E ardhmja e Ademola Lookman mbetet pezull në aksin Inter–Atalanta. Atalanta vazhdon të kërkojë 50 milionë euro, kurse Interi mbetet destinacioni i preferuar i lojtarit, që ka refuzuar oferta të tjera dhe pret që premtimi i bërë nga Atalanta për transferimin të mbahet.

Aktualisht i dëmtuar lehtë, Lookman nuk do të udhëtojë në Gjermani me skuadrën, por mund të bashkohet më vonë për miqësoren ndaj Këlnit më 9 gusht. Pavarësisht dëshirës për transferim, ai po tregohet profesional dhe nuk ka bërë presion publik për largim  një qëndrim që vlerësohet nga klubi bergamask.

Interi nuk ka ndërmend të ngrejë ofertën prej 42 milionë euro plus 3 milionë në formë të bonuseve në mënyrë të konsiderueshme, ndërsa Atalanta po shqyrton alternativat e zëvendësimit, si Federico Chiesa apo Roëe i Marsejës.

Qeveria në detyrë sot ka pezulluar nga marrëdhënia e punës në shërbimin civil Besim Kamberajn, sekretar i përgjithshëm i Ministrisë së Zhvillimit Rajonal ndaj të cilit është ngritur aktakuzë për procedurë penale për kryerje të veprës penale gjatë ushtrimit të funksioneve të tij zyrtare.

Ministri në detyrë i Punëve të Brendshme, Xhelal Sveçla, tha se pezullimi nga detyra i nëpunësit civil të kategorisë së lartë drejtuese në institucionet e administratës shtetërore në rast të ngritjes së aktakuzës është obligim ligjor i qeverisë.

“Ky propozim vendim është i bazuar në njoftimin e pranuar nga organet e drejtësisë sipas të cilit, në këtë rast të z. Kamberaj është ngritur aktakuzë për kryerje të veprës penale që lidhet me ushtrimin e funksioneve të tij zyrtare… Pezullimi nga detyra i nëpunësit civil në rast të ngritjes së aktakuzës është obligim ligjore i qeverisë”, tha ai.

Prokuroria Speciale e Kosovës më 4 korrik 2025 ka ngritur aktakuzë ndaj ministrit në detyrë të Zhvillimit Rajonal, Fikrim Damka, dhe ushtruesit të detyrës së Sekretarit të kësaj Ministrie, Besim Kamberaj.

Po ashtu në mbledhjen e sotmë të qeverisë në detyrë, është emëruar Hysen Muzliukaj në pozitën e Drejtorit të Përgjithshëm të Institutit të Kosovës për Administratë Publike me mandat katër vjeçar, si dhe është emëruar Shemsi Duriqin në pozitën e Drejtorit Ekzekutiv të Agjencisë së Kosovës për Forenzikë me mandat katër vjeçar.

Një nga skenat më të ndjera të Kupës së Ligës u regjistrua gjatë fitores dramatike të Inter Miami ndaj Atlas FC, ku Lionel Messi dhe sulmuesi uruguaian Matías Cóccaro u përfshinë në një shkëmbim emocional në fushë, që përfundoi me një përqafim dhe shkëmbim fanellash.

Në një intervistë pas ndeshjes, Cóccaro sqaroi se tensioni që u pa në fushë ishte rezultat i intensitetit të lojës.

“Kur shënuam golin e barazimit, entuziazmi im nuk i pëlqeu Messit. Kur ata shënuan, ai festoi para meje. Por më pas u përqafuam dhe ai madje më kërkoi falje. Më tha që do të më dërgojë fanellën e tij, një gjest që tregon madhështinë e tij,” tha ai.

Cóccaro nuk kurseu fjalët e mira për yllin argjentinas:

“Ai është më i madhi në histori. Me të, unë thjesht hesht… me askënd tjetër. Dhe Suárez? Ai është idhulli im,” u shpreh ai.

Sulmuesi i Atlas shtoi se Messi kuptoi se gjithçka ishte pjesë e përkushtimit për skuadrën dhe nuk kishte asgjë personale.

Messi pati një tjetër paraqitje të shkëlqyer, duke dhuruar dy asistime, krijuar tri raste të mëdha dhe kontribuar në mënyrë të drejtpërdrejtë në golin vendimtar në minutën e fundit.

Për Atlasin, humbja e vendos skuadrën në një pozitë të vështirë për kualifikim, megjithëse ata kanë ende dy ndeshje për të ndryshuar situatën – ndaj Orlando City dhe Atlanta United.

Zëvendëskryeministrja, Donika Gërvalla, tha se marrëdhëniet me Shtetet e Bashkuara të Amerikës “kanë arritur një transformim substancial”.

Sot, Qeveria në detyrë e Kosovës ka hequr tarifën doganore me Shtetet e Bashkuara të Amerikës. Sipas kryeministrit në detyrë Albin Kurti, tani e tutje, të gjitha produktet me origjinë nga SHBA-ja do të kenë tarifë zero për qind kur të hyjnë në Kosovë.

“Gjatë katër vjeçarit që lamë mbrapa, marrëdhëniet me Shtetet e Bashkuara të Amerikës kanë arritur një transformim substancial, i cili ka çuar në forcim të marrëdhënieve bilaterale në shumë fusha të rëndësishme dhe sidomos në fushën e sigurisë dhe në diplomaci. Prandaj këtë vendim e shohim në vazhdimësi të politikave të pandara të vendit tonë me Shtetet e Bashkuara të Amerikës, jo vetëm në forcimin e miqësisë por në krijimin dhe forcimin e një partneriteti të mirëfilltë me shtetin i cili ka qenë përkrahës gjithmonë në të gjitha temat që kanë të bëjnë me shtetësinë tonë”, tha ajo.

Kujtojmë se Kosova kishte tarifë doganore ndaj produkteve amerikane prej 10%. Pas tarifave të publikuara nga Donald Trump për rreth 200 vende në mbarë botën, Kosova u prek me 10% për produktet e eksportuara në SHBA.