Kristjan Asllani është tashmë zyrtarisht pjesë e Torinos. Mesfushori shqiptar u transferua te skuadra nga Piemonte mbrëmjen e së hënës, në formë huazimi nga Interi, me një pagesë prej 1.5 milionë eurosh dhe me të drejtë blerjeje për 12 milionë euro në fund të sezonit.

23-vjeçari, i cili ka qenë pjesë e Interit që nga viti 2022, është përshëndetur me klubin dhe tifozët zikaltër përmes një mesazhi të publikuar në rrjetet sociale.

“Ka ardhur momenti të përshëndetemi, dhe besomëni, nuk është e lehtë të gjej fjalët e duhura. Të vesh fanellën e Interit ka qenë një ëndërr që e kam ruajtur që fëmijë”, shkruan Asllani, duke falënderuar klubin për mundësinë dhe tifozët për mbështetjen gjatë këtyre dy sezoneve.

Mesazhi i tij përfshinte edhe mirënjohje për shokët e skuadrës dhe stafin teknik, duke theksuar se ka dhënë maksimumin për të respektuar fanellën e klubit.

Asllani largohet nga Milano pas dy sezonesh në të cilat pati hapësira të kufizuara, por mbetet një nga lojtarët e perspektivës në futbollin italian dhe me rëndësi për Kombëtaren shqiptare.

Thirrjet me përmbajtje raciste në stadiumet e Maqedonisë së Veriut vijojnë të jenë një problem i përsëritur në futbollin vendor. Rasti më i fundit është shënuar mbrëmjen e djeshme në Kavadar, gjatë ndeshjes mes Pelisterit dhe Shkupit, ku nga tribuna u dëgjuan brohoritje fyese ndaj shqiptarëve.

Incidenti vjen vetëm një muaj pas një ngjarjeje të ngjashme në Kumanovë, duke treguar se urrejtja etnike vazhdon të shfaqet hapur në ambientet sportive. Një nga thirrjet e përsëritura në këto raste ka qenë “le ta kuptojnë shqiptarët e mallkuar, emri maqedonas nuk do të zhduket”.

Federata e Futbollit të Maqedonisë së Veriut ka reaguar përmes një komunikate, ku njofton se pas raportit të delegatit të ndeshjes, KF Pelister është dërguar në Komisionin Disiplinor.

“Pas raportit të delegatit të ndeshjes KF Pelisteri – KF Shkupi, Komisioni për ndeshjet e FFM-së e ka dërguar KF Pelister në Komisionin Disiplinor për procedurë të mëtejshme. Raporti ka të bëjë me brohoritje fyese nga disa tifozë në ndeshjen Pelisteri – Shkupi, të luajtur në kuadër të raundit të 3-të të Ligës së Parë të Futbollit të Maqedonisë së Veriut”, thuhet në reagim.

Mesfushori 21-vjeçar, Leon Avdullahu, ka marrë vendimin për të përfaqësuar ekipin kombëtar të Kosovës, duke lënë pas vetes mundësinë për të luajtur me Zvicrën. Edhe pse i rritur në Zvicër dhe pjesë e ekipeve zinxhir të të rinjve në këtë shtet, Avdullahu ka vendosur të ndjekë një rrugë tjetër në karrierën e tij ndërkombëtare.

Federata Zvicerane e Futbollit (SFV) ka reaguar pas konfirmimit të vendimit të futbollistit. Drejtori i ekipeve kombëtare, Pierluigi Tami, ka shprehur zhgënjimin e institucionit që përfaqëson.

“Leoni na informoi për vendimin e tij. Jemi të zhgënjyer që ai tani dëshiron të ndjekë një rrugë tjetër”, tha Tami.

Ai theksoi se Federata është e vetëdijshme për situatat e tilla dhe ka pasur përvoja të ngjashme edhe më parë.

“Por, gjithashtu e bëj të qartë se ne duam vetëm ata lojtarë në ekipet tona kombëtare që identifikohen 100 për qind me vendin dhe ekipin tonë kombëtar”, shtoi ai.

Avdullahu pritet t’i bashkohet ekipit kombëtar të Kosovës në muajin shtator, për dy ndeshjet kualifikuese kundër Zvicrës dhe Suedisë.

Veterani i Real Madridit, Lucas Vazquez, ka gjetur një skuadër të re pas dy muajsh pa klub. Pas një karriere 17-vjeçare te “Los Blancos”, e ndërprerë vetëm për një sezon huazimi te Espanyol, Vazquez mbeti pa kontratë këtë verë, pasi Real Madrid vendosi të mos i ofrojë rinovim, veçanërisht pas transferimit të Trent Alexander-Arnold.

Gjatë viteve të fundit, Vazquez ka qenë një mbrojtës i djathtë alternativ, pas rikthimit nga pozicioni i tij origjinal si sulmues i djathtë. Edhe pse ishin përfolur oferta nga Espanyol, Juventus dhe Milan, sipas gazetarit të njohur Fabrizio Romano, Vazquez ka arritur marrëveshje për t’u transferuar te Bayer Leverkusen në Bundesligë — klub ku më parë ka punuar trajneri i fundit i Real Madridit, Xabi Alonso, dhe ku ka luajtur edhe Dani Carvajal.

Sezoni i fundit për Vazquezin ishte sfidues, sidomos pas dëmtimit serioz të Carvajal, dhe pavarësisht disa vështirësive, ai arriti të zhvillojë 53 ndeshje, duke shënuar dy gola dhe dhënë tetë asistime. Ky bilanc tregon kontributin e tij edhe në moshën 34-vjeçare.

Ky transferim përbën lëvizjen e parë të madhe të Vazquez jashtë Spanjës, duke i dhënë një drejtim të ri karrierës së tij.