Zyrtarët e Interit janë të gatshëm të ndjekin alternativa të tjera në merkato nëse dështojnë përfundimisht negociatat për Ademola Lookman.

Aktualisht, zikaltërit dhe Atalanta ndodhen në një bllokadë të plotë. Sulmuesi nigerian, i cili tashmë është larguar nga Bergamo, ndërsa skuadra e trajnerit Juriç zhvillon e cila sot një miqësore ndaj Monzës, ka shprehur qartë dëshirën për t’u transferuar në Milano, ku presidenti Marotta do t’ia besonte me kënaqësi trajnerit Cristian Chivu. Megjithatë, presidenti i Atalantës, Antonio Percassi, mbetet i vendosur, ai nuk dëshiron ta shesë lojtarin në Itali për shifrat aktuale.

Oferta më e fundit e Interit, 42 milionë euro plus 3 milionë euro në formë bonusesh, është refuzuar. Sipas mediave italiane, me miratimin e Oaktree, zikaltërit po shqyrtojnë një rritje të ofertës duke u afruar te 50 milionë eurot, me një bazë fikse prej 45 milionë eurosh, plus bonuse dhe mundësinë e përfshirjes së një lojtari të ri si pjesë e marrëveshjes.

Sipas “La Gazzetta dello Sport”, Interi po eksploron edhe emra të tjerë për krahun e sulmit. Fillimisht është përmendur francezi Christopher Nkunku i Chelseat, por kandidatura që po fiton terren është ajo e Jadon Sanchos. Anglezi, i lindur në vitin 2000 dhe me kontratë deri në verën e ardhshme me Manchester United, ka një vlerë rreth 25 milionë euro, dukshëm më e ulët se ajo e Lookman dhe Nkunku.

Përveç moshës dhe cilësive teknike, çmimi më i ulët e bën më të lehtë për Interin të akomodojë pagën e tij, e cila nuk përfiton nga “Dekreti i Rritjes”. Këtë verë, Sancho është lidhur edhe me interesime nga Juventus dhe Napoli, duke shtuar konkurrencën për shërbimet e tij.

Presidentja e Kosovës, Vjosa Osmani, ka pritur sot në takim Përfaqësuesin e Posaçëm të Bashkimit Evropian për Dialogun Kosovë-Serbi, Peter Sorensen.

Presidenca ka njoftuar se në këtë takim Osmani ka theksuar rëndësinë e largimit të masave të padrejta ndaj Kosovës.

“Në kuadër të diskutimit, u trajtua edhe procesi i konstituimit të Kuvendit dhe institucioneve të tjera, si dhe rëndësia që këto institucione të funksionojnë në mënyrë demokratike për të avancuar objektivat e përbashkëta. Presidentja trajtoi edhe çështjen e arrestimeve arbitrare të qytetarëve të Kosovës nga ana e Serbisë duke kërkuar angazhim të bashkësisë ndërkombëtare në mënyrë që Serbia t’i ndalë këto veprime të paligjshme ndaj qytetarëve të Kosovës“, thuhet në njoftim.

Në lidhje me dialogun, Kosovë-Serbi, Osmani tha se ky proces duhet të jetë i drejtë ipaanshëm, duke përcaktuar objektiva të qarta, gjë që do të kontribuonte po ashtu në avancimin e paqes, stabilitetit dhe perspektivës evropiane të rajonit në tërësi.

Osmani nënvizoi rëndësinë e integrimit të Kosovës në organizata ndërkombëtare, me theks të veçantë në Këshillin e Evropës, si dhe në organizata të tjera të rëndësishme.

Për shkak të mos ekzekutimit të pagave për muajin korrik, disa punëtorë të Radio Televizionit të Kosovës (RTK) protestuan sot para Kuvendit të Kosovës, duke kërkuar të drejtat e tyre ligjore për alokim të mjeteve.

Ndonëse 5 gushti ishte dita e fundit kur atyre do të duhej t’iu alokoheshin mjetet për muajin korrik, rreth 700 punonjës të RTK-së kanë mbetur pa paga.

“RTK nuk hesht”, “Gazetar pa pagë=Demokraci pa zë”, “Mos na e fikni zërin publik”, “Buxheti nuk është privilegj, është e drejtë ligjore”, “Mos e shkatërroni mediumin publik”, “RTK është e popullit, jo e politikës”, “Punëtorët e RTK-së, jo viktima të krizës”, janë disa nga mbishkrimet në pankartat që punëtorët e mediumit publik mbanin në duar gjatë protestës.

