Lajmet

Gashi për mosparaqitjen e Kurtit në Prokurorinë Speciale: Tani është çështje e gjykatës

Published

on

Avokati Tomë Gashi ka komentuar mosparaqitjen e kryeministrit të Kosovës, Albin Kurti, si dëshmitar në Prokurorinë Speciale.

Gashi ka theksuar se prokuroria mund ta merrte deklaratën e Kurtit në zyrën e tij, duke pasur parasysh ligjin dhe praktikat e mëparshme.

“Duhet të themi që prokuroria duhet ta përcaktojë se çfarë e ka prioritet nëse e ka për prioritet hetimin e këtij rasti për të cilën është thirr edhe Kurti në cilësi të dëshmitarët. Ligji e lejon nuk e ndalon që të shkoj dhe ta marrë këtë deklaratë në zyrën e kryeministrit për shkak se situata të tilla kanë ndodhur edhe më herët dhe një praktikë e tillë e prokurorisë nuk kishte me qenë jo ligjore që ta marrë deklaratën e tij në zyrën e tij. Albin Kurti ka dhënë deklarata publike dhe ka njoftuar zyrtarisht për datat ku mund të shkojnë dhe ta marrin atë deklaratë, datat duhet të harmonizohen me prokurorinë jo vetëm me kryeministrin”, ka thënë Gashi.

Gashi shtoi se, pavarësisht justifikimeve të Kurtit, për shkak të një ftese të vonuar, ai duhej të respektonte urdhrin e gjyqtarit dhe të jepte deklaratën.

“Rëndësia e hetimit prokuroria e vlerëson kështu që është një ngërç që nuk po na dërgon askund, nëse ne e shohim saktësisht nenin 132 prokuroria nuk mund të marrë asnjë masë ndëshkuese as ndaj Albin Kurtit, por as nga dikush tjetër. Për shkak se masat ndëshkuese mund t’i bëjë vetëm gjykata me kërkesë të prokurorisë, kjo e fundit ka dërguar një kërkesë ditëve të fundit, gjyqtari ka nxjerr një urdhëresë që e ka obliguar kryeministrin që të jap deklaratë, Albini nuk e ka bërë dhe deri në ditën e djeshme ka pasur justifikimi për shkak se diku nga mesi i dhjetorit ka marruar ftesë”, theksoi ai.

Sipas Gashit, tashmë është çështje e gjykatës dhe jo prokurorisë, pasi kjo e fundit nuk ka mjete për të marrë masa ndëshkuese ndaj Kurtit.

“Të dy palët kanë lëshimet e veta procedurale dhe është shndërruar një luftë politikë e panevojshme, deri ditën e martë mund të justifikohen deklarimet e Albin Kurtit, para zgjedhjeve ka thënë se mund të konsiderohet ndërhyrje në zgjedhje, zgjedhjet kanë kaluar Lëvizje Vetëvendosje ka fituar këto zgjedhje. Kështu që ditën e djeshme është dashur që ta respektojë urdhrin e gjyqtarit dhe të shkoj në prokurori ta jap këtë deklaratë, tani kemi punë me gjykatën dhe jo me prokurorinë. Prokuroria nuk ka mjete shtrënguese në kuptimin e shtrenjtimin e shqiptimin e gjobave apo çfarëdo masa tjetër, këtë mund ta bëjë gjykata me kërkesë të prokurorisë”, theksoi ai.

Avokati theksoi se prokuroria mund t’i drejtohet gjykatës për të shqiptuar një gjobë prej 250 euro për kryeministrin Albin Kurti, gjithashtu ai shtoi se mund të merret edhe vendim për arrestim.

 “Zyra e kryeministrit ka dërguar një përgjigje publike që është dërguar një kërkesë tek gjyqtari për të vepruar dhe për të sjellë masa konkrete, dhe duket që nuk janë marrë fare parasysh për arsye teknike ato të tjera që nuk jemi njoftuar. Kemi të bëjmë me rastin e rezervave shtetërore atëherë duhet të themi se edhe ministrja ka shkuar në prokurori dhe është keqinterpretuar tek mediat kinse është mbrojtur në heshtje, deklaratën e saj ajo e ka ofruar tek prokurori kompetentë që ka të bëjë me rastin e njëjtë”.

