Lajmet

Familjet dhe bizneset e prekura nga vërshimet në gjendje të rëndë në Klinë

Elezaj kërkon ndihmën e qeverisë.

Published

2 years ago

on

Vërshimet e ditëve të fundit kanë lënë shumë dëme edhe në komunën e Klinës si në prona publike ashtu edhe ato private. Familjet dhe bizneset e përmbytura nga uji janë në gjendje të rëndë. E për t’u dalë në ndihmë të prekurve, kryetari Zenun Elezaj thotë se nevojitet ndihma e qeverisë.

Familja Imeri në lagjen Dukagjini nga Klina është në gjendje të rëndë, pasi që shtëpia iu vërshua nga uji.

Naim Imeri, i cili ka nisur ta pastrojë shtëpinë nga balta, thekson se nuk i ka shpëtuar asgjë. Imeri me pesë anëtarë të familjes që është strehuar te xhaxhai i tij, kërkon ndihmën e komunës dhe qeverisë.

“Dëmet janë të mëdha, s’kam koment po shihen. Asgjë nuk ka shpëtuar në këtë shtëpi nga orenditë dhe pajisjet shtëpiake. Kjo është gjendje e rëndë. Çka kam pasur ka shkuar dëmë. Jemi strehuar te axha. Kemi qenë në rrezik edhe për jetë, niveli i ujit ka qenë i madh. Të gjitha orenditë i kam gjuajtur, ka qenë një komision për verifikim, çka ndodhë tash nuk e di… Komuna duhet të më bëjë një zgjidhje se nuk kam ku të qëndrojë, nuk kam çka të shtoj më”, tha ai.

Përveç ekonomive familjare, dëme pësuan edhe bizneset në Klinë. Aktim Dushi, pronar i fabrikës së mobilieve, thekson se dëmet janë të mëdha në makineri, dhe sipas tij, nëse nuk mund të futen më në funksion këto makina do të falimentojnë.

“Niveli i ujit ka qenë 95 centimetra në punëtori. Sa i përket makinave të punës, e kemi problemin me elektronikë, nuk e dimë se sa është dëmi i tyre dhe a do të mund t’i rikthejmë në gjendjen e mëparshme. Të gjitha makinat kanë qenë në ujë, dhe nëse nuk mundemi me i rikthyer makinat në funksion si biznes edhe do të kapitullojmë. Por, presim mbështetjen e komunës dhe institucioneve”, tha ai.

Kryetari i Klinës, Zenun Elezaj tha se Klina ka qenë ndër komunat më të dëmtuara në Kosovë nga vërshimet e fundit.

Elezaj tha se komuna nuk ka ndonjë fond të veçantë për mbulimin e këtyre dëmeve, por shpreson në ndihmën e qeverisë.

Kryetari nuk ka treguar për vlerën e dëmeve në këtë komunë, por thotë se shumë shpejt komuna do të dalë me një raport përfundimtar.

“Ishin nivelet më të larta të vërshimeve në histori që Klina ndonjë herë i ka përjetuar. Lumi Klina këtë herë ka kaluar të dyja anët e rrjedhës dhe ka vërshuar lagjen Dukagjini, Arbëria e shumë e shumë fshatra. Dhe tani po merremi me pasojat e vërshimeve… Vendet më të rrezikuara ishin Ujmiri, Shtarica, Pogragja, ndërsa edhe qyteti i Klinës kësaj radhe ishte më i godituri… Qindra familje janë evakuuar nga shtëpitë, të gjitha këto familje janë vendosur tek të afërmit e tyre me shpresën që brenda dy tre ditëve do të rikthehen në shtëpitë e tyre, por ato shtëpi janë në një gjendje të mjerueshme, mirëpo mundësitë janë të pakta që në këtë stinë dimri të bëhen tharjet e ajrosjet e orendive dhe pajisjeve shtëpiake nëpër shtëpi që i kanë pasur. Megjithatë ne do të kemi shifrën e saktë të dëmeve të shkaktuara nga vërshimet. Megjithatë, ka edhe familje që kanë kërkuar strehim. Ka për të pasur shtëpi që nuk janë në gjendje për me rifilluar jetën ato familje, por të shohim për këto pas vlerësimeve të sakta nga terreni”, tha ai.