Kryetari i Sindikatës së Punëtorëve të RTK-së (SPERTK), Gëzim Bimbashi tha se kjo krizë është rezultat i mosmiratimit të Ligjit të ri për RTK-në dhe mungesës së një financimi të pavarur dhe të qëndrueshëm.

Ai tha se kërkesat e punëtorëve të RTK-së janë alokimi i menjëhershëm i buxhetit, kompletimi i bordit të RTK-së nga Kuvendi i ri, shpallja e konkursit për drejtor të përgjithshëm, me respektim të plotë të procedurave ligjore, si dhe rritja e buxhetit për vitin 2026, përfshirë rritjen e pagave.

Bimbashi potencoi se mbi 700 familje janë pa paga, në kushte të rënda ekonomike, nën barrën e kredive dhe me kosto të jetesës në rritje.

Po ashtu, Bimbashi tha se nuk përjashtohen greva, protesta para objektit të RTK-së dhe bojkoti i ngjarjeve politike.

Ndërkaq, kryetari i Asociacionit të Gazetarëve të Kosovës, Xhemajl Rexha tha se ofrojnë mbështetje të plotë dhe të fuqishme për punëtorët e RTK-së.

Ai potencoi se thirrja e AGK-së është që punonjësit e RTK-së të vazhdojnë punën e tyre pa presion financiar e politik.

Sipas tij, situata aktuale ka qenë e shmangshme për cka ftoi institucionet që të ndërmarrin hapat e nevojshëm.

Organizatat e dala nga lufta e Ushtrisë Çlirimtare të Kosovës, ka mbajtur sot konferencë për media për të prezantuar detajet dhe informacionet për protestën e nesërme të 7 gushtit në sheshin Skënderbeu në Prishtinë.

Në konferencë për media Gazmend Syla tha se për këtë protestë janë paralajmëruar të gjitha institucionet për mbarëvajtjen sa më korrekte të saj dhe se janë bërë të gjitha përgatitjet për protestë.

“Në kuadër të organizimit të protestës të paralajmëruar nga kategoritë e dala nga lufta e UÇK-së janë bërë të gjitha përgatitjet, kemi kërkuar lejen e Komunës së Prishtinës, është njoftuar Policia e Kosovës, është angazhuar ambulanta kemi bërë kërkesë të kemi një ambulantë nëse ka nevojë. I është dhënë mundësia kushdo që ka dëshirë me marrë pjesë në protestë me autobus. Kemi komunikuar me parkingun Prishtina, ka mbetë vetëm nesër me fillu protesta. Folës të kësaj proteste do jene profesoresha universitare, zonja Nevenka edhe organizuesi i kësaj proteste, Hysni Gucati, pastaj do të jetë edhe një bashkëluftëtari joni, kryetari i BDI, Ali Ahmeti edhe një djalë dëshmori”, tha fillimisht ai.

Syla ftoi sërish qytetarët për pjesëmarrje masive në këtë protestë dhe se OVL-UÇK vazhdimisht ka bërë fushatë diplomatike te bashkësia ndërkombëtare në institucione dhe figura të ndryshme botërore.

Ndër të tjera Syla tha se po synohet të rishkruhet historia jonë dhe se po presin edhe ndonjë reagim ndërkombëtar.

“Për ne është e papranueshme dhe kjo është edhe një motiv shtesë për me dalë në protestë por edhe në protestat tjera që do kemi pas kësaj, për të kërkuar nga faktori ndërkombëtar të mos lejojnë një gjë të tillë pasi aty po synohet të rishkruhet historia jonë, po cenohet të rishkruhet historia e shtetndërtimit tonë që e kemi ndërtuar së bashku me bashkësinë ndërkombëtare, prandaj kjo i lëkund themelet e shtetit tonë. Jemi duke pritur nëse do ketë reagim ndërkombëtar, nëse jo ne do të vazhdojmë prapë me protesta”, përfundoi Syla.

Gjykata Speciale së fundmi ka pranuar si dëshmi edhe dëshmi nga institucionet serbe, teksa Syla shpreh shqetësim të thellë për këtë fakt duke ftuar edhe reagim ndërkombëtar.