Yjet e njohur të kinematografisë, Dwayne Johnson dhe Emily Blunt, arritën mbi tapetin e kuq të shtruar me rastin e premierës së filmit të tyre të ri aksion dhe aventurë, “Jungle Cruise”. Ngjarja zuri vend të dielën në parkun e lojërave “Disneyland”, në Anaheim të Kalifornisë.
Aktorët e famshëm kanë pritur tri vjet të gjata për lansimin e filmit të tyre, i cili zanohet në njërën prej lojërave të popullarizuara të këtij parku argëtues. Por pas vonesave të shkaktuara nga pandemia e koronavirusit, Blunt dhe Johnon, u shprehën të kënaqur që janë rikthyer në vendin më të lumtur në botë.
“Ky është vendi më i lumtur në botë dhe mendoj që secili person ka nevojë për pak gëzim dhe harmoni për t’ua ndrequr disponimin, dhe filmi ynë e përfaqëson pikërisht këtë. Është i mbushur me momente nostalgjie. Është një prej atyre filmave të cilët i ke shikuar në fëmijëri, prandaj është e nevojshme të jesh në një vend sikur ky, që është po aq nostalgjik sa vet filmi. Prandaj e kemi këtë ndjesi të përkryer. Edhe teksa shëtisnim nëpër këtë vend gjatë ditës së djeshme, ndiheshim të prekur dhe të emocionuar. Është vërtetë një gjë shumë cool ta shënojmë premierën e filmit këtu”, tha Blunt para gazetarëve të pranishëm në premierë
“Dje kemi shëtitur nëpër këtë vend dhe ishte një eksperiencë e mahnitshme. Shkuam tek amfiteatri që gjendet këtu dhe mund ta ndjeje emocionin dhe gëzimin që e sjellë kompania apo brendi ‘Disney’, dhe të gjithë personat që punojnë këtu. Thjeshtë njerëzit duan t’i kthehen filmave dhe të shkojnë nëpër kinema për të shikuar filma të mirë. Me të vërtetë mund ta ndjesh këtë gjë”, shtoi tutje Dwayne Johnson, ndryshe i njohur me nofkën “The Rock”.
Dhe sipas dy aktorëve të njohur hollywoodian, lokacioni i premierës së filmit të tyre ishte mjaft i rëndësishëm.
“Epo gjithçka po duket shumë bukur dhe ta jep një ndjesi të ngrohtë dhe mikpritëse. Përshtatet shumë mirë me filmin. Ka këtë ndjenjën e çuditshme të modës së vjetër dhe është vërtet bukur. Jam shumë e lumtur”, tha aktorja.
“Ne e kemi realizuar filmin para disa vjetësh, dhe me shpërthimin e pandemisë u detyruam ta shtyjmë lansimin e tij për ca kohë. Por, atëkohë mendonim se jemi duke realizuar diçka të veçantë dhe një projekt të cilin njerëzit do të pëlqejnë vërtetë dhe do ta shijojnë. Në veçanti adhuruesit e parkut të lojërave ‘Disney’. Shpresoj të jetë kështu, por mendoj se e kemi realizuar një film të mirë”, shtoi tutje Johnson.
“Jungle Cruise” e rrëfen historinë e kapitenit të mençur Frank Wolff dhe studiueses së guximshme Dr. Lily Houghton, të cilët në film portretizohen nga Johnson dhe Blunt. Lily udhëton nga Londra për në xhunglën e Amazonës dhe e angazhon Frankun, i cili e posedon një anije të quajtur “La Quila”, si udhërrëfyes në misionin e saj nëpër lum. Lily është e vendosur ta zbulojë një pemë antike me aftësi shëruese të pashembullta, e që njëkohësisht zotëron fuqinë për të ndryshuar të ardhmen e mjekësisë. Të përfshirë në këtë kërkim epik së bashku, dyshja has në rreziqe të panumërta dhe forca të mbinatyrshme, të cilat fshihen në bukurinë mashtruese të pyjeve të harlisura. Por ndërsa sekretet e pemës së humbur shpalosen, rreziqet rriten edhe më shumë për Lilyn dhe Frankun. Kështu fati i tyre dhe i gjithë njerëzimit mbetet pezull.
