Lajmet

​Gjonlleshaj: Nënë Tereza na thërret të jemi ndërtues të paqes dhe unitetit

Published

2 years ago

on

Në 27-vjetorin e vdekjes së humanistes shqiptare, Nënë Tereza u kërkua që në Kosovë të krijohen ura mirëkuptimi dhe dialogu që çojnë drejt paqes.

Në meshën e mbajtur për të nderuar veprën dhe jetën e Shën Nënë Terezës, e cila u mbajt në Katedralen që mban po emrin e saj, ishin të pranishëm qytetarë të shumtë.

Nga Tivari drejt Kosovës kishte ardhur për të shënuar këtë ditë edhe kryeipeshki i Tivarit, Rrok Gjonlleshaj, i cili theksoi se paqja nuk është mungesa e luftës, por prania e drejtësisë dhe dashurisë për njëri-tjetrit. Gjonlleshaj theksoi se mjafton të ndiqet shembulli i Nënën Terezës për t’u qëndruar afër atyre që kanë nevojë.

“Nënë Tereza na thërret që të jemi ndërtues të paqes dhe unitetit ajo na kujton që të mos shikojmë vetëm dallimet tona, por të kërkojmë atë që na bashkon. Paqja nuk është thjesht mungesa e luftës, por prania e drejtësisë, dashurisë dhe e respektit për njëri-tjetrin. Në një vend si Kosova me historinë e saj të pasur dhe sfiduese është e rëndësishme të kujtojmë fjalët e Nënë Terezës nëse duam paqe të vërtetë duhet të fillojmë të duam, le të fillojmë këtu dhe tani në këtë vend të shenj në këtë shenjtërore, mu në festën e Shën Terezës në këtë Katedrale duke ndërtuar ura të mirëkuptimit dhe të dialogut. Le të kërkojmë unitet dhe bashkëpunim me të gjithë ata që jetojnë në këtë tokë pavarësisht besimit apo përkatësisë së tyre. Kjo është rruga e paqes që na e mëson Nëna Tereza”, theksoi kryeipeshkvi i Tivarit.

Kryeipeshkvi Gjonlleshaj para të pranishmëve u shpreh se humanistja Nënë Tereza është shembull prej të cilit duhet të frymëzohen të gjithë.

“Le të frymëzohemi nga shembulli i saj dhe të reflektojmë si mund të shërbjemë më shumë, të japim më shumë dhe të japim më shumë. Si mund të jemi ndihmë dhe mbështetje për ata që na rrethojnë e që kanë nevojë për ndihmën dhe mbështetjen tonë ne duhet të kujtojmë edhe nevojën e pashmangshme për të qenë të vetëdijshëm për nevojën e të tjerëve…. Ajo e shihte misionin e saj si një mënyrë për të shërbyer Krishtin në personat më të dobët, ajo e dinte që dashuria e saj për njerëzit ishte reflektim i dashurisë së zotit për të gjithë ne dhe në çdo person që takonte ajo shihte fytyrën e Krishtit”, theksoi Gjonlleshaj.

Kryeipeshkvi i Tivarit, Rrok Gjonlleshaj në këtë meshë përkujtimi dhe nderimi për Nënën Terezë deklaroi se ajo ishte hallkë e dashurisë e mirësisë.

“Roli i Nënës është i ngritur në nivelin më sublim fal amësisë. Ajo përshkon dimension më të thellë të jetës duke qenë një hallk e dashurisë, mirësisë, butësisë, faljes, mëshirës dhembshurisë, sakrificës, dhembjes, vuajtjes dhe shërbimit….. Në një botë që shpesh duket e ndarë, ku luftërat, urrejtjet dhe varfëria po na sfidojnë çdo ditë Nënë Tereza na kujton për fuqinë transformuese të dashurisë çdo ditë nëpër rrugët e qyteteve tona në shtëpitë, në vendet tona të punës kemi mundësinë të zgjedhim dashurinë mbi urrejtjen, mirësisë mbi indiferencën dhe shërbimin ndaj tjetrit mbi egoizmin”, theksoi ai.

Sot në Kosovë po shënohet edhe Dita e Humanizmit në Kosovë, vendim të cilin e pati marrë Qeveria e Kosovës më 5 shtator 2022 në shenjë respekti dhe përkujtimit nga Republika e Kosovës për humanisten shqiptare, Anjezë Gonxhe Bojaxhiu, e njohur si Nënë Tereza.

E gjatë ditës së sotme presidentja e Kosovës, Vjosa Osmani e ka përkujtuar Nënë Terezën duke theksuar se ajo mbetet fanarë dhembshurie, përulësie dhe shërbimi vetëmohues ndaj njerëzimit.

Related Topics:
Continue Reading

Vendi

REL: BE-ja kërkon pezullimin e rrënimit të shtëpive buzë Ujmanit

Published

19 minutes ago

on

July 22, 2026

By

Zyra e Bashkimit Evropian ka kërkuar që të ndërpritet rrënimi i shtëpive buzë Liqenit të Ujmanit, teksa shprehu keqardhje për aksionin e një dite më parë të ndërmarrë nga autoritetet e Kosovës.

