Sport

FFK-ja e mbajti Kuvendin e Jashtëzakonshëm për ndryshimet e nevojshme statutare, miratohen të gjitha pikat

Published

10 months ago

on

Federata e Futbollit e Kosovës ka mbajtur sot Kuvendin e Jashtëzakonshëm, në të cilin delegatët votuan për një sërë ndryshimesh statutare, me qëllim që statuti i FFK-së të jetë në përputhje të plotë me statutet e UEFA-s dhe FIFA-s, si dhe me Ligjin e ri të Sportit të Republikës së Kosovës.

Në këtë kuvend morën pjesë 50 delegatë, ndërsa të gjitha pikat e rendit të ditës u miratuan unanimisht. Mes tyre u votua edhe për përfaqësuesin e futbollistëve, Samir Ujkani, si anëtar i Komitetit Ekzekutiv të FFK-së.

Presidenti Agim Ademi, në fjalën e tij para delegatëve, u shpreh mirënjohës për bashkëpunimin dhe unitetin e treguar:

“Delegatë të nderuar, ju falënderoj që ju keni përgjegjur ftesës për Kuvend. Nuk e di pse, por sa herë ka kuvend unë ndihem i lumtur. Ky kuvend ma zgjon një ndjenjë se FFK është shumë e fuqishme. Kur juve ju shoh këtu si delegatë nga sfera të ndryshme të jetës që jepni shumë dhe keni sukses, e shoh që futbolli është në duar të sigurta. Jam shumë falënderues që ma keni besuar këtë bagazh mua. Do të vazhdojmë sigurisht bashkë për sa kohë që këtu jemi në të mirë të futbollit. Ju falënderoj edhe ju Komitet Ekzekutiv që jeni gjithmonë të gatshëm të kontriboni për zhvillimin e futbollit dhe ndani këtë barrë të madhe së bashku me mua”, tha presidenti Ademi në fjalën e tij.

Ai pas votimit të ndryshimeve statutare falënderoi delegatët unitetin dhe kompaktësinë që kanë treguar në të gjitha kohërat. ”E thanë edhe përfaqësuesit e UEFA-s e FIFA-s se futbolli gjithkund në botë duhet të jetë unik për të shkuar përpara. Tashmë të gjitha klubet dhe ne si FFK jemi në harmoni me Ligjin e Sportit dhe me statutet e UEFA-s e FIFA-s”.

Punimet e kuvendit, në emër të presidentit të FIFA-s Gianni Infantino dhe Sekretarit të Përgjithshëm të FIFA-s, Mattias Grafström i përshëndeti Marco Ferri, koordinator rajonal i FIFA-s. Ai theksoi bashkëpunimin e frytshëm me FFK-në dhe vuri në pah sukseset e kombëtares së Kosovës:

“Jemi mbledhur këtu për një kuvend të jashtëzakonshëm për ndryshimet statutore dhe tema të ndryshme. Kemi pasur një bashkëpunim shumë konstruktiv me FFK-në për ndryshimet statutore. Ne në FIFA e kemi çmuar transparencën që ka treguar Federata juaj dhe jemi të kënaqur që propozimet tona për ndryshime janë marrë parasysh. Besoj se ky bashkëpunim paraqet një shembull të ri të një bashkëpunimi të shkëlqyeshëm mes FFK-së dhe FIFA-s gjatë viteve të fundit”, tha ai.

Ai tutje uroi Kosovën për rezultatet e shkëlqyera që ka arritur me një seri prej pesë ndeshjeve me fitore dhe avancimin në Ligën B të Ligës së Kombeve. “Është me rëndësi të mos harrojmë se kjo është një arritje e jashtëzakonshme për një federatë e cila është bërë anëtare e FIFA-s as 10 vite më parë. Tani lajmi i keq është se Kosova, si kundërshtar, me të vërtetë është një paralajmërim për të tjerët. Kualifikimet për Botërorin 2026 nuk do të jenë fare të lehta, posaçërisht duke marrë parasysh grupin konkurrues, por ekipi juaj ka treguar talent dhe potencial, andaj besoj se në të ardhmen e afërt do të shkruani faqe të arta në historinë e futbollit tuaj”, tha tutje Ferri.