 “Nuk ka dënime, prokuroria mund t’i drejtohet gjykatës përsëri me një kërkesë të veçantë dhe gjykata mund të shqiptojë gjobë prej 250 euro, dhe në bazë të ligjit nuk është e përcaktuar se sa herë mundet gjykata të shqiptojë një gjobë të tillë. Masa drastike që mund të përdoret është edhe nxjerrja e vendimit për arrestimin e tij që besoj që nuk do të ndodh kurrë, ka ende kohë të mjaftueshme sepse nuk e di çfarë veprime do të bëjë kryeministri por nuk do të thotë që nuk do ta respektojë vendimin e gjykatës”, deklaroi avokati.

Ai shtoi se tani është çështje e gjykatës dhe jo prokurorisë, dhe se Kurti duhet të respektojë vendimin e gjykatës për të dhënë deklaratë në prokurori, për të mos bllokuar hetimin.

“Tani kemi të bëjë me vendimin e gjykatës jo të prokurorisë dhe meqenëse gjykata ka vendosur që ai të shkoj në zyrat e prokurorisë për të dhënë deklaratë është gjëja më normale që mund ta bëjë dhe jo që të mbetet një ngërç të hetimit të rastit, që prokuroria e konsideroj si prioritet. Por nëse prioritet hetimi nuk ka qenë e kundërligjshme me shkuar me marrë deklaratën prej kryeministrit në cilësinë e dëshmitarit dhe me u mbyll kjo çështje”, tha Gashi

Vendi

UBT sërish në mesin e institucioneve më të vlerësuara shkencore në Kosovë

Published

on

By

UBT vazhdon të dëshmojë përkushtimin dhe rezultatet e tij në avancimin e shkencës dhe kërkimit shkencor, duke ruajtur edhe këtë vit pozicionin në mesin e institucioneve më të vlerësuara shkencore në Kosovë, sipas renditjes së Kosovo National H-Index Ranking.

Në këtë renditje, UBT konfirmon vazhdimësinë e performancës së tij shkencore, duke u pozicionuar krahas Universitetit të Prishtinës në krye të institucioneve shkencore në vend. Ky vlerësim përbën një tjetër dëshmi të punës së vazhdueshme të stafit akademik, studiuesve dhe grupeve kërkimore të UBT-së në prodhimin e njohurive të reja dhe avancimin e shkencës.

Kosovo National H-Index Ranking është një renditje e pavarur që vlerëson ndikimin dhe produktivitetin shkencor të studiuesve dhe institucioneve në Kosovë, duke u bazuar në H-indeksin e konsoliduar dhe të dhënat nga platformat kryesore ndërkombëtare shkencore, përfshirë Web of Science, Scopus dhe Google Scholar.

Ruajtja e këtij pozicioni edhe këtë vit dëshmon për konsistencën e UBT-së në zhvillimin e kërkimit shkencor, rritjen e prezencës akademike dhe fuqizimin e bashkëpunimit me komunitetin shkencor ndërkombëtar.

Për UBT-në, ky rezultat përfaqëson jo vetëm një vlerësim të arritjeve të deritanishme, por edhe një motivim të mëtejshëm për të investuar në kërkim, inovacion dhe ekselencë akademike, duke kontribuar në zhvillimin e shkencës në Kosovë dhe përtej saj.

Linku: https://xk.h-index.com/al/wos?fbclid=IwAR1CKUcHFSGRtCMivI44ZZI-W5FlFad1d3E3O55BkULZRlvKqxMZg3i5mXA

 

Continue Reading

Kujtesë

Ditari: Lajmet kryesore që shënuan datën 16 tetor 1993-1998

Published

on

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

16 tetor 1993

Ende po mbahen në burgje disa arsimtarë shqiptarë

Eset Sahiti, profesor në shkollën e mesme të Lipjanit, Fazli Maloku, arsimtar në shkollën fillore “Zenel Hajdini” të Prishtinës, Çerkin Peci, profesor në shkollën e mesme të Mitrovicës, Mazllum Kumnova, anëtar i Kryesisë së LASH “Naim Frashëri” të Kosovës dhe Salih Çitaku, këshilltar i Entit Pedagogjik të Kosovës, po mbahen në burg, njoftoi Munish Hyseni, nënkryetar i Lidhjes së Arsimtarëve Shqiptarë “Naim Frashëri”. Për Salih Çitakun, që u arrestua para katër ditësh, nuk dihet asgjë.