Ai tha se nëse niveli qendror nuk i del në ndihmë Klinës, komuna duhet ta eliminojë ndonjë projekt dhe do t’iu dalë në ndihmë qytetarëve.

“Në këto raste është e vështirë, sepse nuk ka fond të paraparë, veçse nëse lëmë ndonjë projekt pa realizuar. Por, nëse niveli qendror nuk na del ndihmë për çka nuk besoj, ne duhet ta eliminojmë ndonjë projekt dhe do t’iu dalim në ndihmë qytetarëve”, tha ai.

Kryetarit të Klinës, Elezajt nuk i ka mbetur shumë hatri që kryeministri i vendit nuk e vizitoi Klinën, ndonëse theksoi se janë komuna më e prekur nga vërshimet në këto ditë.

“Komuna e Klinës ka qenë më e dëmtuara në Kosovës, duke pasur parasysh që i ka 6 lumenj, por ndoshta këshilltarët e tij (kryeministrit) nuk e kanë informuar saktë. Por sidoqoftë për mua është me rëndësi të përqendrohemi se si ta tejkalojmë situatën. Megjithatë, tek ne kanë qenë për vizitë presidentja dhe disa ministra të qeverisë”, tha ai.

Klina, Skenderaj, Mitrovica, Podujeva dhe Istogu janë komunat më të prekura nga vërshimet e ditëve të fundit.

Related Topics:
Continue Reading

Lajmet

Krimet kundër njerëzimit nuk falen, përkujtohet masakra në Studime të Vushtrrisë

Published

2 days ago

on

May 2, 2025

By

Në 26-vjetorin e masakrës serbe në Studime të Vushtrrisë u kërkua drejtësi për 116 shqiptarët e vrarë më 2 maj 1999.

Në akademinë përkujtimore, të organizuar nga Komuna e Vushtrrisë, u kërkua edhe unitet politik.

Kryeministri në detyrë, Albin Kurti, tha se strategjia gjenocidale serbe përfshiu edhe fshatrat e Vushtrrisë ku mbeten të vrarë 116 civilë.  Ai theksoi se vetëm me dënim për ata që kryen këtë masakër familjarët do të gjejnë prehje, dhe paqja do të jetë e qëndrueshme.

Kryetari i Vushtrrisë, Ferit Idrizi tha se masakra e 2 majit ka lënë gjurmë të mëdha e te pashlyeshme, ndërsa kriminelët serbë që kryen këtë masakër ende nuk janë dënuar.

Në këtë akademi përkujtimore i pranishëm ishte edhe kryetari i Aleancës për Ardhmërinë e Kosovës, Ramush Haradinaj i cili tha se i paharruar është kujtimi për të gjithë të rënët për liri.

Sokol Gjata, në emër të familjarëve, kërkoi që amaneti i martirëve dhe të rënëve për liri mos të harrohet në zyrat e shtetit.

26 vjet më parë, më 2 maj të vitit 1999, forcat serbe vranë dhe masakruan 116 civilë të pafajshëm shqiptarë. Këta të fundit u nxorën nga kolona e qindra njerëzve që kishin marrë rrugë për Shqipëri. Dëshmitarët kishin deklaruar se 116 civilët u pushkatuan brenda dy orëve.

Continue Reading

Lajmet

Hapet Ambasada e Republikës së Kosovës në Malajzi

Published

2 days ago

on

May 2, 2025

By

Sot hapet Ambasada e Republikës së Kosovës në Kuala Lumpur, Malajzi, duke shënuar një moment të veçantë dhe një hap të rëndësishëm në angazhimet e Kosovës për forcimin e lidhjeve me vendet e Azisë Juglindore dhe zgjerimin e pranisë së saj diplomatike në këtë rajon strategjik.

