Justin Timberlake ka vendosur të zbulojë publikisht se është diagnostikuar me sëmundjen Lyme.

Ai ndau në Instagram se po përballej me probleme shëndetësore dhe se ishte diagnostikuar me sëmundjen Lyme.

“Nëse e keni përjetuar këtë sëmundje, ose njihni dikë që e ka përjetuar, atëherë jeni të vetëdijshëm se të jetosh me të mund të jetë shumë e lodhshme, si mendërisht ashtu edhe fizikisht”, tha ai.

Kjo njohje erdhi ndërsa Timberlake po përfundon turneun e tij dyvjeçar “Forget Tomorrow”, gjatë të cilit u kritikua për performanca të dobëta.

“Pas kësaj, të paktën munda ta kuptoja pse ndjeva dhimbje të madhe dhe thjesht lodhje e të përziera të çmendura në skenë”, pohon ai.

Lyme transmetohet nga pickimi i një rriqre të infektuar e mund të shkaktojë simptoma të ngjashme me gripin, si dhimbje koke, dhimbje të kyçeve dhe lodhje.

Simptomat e mëvonshme mund të përfshijnë paralizë të fytyrës, mpirje, ënjtje të kyçeve dhe dëmtim të nervave.

Duke folur më tej rreth diagnozës, Timberlake tha se kishte vështirësi me vendimin për të vazhduar turneun pavarësisht problemeve shëndetësore.

“Kam hezituar të flas për këtë sepse gjithmonë jam rritur duke i mbajtur gjërat për vete. Megjithatë, po përpiqem të jem më transparent në lidhje me problemet e mia në mënyrë që ato të mos keqinterpretohen. Po i ndaj të gjitha këto me shpresën se të gjithë mund të gjejmë një mënyrë për t’u lidhur më shumë. Do të doja të bëja pjesën time për të ndihmuar të tjerët që po luftojnë me këtë sëmundje”, pohon tutje.

Presidentja e Kosovës, Vjosa Osmani, e ka mirëpritur të enjten në takim yllin botëror të muzikës, Dua Lipa, së cilës, me dekret presidencial, ia ka dhënë shtetësinë e Republikës së Kosovës.

Lajmin e ka bërë të ditur Osmani përmes një postimi në rrjetin social ‘Facebook’.

“Nder i veçantë që sot, me dekret presidencial, t’ia jap shtetësinë e Republikës së Kosovës, Dua Lipës, një prej personaliteteve më të rëndësishme kulturore dhe artistike në historinë e vendit tonë”, ka shkruar Osmani.

Ajo ka thënë se Dua dhe Kosova kanë qenë gjithmonë të pandashme.

“Ajo ka qenë dhe vazhdon të jetë një nga zërat më të fuqishëm në skenat më të mëdha të botës, duke bërë histori me të arriturat e saj dhe duke u shndërruar në inspirim për miliona njerëz anekënd globit”.

Teksa ka shprehur mirënjohje të pafund ndaj Lipës.

“Dua ka bërë dhe vazhdon të bëjë për Kosovën, për rininë tonë, për artin tonë dhe për imazhin ndërkombëtar të vendit tonë. Dua, Kosova është gjithmonë krenare me ty!”.

Dua Lipa do të performojë të premten në “Sunny Hill Festival”, i cili do të mbahet për tri ditë radhazi, nga 1 deri më 3 gusht.

Në momentet para funeralit të Ozzy Osbourne, Sharon Osbourne bëri një gjest të veçantë që preku mijëra fansa të vokalistit legjendar të Black Sabbath.

Dukshëm emocionale, e veja e muzikantit ngriti të dy duart me pjesën tjetër të familjes, duke formuar shenjën e dyfishtë të paqes drejt turmës së mbledhur, duke përsëritur gjestin karakteristik që ishte bërë sinonim i Ozzy-t gjatë gjithë karrierës së tij.

Ky gjest i veçantë kishte një kuptim të veçantë për Ozzy-n. Siç tha në një intervistë më 2002, “Ne ishim grupi i fundit hipi. Ne ishim të gjithë për paqen”.

Edhe pse gjestet “djallëzore” u bënë të famshme ndër të tjera, Ozzy këmbënguli në shenjën e dyfishtë të paqes, gjest që njerëzit e identifikonin me fytyrën e tij.

