Google po sjell një veçori të re të rëndësishme në Google Maps – një buton të quajtur “Aerial”, i cili e bën shumë më të lehtë dhe të shpejtë kalimin nga Street View në pamjen Satelitore.

Funksionaliteti është zbuluar në versionin 25.39.07 të Google Maps për Android, është aktivizuar para publikimit nga Android Authority.

Me anë të butonit, përdoruesit mund të kalojnë menjëherë nga pamja e rrugës në një perspektivë ajrore, si në 2D, ashtu edhe në 3D, duke ofruar një eksperiencë më të plotë dhe intuitive të eksplorimit virtual.

Google ka punuar në animacione për kalim sa më natyral midis pamjeve, aplikacioni ruan drejtimin në të cilin po shikonit në Street View kur ktheheni në pamjen Aerial. Kjo veçori e re do të jetë e dobishme për përdoruesit që duan të eksplorojnë lagje, rrugë ose destinacione para se t’i vizitojnë fizikisht, dhe shkon në linjë me përmirësimet e fundit të Google në navigimin me transport publik.

Publikimi i “Aerial” pritet së shpejti për të gjithë përdoruesit Android, ndërsa detajet për versionin në iOS nuk janë bërë ende të ditura. /A.Z/UBT News/

Shitjet e Hyundai në SHBA arritën nivele rekord muajin e kaluar, pjesërisht falë rritjes së ndjeshme të kërkesës për automjetet elektrike të markës dhe disa nga modelet e saj SUV dhe sedan.

Edhe pse kredia federale tatimore për automjetet elektrike u hoq në fund të shtatorit, prodhuesi korean duket i bindur se mund të ruajë këtë ritëm gjatë pjesës tjetër të vitit dhe gjatë vitit 2026.

Në shtator, Hyundai shiti gjithsej 71,003 automjete në SHBA, një rritje prej 14% krahasuar me 62,491 njësi të shitura gjatë të njëjtit muaj të vitit të kaluar.

Gjithashtu, shitjet për tremujorin e tretë u rritën me 11%, duke arritur në 678,349 njësi, krahasuar me 610,494 të tre tremujorëve të parë të vitit 2024.

Mes modeleve që kontribuan në këtë rritje, Ioniq 5 i tërësisht elektrik dallohet veçanërisht, me një rritje prej 152%, nga 3,336 njësi të shitura në 8,408 njësi. /A.Z/UBT News/

Beats ka prezantuar kufjet e reja Powerbeats Fit, pasardhëse të modelit Beats Fit Pro të lansuar katër vite më parë.

Ato vijnë me dizajn të ngjashëm me majë fleksibël për fiksim të sigurt, si dhe janë të certifikuara IPX4 për rezistencë ndaj ujit dhe djersës.

Powerbeats Fit përdorin çipin H1 të Apple dhe ofrojnë anulim aktiv të zhurmës, modalitet transparence, si dhe spatial audio me ndjekje dinamike të kokës.

Përdoruesit e Apple përfitojnë nga veçori si një-prekje për lidhje, kalim automatik mes pajisjeve dhe komandat “Hey Siri”, ndërsa përdoruesit e Android mund t’i kontrollojnë me aplikacionin Beats.

Bateria zgjat deri 7 orë përdorim dhe deri 30 orë me kutinë e karikimit, ndërsa një karikim i shpejtë prej 5 minutash ofron një orë muzikë.

Powerbeats Fit do të dalin në treg me çmim prej 200 dollarësh në katër ngjyra: Jet Black, Gravel Gray, Spark Orange dhe Power Pink. /A.Z/UBT News/

Elon Musk ka shkruar një faqe të re në historinë financiare, duke u bërë personi i parë në botë që arrin pasurinë neto prej 500 miliardë dollarësh, sipas indeksit të miliarderëve të Forbes.

Ky rekord i jashtëzakonshëm është nxitur nga rikuperimi i aksioneve të Tesla-s, rritja e vlerësimeve për kompaninë hapësinore SpaceX dhe zhvillimet pozitive rreth start-up-it të tij të inteligjencës artificiale, xAI.

Këtë vit, aksionet e Tesla-s janë rritur mbi 14%, ndërsa pasuria e Muskut është shtuar me më shumë se 6 miliardë dollarë në ditët e fundit.

Vendimi i Muskut për t’u distancuar nga angazhimet dhe për t’u fokusuar plotësisht në bizneset e tij ka rritur besimin e investitorëve.

Ai gjithashtu bleu aksione shtesë të Tesla-s me vlerë rreth 1 miliard dollarë, duke treguar besim të plotë në zhvillimin e kompanisë drejt teknologjive të reja si inteligjenca artificiale dhe robotika, raporton Sky News.

Aktualisht, start-up-i xAI vlerësohet në 75 miliardë dollarë, ndërsa SpaceX pritet të arrijë një vlerë rekord prej 400 miliardë dollarësh në raundet e ardhshme të financimit.

Në renditjen e Forbes, pas Muskut renditet Larry Ellison i Oracle, me një pasuri prej rreth 350 miliardë dollarësh. /A.Z/UBT News/