Lajmet

Foshnja afgane që humbi gjatë evakuimit kaotik ribashkohet me familjen

Një shofer i taksisë tha se e gjeti fëmijën duke qarë dhe vetëm në dyshemenë e aeroportit.

Published

5 years ago

January 10, 2022

UBT news

Një foshnjë e humbur gjatë evakuimit kaotik të dhjetëra mijëra afganëve në aeroportin e Kabulit është ribashkuar me të afërmit e tij pas pesë muajsh.

Babai i djalit ia dorëzoi foshnjën dy muajshe, Sohail Ahmadin, një ushtari të huaj mes turmave të dëshpëruara për t’u larguar nga talibanët pasi ata pushtuan kryeqytetin në mes të gushtit.

Dyshja u ndanë dhe çfarë ndodhi më pas është e paqartë – por shoferi i taksisë Hamid Safi tha se e gjeti fëmijën duke qarë dhe vetëm në dyshemenë e aeroportit të njëjtën ditë.

“E çova tek disa gra për ta ushqyer por ato nuk e bënë… unë vazhdova të kërkoja familjen e tij”, tha Safi, i cili kishte shkuar në aeroport për të ndihmuar vëllain e tij në evakuim.“Më pas thirra gruan time dhe ajo tha sille foshnjën në shtëpi”.

Çifti tha se ata vazhduan të kërkonin për prindërit e djalit, por pasi nuk i gjetën ata, i dhanë emrin Mohammad Abed dhe filluan të kujdeseshin për të.

Sohail Ahmadi me Hamid Safin, shoferi që e gjeti foshnjën pasi ai humbi në aeroportin e Kabulit (AFP/Mohd RASFAN)

“Nëse nuk do të kishim gjetur familjen e tij, atëherë do ta kishim mbrojtur dhe rritur atë si fëmijën tonë”, tha Safi, 29 vjeç, për AFP.

Ndërkohë, babai i foshnjës , Mirza Ali Ahmadi, kërkoi për tre ditë në aeroport për djalin e tij të zhdukur, duke zgjedhur më në fund të hipte në një fluturim për në Shtetet e Bashkuara me gruan dhe katër fëmijët e tjerë. Kjo pasi shumë afganë kishin frikë nga rikthimi i sundimit të ashpër të talibanëve.

Vetëm disa ditë më parë, të afërmit e Sohail u gjetën në Kabul me ndihmën e mediave sociale dhe policisë, dhe djali iu dorëzua gjyshit të tij nga çifti Safi. “Ndihesha përgjegjëse për të si nënë”, tha gruaja e Safit, Farimah.

“Ai zgjohej shumë natën… tani kur zgjohem ai nuk është aty dhe kjo më bën të qaj. Unë jam një nënë. E kuptoj që ai nuk do të jetë gjithmonë me ne dhe duhet të jetë me prindërit e tij”, i tha ajo AFP-së.

Të dielën, gjyshi i Sohail, Mirza Mohammad Qasemi, ftoi familjen Safi në shtëpinë e tij në Kabul për të kaluar kohë me djalin, i cili po trajtohej me shumë dashuri.

“Ata u kujdesën për të për pesë muaj dhe ishin shumë të lidhur me të”, tha ai për AFP, duke shtuar se çifti fillimisht kishte hezituar ta dorëzonte.

Qasemi, i cili tha se edhe ai kishte qenë në kërkim të nipit të tij, është i emocionuar që Sohail tani do të mund të bashkohet me prindërit e tij në Shtetet e Bashkuara.

“Ishte e vështirë për vajzën time. Ajo po qante dhe nuk hante asgjë”, tha Qasemi duke fshirë lotët e tij teksa shikonte foshnjën duke fjetur.

Derisa Sohail t’i bashkohet prindërve të tij, për të do të kujdeset tezja e tij, tha Qasemi.

“Ne ishim në një gjendje të keqe këto pesë muajt e fundit … por kur gjetëm foshnjën tonë, ne ishim të lumtur që Zoti na e ktheu fëmijën tonë”, tha babai i foshnjës, Ahmadi, me telefon nga Amerika./UBTNews/

Vendi

Gjenden mbetje mortore në Brod të Shtërpcës

Published

5 hours ago

November 12, 2026

UBT News

Mbetje mortore janë gjetur sot në fshatin Brod të Komunës së Shtërpcës, gjatë aktiviteteve të kërkimit për personat e zhdukur me dhunë.

Sipas njoftimit të Komisionit Qeveritar për Persona të Zhdukur, aktivitetet e kërkimit dhe gërmimet vlerësuese në këtë lokacion kishin nisur më 6 nëntor 2026, pas sigurimit të urdhrit përkatës gjyqësor.

Gjatë aktivitetit të parë nuk ishte arritur të lokalizohej varri i dyshuar, për shkak të ndryshimeve që kishte pësuar terreni ndër vite, duke vështirësuar përcaktimin e vendndodhjes së saktë.

Ndërkaq, gjatë vazhdimit të gërmimeve më 12 nëntor, janë gjetur mbetje mortore, të cilat do t’i nënshtrohen ekzaminimit mjekoligjor dhe procedurave të identifikimit përmes analizës së ADN-së.

