Meta më në fund ka bërë një hap të vogël drejt adresimit të ndarjes së tepërt të informacionit personal, që ka ndodhur në feedin publik të aplikacionit të saj të IA-së.

Kompania ka shtuar paralajmërim të shkurtër pranë butonit “post to feed” në aplikacionin Meta AI, duke i këshilluar përdoruesit të shmangin ndarjen e informacionit personal ose të ndjeshëm.

Ndryshimi u vu re për herë të parë nga Business Insider, i cili e quajti aplikacionin një nga vendet më depresive në internet për shkak të vëllimit të madh të informacionit intim, të sikletshëm dhe madje edhe personalisht të identifikueshëm që përdoruesit e Meta AI – me sa duket pa vetëdije – po ndajnë publikisht përmes feed-it të saj të integruar “zbulo”.

Ndërsa Meta AI nuk ndan historikun e bisedave të përdoruesve si parazgjedhje, duket se shumë përdorues kanë zgjedhur të ndajnë ndërveprimet, duke mos e kuptuar se duke vepruar kështu do t’i bënte bisedat e tyre me zë dhe tekst të dukshme për të gjithë. Ekspertët e privatësisë e kanë kritikuar Metën, duke theksuar se shumica e chatbot-eve të tjerë të njohur të AI-së nuk kanë një burim social, të shikueshëm publikisht.

“Nëse pritjet e përdoruesve rreth mënyrës si funksionon mjeti nuk përputhen me realitetin, keni problem serioz me përvojën e përdoruesit dhe sigurinë”, tha javën e kaluar ekspertja e sigurisë Rachel Toback, e cila më parë ka punuar me Meta-n.

“Njerëzit kanë ndërtuar një model mendor se si funksionojnë chatbot-et e inteligjencës artificiale dhe nuk presin që postimet e tyre të shfaqen në ndonjë formë të feed-it social – nuk funksionon kështu mënyra se si funksionojnë mjetet e tjera”, shtoi ajo.

Fondacioni Mozilla i ka bërë gjithashtu thirrje Meta-s të ndryshojë dizajnin e aplikacionit.

“Aplikacioni Meta AI nuk e bën të qartë se ajo që ndani po bëhet plotësisht publike”, tha ai në një deklaratë.

“Nuk ka ikona të qarta, as tregues të njohur të ndarjes si në aplikacionet e tjera Meta”, u tha ndër tjera.

Me këtë ndryshim, kur një përdorues vendos të ndajë publikisht një ndërveprim me Meta AI, shfaqet një paralajmërim që thotë: “Postimet që postoni janë publike dhe të dukshme për të gjithë. Postimet tuaja mund të sugjerohen nga Meta në aplikacione të tjera Meta. Shmangni ndarjen e informacionit personal ose të ndjeshëm”.

Ky paralajmërim shfaqet në postimin e parë, burimi publik i aplikacionit nuk tregon më shkëmbimet e mesazheve që përdoruesit e tjerë kanë ndarë me AI-në, por vetëm imazhe dhe video të gjeneruara nga AI. Nuk është e qartë nëse ky është një ndryshim i përhershëm apo reagim ndaj vëmendjes negative që aplikacioni ka marrë së fundmi.

Nëse pa e ditur keni postuar përmbajtje publikisht në aplikacionin Meta AI, mund ta hiqni duke klikuar në profilin tuaj në këndin e sipërm të djathtë të aplikacionit, pastaj duke shkuar te Të dhënat dhe privatësia -> Menaxho informacionin tënd -> Bëj të gjitha kërkesat publike të dukshme vetëm për ty dhe duke zgjedhur opsionin “zbato për të gjitha”.

Aktualisht, përdoruesit e Facebook-ut kanë mundësi të ndajnë videot e postuara nga persona të tjerë si video-reels, ku secili përdorues shfaqet me një pamje të ndryshme të përmbajtjes së ndarë.

Kjo do të ndryshojë, në muajt në vijim, të gjitha videot e postuara në Facebook do të ndahen automatikisht si video-reels.

“Facebook mbetet shtëpia për të gjitha llojet e videove – të shkurtra, të gjata dhe Live”, tha Meta në njoftim.

Kompania ka paralajmëruar se këto ndryshime do të zbatohen gradualisht në mbarë botën, si për profilet personale ashtu edhe për faqet, me qëllim që përdoruesit ta kenë më të lehtë krijimin dhe shpërndarjen e përmbajtjeve në formën e reels.

“Ne do t’i mundësojmë gradualisht këto ndryshime globalisht për profilet dhe faqet gjatë muajve në vijim për ta bërë më të lehtë për përdoruesit të krijojnë, ndajnë dhe zbulojnë video-reels në Facebook”, u tha ndër tjera.

Meta gjithashtu planifikon të heqë kufizimin ekzistues prej 90 sekondash për video-reels, duke u hapur rrugë videove më të gjata në këtë format.

Përveç kësaj, skeda aktuale “Video” do të riemërtohet në “Reels”, për ta reflektuar më qartë drejtimin e ri të platformës.

