Besiktasi ka reaguar ashpër pas humbjes 1:0 ndaj Alanyasporit, në ndeshjen e vlefshme për xhiron e dytë të Superligës së Turqisë.

Klubi nga Stambolli ka shprehur pakënaqësi të madhe me vendimet e gjyqtarëve, veçanërisht me gjyqtarin kryesor Adnan Deniz Kayatepe dhe disa prej vendimeve të tij gjatë takimit.

Në qendër të polemikave ishte edhe kapiteni i Alanyasporit, Fidan Aliti. Besiktasi publikoi një video në rrjetet sociale me disa nga situatat e diskutueshme ku ishte i përfshirë mbrojtësi kosovar.

Një nga rastet më të diskutuara ishte përplasja mes Alitit dhe sulmuesit belg Leandro Trossard në zonën e rreptësisë. Besiktasi pretendon se ndaj Trossardit është përdorur forcë e palejueshme dhe se Aliti duhej të ndëshkohej me karton të kuq.

Në pamjet e publikuara nga klubi shihet kontakti mes dy futbollistëve, ndërsa Trossard pas ndeshjes pretendoi se ishte goditur me shuplakë.

“VAR-i ishte aty dhe, nëse do të ishte përdorur siç duhet, vendimi duhej të ndryshonte qartë. Mendoj se kundërshtari më goditi me shuplakë. Ishte karton i kuq i pastër. Vendimi duhej të ndryshohej”, deklaroi Trossard.

Gjyqtari Kayatepe e ndërpreu lojën pas incidentit, por VAR-i nuk ndërhyri për ta ndryshuar vendimin.

Besiktasi kontestoi edhe anulimin e një goli të tij, duke pretenduar se nuk kishte faull ndaj Alitit në zonë. Klubi turk publikoi gjithashtu një moment tjetër ku Aliti shihet duke e kapur për fanelle Dusan Vlahovicin, teksa sulmuesi po tentonte të futej në zonën e rreptësisë.

Përmes një komunikate zyrtare, Besiktasi kritikoi ashpër ekipin e gjyqtarëve dhe kërkoi që Kayatepe dhe zyrtarët e tjerë të përfshirë të mos gjykojnë më ndeshjet e klubit.

“Adnan Deniz Kayatepe, vendimet skandaloze të të cilit nga gjysmëfinalja e kaluar e Kupës janë ende të freskëta në kujtesën tonë, ka shtuar edhe një tjetër turp në bilancin e tij. Lojtari kundërshtar e goditi Trossardin me shuplakë para gjithë botës. Gjyqtari nuk e pa incidentin, ndërsa VAR-i mbeti i heshtur”, thuhet në reagimin e Besiktasit.

Klubi nga Stambolli pretendon gjithashtu se goli i tij u anulua për një faull që nuk ekzistonte, ndërsa ka kontestuar edhe ndërhyrjen e Alitit ndaj Vlahovicit.

Në këtë takim, Florent Hadërgjonaj ishte protagonist për Alanyasporin, duke asistuar në golin e vetëm të ndeshjes. Ndërkohë, Milot Rashica e ndoqi takimin nga banka rezervë e Besiktasit.

Referimi në futbollin turk vazhdon të jetë temë e debatit të madh, ndërsa ankesat ndaj gjyqtarëve kanë nisur që në xhirot e para të sezonit të ri.

D.L

Kosova do të ketë një ditë të ngjeshur me gara të hënën, në ditën e pestë të Lojërave Mesdhetare “Taranto 2026”.

Përfaqësuesit kosovarë do të garojnë në disa sporte, ndërsa shpresat për rezultate pozitive janë të mëdha sidomos në sportet ekipore. Kosova do të kërkojë fitore në volejboll, hendboll dhe futboll.

Në sportet individuale, garuesit kosovarë do të paraqiten në boks, not, mundje, çiklizëm dhe disiplina të tjera.

Vëmendja kryesore do të jetë te boksierja Donjeta Sadiku, e cila sot e nis garimin në çerekfinale. Një fitore në këtë përballje do t’i sigurojë Sadikut kalimin në gjysmëfinale dhe, rrjedhimisht, të paktën medaljen e bronztë.

Kështu, Kosova sot e ka mundësinë e parë për të siguruar një medalje në këtë edicion të Lojërave Mesdhetare.

