Touareg, SUV-i më i madh i Volkswagenit në Evropë, do të tërhiqet nga tregu vitin e ardhshëm, pas gati 25 vitesh prodhimi dhe tre gjeneratash.

Ky model ndan platformën me Porsche Cayenne. Por ndërsa Cayenne-i i ri elektrik i cili pritet të prezantohet këtë dimër do të përdorë platformën PPE (të njëjtën që përdoret në Macan Electric, Audi A6 dhe Q6 e-tron), Touareg-u nuk pritet të ketë version të ri para vitit 2029.

Për këtë arsye, gjenerata e ardhshme do të zhvillohet mbi platformën më moderne të Volkswagenit, të quajtur SSP.

ID. Touareg – modeli i parë me platformën SSP

Sipas gazetës gjermane Automobilwoche, ID. Touareg do të jetë modeli i parë i Volkswagenit që do të bazohet në këtë platformë të re.

Ky rol i ishte parashikuar ID. Roc-ut (version elektrik i T-Roc), por lansimi i tij, bashkë me atë të ID. Golf, është shtyrë deri në vitin 2030.

SUV-i i ri do të ketë arkitekturë zonale dhe softuer të zhvilluar nga Rivian, njësoj si modeli Scout SUV që Volkswagen po përgatit për tregun e Amerikës së Veriut.

Edhe pse platforma SSP është menduar për makina elektrike, ajo mundëson nstalimin e një motori benzine për të zgjatur autonominë e automjetit. /A.Z/UBT News/

Në prag të 20-vjetorit të themelimit të saj, YouTube nuk është më thjesht platformë për video amatore pa përpunim. Sot, numëron 2.7 miliardë përdorues dhe është bërë një nga mjetet më të fuqishme të medias globale.

Kur nisi më 2005, YouTube ishte hapësirë ku përdoruesit e zakonshëm ngarkonin video të thjeshta dhe autentike, shpesh me cilësi të ulët dhe pa ndihmën e profesionistëve.

Por, krijuesit janë më të specializuar dhe mes tyre ka edhe emra të mëdhenj nga fusha të ndryshme, përfshirë edhe yje të njohur ndërkombëtarisht si këngëtarja shqiptare Dua Lipa, e cila ndan me fansat video me cilësi të lartë.

YouTube ka ndryshuar mënyrën se si amerikanët konsumojnë media, duke u bërë kanali kryesor për shikimin e përmbajtjeve televizive. Statistikat tregojnë se platforma ka më shumë përdorues dhe vizita sesa televizionet tradicionale, duke u bërë alternativa kryesore për argëtim në mbarë botën.

Parashikohet që YouTube të tejkalojë këtë vit të ardhurat e Disney-t, një tregues i fuqisë së jashtëzakonshme që ka arritur. Në të njëjtën kohë, platforma po investon në Inteligjencën Artificiale për të përmirësuar krijimin e përmbajtjeve të reja.

Së fundmi, YouTube prezantoi produkte të reja e përzgjodhi disa prej krijuesve më të suksesshëm në platformë, si Dua Lipën, Mark Roberin, Smoshin dhe Brandon B, siç raportoi Reuters të mërkurën. /A.Z/UBT News/

Samsung ka njoftuar se këtë muaj do të nisë prodhimin masiv të chipsetit të ri Exynos 2600, i pari që përdor teknologjinë 2nm GAA (Gate-All-Around).

Ky procesor do të jetë i integruar në serinë Galaxy S26, duke përfshirë edhe modelin flagship Galaxy S26 Ultra. Exynos 2600 sjell një veçori të re, Heat Pass Block, e cila përmirëson largimin e nxehtësisë nga çipi, duke optimizuar performancën dhe stabilitetin.

Testimet e para në Geekbench tregojnë rezultate premtuese, ndërsa GPU-ja Xclipse 960 tejkalojë fuqinë e Qualcomm Snapdragon 8 Elite Gen 5.

Suksesi i këtij çipi pritet të ndikojë pozitivisht edhe në biznesin e prodhimit të Samsung, duke tërhequr porosi nga kompani të mëdha si Nintendo dhe Tesla.

Analistët parashikojnë se divizioni Samsung Device Solutions mund të shënojë një fitim operativ prej rreth 3.6 miliardë dollarë në tremujorin e tretë.

Microsoft ka përditësuar aplikacionin Xbox për Windows, duke prezantuar një bibliotekë të përbashkët ku shfaqen të gjitha lojërat e instaluara në kompjuter, pavarësisht nëse vijnë nga Steam, Battle.net apo dyqane të tjera për PC.

Kjo e kthen aplikacionin Xbox në një lëshues qendror për lojërat tuaja.

Funksioni është testuar prej muajsh me Xbox Insider-at, por tani është i disponueshëm për të gjithë përdoruesit. Ai është menduar për përvojën e re në ekran të plotë të Xbox-it, veçanërisht në pajisjet portative si Asus ROG Ally, por përfaqëson hapin e radhës në përpjekjet e Microsoft për ta kthyer aplikacionin Xbox në “shtëpinë e lojërave për PC”.

“Kur instaloni një lojë nga një dyqan i mbështetur, shfaqet automatikisht në seksionin My Library brenda aplikacionit Xbox, dhe në listën Most Recent, që të mund t’i riktheheni menjëherë lojërave tuaja të preferuara,” tha Jason Beaumont, nënkryetar për përvojën në Xbox.

Përveç bibliotekës, aplikacioni merr edhe seksionin e ri My Apps, ku lojtarët mund të instalojnë e hapin aplikacione të palëve të treta si shfletues, mjete ndihmëse për lojëra apo dyqane konkurrente. Edhe kjo veçori është menduar për pajisjet dore, duke u dhënë përdoruesve mundësinë të menaxhojnë dhe nisin lojëra nga platforma të ndryshme.

Më vonë, Microsoft do të shtojë në aplikacion edhe lojërat e disponueshme në cloud dhe historikun e lojërave, i cili sinkronizohet në konzolë, kompjuter dhe pajisje portative. Ky funksion tashmë ka nisur të shpërndahet në konzolat Xbox muajin e kaluar.

“Pasi veçoria të jetë e aktivizuar, kërkoni seksionin Jump back in në faqen kryesore të konzolës, kompjuterit ose pajisjes suaj dore, për të parë lojërat e fundit të luajtura dhe për të vazhduar aty ku e keni lënë,” shtoi Beaumont. /A.Z/UBT News/