Përzgjedhësi i Kombëtares së Kosovës, Franco Foda, ka bërë publike listën e futbollistëve të ftuar për katër sfidat e radhës në kuadër të Ligës së Kombeve. “Dardanët” hyjnë në këtë cikël ndeshjesh me motivim dhe përkushtim maksimal për të kërkuar rezultate pozitive.

Prurjet e reja dhe lojtarët e ftuar për herë të parë Lista e këtij grumbullimi sjell disa emra të rinj dhe premtues për përfaqësuesen:

Erblin Osmani – Talenti i Bayern Munichut është risia kryesore, i cili ka vendosur përfundimisht të përfaqësojë Kosovën duke lënë pas kombëtaren e Gjermanisë.

Milot Avdyli – Ylli i skuadrës së Celje merr ftesën e tij të parë me kombëtaren A.

Dion Kacuri – Mesfushori i ri i bashkohet ekipit si një nga prurjet e reja në këtë listë.

Mungesat dhe rikthimet Kosova do të përballet me mungesa të rëndësishme në mbrojtje dhe mesfushë. Amir Rrahmani dhe Florent Hadërgjonaj nuk do të jenë pjesë e ekipit për shkak të vendimit të tyre për t’u pensionuar përkohësisht. Po ashtu, për shkak lëndimesh mungojnë Fidan Aliti, Kreshnik Hajrizi, Elvis Rexhbeçaj dhe Florent Muslija. Në anën tjetër, pjesë e listës janë dy emrat kryesorë të sulmit, Edon Zhegrova dhe Milot Rashica.

Lista e Plotë e Futbollistëve të Ftuar:

Portierë: Arijanet Muric, Amir Saipi, Visar Bekaj.

Mbrojtës: Mërgim Vojvoda, Lumbardh Dellova, Ilir Krasniqi, Albian Hajdari, Ron Raçi, Leard Sadriu, Dion Gallapeni.

Mesfushorë dhe Sulmues: Ermal Krasniqi, Milot Avdyli, Baton Zabërgja, Veldin Hoxha, Erblin Osmani, Lindon Emërllahu, Leon Avdullahu, Dion Kacuri, Donat Rrudhani, Muharrem Jashari, Valmir Matoshi, Milot Rashica, Edon Zhegrova, Fisnik Asllani, Albion Rrahmani, Vedat Muriqi.

24 shtator: Kosova – Irlanda (Prishtinë)

27 shtator: Austria – Kosova (Gjermani/Austri, mysafir)

1 tetor: Izraeli – Kosova (Hungari, mysafir)

4 tetor: Kosova – Austria (Stadiumi “Fadil Vokrri”, Prishtinë)

D.L

Trajneri Franco Foda ka hartuar një listë rezervë prej dhjetë lojtarësh si plan emergjence për kombëtaren.

Në këtë grup përfshihen emra si Meriton Korenica, Leon Frrokaj, Rilind Nivokazi dhe Betim Fazliji.

Këta futbollistë do të jenë në gatishmëri të plotë për t’u grumbulluar me ekipim në rast se lojtarët e listës bazë pësojnë lëndime apo kanë mungesa të tjera.

Kjo listë i mundëson shtabit teknik reagim të shpejtë për të mbuluar çdo nevojë të papritur.

D.L

Sonte, e premte, nis xhiroja e shtatë e Superligës së Kosovës, e cila këtë herë sjell vetëm një përballje, por një derbi të zjarrtë mes Gjilanit dhe Prishtinës.

Dy skuadrat e kanë nisur në mënyrë fantastike sezonin dhe në stadiumin e qytetit do të kërkojnë pikët e plota. Prishtina vjen në këtë përballje pa asnjë humbje, me pesë fitore në po aq ndeshje, ndërsa Gjilani ka regjistruar vetëm një humbje.

“Bardhëkaltrit” kanë edhe një motiv shtesë për këtë duel, pasi synojnë t’i japin fund një serie negative ndaj “Skifterëve”. Prishtina nuk ka arritur të fitojë në 10 përballjet e fundit ndaj Gjilanit.

