Lajmet

Gjermania konfirmon praninë e saj në Ballkanin Perëndimor

Baerbock është duke i vizituar vendet e Ballkanit Perëndimor.

Published

3 years ago

March 10, 2022

Betim Gashi

“Gjermania në të ardhmen do të jetë më e pranishme në Ballkanin Perëndimor dhe për këtë arsye për herë të parë kemi një të dërguar special për këtë rajon”, ka deklaruar të enjten në Sarajevë ministrja e Jashtme e Gjermanisë, Annalena Baerbock.

Baerbock është duke i vizituar vendet e Ballkanit Perëndimor. Të enjten pasdite ajo do të qëndrojë edhe në Kosovë, ku do të takohet me udhëheqës institucionesh. Pas Kosovës, ajo do të udhëtojë në Serbi. Me të është Manuel Sarrazin, i dërguari i Posaçëm i Gjermanisë për Ballkanin Perëndimor, të cilin Qeveria gjermane e emëroi në këtë pozitë më 18 shkurt 2022.

Në Sarajevë, në një konferencë për media me ministren e Punëve të Jashtme, Bisera Turkoviq, Baerbock tha se Bosnja e Hercegovina është një nga prioritetet e politikës së jashtme të Gjermanisë.

Ajo shtoi se Gjermania do t’i mbështesë ata që janë në favor të forcimit të vendit, (Bosnje dhe Hercegovinës), jo ata që po punojnë për destabilizimin e shtetit.

“Ne duhet të sigurojmë paqen në Bosnje e Hercegovinë dhe duhet t’i luftojmë ata që e kërcënojnë atë”, tha Baerbock.

Ministrja gjermane nuk përmendi në mënyrë specifike sanksionet e mundshme për zyrtarët në Bosnje, por përmendi se Gjermania do të ndërpresë mbështetjen e saj ekonomike për pjesët e Bosnje e Hercegovinës që nuk respektojnë sundimin e ligjit.

Në dhjetor të vitit të kaluar, pak pasi mori detyrën, Baerbock loboi për sanksione kundër Milorad Dodikut, anëtar serb i Presidencës së Bosnjes.

Shtetet e Bashkuara veçse kanë vendosur sanksione ndaj Dodikut, për përfshirje në korrupsion. Uashingtoni ka thënë se me veprimet e tij për të transferuar disa kompetenca shtetërore në nivelin e entitetit të Republikës Sërpska, Dodik ka minuar stabilitetin e rajonit.

Ministrja e Punëve të Jashtme, Bisera Turkoviq, ka thënë se nëse lejohet destabilizimi i mëtejshëm i Bosnjës e Hercegovinës dhe bllokimi i institucioneve shtetërore, ekziston frika se do të rrezikohet stabiliteti dhe siguria e Evropës, prandaj është e nevojshme që menjëherë të ndalen të gjitha proceset retrograde në Bosnje.

Kjo është vizita e saj e parë që kur mori detyrën si ministre e Jashtme gjermane në dhjetor të vitit të kaluar. Ajo zëvendësoi socialdemokratin Heik Maas në atë post.

Në dhjetor të vitit të kaluar, Qeveria e re gjermane i bëri thirrje Bashkimit Evropian të vendosë sanksione ndaj Milorad Dodikut, një anëtar i Presidencës së BeH, duke shpjeguar se qëllimi i tij ishte “ta tërhiqte Republikën Sërpska, një nga dy entitetet e Bosnjës, nga forcat e armatosura të BeH, nga gjyqësori dhe sistemi tatimor”.

Diplomatja gjermane po viziton Bosnjën e Hercegovinën në kohën kur Ukraina po përballet me pushtimin rus dhe nga një pjesë e komunitetit ndërkombëtar ka paralajmërime se kriza mund të përhapet edhe në Ballkanin Perëndimor.

Lajmet

Rama reagon për herë të parë për fitoren: Ju falenderoj përgjunjësisht

Published

1 hour ago

May 14, 2025

UBTnews

Kryeministri Edi Rama ka reaguar për herë të parë lidhur me fitoren e zgjedhjeve të 11 majit, që i ka siguruar edhe mandatin e katërt të qeverisjes.

Në një postim në rrjete sociale, kryesocialisti shpreh mirënjohjen për besimin që i dhanë sërish qytetarët, ndërsa paralajmëron edhe fjalimin e fitores që do të mbajë në orën 19:00 në sheshin Skënderbej.

“Mirëmëngjes dhe duke ju rrëfyer se s’po i gjej dot fjalët për të shqiptuar sonte në 7 në Sheshin Skënderbej, ju falenderoj përgjunjësisht për besimin e patregueshëm e ju uroj një ditë të mbarë”, shkruan Rama.

Lajmet

Presidenti i Këshillit Evropian viziton Kosovën

Published

1 hour ago

May 14, 2025

UBTnews

Presidenti i Këshillit Evropian, Antonio Costa, do ta vizitojë Kosovën të mërkurën.

Gjatë pasdites, ai do të takohet me presidenten e Kosovës, Vjosa Osmani, dhe me kryeministrin në detyrë, Albin Kurti.

