Google ka sjellë një përmirësim të rëndësishëm në aplikacionin e saj të inteligjencës artificiale, Gemini, duke futur aftësinë për të kujtuar automatikisht bisedat e mëparshme, por edhe opsionin për t’i harruar ato nëse përdoruesi dëshiron.

Veçoria e re “Konteksti Personal” i lejon Gemini-t të përdorë bisedat e kaluara për të ofruar përgjigje më të personalizuara dhe të sakta. Ky opsion është aktiv si parazgjedhje, por mund të çaktivizohet lehtësisht në cilësime (Cilësimet → Konteksti Personal → Bisedat tuaja të kaluara me Gemini-n).

Për përdoruesit që preferojnë biseda pa ruajtje, ekziston edhe opsioni “Biseda të Përkohshme”, që nuk ruhen, nuk përdoren për trajnimin e modelit dhe fshihen automatikisht brenda 72 orëve. Këto biseda nuk shfaqen në listën e bisedave të fundit.

Gjithashtu, Google ka ndryshuar emrin e opsionit “Aktiviteti i Aplikacioneve Gemini” në “Mbaj Aktivitetin”, i cili lejon përdoruesit të zgjedhin nëse skedarët, fotot dhe aktivitetet e tyre do të përdoren për përmirësimin e shërbimit. Ky cilësim do të aktivizohet nga 2 shtatori 2025.

Veçoria e Kontekstit Personal është aktualisht e disponueshme për përdoruesit e modelit Gemini 2.5 Pro në disa vende, ndërsa në të ardhmen pritet të jetë pjesë e versionit më të gjerë 2.5 Flash.

Me këtë hap, Google synon të gjejë një balancë midis personalizimit dhe privatësisë, duke i dhënë përdoruesve mundësinë të zgjedhin çfarë informacioni do të mbahet mend dhe çfarë do të harrohet përgjithmonë.

Kompania amerikane Palo Alto Networks publikoi rezultatet financiare për tremujorin e katërt të vitit fiskal 2025, duke theksuar se inteligjenca artificiale po krijon sfida të reja në fushën e sigurisë kibernetike.

Drejtori ekzekutiv i kompanisë, Nikes Arora, vuri në pah se zhvillimi i agjentëve të AI, të mbështetur nga gjigantë si Microsoft, Google, OpenAI dhe Perplexity, po riaktivizon atë që ai e quan një “luftë kërkuesish”. Sipas tij, mjetet e reja lejojnë përdoruesit të kryejnë veprime si rezervimi i restoranteve apo akomodimeve direkt përmes shfletuesve, por kjo sjell edhe rreziqe të mëdha sigurie për bizneset.

“Çka është fantastike për konsumatorin, është e rrezikshme për biznesin. Asnjë kompani nuk do të dëshirojë një shfletues me agjentë të lirë pa asnjë kontroll,” tha Arora.

Ai shtoi se zgjidhja qëndron te shfletuesit e sigurt për biznes, ndër të cilët Palo Alto ofron produkte të dedikuara për këtë qëllim.

Drejtori ekzekutiv shprehu optimizëm për vitin fiskal 2026, duke paralajmëruar se Palo Alto Networks synon të bëhet kompania e parë e sigurisë kibernetike që do të kalojë pragun e 10 miliardë dollarëve të ardhura vjetore.

Kompania kineze e robotikës LimX Dynamics ka zbuluar robotin e saj humanoid, LimX Oli, i cili zhvilloi një performancë unike vallëzimi në grup gjatë konferencës World Robotic Conference 2025. Disa robotë u paraqitën para audiencës dhe më pas u bashkuan në një valle kolektive, ku demonstruan edhe lëvizje elegante në stil baleti.

LimX Oli përfaqëson përparimet e firmës në fushën e robotikës humanoide. Roboti u prezantua zyrtarisht më 30 korrik dhe debutoi si një platformë me qëllime të ndryshme, duke ofruar mundësi të shumta për kërkuesit, inxhinierët dhe integratorët e sistemeve robotike.

LimX Oli është i disponueshëm në tre versione: Lite, EDU dhe Super, me çmime që fillojnë nga 21,800 dollarë. Sistemi është i ndërtuar modularisht, duke lejuar ndryshimin e duarve me pajisje të ndryshme si kapëse precize ose duar lëvizëse, gjë që e bën të përshtatshëm për detyra industriale dhe përdorime eksperimentale.

Përveç kësaj, SDK-ja e robotit siguron kontroll të plotë mbi nyjet dhe sensorët, duke mundësuar përdorimin e Olit si platformë testimi për hulumtime apo si pjesë e sistemeve në ambiente prodhimi dhe depo.

Me gjatësi 1.65 metra dhe 31 shkallë lëvizshmërie, LimX Oli është projektuar për të tejkaluar kufizimet e robotëve tradicionalë me bazë rrotulluese dhe për të realizuar lëvizje komplekse dhe manipulim objektesh, duke kombinuar performancën praktike industriale me aftësi lëvizjeje të ngjashme me ato njerëzore.

Presidenti i Turqisë, Recep Tayyip Erdogan, ka bërë postimin e tij të parë në rrjetin social turk Next Sosyal, një platformë e re e zhvilluar brenda vendit.

Në postimin e tij, Erdogan ka cituar një varg nga poezia e Erdem Bayazitit: “Lulja ka çelur mes mureve prej betoni”. Ai ka përdorur gjithashtu hashtagun #PoFillojmë, të shoqëruar me emoji të flamurit turk, tokës dhe raketës.

Next Sosyal është prezantuar më 23 korrik dhe deri tani ka tejkaluar një milion përdorues. Platforma u mundëson përdoruesve të ndajnë përmbajtje në formën e teksteve, fotove, videove dhe sondazheve, ndërsa ofron një përvojë pa reklama, pa algoritme dhe pa censurë.

Aplikacioni përfshin përditësime rreth teknologjisë, stilit të jetesës dhe zhvillimeve aktuale, dhe mbështet ndërveprim shumëgjuhësh. Ai është zhvilluar nga fondacioni T3 në bashkëpunim me kompaninë turke të mbrojtjes Baykar, dhe përfshin një model të inteligjencës artificiale.

Sipas zhvilluesve, qëllimi i Next Sosyal është të krijojë një hapësirë të sigurt për përdoruesit në Turqi, ku mund të shprehin mendimet dhe ndjenjat pa ndërhyrje, manipulim apo dezinformim.