Në emër të presidentit të UEFA-s, Aleksandër Çeferin, fjalën e mori Jozef Klemen, i cili vuri theksin te uniteti dhe zhvillimi i futbollit:

“E dini të gjithë se para pak kohësh u mbajt Kongresi i UEFA-s në Beograd, ku fjala kyçe aty ishte bashkimi, mospërçarja. E dini se ka palë të shumta që po synojnë të na përçajnë, por është shumë me rëndësi të mbetemi të bashkuar. Futbolli ndërton ura, ndërsa politikanët ndërtojnë mure”, tha Klemen.

Ai tha se Kosova si një nga anëtaret më të reja të UEFA-s po bën zhvillim të rëndësishëm të futbollit brenda strategjisë së saj, duke u fokusuar në projekte të mëdha infrastrukturore.

“Jam shumë i kënaqur që fondet e HatTrick-ut të UEFA-s po shfrytëzohen në mënyrën më të mirë për zhvillimin e futbollit në Kosovë. Ju uroj për suksesin e treguar me Kombëtaren, sidomos për fitoren në play-off kundër Islandës. Besoj se nga rezultati i treguar, Vedat Muriqi tashmë është heroi i vendit tuaj. Nëse vazhdoni kështu, Kosova do të jetë pjesë e kampionateve të mëdha”, shtoi ai.

Një fjalë përshëndetëse mbajti edhe ushtruesi i detyrës së Kryeshefit të Agjencionit për Sport në MKRS, Fidan Shatri, i cili theksoi rëndësinë e Ligjit të ri të Sportit dhe mbështetjen për organizatat sportive:

“Ligji i ri për Sport ka sjellë rregulla të qarta për të gjitha organizatat sportive. Si Komision i Licencimit gjithmonë kemi qenë të gatshëm të ofrojmë mbështetje për organizatat sportive, por njëherësh edhe të monitorojmë ligjshmërinë e tyre në koordinim me organizatat sportive ndërkombëtare”, tha ai.

Related Topics:
Continue Reading

Sport

Koreja e Jugut e nis me fitore Botërorin, mposht Republikën Çeke pas përmbysjes së rezultatit

Published

7 hours ago

on

June 12, 2026

By

Koreja e Jugut e ka nisur me fitore aventurën në Kupën e Botës, duke mposhtur Republikën Çeke me rezultat 2:1 në stadiumin “Akron” në Zapopan.

Koreanët dominuan ndeshjen që nga minuta e parë dhe krijuan rastet më të mira gjatë pjesës së parë. Në minutën e 12-të, Lee provoi me kokë, por topi përfundoi mbi portë, ndërsa gjashtë minuta para pushimit Son ishte shumë pranë golit, me goditjen e tij që kaloi ngjitur me shtyllën.

Edhe në pjesën e dytë Koreja e Jugut vazhdoi të ushtrojë presion. Hwang rrezikoi menjëherë pas rifillimit të lojës, ndërsa Lee dhe Son patën raste të tjera të mira, por portieri çek Kovar u tregua i pakalueshëm me disa pritje vendimtare.

Megjithatë, kur pritej goli i koreanëve, ishte Republika Çeke që kaloi në epërsi. Në minutën e 60-të, Krejci realizoi me kokë për 1:0, duke ndëshkuar shpërdorimin e rasteve nga kundërshtari.

Gëzimi i çekëve nuk zgjati shumë, pasi Koreja e Jugut reagoi shpejt dhe arriti të barazojë rezultatin me anë të Hwang, i cili shënoi për 1:1.

Republika Çeke mendoi se kishte rikthyer epërsinë në minutën e 77-të, kur Soucek dërgoi topin në rrjetë, por goli u anulua pas rishikimit nga VAR-i për pozicion jashtë loje.

Në vazhdim, koreanët arritën të gjenin golin e fitores, duke vulosur triumfin 2:1 dhe duke siguruar tre pikët e para në fazën e grupeve të Kupës së Botës.

D.L

Continue Reading

Sport

Kosova arrin në Estoni, gati për sfidat e radhës në Ligën Evropiane të Volejbollit

Published

7 hours ago

on

June 12, 2026

By

Kombëtarja A e meshkujve e Kosovës ka arritur në Estoni, ku do të zhvillojë ndeshjet e radhës në kuadër të edicionit 2026 të Ligës Evropiane të Volejbollit (CEV Volleyball European League).

Pas përfundimit të turneut të parë në Letoni, volejbollistët kosovarë kanë nisur menjëherë përgatitjet për sfidat e reja, duke zhvilluar edhe seancën e parë stërvitore në palestrën ku do të luhen ndeshjet e turneut të dytë.