Costa e viziton Kosovën në një kohë kur ligjvënësit kosovarë nuk kanë arritur të konstituojnë Kuvendin pas zgjedhjeve të mbajtura në shkurt, edhe pas 15 përpjekjeve. Qeveria e Albin Kurtit është ende në detyrë, deri në formimin e një qeverie të re pas konstituimit të Kuvendit.

Po ashtu, kjo vizitë zhvillohet në një kohë kur liderët kosovarë po shtojnë thirrjet drejtuar Bashkimit Evropian për heqjen e masave ndëshkuese të vendosura pas tensioneve në veri të vendit. Këto masa mbeten ende në fuqi, me arsyetimin se Kosova nuk ka ndërmarrë hapa të mjaftueshëm për shtensionimin e situatës në komunat me shumicë serbe.

Costa një ditë më parë qëndroi në Serbi dhe në Bosnje e Hercegovinë.

Gjatë një konference për media me presidentin serb, Aleksandar Vuçiq, Costa theksoi se dialogu me Kosovën është kyç për anëtarësimin e Serbisë në BE, dhe shtoi se është po aq i rëndësishëm edhe qëndrimi i qartë për dënimin e agresionit rus ndaj Ukrainës.

Për sa i përket vizitës së Vuçiqit në Moskë për festën e Ditës së Fitores, pavarësisht mesazheve nga Brukseli që i kërkonin të mos shkonte, Costa tha se Vuçiq ia shpjegoi atij se shkoi për të festuar një ngjarje historike.

“Nuk mund ta ndryshojmë historinë, e kuptoj plotësisht, që Serbia feston çlirimin, por nuk mund ta festojmë këtë pa dënuar invazionin aktual në një shtet tjetër“, tha Costa.

Në Sarajevë, ai shprehu shqetësim për, siç i quajti, “veprimet ndarëse të Republikës Sërpska”, duke i cilësuar ato si kërcënim për stabilitetin dhe të ardhmen evropiane të Bosnjë e Hercegovinës.

Pas Kosovës, ai do të vizitojë edhe Maqedoninë e Veriut, si dhe Shqipërinë, ku do të marrë pjesë në Samitin e Komunitetit Politik Evropian.

Liderët e BE-së zgjodhën portugezin Antonio Costa si president të Këshillit Evropian, detyrë të cilën e mori më 1 dhjetor 2024./REL/

Lajmet

Sali Berisha paralajmëron protestë më 16 maj

Published

20 hours ago

May 13, 2025

UBTnews

Kryedemokrati i Shqipërisë, Sali Berisha ka paralajmëruar protestë pas rezultatit të zgjedhjeve.

Tubimi do të mbahet në datë 16 në bulevardin “Zogu i Parë”, pikërisht në ditën e Samitit të Komunitetit Politik Europian.

“Thirrja ime për të gjithë komisionerët të numërojnë çdo votë në dëshmi të respektit tonë të palëkundur për ata që kanë votuar për opozitën në dëshmi të terrorit, të mbajnë çdo parregullsi.

Libri i zi shkruhet me datën 16 ora 17:00 në bulevardin Zogu i Parë për të sensibilizuar opinionin kombëtar të përbindëshit elektoral Edi Rama”, tha Berisha.

Lajmet

Anulohet konferenca e Trendafilovës pas protestës së veteranëve

Published

21 hours ago

May 13, 2025

UBTnews

Veteranët e luftës së Ushtrisë Çlirimtare të Kosovës protestuan kundër vizitës së kryetares së Dhomave të Specializuara, Ekaterina Trendafilova, në Prishtinë.

Një grup veteranësh së bashku me udhëheqësit e Organizatës së Veteranëve të Luftës së UÇK-së, u mblodhën para hotelit ku ishte paralajmëruar një konferencë e Trendafilovës, e cila u anulua pas protestës.

Udhëheqësi i OVL të UÇK-së, Hysni Gucati, tha se Trendafilova nuk është e mirëseardhur në Kosovë.

“Sa herë vjen në Kosovë, kjo vjen për një të keqe. Unë mendoj se kjo ka ardhur vetëm ta destabilizojë Kosovën”, deklaroi Gucati.

Me anulimin e konferencës, Gucati tha se u arrit qëllimi i veteranëve.

Pas anulimit të konferencës, Dhomat e Specializuara thanë për REL-in se do t’i drejtohen opinionit publik përmes një komunikate për media.

Gjatë protestës, veteranët hodhën tym të zi para hyrjes së hotelit.

Në një reagim të përbashkët, organizatat e dala nga lufta paraprakisht thanë se vizita e kryetares së Dhomave të Specializuara në Prishtinë është e papranueshme dhe përbën fyerje për qytetarët e Kosovës.

Ata deklaruan se vizita e saj nuk ka të bëjë me drejtësinë dhe transparencën, duke theksuar se gjykata ka një qasje arrogante dhe nuk i shërben drejtësisë.

Trendafilova ka mbajtur konferenca dhe ka qëndruar edhe më parë në Prishtinë./REL/