Oda Ekonomike e Kosovës ka kërkuar nga Qeveria në detyrë që të ndërmarrë veprime urgjente për mbështetjen e fermerëve, prodhuesve dhe përpunuesve vendorë, pas zhvillimeve të fundit në sektorin e qumështit.

Në një takim të organizuar me Shoqatën e Prodhuesve të Kosovës dhe fermerë të vendit, OEK shprehu shqetësimet për situatën e krijuar dhe kërkoi që analizat për qumështin “Vita” të publikohen sa më shpejt nga Agjencia e Ushqimit dhe Veterinës, në mënyrë profesionale dhe të pavarur.

Kryetari i Odës Ekonomike të Kosovës, Lulzim Rafuna, tha se institucionet duhet të tregojnë kujdes në deklarimet dhe veprimet administrative ndaj prodhuesve vendorë.

“Duhet të ndërmerren veprime urgjente për mbështetjen e fermerëve, prodhuesve dhe përpunuesve përmes politikave fiskale dhe administrative. Kërkojmë që sa më shpejt të dalin analizat për rastin e ‘Vitës’ në mënyrë profesionale dhe të pavarur”, u shpreh Rafuna.

Edhe kryetari i Shoqatës së Prodhuesve të Kosovës, Kushtrim Ajvazi, tha se raportimet ndaj prodhuesve duhet të bëhen vetëm mbi bazë ligjore, duke theksuar se duhet të mbrohet prodhimi vendor.

Drejtori i përgjithshëm i qumështores “Vita”, Artan Spahijaj, deklaroi se kompania është e hapur për kontrolle dhe marrje mostrash, duke shtuar se të gjitha proceset janë të dokumentuara sipas ligjit. Ai bëri të ditur se më 7 korrik inspektorët kanë marrë gjashtë mostra të tjera nga produktet e kompanisë.

Sipas tij, “Vita” ka grumbulluar miliona litra qumësht nga fermerët vendorë gjatë viteve të fundit, duke theksuar se kompania ka bashkëpunuar me prodhuesit lokalë dhe se proceset e saj janë të deklaruara.

Fermerët e pranishëm në takim ngritën shqetësimet e tyre për humbjet e shkaktuara nga situata e krijuar. Fermeri Fidan Krasniqi tha se derdhja e qumështit ka ndodhur si pasojë e pamundësisë për ta plasuar atë në treg, duke kërkuar që prodhuesit vendorë të mos dëmtohen nga deklarimet pa bazë.

Ministria e Bujqësisë dhe Agjencia e Ushqimit dhe Veterinës kishin inspektuar më herët qumështoren “Vita”, pas së cilës menaxhmenti i kompanisë kishte vendosur mbylljen e përkohshme të fabrikës. Pas protestës së fermerëve dhe marrëveshjes me Ministrinë e Bujqësisë, fabrika është rihapur për grumbullimin e qumështit./A.K/

Artisti Arianit Lakna hap sonte ekspozitën personale “anGjelus Novus”, të kuruar nga Artrit Bytyçi, në Open Art Gallery. Hapja e ekspozitës do të mbahet duke filluar nga ora 19:30.

Ekspozita sjell një cikël veprash ku lajtmotivi i gjelit zë vend qendror, duke krijuar një dialog artistik me veprën “Angelus Novus” të Paul Klee dhe interpretimin filozofik të Walter Benjamin.

Sipas konceptit kuratorial, “anGjeli i Ri” i Laknës shkon përtej referencës klasike, duke ndërtuar një figurë simbolike që mishëron përditshmërinë, punën dhe përballjen me sfidat e jetës.

Një nga veprat qendrore të ekspozitës, “Zgjohu me Gjela”, paraqet figurën e gjelit përballë detyrimeve të përditshme, duke simbolizuar gatishmërinë për t’u përballur me sfidat pa pritur zgjidhje nga të tjerët.