Kohëve të fundit shqetëson fakti se regjimi serb në Kosovë, është duke penguar mbarëvajtjen e procesit mësimor edhe në punktet private e kjo po ngjet veçanërisht në shkollat fillore dhe të mesme të Mitrovicës, tha z. Hyseni dhe shtoi se pardje, rreth orës 14, policia serbe ndërpreu mësimin në punktin e gjimnazit “Frang Bardhi” në Mitrovicë.

Ndërsa dje, gjatë rrugës për në shkollë, policia serbe në Mitrovicë, e dërgoi në stacionin e policisë Ibrahim Balën, drejtor i shkollës së mesme ekonomike “Hasan Prishtina” në Mitrovicë, të cilin më vonë e liroi.

 

16 tetor 1995

 Në Prishtinë filluan “Ditët e Gjeçovit”

Në kuadër të manifestimit tradicional kulturor-shkencor e letrar “Takimet e Gjeçovit ’95” (që mbahen në Zym të Hasit më 21 tetor), pardje në Prishtinë filluan “Ditët e Gjeçovit”.

Në kuadër të këtij manifestimi u mbajt tribuna kushtuar veprës së Atë Shtjefën Gjeçovit dhe u promovua vepra postume “Shpërblesi i botës ase jeta e Jezu Krishtit”, njofton “Bujku”.

Manifestimi i sivjetshëm ka filluar me pjesën e parë – ditët e Gjeçovit, që kanë filluar në Prishtinë me këtë manifestim, pastaj në Zllakuqan, në Janjevë, në Pejë, kurse ditëve të tjera manifestime të ngjashme do të mbahen edhe në Gjakovë, Prizren, Zym, Bishtazhin e qendra të tjera të Kosovës.

Në vazhdim të këtij manifestimi u bë promovimi i veprës postume të Atë Shtjefën Gjeçovit, që e botoi redaksia e botimeve “Drita” e Ipeshkvisë së Kosovës në vitin 1993. Për këtë vepër foli dr. Don Lush Gjergji, famullitar i Binçës. Ai në mes tjerash tha se veprën e përmendur të Gjeçovit e gjeti Imzot Nikë Prela në famullinë e Pejës.

Në vazhdim dr. Dom Lush Gjergji shtoi se kjo vepër, që është një lloj historie e shëlbimit, gërshetohet në mënyrë të qëlluar me Besëlidhjen e Vjetër dhe Besëlidhjen e Re, me përqendrim në jetën e Jezu Krishtit si fytyrë qendrore – Zotit – Njeri, i cili na ka shëlbuar me dashuri. Të them edhe këtë, tha Don Lushi, kjo vepër ka edhe qëllim gjuhësor, përkatësisht të pastrimit të gjuhës sonë nga ndikimet e huaja. Në këtë vepër gjejmë mjaft fjalë, shprehje, tentim të krijimit të fjalëve të reja me bazë shqipe në mënyrë që të zëvendësohen shprehjet e huazuara. Vepra e Gjeçovit “Shpërblesi…” mbeti e papërfunduar për arsye të vrasjes mizore të françeskanit zelltar dhe të guximshëm – Atë Shtjefën Gjeçovit. Në Prishtinë, manifestimi “Ditët e Gjeçovit” vazhdon edhe me një orë letrare, që mbahet ditën e enjte, më 19 tetor, në Shoqatën e Shkrimtarëve të Kosovës.

Kjo orë letrare dhe i tërë manifestimi (Ditët e Gjeçovit dhe Takimet e Gjeçovit ’95) organizohen nga Shoqata e Shkrimtarëve të Kosovës, klubi letrar “Shtjefën Gjeçovi” i Zymit të Hasit dhe Ordinariati i Ipeshkvisë së Kosovës me seli në Prizren, thuhet mes tjerash në njoftimin e “Bujkut”.

 

 16 tetor 1997

 Aksion i forcave në pesë fshatra të Pejës

Prishtinë, 16 tetor (QIK)

Forcat serbe organizuan sot një aksion të gjerë represiv kundër popullsisë shqiptare në fshatrat Zahaq, Llabian, Gllaviçicë, Leshan dhe Kliçinë të rrethinës së Pejës. Në Kliçinë gjendet një stacion i policisë serbe. Në bazë të deklaratave të personave të keqtrajtuar nga policia mirret vesh se aksioni u ndërmor pas një incidenti të pasqaruar në stacionin e policisë në Kliçinë. Nuk dihet asgjë për rethanat dhe epilogun e incidentit. Deri në orën 9,30 rruga Pejë-Prishtinë, në vendin Kliçinë mbahej e bllokuar nga forcat të mëdha serbe të shoqëruara edhe me autoblinda.