Kështu thuhet në një komunikatë për media të Ministrisë së Punëve të jashtme, ku theksohet se Malajzia ka qenë një ndër vendet e para që ka njohur pavarësinë e Kosovës, dhe hapja e ambasadës në kryeqytetin e saj përfaqëson një dëshmi të përkushtimit të ndërsjellë për të avancuar bashkëpunimin dhe për të thelluar marrëdhëniet e ndërtuara mbi respektin dhe mirëkuptimin reciprok.

“Hapja e Ambasadës në Kuala Lumpur nuk është vetëm një zgjerim i pranisë sonë diplomatike, por edhe një shprehje konkrete e vullnetit tonë për të ndërtuar ura miqësie, bashkëpunimi dhe zhvillimi me një nga rajonet më dinamike në botë. Jemi mirënjohës për mbështetjen e vazhdueshme të Malajzisë dhe të përkushtuar për ta çuar këtë partneritet në nivele të reja,”deklaroi Ministrja e Punëve të Jashtme dhe Diasporës, Donika Gërvalla.

Ambasada e Kosovës në Kuala Lumpur synon të shërbejë si një urë e re bashkëpunimi në fushat e diplomacisë, tregtisë, shkëmbimeve kulturore dhe përkrahjes së qytetarëve të Kosovës në këtë pjesë të botës. Kjo hapje është rezultat i punës së vazhdueshme institucionale dhe përkushtimit strategjik për afirmimin ndërkombëtar të Republikës së Kosovës.

Continue Reading

Lajmet

Presidentja Osmani pritet me nderime të larta shtetërore në Malajzi: “Faleminderit Kryeministër Anwar Ibrahim për mikpritjen!”

Published

2 days ago

on

May 2, 2025

By

Presidentes së Republikës së Kosovës iu organizua pritje me nderime të larta shtetërore në Kompleksin qeveritar Perdana Putra në Putrajaya në Malajzi.

Presidentja Osmani falënderoi për pritjen në këtë shtet.

“Faleminderit Kryeministër Anwar Ibrahim për mikpritjen!”, shkroi presidentja Osmani.

Kreu i shtetit të Kosovës ka udhëtuar për vizitë zyrtare në Federatën e Malejzisë, me ftesë të Kryeministrit YAB Dato’ Seri Anwar Ibrahim.

Më parë, Zyra e Presidentes së Kosovës ka bërë të ditur se në kuadër të kësaj vizite, presidentja Osmani do të dekorojë me Medalje Presidenciale të Meritave Kryeministrin aktual të Malejzisë, Anwar Ibrahim, si dhe ish-kryeministrin Abdullah Ahmad Badawi, në shenjë mirënjohjeje për kontributin e tyre në mbështetje të Kosovës.

“Presidentja Osmani, në prezencë të korit diplomatik dhe të ftuarve të tjerë, do ta hapë zyrtarisht Ambasadën e Republikës së Kosovës në Kuala Lumpur, një hap i rëndësishëm në forcimin e pranisë diplomatike të Kosovës në rajonin e Azisë Juglindore.

Presidentja Osmani do të zhvillojë gjithashtu takime me përfaqësues të Dhomës Kombëtare të Tregtisë dhe Investimeve të Malajzisë (NCCIM), si dhe me përfaqësues të sektorëve të rëndësishëm të ekonomisë malajziane, përfshirë prodhimin, teknologjinë dhe turizmin. Me këtë rast, do të diskutohet për mundësitë konkrete të bashkëpunimit ekonomik mes dy vendeve dhe tërheqjes së investimeve në Kosovë”, thuhet në njoftimin e Zyrës së Presidentes së Kosovës.

Continue Reading

Lajmet

26 vjet nga masakra e Studimes së Vushtrrisë

Published

2 days ago

on

May 2, 2025

By

Sot mbushen 26 vjet nga koha kur në Studime të Vushtrrisë forcat kriminele serbe vranë 116 shqiptarë të pafajshëm.

Këta të fundit u nxorën nga kolona e qindra njerëzve që kishin marrë rrugë për Shqipëri.

Nga dëshmitarët mësohet se 116 civilët u pushkatuan brenda dy orëve.

Kjo ditë do të kujtohet sot me një akademi përkujtimore në Studime.

Continue Reading

Të kërkuara