Në këtë aventurë të bukur por edhe të rrezikshme, Lily shoqërohet edhe nga vëllai i saj MacGregor, i portretizuar në film nga aktori britanik Jack Whitehall, i cili pa dashje shndërrohet në asistent të misionit të motrës së tij.
“Ky vend është shumë i veçantë dhe i takon një niveli tjetër. Unë kurrë më parë nuk kam qenë në një vend të këtillë, dhe duket si lokacioni i përkryer për ta lansuar filmin tonë që e gjithë bota ta shohë atë. Natyrisht kjo njihet si loja origjinale e njohur me emrin ‘Jungle Cruise’ që ishte ndër atraksionet e para të krijuara për parkun ‘Disney’ në vitin 1955, dhe tani jemi kthyer këtu pas kaq shumë vjetësh, për ta shndërruar atë në një film. Kjo gjë më duket diçka shumë e veçantë” ka deklaruar aktori Whitefall.
Edhe regjisori i filmit, Jaume Collet-Serra, tregoi se është gëzuar shumë kur ka kuptuar që “Disney”, e ka aprovuar kërkesën e tyre për ta mbajtur premierën në parkun e njohur të lojërave.
“Është një ndjenjë e veçantë. Ishte një befasi e këndshme kur kompania ‘Disney’ na tha se do ta mundësonin ta shfaqnin premierën e filmit këtu. Ka kaluar kohë e gjatë prej se kanë organizuar ngjarje të këtilla, prandaj nuk mund ta besoja se kjo gjë po ndodhte me të vërtetë. Është një eksperiencë e mrekullueshme për të gjithë ne, veçanërisht marrë parasysh faktin se çfarë ka ndodhur së fundmi me pandeminë. Dhe të kesh mundësi sërish t’i shohësh njerëzit duke u kthyer në kinema në një vend kaq special, ishte një ëndërr e shndërruar në realitet”, deklaroi regjisori i filmit.
Në film po ashtu luajnë aktorët Edgar Ramirez, Veronica Falcon, Jesse Plemons dhe Paul Giamatti.
“Jungle Cruise” lansohet nëpër kinema dhe në platformën “Disney+”, nga 30 korriku./koha
Në fshatin Kukaj ka nisur një tjetër edicion i Etno Fest, festivalit që prej vitesh bashkon traditën, artin dhe krijimtarinë bashkëkohore në një ambient të veçantë mes natyrës.
Ministrja e Kulturës dhe Turizmit, Saranda Bogujevci, vlerësoi rëndësinë e festivalit, duke theksuar se Etno Fest vazhdon të krijojë një përvojë unike, ku trashëgimia kulturore prezantohet përmes performancave artistike, muzikës, shfaqjeve teatrore dhe ekspozitave.
Sipas saj, festivali është shndërruar në një nga ngjarjet më të rëndësishme kulturore në Kosovë, duke promovuar vlerat tradicionale përmes formave bashkëkohore të shprehjes artistike dhe duke afruar publikun me kulturën dhe identitetin e vendit.
Bogujevci përgëzoi organizatorët, artistët dhe gjithë ekipin e festivalit për përkushtimin e tyre në ndërtimin e një ngjarjeje që ruan dhe promovon trashëgiminë kulturore të Kosovës.
Ajo theksoi se institucionet do të vazhdojnë të mbështesin artin dhe iniciativat kulturore që kontribuojnë në ruajtjen, zhvillimin dhe promovimin e vlerave kulturore të vendit./A.K/
Festivali Ndërkombëtar i Filmit Dokumentar dhe të Shkurtër, DokuFest, rikthehet në Prizren për edicionin e tij të 25-të, i cili do të mbahet nga 7 deri më 15 gusht. Në kuadër të festivalit do të shfaqen gjithsej 223 filma, duke e kthyer edhe një herë qytetin historik në qendër të kinemasë dokumentare dhe asaj të filmit të shkurtër.
