet e ardhshme.

Me këtë fitore, Real Madridi mbetet vetëm tri pikë prapa Barcelonës, duke e bërë edhe më interesante garën për titullin e kampionit në Spanjë.

D.L

Adri Mehmeti, 17-vjeçari me prejardhje shqiptare, po konsiderohet një nga talentet më premtuese të futbollit në Amerikën e Veriut, pasi brenda një kohe të shkurtër ka arritur të depërtojë në ekipin e parë të New York Red Bulls dhe të debutojë me kombëtaren e Shteteve të Bashkuara të Amerikës.

Në një artikull të publikuar nga CNN Sports, Mehmeti përshkruhet si një nga emrat e rinj që mund të ndihmojnë në ngritjen e nivelit të futbollit amerikan në vitet e ardhshme.

Mesfushori mbrojtës, i cili është vetëm 17 vjeç, ka fituar vend të rëndësishëm te New York Red Bulls, ndërsa zhvillimi i tij i shpejtë ka tërhequr vëmendjen edhe jashtë Shteteve të Bashkuara.

Mehmeti debutoi me ekipin e parë të klubit në shkurt, në moshën 16-vjeçare, ndërsa në prill shënoi golin e tij të parë në Major League Soccer (MLS).

Talenti i ri, të dy prindërit e të cilit janë nga Shqipëria, e nisi rrugëtimin e tij në futboll që në fëmijëri, duke luajtur me të atin në oborrin e shtëpisë. Në vitin 2019, rreth moshës 10-vjeçare, ai iu bashkua akademisë së New York Red Bulls, ku nisi të ngjitej gradualisht drejt ekipit të parë.

“Për mua, babai im është ndikimi më i madh në fushë dhe jashtë saj gjithashtu”, ka thënë Mehmeti për CNN Sports.

Ai ka treguar se lidhja me futbollin nisi shumë herët, duke kujtuar kohën kur godiste topin me të atin që në moshën dyvjeçare.

Të dy prindërit e tij janë me origjinë nga Shqipëria, ndërsa babai i tij kishte luajtur futboll edhe në rini, duke përfaqësuar vendin në nivelin e të rinjve. Mehmeti vetë kishte përfaqësuar Shqipërinë në kategoritë e reja, përpara se të debutonte me përfaqësuesen e seniorëve të SHBA-së.

Debutimi i tij me kombëtaren amerikane erdhi në shtator, në fitoren 4:1 ndaj Perusë. Ai u inkuadrua në minutën e 88-të, duke zëvendësuar Tyler Adamsin, një tjetër futbollist që është zhvilluar në sistemin e New York Red Bulls.

Përzgjedhja e Mehmetit nga trajneri Mauricio Pochettino është një tjetër dëshmi e besimit që po i jepet brezit të ri të futbollistëve amerikanë.

Pavarësisht suksesit të hershëm, 17-vjeçari vazhdon shkollimin nga distanca, ndërsa jashtë fushës merret me videolojëra dhe golf. Megjithatë, pjesën më të madhe të kohës së lirë e kalon duke analizuar ndeshje dhe paraqitjet e tij, me synimin për t’u përmirësuar vazhdimisht.

Ndër futbollistët që admiron janë Rodri, Pedri dhe Elliot Anderson, nga të cilët përpiqet të mësojë për mënyrën e lojës në mesfushë.

CNN raporton se talenti i tij ka tërhequr interesimin e klubeve evropiane, megjithëse për momentin Mehmeti mbetet i përqendruar te zhvillimi i tij me New York Red Bulls dhe kombëtaren amerikane.

Ai pritet të rikthehet në fushë këtë fundjavë, kur New York Red Bulls do të përballet me Inter Miamin e Lionel Messit.

(Kosovapress)