D.L

Vedat Muriqi ishte protagonist në fitoren e rëndësishme të Fenerbahçes ndaj Konyasporit, me rezultat 4:2, duke shënuar një gol dhe duke asistuar në një tjetër.

Pas ndeshjes, sulmuesi kosovar u shpreh i lumtur për rikthimin në këtë stadium dhe për pritjen që mori nga tifozët.

“Jam shumë i lumtur. Kanë kaluar gjashtë vjet. Të luaj në këtë fushë, para këtyre tifozëve dhe të dëgjoj tifozët e mrekullueshëm që brohorasin emrin tim është diçka e mrekullueshme. I falënderoj ata dhe të gjithë ata që më dhanë këtë mundësi”, deklaroi Muriqi.

Sulmuesi i Kosovës e vlerësoi lart fitoren, veçanërisht pas humbjes në javën e parë të kampionatit.

“Humbja që pësuam në javën e parë ishte një tronditje për ne. Kjo javë ishte shumë e rëndësishme. Tani është ndeshja me Lyonin. Shpresojmë ta fitojmë dhe të vazhdojmë rrugën tonë”, u shpreh ai.

Fenerbahçe tani e ka të gjithë fokusin te përballja me Lyonin në ndeshjen e kthimit të play-offit të Ligës së Kampionëve. Takimi i parë në Francë përfundoi 1:1, duke e lënë gjithçka të hapur për duelin në Stamboll.

Muriqi pret një ndeshje të vështirë, por beson se Fenerbahçe ka cilësinë për ta kaluar këtë pengesë.

“Do të jetë një ndeshje krejt e re. Ata do të jenë më agresivë dhe do të përpiqen të na frikësojnë, por ne kemi lojtarë shumë të talentuar. Nëse shënojmë një gol, në varësi të rrjedhës së ndeshjes, do ta kthejmë avantazhin. Jemi një ekip më i mirë se ata”, deklaroi Muriqi.

Ai nuk e fshehu dëshirën për ta ndihmuar Fenerbahçen të sigurojë kualifikimin në fazën e Ligës së Kampionëve.

“Mendoj se do të marrim pjesë në Ligën e Kampionëve, të cilën e kemi dëshiruar me padurim. Mund të më mungojnë golat, por kur nënshkrova kontratën për herë të parë thashë se nuk do të shmangesha kurrë nga lufta. Kjo do të vazhdojë”, përfundoi sulmuesi kosovar.

Përballja Fenerbahçe – Lyon pritet të jetë vendimtare për një vend në fazën e Ligës së Kampionëve, ndërsa Muriqi pritet të jetë një nga protagonistët kryesorë të skuadrës turke.

D.L

Sportistët e Kosovës kanë zhvilluar sot gara në not, taekwondo dhe boks në kuadër të Lojërave Mesdhetare, por pavarësisht përkushtimit, nuk arritën të sigurojnë ndonjë fitore.

Në not, Hana Beiqi e përfundoi garën në vendin e gjashtë, ndërsa Erina Idrizaj u rendit e shtata në disiplinën 50 metra shpinë.

Në taekwondo, Kosovën e përfaqësuan Resa Gashi, Bled Tufa dhe Jon Gashi. Resa Gashi u mposht 2:0 nga spanjollja Helena Suarez. Me të njëjtin rezultat përfunduan edhe duelet e Jon Gashit ndaj Ivan Martinezit dhe Bled Tufës ndaj kroatit Ivan Sapina.

Në boks garuan Bashkim Bajoku dhe Taulant Jakupi. Bajoku zhvilloi një përballje të fortë me italianin Scaccia, por u mposht ngushtë 3:2. Ndërkohë, Jakupi nuk arriti ta kalojë spanjollin Paolo Bernal, i cili konsiderohej favorit në këtë përballje.

Garat e sportistëve kosovarë i ndoqën nga afër nënpresidentët e Komitetit Olimpik të Kosovës, Gazmend Maxhuni dhe Musa Selimi, si dhe anëtaret e Bordit Ekzekutiv, Vjollca Krasniqi dhe Besire Domaniku.

Kështu, edhe në këto tri sporte Kosova mbeti pa fitore, ndërsa garuesit kosovarë do të kërkojnë rezultate më të mira në ditët në vazhdim.

D.L