Një anëtar i Kryesisë së Degës së LDK-së në Pejë i tha QIK-ut me telefon se nga fshatrat ku kanë ndërhyrë forcat serbe po arrinin njoftime të vazhdueshme për numrin e madh të njerëzve e familjeve të keqtrajtuara dhe të personave të arrestuar.

Në orën 3 pas mesnate policia bastisi në Llabian shtëpinë e Zenel H. Kelmendit, në të cilën nuk ndodhej askush, pasi kjo familje jeton në Prishtinë. Policia shkoi pastaj në shtëpitë e afërme të Shaban (Cenë) Kelmendit e Ahmet (Deli) Kelmendit dhe i rrahu rënd kryefamiljarët. Ahmeti ka pësuar lëndime të rënda dhe është dërguar në spital. Janë rrahur edhe nëna e Shabanit, Hata (90) dhe bashkëshortja Ganimetja.

Në Zahaq policia bastisi shtëpinë e Ramiz Zeqirit, sekretar i shkollës fillore “N. Veqilharxhi” dhe e rrahu atë.

Në Gllaviçicë u bastisën shtëpitë e vëllezërve Gjon e Marash M. Vataj. Të dy vëllezërit u keqtrajtuan fizikisht para anëtarëve të familjes dhe pastaj u morën në polici bashk me djemtë Leonin e Viktorin. Pas disa orëve këta u liruan.

Në Kliçinë u bastis shtëpia e Hasan Berishës, drejtor i shkollës fillore “N. Veqilharxhi” dhe kryetar i nëndegës së LDK-së.

Hasan Berisha u keqtrajtua para anëtarëve të familjes. U keqtrajtuan edhe vëllezërit e tij Zeneli e Aliu e djemtë e tij Samiu (22), Shkumbini (16) dhe Dardani (14) dhe Naimi(20), i cili u mor në arrest. Në polici është marrë edhe Zekë (M. ) Berisha. Pas pesë orë mbajtjeje e rrahjeje janë liruar Zeka, Aliu dhe Naimi.

Po sot policia ka ndaluar punën e ndërrimit të paradites në shkollën e Kliçinës.

Në rrugën afër stacionit të policisë në Kliçinë, rreth orës 6 të mëngjesit, pasi u ndaluan dhe u nxorën nga vetura e tyre, u rrahën në rrugë Njazi Goga (37) dhe Ramiz Nikçi nga Peja.

Në Leshan u bastisën dhe u rrahën Skender (Lush) Berisha, Maxhun (L. ) Berisha, Xhevdet (M. ) Berisha (20), si dhe Milaim Seniku (18) nga Jabllanica, që ndodhej mysafir. Skenderi, Maxhuni e Milaimi u morën në arrest.

Në Kliçinë u ndaluan nga policia serbe anëtarët e familjes Bruqi (Shala) nga Isniqi i Deçanit, me ç’rast u rrahën brutalisht dhe u fyen në baza nacionale. Me këtë rast u rrahën Hajrullah Bruqi (Shala) – plak, Samir Bruqi (33) dhe Nisret Bruqi (Shala) – 30-vjeçar, të gjithë nga Isniqi i komunës së Deçanit.

Ata u rrahën në prani të fëmijës pesëvjeçar të tyre, të cilin ishin nisur për ta dërguar në spitalin e Shkupit për shërim.

Përkujtojmë se një aksion të ngjajshëm forcat serbe ndërmorën pardje në fshatrat Bardhaniq dhe Zhabel të Gjakovës, me pretekst të gjurmimit të gjoja sulmuesve në stacionin e policisë serbe në Qollopek.

 

16 tetor 1998

Skënderaj: Pardje, forcat serbe vranë një e plagosën një shqiptar

Forcat serbe të stacionuara në postbllokun policor në Makërmal vranë të enjten Zymer Goxhulin (33) dhe plagosën Isuf Goxhulin (28), për fatin e të cilit nuk dihet, pasi nuk ka mundësi të depërtohet në vendin e ngjarjes. Dyshohet se atë e ka marrë policia.

Nënkëshilli i KMDLNJ-së në Skënderaj njofton ata u qëlluan në momentin kur po mblidhnin bagëtinë e shpërndarë fushave.

 

Vushtrri: U gjet turpi i pajetë i Selim Aliut nga Pantina

Sot u gjet trupi i Selim Aliut (58) nga Pantina, i vrarë para disa ditësh nga forcat serbe.

