FIFA ka bërë një ndryshim të fundit në rregullat e stadiumeve për Kupën e Botës 2026, duke ndaluar tifozët të futin shishe uji në të gjitha ndeshjet që do të zhvillohen në Amerikën e Veriut.

Sipas raportimeve të “New York Times”, më herët rregullorja e FIFA-s lejonte futjen e shisheve plastike bosh dhe të ripërdorshme deri në një litër, për përdorim personal brenda stadiumeve. Megjithatë, kodi i sjelljes i përditësuar më 2 qershor e ka hequr këtë leje, duke ndaluar plotësisht hyrjen e tyre.

Në rregulloren e re theksohet se, për arsye sigurie, çdo lloj shisheje e fortë mund të ndalohet, pasi mund të përdoret si objekt i rrezikshëm në rast hedhjeje në tribuna.

Vendimi pritet të ngjallë debat, pasi tifozët nuk do të kenë më mundësi të mbushin shishet e tyre në burimet e ujit brenda stadiumeve. Në turne të mëparshëm, përfshirë Kupën e Botës për Klube, janë ngritur shqetësime edhe për çmimet e larta të ujit brenda impianteve sportive.

Ndërkohë, ende nuk janë bërë të ditura çmimet zyrtare për Kupën e Botës 2026, por FIFA vazhdon partneritetin e saj me “Coca-Cola”, ndërsa pritet që uji i ambalazhuar të jetë i disponueshëm në stadiume.

Argjentina është kampione në fuqi e botës, pas triumfit në Katar 2022.

Kombëtarja e Shqipërisë e ka nisur me humbje epokën e trajnerit të ri, Rolando Maran, pasi u mposht 1:0 nga Izraeli në ndeshjen miqësore të zhvilluar në Air Albania Stadium.

Pas një pjese të parë të balancuar, kuqezinjtë u shfaqën më kërkues në vazhdim të takimit, duke regjistruar 13 goditje drejt portës kundrejt 11 të mysafirëve dhe duke mbajtur 59 për qind të posedimit të topit. Megjithatë, përkundër rasteve të krijuara, Shqipëria nuk arriti të konkretizonte dominimin e saj.

Momenti vendimtar i ndeshjes erdhi në minutën e 73-të, kur Oscar Gloukh realizoi golin e vetëm të takimit, duke i siguruar fitoren Izraelit.

Pas golit pati tensione në fushë. Sipas raportimeve, Gloukh provokoi tifozët vendas gjatë festimit, ndërsa kapiteni shqiptar Elseid Hysaj reagoi menjëherë, duke shkaktuar një përplasje të shkurtër mes lojtarëve të të dy skuadrave. Hysaj u ndëshkua me karton të verdhë nga gjyqtari.

Në minutat e mbetura, Maran provoi të ndryshonte rrjedhën e lojës me disa zëvendësime, por Shqipëria nuk arriti të gjente golin e barazimit.

Kështu, debutimi i trajnerit italian në stolin kuqezi u mbyll me një humbje minimale, ndërsa Shqipëria do të synojë reagim dhe përmirësim në ndeshjet e ardhshme.

foto:kosovapress

Të mërkurën mbrëma, Italia shënoi fitore minimale 1:0 ndaj Luksemburgut në ndeshjen miqësore të zhvilluar në “Stade de Luxembourg”.

Golin e vetëm dhe të fitores për italianët e realizoi sulmuesi Francesco Pio Esposito në minutën e 49-të, katër minuta pas fillimit të pjesës së dytë.

Kjo ishte ndeshja e parë e Italisë nën drejtimin e përzgjedhësit të përkohshëm Silvio Baldini, i cili më herët ka udhëhequr përfaqësuesen U21 të Italisë. Baldini mori detyrën pas largimit të Gennaro Gattusos nga posti i selektorit.

Fitorja ndaj Luksemburgut i jep moral skuadrës italiane, e cila po vazhdon përgatitjet dhe procesin e rindërtimit pas ndryshimeve në stafin teknik.

Kapiteni i Kombëtares së Zvicrës, Granit Xhaka, nuk i ka fshehur ambiciet e tij të mëdha para Kupës së Botës 2026, duke deklaruar se ëndrra e tij më e madhe është të fitojë trofeun më prestigjioz në futbollin botëror.

Në një intervistë për mediumin zviceran Blick, mesfushori shqiptar tha se synimi i tij është të shpallet kampion bote me Zvicrën, pavarësisht se shumëkush mund ta konsiderojë këtë objektiv tepër ambicioz.

“Dua të bëhem kampion bote. Ndoshta disa do të qeshin me këtë, por unë gjithmonë kam menduar në këtë mënyrë. Duhet të kesh vizione dhe të mendosh në përmasa të mëdha. Nëse nuk beson vetë në ëndrrat e tua, atëherë nuk mund t’i arrish kurrë ato”, deklaroi Xhaka.

Mesfushori 33-vjeçar theksoi se kjo mënyrë e të menduarit e ka shoqëruar gjatë gjithë karrierës së tij dhe nuk duhet të interpretohet si arrogancë. Ai kujtoi se edhe para triumfit historik të Zvicrës në Kupën e Botës U17 në vitin 2009 kishte besuar fuqishëm se skuadra e tij mund të arrinte deri në fund.

Xhaka vlerëson se brezi aktual i futbollistëve zviceranë posedon cilësi të mjaftueshme për të konkurruar me kombëtaret më të forta në botë. Sipas tij, çdo sukses i madh nis nga besimi dhe bindja se ai është i arritshëm.

“Për të shkruar histori, fillimisht duhet të besosh se është e mundur”, është mesazhi që përcjell kapiteni zviceran, teksa synon të udhëheqë ekipin drejt një paraqitjeje sa më të suksesshme në Kupën e Botës 2026.