Bota

Fëmijët ukrainas që u morën me dhunë nga familjet e tyre u kthyen në shtëpi

Published

on

Tetë fëmijë ukrainas, të cilët u morën me forcë nga familjet e tyre, janë kthyer në shtëpitë e tyre, njoftoi një zyrtar i lartë ukrainas. Këto fëmijë u morën nga autoritetet ruse në gadishullin e Krimesë, i cili është nën kontrollin e Moskës, dhe u vendosën në jetimoret shtetërore.

Sipas Darina Zarivna, këshilltare e shefit të kabinetit të presidentit ukrainas, Volodymyr Zelensky, fëmijët u morën ndërsa ishin në trajtim në një spital, dhe gjatë kohës që qëndruan në jetimore, ata përjetuan keqtrajtimin dhe u detyruan të marrin pjesë në trajnime pro-ruse. Për më tepër, fëmijët u detyruan të mbanin armë dhe të përgatiteshin për luftë, tha Zarivna.

Fëmijët u shpëtuan në kuadër të një programi të quajtur “Bring Kids Back”, por Zarivna nuk ofroi detaje të mëtejshme mbi mënyrën se si ata u shpëtuan dhe se ku ndodhen tani.

Zarivna e cilësoi këtë si një shembull të brutalitetit sistematik të pushtuesve rusë, duke theksuar se ky akt është pjesë e politikës së Rusisë për të shkatërruar identitetin ukrainas. Ajo shtoi se fëmijët u morën me forcë nga nënat e tyre ndërsa po merrnin trajtim mjekësor, duke theksuar që ky ishte një akt i pashembullt i dhunës.

Në vitin 2023, Gjykata Ndërkombëtare Penale lëshoi urdhër-arresti për presidentin rus Vladimir Putin për akuzat për krime lufte, duke përfshirë rrëmbimin e fëmijëve ukrainas. Nga ana tjetër, Kremlini ka hedhur poshtë këto akuzat.

Përveç këtyre tetë fëmijëve, shefi i shtabit të Zelensky, Andriy Yermakov, bëri të ditur se njëzet fëmijë të tjerë, të cilët ishin dërguar me forcë në Rusi, janë kthyer tashmë në Ukrainë. Ky është një proces që përfshin disa shkëmbime të fëmijëve, për t’u bashkuar ata me familjet e tyre.

Ukraina ka denoncuar këtë akt si një krim lufte, duke i cilësuar rrëmbimet e fëmijëve si një pjesë të gjenocidit, sipas një traktati të Kombeve të Bashkuara. Sipas autoriteteve ukrainase, më shumë se 19,500 fëmijë janë dërguar në Rusi ose në territoret e pushtuara nga Rusia pa pëlqimin e familjeve të tyre./UBTNews/

Continue Reading

Bota

Tarifat e reja të Trump hyjnë në fuqi

Published

on

By

Tarifat më të larta të vendosura nga Shtetet e Bashkuara kanë hyrë në fuqi të enjten për dhjetëra ekonomi, në një përshkallëzim të ri të përpjekjeve të Presidentit Donald Trump për të riformësuar tregtinë globale. Me hyrjen në fuqi të një urdhri ekzekutiv të nënshkruar javën e kaluar, detyrimet doganore amerikane janë rritur ndjeshëm, nga 10%, në një shkallë që tani varion mes 15% dhe 41%.

Ndikimi është i përhapur në produktet nga Bashkimi Evropian, Japonia dhe Koreja e Jugut tashmë të cilat përballen me një tarifë 15%, edhe pse këto vende kanë arritur marrëveshje me Uashingtonin për të shmangur penalitete më të rënda. India, ndërkohë, është goditur me një tarifë 25%, që pritet të dyfishohet brenda tre javësh, ndërsa shtete si Siria, Mianmari dhe Laosi përballen me tarifa drastike prej 40% deri në 41%.

Këto tarifa të reja nuk zbatohen për të gjitha kategoritë e importit. Përjashtime janë bërë për sektorë të ndjeshëm si çeliku, automjetet, produktet farmaceutike dhe çipat, të cilët do të trajtohen me masa të ndara.

Presidenti Trump ka paralajmëruar gjithashtu tarifa 100% mbi gjysmëpërçuesit, megjithëse ka sinjale se gjiganti tajvanez TSMC do të përjashtohet nga kjo masë, për shkak të fabrikave që ka të instaluara në SHBA.

Ekonomistët janë të ndarë në lidhje me efektet e tarifave të reja. Disa parashikojnë një rritje të menjëhershme të çmimeve, ndërsa të tjerë theksojnë se ndikimi afatgjatë në inflacion dhe rritjen ekonomike mund të jetë më i thellë sesa mendohet aktualisht.