Sipas BE-së, me rrënimin e shtëpive në Ujman nuk u respektuan “procedurat e rregullta ligjore”.

Blloku evropian tha se aksioni i së martës i autoriteteve të Kosovës u ndërmor në kohën kur banorët kishin nisur procedura gjyqësore brenda afatit 15-ditor, të përcaktuar në njoftimet e ndërmarrjes publike “Ibër-Lepenc”.

“BE-ja është e shqetësuar për mungesën e respektimit të procedurës së rregullt ligjore në këtë dhe në disa raste të tjera të kohëve të fundit në veri të Kosovës që nga shkurti i këtij viti”, thuhet në reagim.

Ndërmarrja Publike Hidroekonomike “Ibër-Lepenc” tha se 11 shtëpitë e rrënuara ndodheshin ilegalisht në pronën e saj.

Kryeshefi i kësaj ndërmarrjeje, Faruk Mujka, tha se pronarëve u ishte kërkuar më 3 korrik që t’i lironin shtëpitë, por pas moszbatimit të kërkesës, Inspektorati i Ministrisë së Mjedisit dhe Planifikimit Hapësinor, në bashkëpunim me Policinë e Kosovës, nisën zbatimin e vendimit për rrënimin e tyre më 21 korrik.

Ndërkaq, BE-ja kërkoi që të ndërpriten menjëherë të gjitha rrënimet, largimet e detyruara apo marrjet në posedim të pronave, derisa të adresohen shqetësimet lidhur “me procedurën e rregullt ligjore”, duke kërkuar që autoritetet të bashkëpunojnë me banorët dhe komunat e prekura dhe të gjejnë zgjidhje ligjore.

“Masat e pakthyeshme të zbatimit në kontekstin e procedurave në zhvillim dhe pretendimeve të kontestuara pronësore ngrenë shqetësime serioze për sundimin e ligjit”, tha BE-ja, duke shtuar se pret nga Kosova që në përputhje me rrugën evropiane, të adresojë këto shqetësime me urgjencë dhe “veprime të ngjashme të mos përsëriten”.

Ndërkaq, Ambasada gjermane në Prishtinë tha se ndan shqetësimet e shprehura nga BE-ja.

“Jemi thellësisht të shqetësuar lidhur me rrëzimin e shtëpive në Ujman”, tha Ambasada gjermane, duke kërkuar që të ketë procese të rregullta ligjore.

“Ne bëjmë thirrje që veprime të tilla të ndalen menjëherë dhe bëjmë thirrje për transparencë dhe zgjidhje të ligjshme”.

Branimir Mihajlloviq, banor i Mitrovicës së Veriut dhe pronar i një shtëpie në Ujman, i tha Radios Evropa e Lirë se vitin e kaluar kishte paraqitur kërkesë për legalizimin e pronës në sistemin e Kosovës dhe ishte i gatshëm të paguante qiranë ndaj institucioneve të Kosovës.

“Unë i kam të gjitha dokumentet. Papritur si pronar u paraqit ‘Ibër-Lepenci’. Ne nuk ndodhemi fare në brezin ujor. Edhe nëse do të ishim, do të paguaja qira dhe tatime. Kam paguar edhe energjinë elektrike. Sipas ligjit, toka mund të jepet me qira dhe pikërisht këtë kemi kërkuar”, tha Mihajlloviq më 21 korrik.

Rrënohen shtëpi buzë Liqenit të Ujmanit

Ai tregoi se, së bashku me pronarët e tjerë të shtëpive, kryesisht serbë nga veriu i Kosovës, kanë paraqitur ankesë tek Avokati i Popullit dhe në Gjykatën Themelore në Mitrovicë.

“S’është mbajtur asnjë seancë. Kërkuam pezullim të përkohshëm të rrënimit, por ende nuk ka vendim”, deklaroi ai.

Liqeni i Ujmanit ndodhet në komunën e Zubin Potokut, në veriun e Kosovës, të banuar me shumicë serbe. Ai konsiderohet infrastrukturë strategjike për Kosovën, pasi shërben për furnizimin me ujë, prodhimin e energjisë elektrike dhe ujitjen.

Ndryshe, që nga viti 2024, autoritetet në Kosovë kanë nisur mbylljen e institucioneve serbe, duke i cilësuar ato si paralele dhe të paligjshme. Veprimet e Qeverisë së Kosovës në veri shpesh janë përballur me kritika nga faktori ndërkombëtar.  /REL/

Continue Reading

Lajmet

Inspektohen 26 auto-parkingje në Prizren e Suharekë, konstatohen shkelje të shumta

Published

38 minutes ago

on

July 22, 2026

By

Inspektorati Qendror i Punës, në bashkëpunim me Policinë e Kosovës dhe institucione të tjera hetimore e kontrolluese, ka ndërmarrë një aksion të përbashkët inspektues në komunën e Prizrenit dhe atë të Suharekës.