Aktivitetet janë realizuar në koordinim ndërmjet Komisionit Qeveritar për Persona të Zhdukur, Institutit për Mjekësi Ligjore dhe Drejtorisë së Policisë për Hetimin e Krimeve të Luftës – Sektorit për Hetimin e Personave të Zhdukur, me përkrahjen e Prokurorisë – Departamentit për Krime Lufte./A.K/

Lajmet

Leonardo da Vinci sjell frymën e Rilindjes në UBT – ekspozitë që ndërthur artin, shkencën dhe inovacionin

Published

5 hours ago

November 12, 2026

UBTNews

Kampusi Shkencor Inovativ dhe Teknologjik i UBT-së është bërë nikoqir i një ekspozite të veçantë kushtuar njërit prej mendjeve më të jashtëzakonshme në historinë njerëzore, Leonardo da Vincit.

Përmes kësaj ekspozite, studentët, stafi akademik dhe vizitorët kanë mundësi të njihen më nga afër me botën krijuese të Da Vincit, idetë e tij revolucionare dhe projektet që dëshmojnë gjenialitetin e tij në fusha të ndryshme, nga arti e anatomia, deri te inxhinieria dhe teknologjia.

E organizuar në kuadër të edicionit të XXVI të Javës së Gjuhës Italiane në Botë, me temën “Gjuhë e mirësjelljes, gjuhë gjeniale: të ideosh, të projektosh, të krijosh me italisht”, ekspozita sjell në vëmendje rëndësinë e gjuhës, kulturës dhe trashëgimisë italiane në zhvillimin e mendimit krijues dhe shkencor.

Ky aktivitet është realizuar në bashkëpunim me Ambasadën e Italisë në Prishtinë dhe përfaqëson një mundësi të rëndësishme për të nxitur kureshtjen intelektuale, kreativitetin dhe frymën inovative te gjeneratat e reja.

Përmes kësaj ekspozite, UBT sjell në kampusin e tij trashëgiminë e një figure që vazhdon të frymëzojë botën, duke dëshmuar se idetë e mëdha nuk njohin kohë dhe se arti, shkenca dhe teknologjia janë pjesë e së njëjtës gjuhë: gjuhës së inovacionit.

Aktualitet

40 sportistët më të mëdhenj (2000–2026)

Published

6 hours ago

November 12, 2026

UBTNews

Sporti është një nga veprimtaritë më tërheqëse në botën modern. Interesimi në vazhdim i publikut bën që edhe media ta ketë temë të shpeshtë.

Këtë herë, kemi zgjedhur të sjellim tek ju një listë prej 40 sportistësh më të mëdhenj, të periudhës 2000-20026:

Michael Phelps – Not
Lionel Messi – Futboll
LeBron James – Basketboll
Tom Brady – Futboll amerikan
Roger Federer – Tenis
Tiger Woods – Golf
Usain Bolt – Atletikë
Kobe Bryant – Basketboll
Rafael Nadal – Tenis
Cristiano Ronaldo – Futboll
Stephen Curry – Basketboll
Tim Duncan – Basketboll
Shaquille O’Neal – Basketboll
Patrick Mahomes – Futboll amerikan
Lewis Hamilton – Formula 1
Aaron Donald – Futboll amerikan
Sidney Crosby – Hokej në akull
Kevin Garnett – Basketboll
Albert Pujols – Bejsboll
Floyd Mayweather Jr. – Boks
Peyton Manning – Futboll amerikan
Randy Moss – Futboll amerikan
Michael Schumacher – Formula 1
Mike Trout – Bejsboll
Clayton Kershaw – Bejsboll
Miguel Cabrera – Bejsboll
Dwyane Wade – Basketboll
Ichiro Suzuki – Bejsboll
Kevin Durant – Basketboll
Justin Verlander – Bejsboll
Dirk Nowitzki – Basketboll
Giannis Antetokounmpo – Basketboll
Alex Rodriguez – Bejsboll
David Ortiz – Bejsboll
Max Scherzer – Bejsboll
Jimmie Johnson – NASCAR
Zinedine Zidane – Futboll
Steve Nash – Basketboll
Adrian Beltre – Bejsboll
Dedrek Jeter – Bejsboll

Lajmet

Mungesa e deputetëve pas pauzës shtyn seancën e Kuvendit për nesër

Published

7 hours ago

November 12, 2026

UBTNews

Kryetarja e Kuvendit të Kosovës, Albulena Haxhiu, ka marrë vendim që ta shtyjë vazhdimin e seancës së sotme plenare për ditën e nesërme, në orën 11:00, pasi deputetët u vonuan rreth gjysmë ore për t’u kthyer në sallë pas pauzës.

Duke arsyetuar vendimin, kryeparlamentarja Haxhiu theksoi se është e pamundur të zhvillohen punimet e Kuvendit kur deputetët nuk respektojnë orarin. Në momentin e ndërprerjes, në sallën plenare ndodheshin vetëm disa deputetë të PDK-së, disa të LDK-së dhe vetëm dy deputetë të Lëvizjes Vetëvendosje.

Për shkak të kësaj shtyrjeje, mbetën pa u shqyrtuar pikat e mbetura të rendit të ditës, ku përfshiheshin katër marrëveshje ndërkombëtare, interpelanca me ministrin e Shëndetësisë, Arben Vitia, mocioni lidhur me energjinë, si dhe diskutimi për Projektligjin për Gjykatën Speciale. /E.A/