Meta ka filluar të kalojë përdoruesit adoleshentë të Facebook dhe Messenger në llogari të reja, të dizajnuara posaçërisht për ta, me masa të shtuar sigurie dhe mundësi mbikëqyrjeje nga prindërit.

Kjo iniciativë vjen në një kohë kur kompania raporton se “qindra miliona” adoleshentë janë aktivë në Instagram, Facebook dhe Messenger.

Llogaritë e posaçme për adoleshentë u prezantuan në Instagram një vit më parë, ndërsa këtë vit ato u bënë të disponueshme për përdoruesit në SHBA, Kanada, Mbretërinë e Bashkuar dhe Australi. Tani, Meta po i shtrin këto llogari në mbarë botën.

Të gjithë përdoruesit do të kalojnë automatikisht në këto llogari të reja, që janë bërë të detyrueshme për këtë grupmoshë. Për adoleshentët nga 13 deri në 15 vjeç, kërkohet leje prindërore për të ndryshuar cilësimet e sigurisë.

Meta përdor inteligjencën artificiale për të identifikuar përdoruesit që mund të japin të dhëna të pasakta për moshën e tyre. Llogaritë e reja ofrojnë funksione që lejojnë prindërit të monitorojnë aktivitetin e fëmijëve, duke përfshirë kontrollin e kohës së kaluar para ekranit dhe mbikëqyrjen e kontakteve të tyre.

Përveç kësaj, këto llogari kanë cilësime të forta privatësie dhe sigurie, për të kufizuar ndërveprimet midis adoleshentëve dhe të rriturve të panjohur.

Në të njëjtën kohë, Instagram po zgjerohet me një program për të ndihmuar shkollat fillore dhe të mesme në SHBA që të raportojnë më shpejt rastet e ngacmimit dhe sjelljeve problematike.

Ky program është implementuar fillimisht në bashkëpunim me një grup të përzgjedhur shkollash dhe tani çdo shkollë në SHBA mund të aplikojë për t’u bërë pjesë e tij. Meta thotë se ka marrë komente pozitive nga institucionet pjesëmarrëse. /A.Z/UBT News/

OpenAI gjeneroi rreth 4.3 miliardë dollarë të ardhura në gjysmën e parë të vitit 2025 – një rritje prej afro 16% krahasuar me të gjithë vitin e kaluar, raportoi të hënën The Information, duke cituar dokumente financiare të shpërndara aksionarëve.

Sipas raportit, kompania ka shpenzuar rreth 2.5 miliardë dollarë gjatë kësaj periudhe, kryesisht për kërkime dhe zhvillim të inteligjencës artificiale dhe për operimin e platformës ChatGPT.

Në gusht, Reuters njoftoi se OpenAI ishte në bisedime të hershme për një raund të ri shitjeje aksionesh, i cili do t’u mundësonte punonjësve të likuidonin pjesë të aksioneve të tyre, një marrëveshje që mund ta vlerësojë kompaninë deri në 500 miliardë dollarë.

Ndërkohë, Nvidia njoftoi javën e kaluar se planifikon të investojë deri në 100 miliardë dollarë në OpenAI dhe do ta furnizojë atë me çipa të fuqishëm për qendrat e të dhënave. /A.Z/UBT News/

Inteligjenca artificiale ka depërtuar në shumë industri, dhe kinemaja nuk bën përjashtim.

Shembulli më i fundit është rasti i Xicoia, kompani në pronësi të studios Particle 6, e cila ka krijuar nga e para një aktore që nuk ekziston në realitet: Tilly Norwood.

Ky personazh virtual ka ngjallur kuriozitet dhe debat në Hollywood për shkak të pasojave që sjellë në të ardhmen e industrisë së filmit.

“Ajo nuk zëvendëson një qenie njerëzore, është një krijim artistik, një vepër arti”, theksojnë producentët e saj në rrjetet sociale, duke iu përgjigjur polemikave të shumta.

Një aktore e gjeneruar, me personalitet të plotë

Sipas Eline Van der Velden, producente dhe pronare e Particle 6, Tilly Norwood nuk është krijuar si një fytyrë digjitale. Qëllimi ishte t’i jepnin karakter dhe personalitet, duke e bërë të duket si artiste e vërtetë. “Në fillim askush nuk e mori seriozisht. Në shkurt thanë se nuk do të ndodhte kurrë, por në maj nisën të na kërkonin takime. Tani, jemi gati të njoftojmë agjencinë që përfaqëson”, u shpreh ajo për Deadline.

Aktorë të tillë virtualë kanë potencial të pakufizuar: mund të interpretojnë çdo lloj roli, të punojnë pa pushim 24 orë në ditë dhe të përshtaten menjëherë me kërkesat e çdo skenari ose kompanie.

DeepFame dhe ndërveprimi me publikun

Tilly Norwood, falë motorit DeepFame, mund të jetë aktive edhe në rrjet duke komunikuar me ndjekësit si aktore reale. Karakteri i saj është i ndryshueshëm, pasi në thelb mbetet një produkt i krijuar me kujdes nga teknologjia.

Një epokë e re për industrinë e argëtimit

Ky fenomen nuk është i izoluar. Në gusht 2024 Higgsfield Records prezantoi Kion, i cili nënshkroi kontrata me vlerë miliona dollarëshe.

“Është fillimi i një epoke të re në muzikë”, deklaruan krijuesit e tij.

Nëse projektet si Tilly Norwood do të funksionojnë afatgjatë, mbetet për t’u parë. Por një gjë është e qartë: inteligjenca artificiale po ndryshon mënyrën se si krijohet dhe perceptohet arti në industrinë e filmit dhe muzikës. /A.Z/UBT News/

Sipas një burimi të besueshëm, konsola e re PlayStation 5 Pro e Sony mund të marrë rishikimin e saj të parë të harduerit para fundit të shtatorit. Megjithatë, nuk priten ndryshime të mëdha në dizajn ose përditësime të jashtme të harduerit.

PS5 Pro pritet të lansohet në nëntor 2024 si konsola kryesore e PlayStation, duke sjellë përmirësime të konsiderueshme në performancë për shkak të GPU-së së përmirësuar dhe teknologjisë së re të imazhit PlayStation Spectral Super Resolution (PSSR), e bazuar në AI.

Shumë lojëra të optimizuara për PS5 Pro kanë përfituar nga përmirësimet, ndërsa kritikat janë minimale, përveç çmimit dhe mungesës së një disku si standard. Një raport i Dealabs sugjeron se modeli i ri, me numrin e modelit CFI-7121, do të lansohen në Evropë më 30 shtator dhe nga jashtë duket identik me versionin aktual.

Ndërsa nuk pritet një version “Slim”, Sony mund të ketë modifikuar harduerin për efikasitet më të mirë të energjisë, duke ulur nxehtësinë dhe përmirësuar funksionimin e qetë të konsolës.

PS5 Pro i rishikuar do të ruajë SSD-në 2TB, gjë që është një lajm i mirë duke pasur parasysh ndryshimin e memorjes nga 1TB në 825GB që u pa te PS5 i rregullt. Çmimi pritet të mbetet 799.99 euro, pa ndryshime.

Ndryshimet e mundshme përfshijnë optimizime të radiatorit dhe paraqitjes së motherboard-it për të ruajtur performancën dhe për të zvogëluar përdorimin e materialeve, duke rritur në të njëjtën kohë marzhet e fitimit për Sony. /A.Z/UBT News/