Sipas organizatorëve, këtë vit janë pranuar 3 mijë e 687 aplikime nga e gjithë bota, ndërsa 104 filma janë përzgjedhur për të garuar në tetë kategori zyrtare. Përzgjedhja përfshin dokumentarë dhe filma të shkurtër që trajtojnë tema bashkëkohore, si dhe një numër premierash botërore.
Tema e këtij edicioni është “Persistent Defiance” (Mosbindje e Vazhdueshme), ndërsa slogani “Show up or it doesn’t count!” (Doku sepse duhet!) vë theksin te konfliktet globale, kriza klimatike dhe ndryshimet shoqërore. Organizatorët theksojnë se festivali vazhdon të mbetet një hapësirë për shprehje të lirë, reflektim dhe debat edhe në kohë sfiduese.
Programi do të përfshijë filma nga Kosova, rajoni dhe vende të ndryshme të botës, në kategori si Balkan Dox, Balkan Shorts, International Feature Dox, International Short Dox, International Shorts, Human Rights Dox dhe Green Dox, krahas programeve të veçanta të kuruara.
Shfaqjet do të mbahen në disa prej hapësirave më të njohura të Prizrenit, përfshirë DokuKino, DokuKino Plato, Art’s Theatre, Teatrin “Bekim Fehmiu” dhe Abi Qarshinë. Ndërkohë, aktivitetet DokuTalks do të zhvillohen në Shkollën e Muzikës, ndërsa programi DokuKids në shkollën “Lidhja e Prizrenit”.
Në kuadër të festivalit do të organizohen edhe programe të veçanta si Spotlight, kushtuar regjisores britanike Sophie Fiennes, Doku Immersive me përvoja të realitetit virtual, DokuKids për fëmijë dhe Short Film Forum, platformë që bashkon kineastë dhe profesionistë të industrisë së filmit nga vende të ndryshme.
Një nga mysafirët më të rëndësishëm të këtij edicioni do të jetë dokumentaristi i njohur britanik Mark Cousins, i cili në Prizren do të prezantojë dy kapituj nga projekti i tij 16-orësh “The Story of Documentary Film”, kushtuar dekadave të viteve 1960 dhe 1980.
Atmosfera e festivalit do të pasurohet edhe me programin muzikor DokuNights, që nis më 12 gusht dhe do të zgjasë katër net me koncerte në skenën Andrra Stage.
Me një program të pasur artistik dhe kulturor, DokuFest shënon 25 vjet aktivitet, duke vazhduar të jetë një nga festivalet më të rëndësishme të filmit në rajon dhe një pikëtakim i kineastëve, profesionistëve dhe adhuruesve të filmit nga e gjithë bota./A.K/
Edicioni i 16-të i Etno Fest ka nisur mbrëmjen e së dielës me një program të pasur artistik, duke e vendosur në qendër temën “Kujtesa”, si një ftesë për të ruajtur trashëgiminë kulturore dhe identitetin kolektiv.
Ceremonia e hapjes mblodhi artistë, dashamirës të artit dhe vizitorë të shumtë, ndërsa festivali u çel me fjalën përshëndetëse të drejtorit, Fadil Hysaj, i cili falënderoi artistët, partnerët dhe publikun për mbështetjen ndër vite. Të pranishëm në hapje ishin edhe ushtruesja e detyrës së Presidentes së Kosovës, Albulena Haxhiu, si dhe kryetari i Prishtinës, Përparim Rama.
Programi nisi me një ekspozitë shumëdimensionale që bashkoi skulpturën, pikturën, fotografinë, mozaikun, muralin dhe instalacionet artistike. Punimet e artistëve trajtuan kujtesën, identitetin dhe përvojat historike, duke sjellë para publikut një rrëfim të pasur përmes artit pamor.