Derbi i madh pritet të sjellë emocione të shumta, ndërsa vërshëllima e parë në stadiumin e qytetit do të dëgjohet nga ora 19:00.

D.L

Më 24 shtator, Kosova do të përballet me Irlandën në Prishtinë, ndërsa Austria dhe Izraeli do të takohen në Linz. Këto janë ndeshjet e para të Grupit 3 të Ligës B të Ligës së Kombeve të UEFA-s.

Grupi vlerësohet si i fortë dhe mjaft i barabartë, me të katërta përfaqësueset që synojnë vendin e parë dhe avancimin në Ligën A.

Edhe pse ndeshjen e parë Irlanda e zhvillon ndaj Kosovës, në këtë përfaqësuese vëmendja kryesore aktualisht është te sfida e dytë, ajo kundër Izraelit.

Irlanda dhe Izraeli do të përballen më 27 shtator në Debrecen të Hungarisë, me Izraelin si vendas. Pikërisht në Debrecen do të zhvillohet edhe ndeshja Izrael – Kosovë, më 1 tetor.

Në Irlandë, mbështetja për Palestinën është e madhe dhe prej kohësh ka zëra që kërkojnë që ndeshjet ndaj Izraelit të mos zhvillohen. Madje, kjo mundësi është shqyrtuar edhe nga Federata Irlandeze, por në fund është vendosur që ndeshjet të luhen, pasi një bojkot do të mund të sillte sanksione të rënda.

Për shkak të shqetësimeve për mundësi incidentesh, Irlanda ka vendosur që edhe ndeshjen si vendase ndaj Izraelit ta zhvillojë në terren neutral. Sfida do të luhet më 4 tetor në Serbi dhe do të zhvillohet pa praninë e tifozëve.

Selektori i Irlandës, Heimir Hallgrimsson, ka treguar se ka zhvilluar biseda individuale me lojtarët për situatën dhe për ndeshjet ndaj Izraelit.

“Askush prej nesh nuk ndihet rehat duke luajtur në këto ndeshje”, ka thënë Hallgrimsson.

“Sigurisht që kemi mendime të ndryshme dhe qëndrime me intensitet të ndryshëm. Mendoj se është mirë të them, pa hyrë në detaje për individë, se askush prej nesh nuk ndihet rehat duke luajtur në këto ndeshje. Por, pasi kemi vendosur t’i luajmë ato, ne qëndrojmë të gjithë të bashkuar dhe luajmë si një trup i vetëm”, ka shtuar ai.

Në korrik, delegatët e Federatës Irlandeze e mbështetën vendimin për zhvillimin e ndeshjeve, pavarësisht presionit për bojkot. Në federatë kishte shqetësime se moszhvillimi i tyre do të shkaktonte dëme të konsiderueshme.

Presioni ka ardhur edhe nga lëvizja “Irish Sport”, e cila përmes fushatës “Stop The Game” ka bërë thirrje për bojkot të ndeshjeve me Izraelin. Kjo thirrje është mbështetur edhe nga ish-trajnerë dhe ish-futbollistë të Përfaqësueses së Irlandës.

Në maj, një ndeshje e Irlandës ndaj Katarit në Dublin u ndërpre përkohësisht pasi në fushë u hodhën topa tenisi që përmbanin mesazhe në mbështetje të Palestinës.

Sa i përket formës sportive, Irlanda së fundmi është mposhtur 1:0 nga Portugalia, më 11 tetor 2025.

Megjithatë, Hallgrimsson insiston se skuadra e tij është në një moment pozitiv.

“Jemi në seri pozitive dhe duam të vazhdojmë atë”, ka deklaruar selektori irlandez.

“Jemi të pamposhtur në shtatë ndeshje dhe mendoj se asnjë përfaqësuese nuk dëshiron të luajë kundër Irlandës për momentin”, ka përfunduar Hallgrimsson.

D.L