Federata e Boksit e Kosovës po vazhdon organizimin e aktiviteteve sportive sipas kalendarit zyrtar për vitin 2026. Në kuadër të këtyre aktiviteteve, Federata e Boksit e Kosovës, në bashkëpunim me Klubi i Boksit DODONA, do të organizojë më 12 qershor 2026 turneun memorial të boksit “27-Vjetori i Çlirimit të Prishtinës”.

Aktiviteti do të zhvillohet në Pallati i Rinisë dhe Sporteve, ndërsa matja (peshimi) e garuesve do të mbahet nga ora 14:00 deri në 15:00 në palestrën nr. 079. Turneu do të nisë në ora 19:00.

Ky aktivitet është i hapur për të gjitha grupmoshat, si për djem ashtu edhe për vajza, me qëllim promovimin dhe zhvillimin e mëtejmë të sportit të boksit në Kosovë.

Në cilësinë e gjyqtarëve do të angazhohen:

• Agim Tahiraj
• Safet Sylaj
• Granit Qorri
• Dalina Baraliu
• Egzon Shajkovci

Delegat i turneut do të jetë Sylejman Voca.

Organizatorët ftojnë klubet, sportistët dhe dashamirët e boksit që të marrin pjesë dhe të kontribuojnë në suksesin e këtij turneu memorial, i cili shënon një datë të rëndësishme për kryeqytetin dhe sportin kosovar.

Përfaqësuesja e Kosovës në futboll të femrave, “Dardanet”, do të zhvillojnë sot ndeshje miqësore ndaj Kroacisë.

Takimi nis nga ora 19:00 në stadiumin “Fadil Vokrri” në Prishtinë dhe pritet të sjellë atmosferë sportive në kryeqytet.

Ndeshja do të transmetohet drejtpërdrejt në Art Sport, ndërsa hyrja në stadium është falas.

Organizatorët kanë bërë thirrje për mbështetje nga tifozët, duke theksuar rëndësinë e përkrahjes së përfaqësueses së Kosovës në futboll të femrave.

Me vetëm një javë deri në fillimin e Kupës së Botës 2026, tregu i biletave vazhdon të ngjallë debat dhe pikëpyetje, ndërsa mijëra bileta mbeten ende të disponueshme pavarësisht deklaratave të FIFA-s se turneu është “plotësisht i shitur”.

Presidenti i FIFA-s, Gianni Infantino, kishte deklaruar në shkurt se të gjitha ndeshjet ishin shitur, duke theksuar se vetëm një numër i kufizuar biletash mbahej për shitje në momentet e fundit.

Megjithatë, raportimet e fundit të BBC Sport tregojnë se për një numër të madh ndeshjesh, veçanërisht ato me kombëtare më pak të njohura, ende ka mijëra bileta të pashitura. Sipas platformës analitike TicketData, në një moment të fundit ishin në dispozicion rreth 74 mijë bileta për 86 nga gjithsej 104 ndeshje të turneut.

Vetëm pak ditë më vonë, ky numër ra ndjeshëm, duke nxitur dyshime dhe diskutime rreth lëvizjeve në tregun e biletave.

Një tjetër çështje që ka ngritur shqetësime lidhet me transparencën dhe çmimet e biletave. Autoritetet në Shtetet e Bashkuara, përfshirë prokurorët e New Yorkut dhe New Jerseyt, kanë nisur hetime ndaj FIFA-s për dyshime mbi rritjen artificiale të çmimeve, mashtrimin e tifozëve dhe mungesën e transparencës në procesin e shitjes.

Sipas raportimeve, disa tifozë që kishin blerë bileta në kategori më të shtrenjta kanë përfunduar me ulëse që konsiderohen me vlerë më të ulët, shpesh më larg fushës sesa ishte premtuar gjatë blerjes.

Ndërsa afrohet dita e nisjes së turneut më të madh të futbollit në botë, çështja e biletave mbetet një nga temat më të diskutuara mes tifozëve dhe organizatorëve.

FC Prishtina ka njoftuar se ka arritur marrëveshje me Prof. Malsor Gjonbalajn, i cili është emëruar udhëheqës i Këshillit Profesional të klubit.

Sipas njoftimit të klubit, Gjonbalaj, krahas angazhimit të tij akademik, prej vitesh ka dhënë kontribut të rëndësishëm në futbollin kosovar. FC Prishtina vlerëson se përvoja dhe kualifikimet e tij akademike, shkencore dhe profesionale përfaqësojnë një vlerë të shtuar për strukturat drejtuese të klubit.

Në rolin e ri, ai do të ketë përgjegjësi në hartimin e planeve zhvillimore të klubit, me fokus të veçantë në avancimin e Akademisë së të Rinjve, si pjesë e strategjisë afatgjatë të bardhekaltërve.

Klubi ka shprehur bindjen se angazhimi dhe vizioni i Gjonbalajt do të ndikojnë në forcimin e mëtejshëm të FC Prishtinës dhe në realizimin e objektivave sportive në të ardhmen.

Gjonbalaj është një emër i njohur për tifozët prishtinas, pasi ka veshur fanellën e FC Prishtinës për disa sezone në periudha të ndryshme, duke u dalluar për paraqitjet në repartin ofensiv dhe numrin e madh të golave të shënuar.

“Mirë se u ktheve në familjen bardhekaltër, Prof. Gjonbalaj!”, thuhet në fund të komunikatës së FC Prishtinës.