Në njoftim thuhet se trupin e tij forcat serbe i kanë hedhur në lumin Sitnica, ndërsa uji e ka bartur deri afër Mitrovicës.

 Foto: Shtjefën Gjeçovi

Continue Reading

lajme

Detaje të reja nga vdekja e 26-vjeçares në Prizren: Dyshohet se gëlltiti një qese me drogë

Published

on

By

Një 26-vjeçare ka humbur jetën tragjikisht në Prizren, pasi dyshohet se ka gëlltitur një qese me substancë narkotike pas ndalimit nga Policia.

Ngjarja ka nisur mbrëmjen e së dielës, më 15 nëntor, rreth orës 18:00, në Vërmicë, ku viktima ndodhej në një veturë së bashku me një person tjetër dhe u ndaluan nga Policia nën dyshimet për trafikim të narkotikëve. Gjatë kontrollit të automjetit, zyrtarët policorë kanë gjetur dhe konfiskuar 105.7 gramë substancë të dyshuar narkotike të llojit kokainë, dy fishekë të kalibrit 9×19 mm dhe dy telefona celularë.

Sipas procedurave ligjore, të dyshuarve u është caktuar avokati mbrojtës. Pas intervistimit, me vendim të prokurorit, të dyshuarit mashkull i është caktuar masa e ndalimit policor prej 48 orësh. Ndërkohë, 26-vjeçares i është përkeqësuar papritur gjendja shëndetësore pikërisht në momentin kur po fillonte intervistimi i saj në prani të avokatit.

Menjëherë është kërkuar ndihma e ekipit emergjent, i cili i ka dhënë trajtimin e parë mjekësor në vendin e ngjarjes dhe më pas e ka transportuar në Spitalin e Përgjithshëm Rajonal në Prizren. Pavarësisht përpjekjeve të mjekëve, rreth orës 01:30 të mëngjesit, Policia është njoftuar se e reja kishte ndërruar jetë.

Lidhur me rastin janë njoftuar njësitë hetimore të Stacionit Policor në Prizren, Sektori Rajonal i Hetimeve, Inspektorati Policor i Kosovës (IPK), Forenzika dhe prokurori kujdestar, të cilët kanë dalë në vendngjarje dhe kanë ndërmarrë veprimet e nevojshme për zbardhjen e rrethanave.

Me urdhër të prokurorit kujdestar, trupi i pajetë i viktimës është dërguar në Institutin e Mjekësisë Ligjore në Prishtinë për obduksion. /E.A/

 

Continue Reading

Lajmet

Von der Leyen lavdëron Shqipërinë; Kos: Vit rekord për zgjerimin

Published

on

By

Nga Brukseli, ku po zhvillohet Forumi i II-të i Zgjerimit të Bashkimit Evropian me temën “Evropë më e gjerë – Evropë më e fortë”, presidentja e Komisionit Evropian, Ursula von der Leyen, deklaroi se Shqipëria po shënon progres domethënës drejt anëtarësimit në BE.

“Talentet e reja të Ballkanit Perëndimor do të sjellin vlera në tregun e përbashkët evropian. Shqipëria po bën progres domethënës drejt anëtarësimit. Në vendet e BP-së, vendet po bëjnë hapa të mëdhenj. Ky është një moment i rëndësishëm. Ne duhet ta kapim këtë mundësi. Të shfaqim të njëjtën ambicie si liderët e 30 viteve më parë, që ta kthejmë në sukses”, tha mes tjerash von der Leyen.

Ajo solli në vëmendje edhe procesin historik të zgjerimit, duke kujtuar se tre dekada më parë diskutohej për zgjerimin më të madh të unionit, kur vendet e Evropës Qendrore dhe Lindore nisën rrugëtimin për t’u rikthyer në familjen evropiane.

Ndërkohë, komisionerja evropiane për Zgjerim, Marta Kos, theksoi se zgjerimi është rikthyer në qendër të debatit politik dhe se rezultatet e këtij viti tejkalojnë ato të 25 viteve të fundit.

“Sot zgjerimi është sërish në një debat të gjerë se si. Kemi dhënë rezultate për zgjerimin këtë vit më shumë sesa në 25 vitet e fundit. Kemi kundërshtarë që duan të dëmtojnë kandidatët për anëtarësim. Nuk do ta lejojmë të ndodhë kjo”, deklaroi Kos. /E.A/

Continue Reading

Të kërkuara