Nën drejtimin e përzgjedhësit Darko Prebiracevic, së bashku me ndihmësit Habil Ajeti dhe Valon Mustafa, ekipi është ambientuar me kushtet e sallës dhe ka punuar në aspektin tekniko-taktik për të qenë sa më i përgatitur për ndeshjet që e presin.

Sipas njoftimit të Federata e Volejbollit e Kosovës, atmosfera në kampin e Kombëtares është pozitive, ndërsa lojtarët po vazhdojnë me përkushtim dhe motivim të lartë në prag të dueleve të rëndësishme në arenën evropiane.

Kosova do të përballet fillimisht me Estonia më 12 qershor, me fillim nga ora 18:00, ndërsa një ditë më vonë do të luajë kundër Austria, në ndeshjen që nis në orën 16:00.

Federata e Volejbollit e Kosovës i ka uruar sukses Kombëtares dhe shtabit teknik në vazhdimin e garës dhe në përfaqësimin sa më dinjitoz të vendit në Ligën Evropiane 2026.

D.L

Continue Reading

Sport

Meksika e hap me fitore Kupën e Botës 2026

Published

8 hours ago

on

June 12, 2026

By

Meksika e ka nisur me fitore aventurën në Kupën e Botës 2026, duke triumfuar 2:0 ndaj Afrikës së Jugut në ndeshjen hapëse të turneut.

Takimi i parë i Botërorit, që po organizohet nga Kanadaja, Meksika dhe Shtetet e Bashkuara të Amerikës, u zhvillua në stadiumin ikonik “Azteca” në Mexico City.

Kombëtarja meksikane kaloi në epërsi që në minutën e nëntë me golin e Julian Quiñones, ndërsa Raul Jimenez vulosi fitoren në minutën e 67-të. Pjesa e dytë u karakterizua edhe nga tensione në fushë, me arbitrin që ndau tre kartonë të kuq.

Te Afrika e Jugut u përjashtuan Yaya Sithole dhe Themba Zwane, ndërsa te Meksika me karton të kuq u ndëshkua Cesar Montes. Me këtë fitore, Meksika merr kryesimin e përkohshëm në Grupin A, ku bëjnë pjesë edhe Çekia dhe Koreja e Jugut. /D.L/

Continue Reading

Sport

Nis sot Botërori 2026, turneu më i madh në historinë e futbollit

Published

1 day ago

on

June 11, 2026

By

Sot nis zyrtarisht Kupa e Botës 2026, turneu më i madh i organizuar ndonjëherë nga FIFA, me ndeshjen hapëse ndërmjet Meksikës dhe Afrikës së Jugut në stadiumin legjendar “Azteca” në Mexico City.

Botërori i këtij viti shënon një kapitull të ri në historinë e futbollit, pasi për herë të parë marrin pjesë 48 përfaqësuese, krahasuar me 32 sa ishin në edicionet e kaluara. Turneu do të zhvillohet në tri shtete nikoqire, Meksikë, Shtetet e Bashkuara të Amerikës dhe Kanada , dhe do të përfshijë gjithsej 104 ndeshje deri në finalen e 19 korrikut.

Ndeshja hapëse mes Meksikës dhe Afrikës së Jugut është një përsëritje e sfidës së parë të Botërorit 2010, e cila kishte përfunduar në barazim 1:1. Këtë herë, meksikanët do të kenë avantazhin e terrenit vendas dhe synojnë ta nisin me fitore aventurën e tyre në Grupin A.

Në Grupin A bëjnë pjesë gjithashtu Koreja e Jugut dhe Çekia, të cilat do të përballen po ashtu në ditën e parë të garave. Formati i ri parashikon që dy skuadrat e para të secilit grup, si dhe tetë ekipet më të mira të vendeve të treta, të avancojnë në fazën eliminatore.

Përveç aspektit sportiv, ceremonia hapëse pritet të sjellë një spektakël të madh artistik para fillimit të ndeshjes, duke shënuar startin e një muaji futbolli që do të mbajë të fokusuar mbarë botën.

Me 48 kombëtare, 104 ndeshje dhe tri vende organizatore, Botërori 2026 pritet të jetë edicioni më i madh dhe më spektakolar në historinë e Kupës së Botës.

D.L

Continue Reading

Të kërkuara