Sport

FFK: Suksesi i Dritës dëshmon ngritjen e nivelit të futbollit kosovar

Published

4 months ago

July 16, 2025

UBTnews

Kampionia e Kosovës, FC Drita, ka shënuar një sukses historik në arenën evropiane, duke u bërë klubi i parë nga vendi ynë që kalon raundin e parë kualifikues të Ligës së Kampionëve. Klubi gjilanas triumfoi edhe në ndeshjen e kthimit ndaj kampionit të Luksemburgut, Differdange 03, me rezultat 3:2, për të siguruar kualifikimin me rezultat të përgjithshëm 4:2.

Hero i kualifikimit ishte sulmuesi Arb Manaj, i cili realizoi dy gola në ndeshjen e zhvilluar të martën mbrëma në Luksemburg, teksa vulën e fitores në ndeshjen e kthimit e dha Veton Tusha, në minutat shtesë. Të pranishëm në stadium ishin edhe një numër i konsiderueshëm i bashkatdhetarëve. Manaj e zhbllokoi rezultatin në minutën e 4-të pas asistimit të Liridon Balajt, ndërsa në minutën e 17-të e dyfishoi epërsinë me një tjetër finalizim të saktë.

Differdange reagoi në minutën e 28-të me golin e Theo Bruscos, duke ngushtuar disavantazhin. Në pjesën e dytë, djelmoshat e trajnerit Zekirija Ramadani menaxhuan mirë lojën, por në minutat e fundit pësuan gol nga penalltia, të cilën e realizoi Hadji. Paraprakisht Veton Tusha në minutën e 84-t pati një rast të pastër për gol, por edhe pse i vetëm para portierit gjuajti mbi portë. Mirëpo, në minutat shtesë Tusha tregoi klasin e tij dhe realizoi në mundësinë e dhënë, për ta vulosur fitoren dhe çështjen e kualifikimit.

Në reagimin e tyre, Federata e Futbolit të Kosovës këtë hap të Dritës e ka cilësuar si “kualifikim me vlerë të shumëfishtë për futbollin e Kosovës, pasi për herë të parë një klub kosovar arrin të kalojë këtë fazë në garën më prestigjioze për klube në Evropë

“Ky kualifikim ka vlerë të shumëfishtë për futbollin e Kosovës, pasi për herë të parë një klub kosovar arrin të kalojë këtë fazë në garën më prestigjioze për klube në Evropë, një dëshmi e ngritjes së nivelit të futbollit tonë”, thuhet në reagimin e FFK-s.

Në raundin e dytë, FC Drita do të përballet me skuadrën e njohur daneze, FC Copenhagen.

Lajmet

Chelsea synon Panichelli që po shkëlqen në Ligue 1

Published

8 hours ago

October 30, 2025

UBT News

Me nëntë gola në dhjetë ndeshje në Ligue 1, Joaquin Panichelli ka tërhequr vëmendjen e klubeve më të mëdha evropiane.

Sulmuesi argjentinas, 23 vjeç, është duke shkëlqyer te RC Strasbourg, duke përfshirë së fundmi edhe një performancë të jashtëzakonshme kundër PSG.

Chelsea FC po punon për ta sjellë Panichellin në Londër në afatin e verës. Raportet e klubit londinez me Strasbourg mund ta bëjë transferimin më të lehtë./S.K/EO/

Lajmet

Ylli i Barcelonës do të mungojë në 10 ndeshje

Published

8 hours ago

October 30, 2025

UBT News

Pedri Gonzalez do të jetë jashtë fushave të blerta për më shumë se një muaj, pasi që problemet me lëndime po vazhdojnë te gjiganti katalunas.

Pas Lewandowskit, Raphinas, Olmos, Joan Garcias, Christensenit, Gavit, Ter Stegenit, edhe mesfushori spanjoll edhe Gonzalez do të mungojë për të paktën 10 ndeshje.

Sipas gazetarit sportiv italian dhe njëherësh ekspertit të transfereve, Fabrizio Romano, Pedri do të mungojë ndaj ekipeve: Elche, Club Brugge, Celta Vigo, Athletic Club, Chelsea, Alaves, Atletico Madrid, Real Betis, Frankfurt dhe Osasuna.

Lajmi pozitiv për trajnerin Hansi Flick ishte rikthimi në ushtrime i sulmuesit Robert Lewandowski këtë javë dhe mund të ketë minuta loje për polakun në ndeshjen ndaj Elches këtë fundjavë./S.K/KP/

Lajmet

Leao në dyshim për derbin me Romën

Published

8 hours ago

October 30, 2025

UBT News

Milani ka shqetësime për gjendjen fizike të Rafael Leaos para ndeshjes vendimtare të fundjavës kundër Romës. Sulmuesi portugez u largua nga fusha në pjesën e parë të barazimit 1-1 ndaj Atalantës dhe iu nënshtrua kontrolleve mjekësore.

Sipas “Gazzetta dello Sport”, testet nuk zbuluan dëmtim serioz, por lojtari po vuan nga një inflamacion në vijë, çka e vë në dyshim për ndeshjen e së dielës.

Leao, 26 vjeç, ka qenë titullar në tre ndeshjet e fundit të Milanit në Serie A, duke shënuar tre gola, pas një periudhe mungese për shkak të dëmtimit në pulpë.

Nëse nuk do të jetë gati, trajneri mund të aktivizojë Christopher Nkunku ose Ruben Loftus-Cheek, pasi Christian Pulisic dhe Santiago Gimenez pritet të mungojnë.

Ndërkohë, Ardon Jashari dhe Pervis Estupinan janë rikthyer në stërvitje me grupin, ndërsa Pulisic dhe Adrien Rabiot synojnë të jenë gati për ndeshjen ndaj Parmës më 8 nëntor./S.K/KP/

Lajmet

Fitore të mëdha për Llapin dhe Drenicën në xhiron e 11-të të Superligës

Published

13 hours ago

October 30, 2025

UBTnews

Xhiroja e 11-të e Superligës së Kosovës solli duele tejet interesante, ku Llapi dhe Drenica regjistruan fitore të mëdha ndaj rivalëve të tyre, duke ndikuar drejtpërdrejt në ecurinë e tabelës.

Llapi e ndali serinë pozitive të Prishtinës, duke e mposhtur me rezultat 2:1. Skuadra e Tahir Batatinës shfaqi lojë të vendosur, duke marrë epërsinë në pjesën e parë me golin e Edon Sadriut, ndërsa Axel Gnap shënoi golin e dytë në pjesën e dytë për të vulosur fitoren.
Për Prishtinën, goli i vetëm u realizua nga Leotrim Kryeziu, që megjithatë nuk mjaftoi për të shmangur humbjen.

Ndërsa Drenica arriti një fitore të madhe me përmbysje 3:1 ndaj kampiones aktuale, Dritës. Ronaldo Chacon u bë hero i takimit me dy gola, ndërsa fitoren e kompletoi Kreshnik Uka. Nga ana tjetër, goli i Albert Dabiqajt mbeti vetëm statistikë, teksa Drenica ndërpreu një seri negative, duke ia ndalur njëkohësisht edhe ecurinë pozitive Dritës.

Në një tjetër përballje, Ferizaj triumfoi bindshëm ndaj Prishtinës së Re me rezultat 3:0. Golat u shënuan nga Sadriu, Berisha dhe Selmani, duke i dhënë skuadrës tri pikë të vlefshme në garën për mbijetesë./UBTNews