Sabrina Carpenter ka treguar se jeton një stil jete të pazakontë për një yll të muzikës, duke e përshkruar veten si e shkëputur dhe “old school” (me mendësi të vjetër).

Artistja 26-vjeçare ka thënë për revistën Interview se nuk ka as televizor në apartamentin e saj.

“Nuk jam vajzë televizori. Nuk kam fare TV në shtëpi. Tingëllon sikur jam e shkëputur dhe ‘old school’, kur jam aty, thjesht dëgjoj muzikë”, u shpreh ajo e cila ka përshkruar veten si “shpirt i vjetër muzikor”, që në fëmijëri është rritur duke dëgjuar këngë nga dekada të mëhershme.

“Është e vetmja gjë që di të dëgjoj. Me këtë jam rritur. Kohët e fundit po dëgjoj shumë ‘Blue Nile’. Vitet ’70 më japin ngushëllim. Dashuria ime për bende si ‘Fleetwood Mac’ dhe ‘ABBA’ është e pafundme, por po argëtohem shumë duke zbuluar albume të reja”, ka thënë ajo.

Ani se ka arritur sukses në vitet e fundit, ajo ka theksuar se nuk është ndjerë nën presion gjatë punës për albumin e ri, “Man’s Best Friend”.

“Ka kohë që e bëj këtë punë. Nganjëherë është e mirë, nganjëherë jo. Ekziston ideja se kur arrin një pikë të caktuar, ndjen presion e fillon të mendosh. Unë mendoj se nuk është ndryshe nga hera e fundit. Askush nuk më tha se duhej ta nxirrja albumin në një datë të caktuar. Nëse ndihesha e frymëzuar, thjesht shkruaja”, ka treguar ylli.

Pas suksesit të albumit të kaluar, “Short n’ Sweet”, ajo u ndje edhe më e afërt me publikun.

“Pata fat që njerëzit u lidhën me albumin e kaluar ashtu si ndodhi. Kjo më bëri të shkruaj edhe më shumë, se u ndjeva më e kuptuar. Përderisa këngët janë të sinqerta për mua, kjo është ajo që ka rëndësi”, ka shtuar ajo.

Pavarësisht sëmundjes, diva e muzikës Celine Dion nuk është dorëzuar nga karriera dhe madje po planifikon të rikthehet së shpejti në skenë.

Sipas Mirror.uk, këngëtarja po punon për të rifituar zërin dhe qëndrueshmërinë e saj, që të mund të ngjitet përsëri në skenë, dhe burimet zbulojnë se e ka arritur qëllimin e po planifikon një rikthim triumfues vitin e ardhshëm.

Burimet thonë se Dion, e cila zbuloi luftën me sindromën shkatërruese të personit të ngurtë dhjetor 2022, po shërohet më mirë se sa pritej.

“Ajo është mirë, shëndeti i saj është i mirë e po arrin përsëri notat e larta. Ajo po ushtrohet në shtëpi e vazhdon me fizioterapi për të trajtuar sëmundjen. Ajo po lëviz mirë dhe zëri tingëllon bukur, falë të gjitha ushtrimeve vokale që po bën. Njerëzit nuk mund ta besojnë se po shërohet kaq shpejt. Sigurisht, ajo ende ka ditët e saj të këqija, por po bëhet më e fortë”, tha burimi.

Këngëtarja postoi një video të saj duke kërcyer në studio ndërsa dëgjonte një remiks të këngës “A New Day” të Sebastian Ingrosso-s, në të cilën ajo këndon. Remiksi është vetëm fillimi, vuri në dukje burimi, duke shtuar se ylli kanadez dëshiron të performojë vitin e ardhshëm.

“Është ëndrra e saj dhe po punon shumë për ta bërë realitet. Po bën çmos për të përshpejtuar rikthimin e saj”, tha burimi.

Dion u detyrua të anulonte turneun  “Courage World Tour” tre vjet më parë për shkak të SPS-së së rëndë, çrregullim i rrallë nervor që shkakton ngurtësi e spazma muskulore, duke e bërë të vështirë ecjen.

Pavarësisht spazmave muskulore që ia vështirësonin ecjen, ajo arriti të performonte drejtpërdrejt “Hymne a l’amour” në ceremoninë e hapjes së Lojërave Olimpike Verore 2024 në Paris.

Kjo erdhi pas një dekade sfiduese për të, që përfshinte humbjen e bashkëshortit 73-vjeçar nga kanceri në fyt më 2016, duke e lënë të rriste vetëm tre djem.

Meghan Markle nuk ka pasur rezultatin që shpresonte nga shfaqja e saj në Netflix, “Me dashuri, Meghan”.

Pas një audience më të ulët se sa pritej për sezonin e parë, platforma e transmetimit konfirmoi se pjesa e dytë ka pësuar të njëjtin fat.