YouTube ngadalëson riprodhimin e videos për përdoruesit që bllokojnë reklamat.

YouTube ka filluar të ngadalësojë qëllimisht riprodhimin e videos për përdoruesit që përdorin bllokues reklamash, duke futur vonesa dhe kufizime teknike për të mbrojtur të ardhurat e saj vjetore prej 28 miliardë dollarësh nga reklamat.

Përdoruesit që përdorin shtesa si uBlock Origin po shohin ngarkim më të ngadaltë të videos, ndërprerje në ekran dhe mesazhe që i nxisin ata të çaktivizojnë bllokuesit e reklamave ose të blejnë një abonim YouTube Premium.

Strategjia e re është pjesë e një ofensive më të gjerë nga Google, e cila testoi metoda të ndryshme për të luftuar bllokuesit e reklamave duke përfshirë ndalim të plotë të shikimit të videove pas tre shikimeve për përdoruesit që përdorin bllokues reklamash, që në vitin 2023.

Përdoruesit në të gjitha rrjeteve, duke përfshirë Reddit dhe forumet e shfletuesve Brave, kanë raportuar këto probleme, duke sugjeruar që Google mund të jetë duke synuar llogari specifike përdoruesish, pavarësisht nga lloji i shfletuesit.

Sfondi financiar i këtij veprimi është i qartë, YouTube gjeneroi 28 miliardë euro të ardhura nga reklamat në vitin 2024, duke e bërë reklamimin gurthemelin e modelit të saj të biznesit. Një abonim YouTube Premium mbetet e vetmja alternativë për përdoruesit që duan një përvojë pa reklama.

Analiza teknike tregon se ngadalësimi arrihet duke përdorur funksionin setTimeout të JavaScript, i cili prezanton një vonesë prej pesë sekondash para se të ngarkohet përmbajtja. Gjatë kësaj periudhe, përdoruesve u shfaqet një mesazh nga mbështetja teknike për të çaktivizuar bllokuesit e reklamave.

Ky ngadalësim ndikon jo vetëm në luajtje, por edhe në funksionalitete të tjera – komentim, ngarkim videosh të reja dhe opsione bazë të faqes. Disa përdorues raportojnë gjithashtu probleme me zërin gjatë transmetimeve të drejtpërdrejta.

Edhe pse këto masa zbatohen gradualisht, ka ende një mënyrë për t’i anashkaluar ato.

Përdoruesit e plugin-it uBlock Origin mund të përdorin një filtër të veçantë: www.youtube.com##+js(nano-stb, resolve(1), *, 0.001), për të zvogëluar vonesën nga pesë sekonda në 0.001 milisekonda. Rekomandime të tjera përfshijnë përdorimin e modalitetit të shfletimit privat, pastrimin e cookie-ve ose çaktivizimin e disa opsioneve në cilësimet e plugin-it.

Përdoruesit e macOS mund të përdorin funksionin Hide Distractions të Safari-t, ndërsa përdoruesit e shfletuesit Brave mund të përditësojnë bllokuesit e tyre të reklamave në menunë Shields → Content Filtering.

Një ndryshim i madh po vjen për Gmail dhe injorimi i tij mund t’ju vërë në rrezik të humbisni plotësisht aksesin në llogarinë tuaj.

Gjigandi i teknologjisë po shtrëngon masat e sigurisë së llogarive të tij, duke kërkuar të gjithë përdoruesit e Gmail të bëjnë përditësime kyçe në llogaritë e tyre.

Përditësimi do t’u kërkojë përdoruesve të aktivizojnë Verifikimin me 2 hapa, i cili përfshin fjalëkalimin e tyre dhe një hap të dytë, siç është një njoftim në smartphone, një aplikacion verifikimi ose një çelës sigurie.

Google ka filluar t’u dërgojë përdoruesve email-e paralajmëruese specifike për llogarinë dhe kërkesa për hyrje duke i udhëzuar ata të ndërmarrin veprime.

Këto njoftime përfshijnë afate kohore të personalizuara, të cilat zakonisht japin 15 deri në 30 ditë për t’u përmbajtur para se qasja të kufizohet ose bllokohet.

Ky veprim vjen si pjesë e një shtytjeje më të gjerë të industrisë për të luftuar përmbytjen e spam-it, phishing-ut dhe email-eve të rreme që janë bërë gjithnjë e më të vështira për t’u deshifruar nga ato të vërteta. Inteligjenca artificiale e Google filtron pjesën më të madhe të saj, por ndërsa ‘kriminelët’ kibernetikë bëhen më të sofistikuar, kompania po i forcon edhe më tej mbrojtjet e saj.

Një anketë e kohëve të fundit e Google zbuloi se mbi 60 përqind e përdoruesve në SHBA kanë vënë re një rritje të mashtrimeve online, veçanërisht nëpërmjet mesazheve me tekst dhe email-it . Afërsisht një e treta kanë përjetuar personalisht një shkelje të të dhënave.