Përmes këtij cikli punimesh, Arianit Lakna ndërton figurën e “anGjelit” si një simbol të ri që përfaqëson vlera dhe ideale të një utopie bashkëkohore. Ekspozita fton vizitorët të reflektojnë mbi jetën e përditshme, përgjegjësinë dhe mënyrën se si individi ndërton raportin e tij me realitetin përmes artit./A.K/

Filmi i shkurtër kosovar “Keep Going” është përzgjedhur për edicionin e sivjetmë të DokuFest, duke shënuar një tjetër prezantim të rëndësishëm për kinematografinë vendore.

Lajmi u bë i ditur nga ekipi realizues i filmit, i cili shprehu kënaqësinë për këtë përzgjedhje dhe falënderoi aktorët, ekipin artistik e teknik, si dhe të gjithë mbështetësit që kontribuuan në realizimin e projektit.

Në kastin e filmit bëjnë pjesë Eli Gashi, Luan Jaha, Adriana Matoshi dhe Era Balaj.

Skenari dhe produksioni janë realizuar nga Valmira Hyseni dhe Zgjim Terziqi, ndërsa drejtor i fotografisë është Almir Gjikolli. Ekipi krijues përfshin gjithashtu Leart Rama në montazh, Pellumb Ballata në dizajnin e zërit, Gazmend Nela në kolorim dhe Blerim Shala në skenografi.

Filmi është realizuar me mbështetjen e Qendrës Kinematografike të Kosovës, si dhe partnerëve Ujë Rugove dhe Onix Spa & Thermal Resort.

Me këtë përzgjedhje, “Keep Going” do të shfaqet para publikut të DokuFest në Prizren, duke iu bashkuar një prej festivaleve më të rëndësishme të filmit në rajon./A.K/

Komisioni Qendror i Zgjedhjeve ka certifikuar rezultatin përfundimtar të zgjedhjeve parlamentare të 7 qershorit, duke i hapur rrugë konstituimit të Kuvendit dhe formimit të institucioneve të reja të Kosovës.

Sipas Kushtetutës, pas certifikimit të rezultateve, seanca konstituive e Kuvendit duhet të mbahet brenda 30 ditëve. Në këtë seancë pritet të zgjidhen kryetari dhe nënkryetarët e Kuvendit, ndërsa më pas do të vazhdojnë procedurat kushtetuese për formimin e Qeverisë dhe zgjedhjen e presidentit.

Në zgjedhjet e 7 qershorit, Lëvizja Vetëvendosje doli forca e parë politike, duke siguruar 53 ulëse në Kuvend me 47.13 për qind të votave.

Partia Demokratike e Kosovës renditet e dyta me 22 ulëse dhe 19.44 për qind të votave, ndërsa Lidhja Demokratike e Kosovës fitoi 18 ulëse me 16.69 për qind. Aleanca për Ardhmërinë e Kosovës siguroi shtatë ulëse me 6.74 për qind të votave.

Sipas njohësit të proceseve zgjedhore, Eugen Cakolli nga Instituti Demokratik i Kosovës, afati 30-ditor për mbajtjen e seancës konstituive fillon më 9 korrik dhe përfundon më 7 gusht. Nëse deri atëherë seanca nuk thirret nga ushtruesja e detyrës së presidentit, Kuvendi mblidhet automatikisht në ditën e fundit të afatit.

Para seancës konstituive, kryeparlamentarja e legjislaturës së kaluar, Albulena Haxhiu, duhet të thërrasë mbledhjen përgatitore me përfaqësuesit e 15 subjekteve politike që kanë siguruar ulëse në Kuvend, ku do të përgatitet rendi i ditës.

Ndarja e ulëseve në Kuvend

• Lëvizja Vetëvendosje (LVV) – 53 deputetë
• Partia Demokratike e Kosovës (PDK) – 22 deputetë
• Lidhja Demokratike e Kosovës (LDK) – 18 deputetë
• Aleanca për Ardhmërinë e Kosovës (AAK) – 7 deputetë

Me certifikimin e rezultateve, vëmendja tashmë zhvendoset te konstituimi i Kuvendit dhe negociatat politike për krijimin e shumicës parlamentare që do të formojë Qeverinë e re./A.K/