Sezoni i parë i serialit të Dukeshës së Sussex nuk ka shumë për të folur. Me lansim premtues, duke u renditur në 10 serialet më të shikuara të Netflix në botë, gjithçka dukej se tregonte se ishte sukses i garantuar.

Megjithatë, u rendit i 383-ti, duke regjistruar në gjysmën e parë të këtij viti vetëm 5.3 milionë sikime midis më shumë se shtatë mijë titujve.

Edhe pse mund të argumentojmë se nuk pati rezultate të këqija si shfaqje kulinarie (ishte shfaqja më e shikuar e platformës në këtë kategori), sezoni i dytë nuk përfshihet në listën më të fundit të Netflix të “10 serialeve më të shikuara” në Shtetet e Bashkuara, Mbretërinë e Bashkuar dhe globalisht nga 25-31 gusht.

Sezoni i ri me nëntë episode u transmetua më 26 gusht, por u xhirua para se sezoni i parë të dilte në Netflix.

Ai paraqet kuzhinierë të ftuar të profilit të lartë si David Chang dhe Samin Nosrat dhe paraqitje të ftuara nga Chrissy Teigen dhe Tan France, u njoftua pas premierës së pjesës së parë në mars.

Pavarësisht mungesës së “With Love, Meghan” në listën e serialeve më të shikuara, u konfirmua se do të zhvillohet një speciale festive.

“Këtë dhjetor, bashkohuni me Meghan në Montecito për një festë magjike”, njoftoi Archewell Productions në një deklaratë.

Filmi “The Voice Of Hind Rajab” nga regjisorja tuniziane Kaouther Ben Hania mori vlerësim të jashtëzakonshëm në Festivalin e Filmit në Venecia të këtij viti.

Pasi filmi u shfaq premierë në Festivalin e Filmit në Venecia, ai u shoqërua nga një ovacion në këmbë që zgjati deri në 23 minuta e 50 sekonda me britma “Palestina e lirë (Free Palestine)”.

Kjo dramë e fuqishme rindërton ngjarjet që lidhen me vrasjen e gjashtëvjeçares Hind Rajab, familjes dhe dy ndihmësmjekëve mjekësorë që u përpoqën të ndihmonin pasi makina e tyre u godit nga forcat izraelite ndërsa po largoheshin nga Gaza në janar 2024.

Vrasjet ndodhën tre muaj pas fillimit të operacionit ushtarak të Izraelit në Rripin e Gazës, i nisur pas një sulmi të udhëhequr nga Hamasi më 7 tetor 2023. Sipas të dhënave në dispozicion, më shumë se 61,000 njerëz nga territoret palestineze vdiqën në atë operacion.

Duartrokitjet në këmbë për “The Voice Of Hind Rajab” i tejkaluan rekordet e mëparshme të festivalit. Deri më tani, duartrokitjet më të gjata të regjistruara në Festivalin e Filmit në Kanë ishin për filmin “Pan’s Labyrinth” nga Guillermo del Toro në vitin 2006 – 22 minuta. Rekordi i vitit të kaluar në Venecia mbahej nga filmi i Almodovarit me tiutllin “The Room Next Door” me 18 minuta duartrokitje në këmbë.

Gjatë ovacioneve në Venecia, Motaz Malhees ngriti flamurin palestinez e publiku reagoi emocionalisht. Shumë prej tyre qanë gjatë dhe pas shfaqjes së filmit. Filmi u mbështet si producentë nga aktorë të shumtë, përfshirë Brad Pitt, Joaquin Phoenix, Rooney Mara, Alfonso Cuaron dhe Jonathan Glazer. Phoenix dhe Mara morën pjesë në premierë, ku anëtarët e ekipit mbajtën një portret të vogëlushes Hind Rajab.

Tunizia ka zgjedhur “The Voice Of Hind Rajab” si kandidatin zyrtar për çmimin Oscar në kategorinë e filmit më të mirë ndërkombëtar.

Në një konferencë për shtyp të mbajtur po atë ditë, Ben Hania dhe kasta u pritën me duartrokitje në këmbë, dhe aktorja Saja Kilani mbajti një fjalim të fuqishëm në emër të ekipit të xhirimit.

“Mjaft me vrasje masive, uri, dehumanizim, shkatërrim dhe pushtim. Ky film nuk është opinion a fantazi, bazohet në të vërtetën. Historia e Hindit mbart peshën e një kombi të tërë. Zëri është një nga dhjetëra mijëra fëmijë që janë vrarë në Gaza në dy vitet e fundit. Është zëri i çdo vajze e djali me të drejtën për jetë, për të ëndërruar, për ekzistencë dinjitoze, e gjithë kjo u vodh para syve tanë të palëkundur”, tha Kilani. Të shtunën, në Lido u mbajt një protestë e madhe në mbështetje të Palestinës.