Ish-supermodeli amerikan Hoyt Richards, dikur një nga modelet meshkuj më të paguar në botë, ka rrëfyer për herë të parë në detaje për përvojën e tij brenda kultit misterioz “Eternal Values”, histori që trajtohet në dokumentarin e ri të HBO-së, Bring Me the Beauties: A Model Cult.

Në kulmin e karrierës së tij gjatë viteve ’80, Richards ishte fytyra e markave të njohura si Ralph Lauren, Dunhill dhe Donna Karan. Megjithatë, pas shkëlqimit të botës së modës, ai bënte një jetë krejt tjetër si anëtar i përkushtuar i kultit të udhëhequr nga Frederick von Mierers.

Von Mierers, një figurë enigmatike e shoqërisë së lartë në Nju Jork, pretendonte se ishte një qenie jashtëtokësore nga planeti Arcturus, e ardhur në Tokë për të përgatitur njerëzimin për një katastrofë globale që, sipas tij, do të ndodhte në vitin 1999. Ai tërhiqte modele, artistë dhe profesionistë të rinj, duke u ofruar “lexime shpirtërore”, gurë të çmuar me pretendime shëruese dhe mësime për ndriçim shpirtëror.

Richards u përfshi në këtë grup që në vitin 1978 dhe qëndroi pjesë e tij për më shumë se dy dekada. Edhe pas vdekjes së Von Mierers nga komplikimet e lidhura me AIDS-in në vitin 1990, ai dhe disa ndjekës të tjerë vazhduan aktivitetin e kultit deri në vitin 1999.

Sot, në moshën 64-vjeçare, Richards pranon se ishte “i manipuluar psikologjikisht” dhe thotë se ka kaluar 25 vjet duke reflektuar mbi atë periudhë të jetës së tij.

“Kam dashur gjithnjë e më shumë ta ndaj këtë histori me publikun, sepse besoj se ka një vlerë të madhe për të kuptuar se si njerëzit mund të bien pre e manipulimit,” është shprehur ai.

Dokumentari sjell dëshmi nga ish-anëtarë të kultit dhe hedh dritë mbi mënyrën se si organizata, e cila dikur kishte anëtarë nga elita e modës dhe shoqërisë amerikane, arriti të ushtronte ndikim të madh mbi ndjekësit e saj./BBC//A.K/

Një takim i rastësishëm i Rihanna-s me një grua që po lufton me kancerin është kthyer në një nga momentet më prekëse të ditëve të fundit, pasi këngëtarja i dha asaj një mesazh të fuqishëm për vetëbesimin dhe pranimin e vetes.

Ngjarja ndodhi në një supermarket në Los Anxhelos, ku gruaja, e identifikuar si Robin, iu afrua artistes për një fotografi. Para se ta kërkonte, ajo i kërkoi falje që nuk mbante paruke, duke thënë se ndihej në siklet për pamjen e saj.

Por Rihanna nuk e la bisedën të vazhdonte në atë drejtim. “Nuk dukesh aspak keq. Dukesh e mrekullueshme,” i tha ajo, përpara se të prekte flokët e saj dhe të shtonte me humor: “Ja si dukem unë me paruken time.”

Artistja e inkurajoi Robin të mos ndihej kurrë e detyruar të kërkonte falje për pamjen e saj.

“Sa herë që takon dikë, mos e bëj më këtë. Je e mrekullueshme pikërisht kështu,” i tha Rihanna.

Takimi u filmua për vlogun e personalitetit mediatik Jason Lee dhe u shpërnda gjerësisht në rrjetet sociale, ku u vlerësua për ngrohtësinë dhe empatinë e artistes.

Gjatë bisedës, Rihanna zbuloi edhe një rastësi të bukur: emri i saj i vërtetë është Robyn, njësoj si ai i gruas që takoi. “Je një Robyn e vërtetë,” i tha ajo me buzëqeshje.

Në fund të takimit, Robin e pyeti nëse mund ta telefononte ndonjëherë, ndërsa Rihanna iu përgjigj me entuziazëm: “Sigurisht!”. Duke e përqafuar me fjalë inkurajuese, artistja e përcolli me mesazhin: “Shihemi në turne. Të dua. Dhe mos e bëj më kurrë atë.”/A.K/

Kompania OpenAI ka lansuar të mërkurën “GPT-Live”, një familje të re të modeleve zërore, të cilat janë të kapshme të dëgjojnë dhe të flasin në të njëjtën kohë në kohë reale.

Startup-i i inteligjencës artificiale, i cili po përgatitet për të dalë në bursë (IPO), njoftoi se do të nxjerrë në treg dy versione të këtij modeli – GPT-Live-1 dhe GPT-Live-1 mini – për përdoruesit në mbarë botën po të mërkurën.

Në maj, OpenAI prezantoi tre modele audio për platformën e saj të zhvilluesve, me qëllim që t’i bëjë agjentët softuerikë të bazuar në zë më bashkëbisedues dhe më të aftë për të kryer detyra në kohë reale. /Reuters/ /E.A/

Këngëtarja legjendare uellsiane Bonnie Tyler, e njohur në mbarë botën për hitet ikonike “Total Eclipse of the Heart” dhe “Holding Out for a Hero”, ka ndërruar jetë në moshën 75-vjeçare. Lajmi u konfirmua nga familja dhe ekipi i saj përmes një njoftimi të publikuar në rrjetet zyrtare sociale.

Sipas njoftimit, Tyler ndërroi jetë të mërkurën në një spital në Portugali, ku po trajtohej pas një sëmundjeje.

“Në ditët në vijim do të publikojmë një deklaratë të mëtejshme, por për momentin kërkojmë privatësi për ta përballuar këtë humbje të rëndë”, thuhet në deklaratën e familjes dhe ekipit të artistes.

Bonnie Tyler ishte një nga zërat më të veçantë të muzikës rock dhe pop. Me timbrin e saj karakteristik dhe një karrierë që zgjati për më shumë se pesë dekada, ajo la gjurmë në industrinë muzikore me këngë që vazhdojnë të dëgjohen dhe të pëlqehen nga miliona fansa në mbarë botën./A.K/