Qeveria e Republikës së Kosovës ka mbajtur mbledhje elektronike në të cilën ka ndër të tjera ka aprovuar ndërtimin dhe rinovimin e katër stadiumeve si projekte kapitale.

Këto projekte janë pjesë e një përpjekjeje për të përmirësuar infrastrukturën sportive në disa qytete kryesore të Kosovës.

Konkretisht, projektet e miratuara përfshijnë, ndërtimin e Stadiumit të Qytetit në Pejë, rinovimin e Stadiumit “Përparim Thaçi” në Prizren, ndërtimin e Stadiumit të Qytetit në Ferizaj si dhe rinovimi i Stadiumit të Qytetit në Vushtrri.

Këto investime janë një hap i rëndësishëm drejt përmirësimit të infrastrukturës sportive në Kosovë, me qëllim për të mbështetur zhvillimin e sportit dhe për të krijuar më shumë mundësi për ngjarje të nivelit lokal dhe ndërkombëtar./UBTNews/

Në stadiumin “Fadil Vokrri” në Prishtinë sot do të zhvillohet përballja e dy skuadrave të mëdha kosovare, Prishtinës dhe Dritës. Kjo ndeshje është e mbetur nga xhiro e dytë e këtij kampionati, atëherë kur skuadra gjilanase ishte e angazhuar në garat evropiane.

Me një fitore eventuale, Drita do ta rrëmbente kreun e tabelës në Superligën e Kosovës, duke parakaluar kështu Malishevën dhe Ballkanin pasi do të shkonte në kuotën e 24 pikëve, derisa dy skuadrat e lartpërmendura kanë nga 22 sosh.

Nga ana tjetër, Prishtina është momentalisht në vendin e katërt me 19 pikë dhe synimi i kësaj skuadre janë tri pikë të plota për ta ruajtur hapin me skuadrat e kreut të tabelës.

Ndeshja do të zhvillohet nga ora 17:00.

Reali dhe Milani u përballën në një nga klasiket më të mëdha të futbollit europian, pas plot 14 vitesh pritje, dhe kuqezinjtë e trajnerit Fonseka arritën të zhvillonin një ndeshje fantastike në Santiago Bernabeu. Milani e shkatërroi kampionin aktual të Champions League, duke e mposhtur Realin me rezultatin 1-3 në një duel magjik për milanistët.

Golat e shënuar nga Çaut, Moratës dhe Reijnders i dhanë tri pikë të arta skuadrës italiane, ndërsa për madrilenët golin e vetëm e shënoi Vinicius, me një penallti në minutën e 48-të. Megjithatë, dueli nuk kaloi pa polemika, pasi në minutën e 81-të, Realit iu anulua një gol nga VAR-i për pozicion jashtë loje, me Rudiger që kishte dërguar topin në rrjetë.

Ky rezultat e lë Milanin dhe Realin në kuotën e 6 pikëve secili, dhe tani do të përballen me sfida të tjera interesante. Në ndeshjen e radhës, Reali do të udhëtojë drejt Liverpulit, ndërsa Milani do të luajë ndaj Slovan Bratislavës, gjithashtu në transfertë./UBTNews/

Në një zhvillim të papritur që ka tërhequr vëmendjen e mediave dhe sportdashësve, boksierja algjeriane Imane Khelif është bërë kryefjala e lojërave olimpike “Paris 2024”. Pavarësisht suksesit të saj në ring, ku fitoi medaljen e artë në kategorinë e lehtë duke mposhtur kinezen Yung Liu, një raport mjekësor ka zbuluar detaje të papritura mbi karakteristikat biologjike të saj.

Gazetari francez Djaffar Ait Aoudia ka publikuar një raport në të cilin thuhet se Khelif ka kromozome XY, duke sugjeruar se ajo ka karakteristika biologjike mashkullore. Ky informacion ka shkaktuar një polemikë të madhe, sidomos pas tërheqjes së boksieres Angela Carini nga ndeshja kundër Khelif, duke e bërë atë të përfolur për statusin e saj si femër transgjinore.

Raporti mjekësor thekson se Imane Khelif ka një çrregullim të njohur si mungesa e 5-alfa reduktazës, një gjendje që prek ekskluzivisht individët mashkullorë dhe ndikon në zhvillimin seksual. Ky çrregullim ndikon në konvertimin e testosteronit në dihidrotestosteron, duke sjellë ndryshime në zhvillimin e karakteristikave seksuale sekondare.

Këto zbulime kanë ngritur një numër pyetjesh mbi politikën e përfshirjes në sportin olimpik, veçanërisht për individët me karakteristika biologjike që ndodhen jashtë normave tradicionale të caktuara për gjinine. Suksesi i Khelif në “Paris 2024” ka ngjallur një debat të madh mbi drejtësinë dhe barazinë në sport, dhe si do të ndikojnë këto zbulime në të ardhmen e saj si boksier.

Në një botë që po përpiqet të definojë përshtatshmërinë dhe barazinë në sport, historia e Imane Khelif është një përkujtues i rëndësishëm për sfidat që përballen atletët trans dhe ata që kanë çrregullime të natyrës gjenetike. Suksesi i saj, megjithatë, vazhdon të jetë një simbol i fuqisë dhe përkushtimit, pavarësisht nga polemikat që e shoqërojnë./UBTNews/