Bashkimi Evropian ka nisur sot transferimin e mjeteve të parafinancimit prej 61.8 milionë eurosh për Kosovën, si pjesë e Planit për Rritje Ekonomike për Ballkanin Perëndimor.

Ky hap vjen pas ratifikimit të marrëveshjeve në Kuvend dhe dorëzimit të dokumentacionit të nevojshëm nga Qeveria e Kosovës.

Kjo shumë përfaqëson 7% të totalit prej mbi 882 milionë eurosh që Kosova ka në dispozicion deri në fund të vitit 2027. Nga mjetet e bartura sot, rreth 29 milionë euro janë kredi direkte në buxhet, ndërsa pjesa tjetër do të ndahet përmes granteve dhe kredive për projekte kyçe në infrastrukturë.

Kryeministri Albin Kurti u shpreh se Kosova është e përkushtuar për zbatimin e 111 hapave të reformave të dakorduara, duke pranuar se edhe pse është humbur pak kohë, Qeveria do të bëjë çmos për të përshpejtuar procesin.

“Kjo është detyrë e vështirë, por e arritshme,” deklaroi Kurti.

Në anën tjetër, shefja në detyrë e BE-së në Kosovë, Eva Palatova, theksoi se ky plan ofron mundësi konkrete për afrimin e ekonomisë së Kosovës me tregun e përbashkët evropian.

Alokimi i mjeteve në të ardhmen do të jetë i kushtëzuar me rezultate konkrete.

Deri më 30 qershor, Kosova pritet t’i përmbushë 13 hapat e parë të reformave që kapin vlerën e rreth 91 milionë eurove, ndërsa deri në fund të vitit synohen edhe 166 milionë euro të tjera.

Reformat mbulojnë fusha kritike si sundimi i ligjit, tranzicioni i gjelbër dhe zhvillimi ekonomik.

Sot mbushen 27 vite nga rënia heroike e dëshmorëve të kombit, Shkëlzen Haradinaj, Fatmir Nimanaj, Luan Nimanaj dhe Hasim Halilaj. Për të nderuar veprën e tyre, në Kompleksin Memorial në Gllogjan janë zhvilluar homazhe dhe nderime pranë përmendoreve të heronjve, ku morën pjesë familjarë, bashkëluftëtarë dhe qytetarë të shumtë.

Pas ceremonisë zyrtare, ka nisur aktiviteti tradicional i ecjes në këmbë, i njohur si “Shtegu i lirisë”. Kjo marshatë nis nga Gllogjani dhe ndjek itinerarin drejt Maznikut, pikërisht në vendin ku dëshmorët ranë heroikisht 27 vite më parë.

Shkëlzen Haradinaj me bashkëluftëtarë ranë në mbrojtje të popullatës civile në Duboçakë të Maznikut, duke u bërë mburojë e pathyeshme për lirinë e Kosovës.

“Shtegu i lirisë” shërben si një kujtesë e gjallë për sakrificën e tyre sublime dhe rrugën e vështirë që kaloi Ushtria Çlirimtare e Kosovës deri në çlirimin e vendit.

Foto: RTK

Inspektorati Qendror i Punës ka nisur sot një aksion të gjerë inspektimesh në të gjithë Kosovën, me fokus të veçantë në respektimin e kushteve të sigurisë në punë. Ky aksion, i cili po cilësohet si i pari i këtij lloji për nga shtrirja territoriale, ka nisur intensivisht në rajonet e Prishtinës, Fushë Kosovës dhe Ferizajt.

Ushtruesi i detyrës së drejtorit të Inspektoratit Qendror, Kastriot Jashari, ka bërë të ditur se ky hap synon ndryshimin e praktikave të deritanishme dhe vendosjen e rregullave të qarta për mbrojtjen e punëtorëve.

“Ne po përpiqemi që të ndryshojmë disa praktika në mënyrë që të dihet rregulli i qartë në respektimin e kushteve të sigurisë së punës për qytetarët,” deklaroi Jashari para mediave, duke njoftuar nisjen e kontrolleve në terren.

Ky mobilizim i shtuar i autoriteteve vjen menjëherë Një punëtor në Shtime humbi jetën tragjikisht në vendin e tij të punës në rrugën “Industria”, si pasojë e lëndimeve të rënda trupore.

Për këtë rast, policia tashmë ka arrestuar një person i cili dyshohet për veprën penale “asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Prokuroria Themelore në Prishtinë ka njoftuar se pas një pune intensive në bashkëpunim me Policinë e Kosovës, është bërë i mundur lokalizimi dhe arrestimi i të pandehurit me iniciale M.G., i cili ishte në kërkim për veprën penale “Vrasje e Rëndë”.

Gjatë operacionit të arrestimit, policia ka sekuestruar dy armë, një sasi të narkotikëve si dhe dokumente të falsifikuara, të cilat i dyshuari i kishte përdorur gjatë kohës sa ishte në arrati për t’iu shmangur identifikimit. Me urdhër të prokurorit, M.G. është dërguar në mbajtje për 48 orë.

Përveç të dyshuarit kryesor, në këtë aksion është arrestuar edhe një person i dytë, i cili dyshohet për veprën penale “Dhënia e ndihmës kryerësit pas kryerjes së veprës penale”.

“Prokurori i shtetit me kohë do të vazhdojë ndërmarrjen e veprimeve hetimore të nevojshme, si dhe do të shqyrtojë mundësinë e paraqitjes së kërkesës për masën e sigurisë së të pandehurit në procedurë penale,” thuhet në njoftimin e Prokurorisë.

Institucioni i akuzës ka rikonfirmuar përkushtimin për t’i vendosur para drejtësisë të gjithë kryerësit e veprave penale, duke siguruar se hetimet për këtë rast do të vazhdojnë deri në zbardhjen e plotë të rrethanave.