Mbrëmja vazhdoi me interpretimin pianistik të Lule Elezit, ndërsa një nga momentet kulmore ishte performanca antropologjike “MYSAFIRI”, me tekst dhe regji të Fadil Hysajt, muzikë nga Memli Kelmendi dhe interpretim nga aktorët Shpëtim Selmani, Sheqerie Buçaj dhe Shpejtim Kastrati. Shfaqja u pasurua me elemente të traditës shqiptare, përfshirë tingujt e lahutës, tepsisë dhe simbolikën e nuses ilire.
Atmosfera artistike vijoi me interpretimin e kavallistit Vendim Kapaj, i cili solli kolonën zanore të filmit The Odyssey, si dhe me performancën e mysafirëve nga Italia, Soloists of GOB (Ocarina Duo & Piano), të cilët interpretuan vepra të kompozitorëve të njohur ndërkombëtarë dhe melodi tradicionale italiane.
Nata e parë e festivalit u mbyll me koncertin e Edona Reshitajt dhe bendit të saj në “Etno Nejë”, duke përmbyllur një mbrëmje të mbushur me muzikë, art dhe reflektim mbi rëndësinë e kujtesës si pjesë e identitetit kulturor./A.K/
Me kërcime nga 20 metra lartësi, adrenalinë dhe emocione të forta, Gjakova ka mirëpritur edicionin e 76-të të garës tradicionale të kërcimeve nga Ura e Fshajtë, një nga ngjarjet më të veçanta sportive dhe kulturore në vend.
Gara, e organizuar në kuadër të festivalit “Ditët e Shqiptarit”, mblodhi pjesëmarrës nga Kosova dhe rajoni, përfshirë për herë të parë edhe garues nga Bosnjë e Hercegovina, vend i njohur për traditën e kërcimeve nga Ura e Mostarit.
Para nisjes së garës, zhytësit e Mitrovicës kontrolluan sigurinë e lumit, duke konfirmuar se thellësia e ujit ishte rreth 6.5 metra.
Koordinatorja e festivalit, Jeta Gërqari, tha se kërcimet nga Ura e Fshajtë tashmë janë shndërruar në një prej aktiviteteve më të rëndësishme të festivalit, duke bashkuar sportin ekstrem me promovimin e kulturës dhe turizmit.
Edhe kryetari i Fondacionit për Gjakovën, Ermal Hasimja, vlerësoi se kjo garë është një simbol i qytetit dhe një ngjarje që tërheq çdo vit vizitorë të shumtë.
Në kategorinë e stilit “dallëndyshe”, fitues u shpall Florid Gashi, i cili mori vlerësimet maksimale të jurisë. Ai u shpreh i lumtur për triumfin, duke theksuar se përvoja në garat ndërkombëtare, përfshirë kërcimet nga Ura e Mostarit, e ka ndihmuar ta tejkalojë frikën dhe të vazhdojë sukseset.
Vendin e dytë e fitoi Shkëlzen Goqi, ndërsa çmimi i tretë u nda mes Bledar Morinës dhe Albion Gashit.
Në kategorinë e kërcimeve në këmbë, vendi i parë i takoi Gent Krasniqit, i dyti Teki Miftarit, ndërsa i treti Gëzim Krasniqit.
Vëmendje të veçantë tërhoqi edhe pesëvjeçari Kani Basha, i cili u duartrokit nga publiku për guximin e tij dhe u nderua me një mirënjohje.
Bashkorganizatori Astrit Haliti tha se kërcimet nga Ura e Fshajtë janë një traditë që promovon Gjakovën dhe turizmin sportiv, duke shtuar se ky sport ekstrem meriton mbështetje edhe më të madhe në të ardhmen.
Kërcimet nga Ura e Fshajtë organizohen që nga vitet ’50 të shekullit të kaluar. Pas një ndërprerjeje disa vjeçare, ato u rikthyen para një dekade dhe vazhdojnë të tërheqin gjithnjë e më shumë garues, vizitorë dhe vëmendje edhe nga mediat ndërkombëtare, duke promovuar njëkohësisht edhe Urën e Fshajtë, monument të trashëgimisë kulturore dhe një nga simbolet më të njohura të Gjakovës./A.K/
Lajmet2 months ago
Sport5 days ago
Lajmet2 weeks ago
Lajmet5 days ago