Sharon dhe fëmijët e saj, Amy, Jack dhe Kelly, dolën nga makina në Broad Street, ku ndodhet stoli i Black Sabbath, për të parë procesionin mortor dhe për të përshëndetur publikun. Turma, duke brohoritur “Ozzy, Ozzy, Ozzy – oi, oi, oi!” dhe “Faleminderit, Ozzy”, krijoi një atmosferë prekëse.

Policia e Kosovës njofton se ka ndërmarrë të gjithë hapat e duhur të sigurisë për mbarëvajtjen e festivalit “Sunny Hill” që do të mbahet nga data 1 gusht deri më 3 gusht 2025, në fshatin Bërnicë të komunës së Prishtinës.

Policia tha se marrë parasysh rrethanat që karakterizojnë festivalin, policia ka angazhuar një numër të konsiderueshëm të zyrtarëve policorë me detyra specifike në zonën ku do të mbahet festivali, shtuar këtu edhe zyrtarët e tjerë të angazhuar me detyra të përgjithshme në gjithë rajonin e përgjegjësisë.

“E gjithë infrastruktura policore e angazhuar në këtë drejtim me vëmendje të shtuar do të monitoron rrjedhën e kësaj ngjarjeje duke qenë e gatshme për të trajtuar gjithçka që kërkohet brenda autorizimeve dhe kompetencës policore”, thuhet në njoftim.

Angazhimet policore do të shtrihen në disa nivele, përfshirë:

1. Parapërgatitjen dhe ndërmarrjen e masave të nevojshme planifikuese, koordinuese, preventive dhe operative policore në terren, në mënyrë që festivali të zhvillohet në suaza normale të rendit dhe qetësisë publike;
2. Shtimin e masave preventive dhe operative-policore për ruajtjen e rendit dhe qetësisë publike para, gjatë dhe pas festivalit; Sigurimin dhe menaxhimin e hapësirës ku do të zhvillohet festivali;
3. Rregullimin dhe kontrollin e trafikut rrugor përreth zonës së festivalit, përfshirë ndalesa të përkohshme, bllokime ose riorientime të rrugëve, varësisht nga nevoja;
4. Monitorimin e rendit publik për të parandaluar çdo sjellje asociale, të paligjshme apo të dëmshme për sigurinë kolektive;
5. Identifikimin dhe ndërmarrjen e masave adekuate ligjore me Prokurorinë e Shtetit ndaj të gjithë personave të cilët bien ndesh me ligjin; Praninë e shtuar të patrullave në zonat përreth, për të rritur ndjesinë e sigurisë për qytetarët dhe vizitorët;
6. Ndërmarrjen e veprimeve të nevojshme policore operative dhe hetimore, sipas ligjit dhe në varësi të situatës apo kërkesave që mund të paraqiten gjatë operacionit;
7. Koordinimin me organizatorët dhe institucionet e tjera për të siguruar reagim të shpejtë dhe efektiv ndaj çdo situate të papritur.

Sipas policisë, për shkak të fluksit të madh të automjeteve dhe personave që pritet të frekuentojnë festivalin do të ketë bllokime të plota apo të pjesshme të rrugëve që qojnë për në zonën ku mbahet festivali si dhe ri-drejtim të trafikut rrugor, andaj Policia e Kosovës kërkon mirëkuptim nga pjesëmarrësit në trafik.

“Për shkak të kufizimeve hapësinore të ndërlidhura edhe me faktorë të sigurisë dhe cilësisë së qarkullimit rrugor, do të ketë ndalimqarkullimi për të gjitha mjetet motorike në perimetrin e afërt ku do të zhvillohet festivali. Përjashtimisht do të lejohen automjetet e policisë, ndihmës së shpejtë, zjarrfikësve si dhe mjetet e autorizuara/akredituara në shërbim të festivalit”, thuhet në njoftim.

Sipas polisicë, varësisht nga rrjedha e situatës në terren mund të paraqiten rrethana që kërkojnë veprime të tjera policore në funksion të ri drejtimit të trafikut apo orientimit të pjesëmarrësve, porse në të gjitha rastet qytetarët do të instruktohen nga policët në pikat e caktuara.