Që nga e enjta filloi shitja e fishekzjarreve për festën e Vitit të Ri, dy vjet pas ndalimit të shitjes së tyre si pasojë e kufizimeve të pandemisë.

Ashtu si edhe në shumë vende të tjera, tradita e ndezjes së fishekzjarreve është pjesë e rëndësishme e festimeve të Vitit të Ri në Gjermani.

Sipas një studimi të fundit të Universitetit Bundeswehr në Mynih, pothuajse dy të tretat e të anketuarve e panë këtë vendim si të drejtë. I njëjti sondazh tregoi se 17% e njerëzve po planifikojnë të shpenzojnë para për fishekzjarre këtë vit.

Shoqata e industrisë piroteknike VPI pret rreth 120 milionë euro (127.6 milionë dollarë) nga shitjet e fishekzjarreve këtë vit.

Cilat janë rregullat e fishekzjarreve në Gjermani?

Disa qytete kanë krijuar zona pa fishekzjarre, veçanërisht rreth rrugëve të ngarkuara. Cilësia e fishekzjarreve që shiten nga data 29-31 dhjetor duhet të certifikohet nga Instituti Federal i Gjermanisë për Kërkimin dhe Testimin e Materialeve (BAM) ose nga një autoritet i krahasueshëm i BE-së.

Blerësit duhet të jenë të paktën 18 vjeç dhe autoritetet gjermane rekomandojnë që fishekzjarret të mos blihen jashtë vendit.

Gjatë viteve 2020 dhe 2021, kur autoritetet gjermane ndaluan shitjen private të fishekzjarreve, tonelata të lëndëve piroteknike ilegale u kontrabanduan në vend pasi gjermanët shkuan jashtë vendit për t’i blerë ato.

Pse Gjermania ndaloi fishekzjarret më parë?

Kritikët thonë se fishekzjarret e Vitit të Ri i bëjnë zonat e banuara të duken sikurse zona lufte. Autoritetet shëndetësore thonë se ka rritje të rasteve në spital për shkak të dëmeve që shkaktojnë fishekzjarret, sikurse djegie të rënda, si dhe lëndime të duarve dhe syve.

Gjermania e ndaloi shitjen e tyre në dy vitet e fundit veçanërisht për shkak se spitalet ishin të mbingarkuara me raste të COVID në kulmin e pandemisë.

Kryqi i Kuq Gjerman bëri thirrje për kujdes gjatë ndezjes së fishekzjarreve këtë vit, duke paralajmëruar se disa objekte të kujdesit shëndetësor janë tashmë të tensionuara.

Ndikimi mjedisor i fishekzjarreve ka qenë gjithashtu në qendër të vëmendjes vitet e fundit. Të krijuara nga plastika e dëmshme dhe komponime kimike, dritat piroteknike jo vetëm që shkaktojnë ndotje të tokës, por mund të ndikojnë seriozisht në cilësinë e ajrit.

Grupet mjedisore dhe sindikata e policisë gjermane kanë kërkuar rikthimin e ndalimit të fishekzjarreve./UBTNews/