Profesori Marc Busch nga Universiteti Georgetown thekson se megjithëse kompanitë fillimisht u përpoqën të absorbojnë koston, ato nuk mund ta bëjnë këtë pafundësisht. Ai paralajmëron se një pjesë e madhe e kostos do t’i kalojë konsumatorëve amerikanë, sidomos tani kur nis sezoni i blerjeve për kthimin në shkollë.

“Inventarët po pakësohen dhe bizneset janë gjithnjë e më pak të gatshme të përballojnë barrën tarifore vetë,” tha Busch për AFP, duke shtuar se “impakti ekonomik i këtyre tarifave nuk është vetëm teknik, por edhe politik.”

Valët e reja të detyrimeve “reciproke” janë pjesë e një strategjie më të gjerë të Trump për të adresuar ato që ai i cilëson si praktika të padrejta tregtare ndaj SHBA-së. Megjithatë, shumë analistë argumentojnë se qasja përmes penaliteteve të rënda mund të rezultojë kundërproduktive, sidomos për bizneset e vogla amerikane, të cilat kanë më pak fleksibilitet për t’u përshtatur me kostot shtesë.

Continue Reading

Bota

Koreja e Jugut dhe SHBA-ja me stërvitje të përbashkëta ushtarake

Published

on

By

Koreja e Jugut dhe Shtetet e Bashkuara do të kryejnë stërvitje të përbashkëta ushtarake të mëdha duke filluar nga 18 gushti.

Kështu thanë zyrtarët, megjithëse do të shtyjnë pjesë të stërvitjeve vjetore që kanë qenë burim tensioni me Korenë e Veriut gjatë vitit.

Stërvitjet vjetore 11-ditore, të quajtura Mburoja e Lirisë Ulchi, do të jenë në një shkallë të ngjashme me vitin 2024, por të përshtatura duke riplanifikuar 20 nga 40 ngjarjet e stërvitjes në terren për në shtator, tha zëdhënësi i Shtabit të Përgjithshëm të Koresë së Jugut, Lee Sung-jun.

Continue Reading

Bota

Ruanda do të presë 250 emigrantë të dëbuar nga SHBA-të

Published

on

By

Ruanda ka rënë dakord të presë deri në 250 persona të dëbuar nga Shtetet e Bashkuara të Amerikës, në bazë të një marrëveshjeje të re me administratën amerikane.

Lajmi u bë i ditur nga autoritetet ruandeze, të cilat theksuan se kjo iniciativë shënon një kapitull të ri në përpjekjet e SHBA-së për të zhvendosur emigrantët në vende të treta.

Sipas burimeve zyrtare, ky është një hap i rëndësishëm në kuadër të strategjisë më të gjerë të emigracionit të SHBA-së, që synon të bashkëpunojë me vende partnere për të menaxhuar më mirë flukset migratore.

Korrespondentja e FRANCE 24, Juliette Montilly, raportoi nga Kigali se marrëveshja është pjesë e një qasjeje më të gjerë ndërkombëtare, që përfshin zhvendosjen vullnetare të personave të përjashtuar nga territori amerikan drejt vendeve që janë të gatshme t’i pranojnë.

Continue Reading

Bota

Tragjedi në Gaza: 20 të vdekur nga përmbysja e një kamioni me ndihma

Published

on

By

Agjencia e Mbrojtjes Civile në Gaza ka njoftuar se 20 persona humbën jetën dhe dhjetëra të tjerë u plagosën pasi një kamion që transportonte ndihma humanitare është përmbysur pranë kampit të refugjatëve Nuseirat, në qendër të Rripit të Gazës.

Sipas informacioneve tona, rreth mesnatës, një kamion që mbante ndihma u përmbys ndërsa qindra civilë po prisnin për ndihma. Si pasojë, 20 persona humbën jetën dhe shumë të tjerë mbetën të plagosur,” ka thënë zëdhënësi i agjencisë Mahmud Bassal për agjencinë franceze të lajmeve AFP.

Hamasi e ka akuzuar Izraelin se po i detyron shoferët e kamionëve të ndjekin rrugë të pasigurta për të arritur në qendrat e shpërndarjes së ndihmave.

Kjo çon shpesh në grumbullimin e turmave të dëshpëruara që rrethojnë kamionët,” është thënë nga zyra mediatike e Hamasit në një deklaratë.

Ndërkohë, shoferë lokalë kanë konfirmuar për mediat se turma të uritura njerëzish kanë hequr ndihmat nga kamionët në lëvizje, ndërsa disa mjete janë sulmuar nga persona të armatosur të lidhur me banda që më pas i shesin ndihmat në tregjet lokale me çmime shumë të larta.

Continue Reading

Të kërkuara