Aksioni, i cili është koordinuar me Prokurorinë Themelore në Prizren, ka përfshirë kontrolle të detajuara në gjithsej 26 auto-parkingje për të verifikuar zbatimin e legjislacionit në fuqi.

Në këtë aksion, përveç Inspektoratit të Punës dhe Policisë së Kosovës (Drejtorisë për Hetimin e Krimeve Ekonomike dhe Korrupsionit), kanë marrë pjesë edhe Administrata Tatimore e Kosovës (ATK) si dhe Inspektorati Qendror nga Ministria e Industrisë, Ndërmarrësisë dhe Tregtisë (IQMINT).

Gjatë inspektimeve në terren, zyrtarët kanë konstatuar shkelje të ndryshme ligjore, me ç’rast secili nga institucionet pjesëmarrëse ka ndërmarrë masat dhe veprimet përkatëse sipas kompetencave të veta ligjore.

Nga Inspektorati Qendror i Punës kanë bërë të ditur se mbeten të përkushtuar për të vazhduar bashkëpunimin ndërinstitucional me qëllim forcimin e zbatimit të ligjit, mbrojtjen e të drejtave të punëtorëve si dhe krijimin e një mjedisi të sigurt e të ligjshëm pune. /E.A/

Continue Reading

Vendi

Publikohet lista e guidave turistike të licencuara në Kosovë

Published

1 hour ago

on

July 22, 2026

By

Ministria e Kulturës dhe Turizmit ka bërë të ditur se është publikuar lista e guidave turistike të licencuara të Republikës së Kosovës.

Lista tashmë është e qasshme në uebfaqen e Ministrisë dhe përmban të dhëna për guidat e licencuara, përfshirë llojin e licencës dhe kontaktet e tyre, duke u mundësuar qytetarëve dhe vizitorëve qasje më të lehtë në shërbimet profesionale turistike.

Sipas Ministrisë, lista do të përditësohet vazhdimisht, ndërsa të gjitha guidat turistike që ushtrojnë veprimtarinë në Kosovë dhe ende nuk janë pjesë e saj janë ftuar të plotësojnë dokumentacionin përkatës për t’u përfshirë në regjistrin zyrtar.

Ky hap synon rritjen e standardeve në sektorin e turizmit dhe ofrimin e informacionit më të organizuar për vizitorët që zgjedhin Kosovën si destinacion./A.K/

Continue Reading

Lajmet

Apel urgjent nga institucionet: Sot priten stuhi, breshër e përmbytje lokale në Kosovë 

Published

2 hours ago

on

July 22, 2026

By

Institucioni për Menaxhimin e Emergjencave (AME), bazuar në paralajmërimet e Institutit Hidrometeorologjik të Kosovës (IHMK), u ka bërë thirrje urgjente qytetarëve për kujdes dhe gatishmëri të shtuar, pasi gjatë ditës së sotme priten zhvillime të fuqishme të motit të ligë.

Sipas njoftimit zyrtar, sot priten stuhi lokale me bubullima, reshje intensive shiu, breshër dhe erëra të fuqishme në disa pjesë të territorit të Kosovës.

Autoritetet paralajmërojnë se kjo valë e motit të ligë mund të sjellë një sërë pasojash, duke përfshirë:

  • Përmbytje të shpejta lokale në zonat me reshje më intensive;
  • Dëmtime materiale në objekte, automjete, infrastrukturë dhe kultura bujqësore nga breshëri e era;
  • Rritje të rrezikut për zjarre nga shkarkimet e shpeshta atmosferike (rrufetë);
  • Probleme në rrjetin elektrik dhe ndërprerje të furnizimit me energji;
  • Pengesa në telekomunikacion dhe rrezik të lartë nga goditjet e rrufesë për njerëzit e kafshët.

Me qëllim parandalimin e incidenteve dhe mbrojtjen e jetës e pronës, emergjencat u bëjnë thirrje qytetarëve të ndjekin këto hapa:

  1. Qëndroni brenda: Shmangni lëvizjet e panevojshme gjatë kohës që zgjat stuhia.
  2. Kujdes nga strehimi: Mos u mbroni nën pemë të larta, pranë objekteve metalike apo shtyllave elektrike.
  3. Kujdes në ngasje: Përshtatni shpejtësinë e veturës dhe shmangni rrugët apo nënkalimet e mbuluara nga uji.
  4. Siguroni pronën: Largoni ose fiksoni pajisjet e sendet në ballkone e oborre që mund të merren nga era ose dëmtohen nga breshëri.

Njësitë e Zjarrfikjes dhe Shpëtimit, si dhe Qendrat Operative Emergjente, ndodhen në mobilizim të plotë në të gjithë territorin e Kosovës për t’u përgjigjur në çdo rast nevoje.

Numrat pa pagesë për çdo rast emergjent:

  • 112 – Qendra Operative Emergjente
  • 192 – Policia e Kosovës
  • 193 – Zjarrëfikësit
  • 194 – Ndihma e Shpejtë

Continue Reading

Të kërkuara