Kosova do të përfaqësohet me një delegacion rekord në Lojërat Mesdhetare “Taranto 2026”. Komiteti Olimpik i Kosovës ka njoftuar se plot 163 sportistë do ta përfaqësojnë vendin në këtë ngjarje të madhe shumë-sportëshe.

Nga ky numër, 87 janë sportistë meshkuj dhe 76 sportiste femra. Ky është numri më i madh i pjesëmarrësve që Kosova ka dërguar ndonjëherë në një garë të këtij niveli.

Pjesëmarrja në Lojërat Mesdhetare nuk kërkon norma kualifikimi, ndërsa KOK-u ka vendosur për një delegacion të gjerë, edhe për shkak se edicioni i vitit 2030 do të organizohet në Prishtinë.

Kosova debutoi në Lojërat Mesdhetare në “Tarragona 2018”, ku u përfaqësua me 40 sportistë. Katër vite më vonë, në “Oran 2022”, numri ishte 38 sportistë. Ndërsa në “Taranto 2026”, që do të zhvillohet në Itali nga 21 gushti deri më 3 shtator, pjesëmarrja është shumëfishuar.

Në këtë edicion do të garojnë sportistë nga 26 vende, në 28 sporte të ndryshme. Kosova do të jetë pjesë e 21 sporteve, ndërsa për herë të parë do të garojë në katër sporte ekipore.

Përfaqësueset e Kosovës do të paraqiten në futboll me ekipin U21 të meshkujve dhe U19 të femrave, në hendboll dhe volejboll me ekipet seniore, ndërsa në basketboll do të garojnë në formatin 3×3.

“Synimi është që ta përfaqësojmë vendin sa më denjësisht”, ka bërë të ditur Komiteti Olimpik i Kosovës. Një moment i veçantë do të jetë ceremonia e mbylljes, ku Kosovës do t’i dorëzohet flamuri i Lojërave Mesdhetare si vendi organizator i edicionit të ardhshëm, “Prishtina 2030”.

Përveç sporteve ekipore, Kosova do të garojë edhe në xhudo, boks, atletikë, badminton, çiklizëm, kajakim, karate, mundje, padel, not, peshëngritje, pingpong, shenjëtari sportive, shigjetari, taekwondo, tenis dhe triatlon.

Pritshmëritë më të mëdha për medalje janë te xhudoja dhe boksi, por shpresat janë edhe në disiplinat e tjera.

Në debutimin e saj në Tarragona 2018, Kosova fitoi katër medalje, të gjitha në xhudo. Medalje të arta morën Distria Krasniqi, Nora Gjakova dhe Akil Gjakova, ndërsa Loriana Kuka fitoi argjend.

Në “Oran 2022”, Kosova arriti të fitojë gjashtë medalje. Distria Krasniqi, Laura Fazliu dhe Loriana Kuka fituan të arta, Akil Gjakova dhe Flaka Loxha morën bronz në xhudo, ndërsa Shpëtim Bajoku fitoi medalje bronzi në boks.

Në “Taranto 2026”, Kosova synon ta rrisë edhe më shumë numrin e medaljeve, edhe pse në xhudo, sporti ku vendi ka pasur suksesin më të madh – po zhvillohet një proces i ndërrimit të gjeneratave.

D.L

Sigal Prishtina ka zyrtarizuar transferimin e radhës për edicionin e ri. Basketbollisti Norik Binqe është lojtari më i ri që i bashkohet skuadrës “bardhekaltër”.

Binqe, i cili është 196 centimetra i gjatë, rikthehet te Prishtina pasi më herët ka qenë pjesë e këtij klubi. Gjatë karrierës së tij ai ka luajtur edhe për Borën, ndërsa ka pasur një përvojë edhe jashtë Kosovës, te skuadra kroate Dubrava.

Ky është transferimi i pestë i Sigal Prishtinës gjatë kësaj vere. Para Binqes, klubi ka afruar edhe Bryson Dawkins, Malcolm Armstead, Ajiri Ogemuno-Johnson dhe Dion Sheqiri.

Përveç afrimeve të reja, Prishtina ka vazhduar bashkëpunimin me Arbër Sinanin dhe Don Polloshkën.

Skuadra nga kryeqyteti në edicionin e ri do të udhëhiqet nga trajneri kroat Jeronimo Šarin, me synimin për të qenë përsëri ndër ekipet kryesore të basketbollit kosovar.

D.L

Edicioni 2026/2027 i Premier Leagues ende nuk ka filluar, por tashmë ka hyrë në histori. Sipas BBC-së, nëntë klube do ta nisin sezonin me trajner të ri, numri më i madh i ndryshimeve në stolin e skuadrave në javën e parë të kampionatit elitar anglez.

Nga Liverpooli dhe Manchester City, te Chelsea dhe Newcastle United, ndryshimet kanë prekur pothuajse gjysmën e ligës, duke sjellë një pamje krejtësisht të re të skenës së trajnerëve në Premier League.

Nëntë klube, nëntë emra të rinj

Shkalla e ndryshimeve është e jashtëzakonshme. Liverpooli i ka besuar Andoni Iraolas pas largimit të Arne Slot, ndërsa Manchester City ka zgjedhur Enzo Marescën pas dorëheqjes së Pep Guardiolas, trajnerit që solli shumë trofe në “Etihad”.

Chelsea ka emëruar Xabi Alonson pas largimit të Liam Rosenior, ndërsa Bournemouthi ka zgjedhur Marco Rosen si pasues të Iraolas. Nottingham Foresti ka emëruar Oliver Glasnerin pas shkarkimit të Vitor Pereiras.

Crystal Palace i ka dhënë besimin Pierre Sages pas largimit të Glasnerit, Fulhami ka sjellë Alvaro Arbeloan në vend të Marco Silvas, ndërsa Ipswich Town ka emëruar Gary O’Neilin pas dorëheqjes së Kieran McKennas.

Ndryshimi i fundit erdhi te Newcastle United, ku Matthias Jaissle mori drejtimin pas largimit të Eddie Howes.

Kështu, nëntë skuadra do të hyjnë në sezonin e ri me trajner të ri të përhershëm. Rekordi i mëparshëm ishte në edicionin 2016/17, kur tetë klube nisën kampionatin me ndryshime në stol – një sezon që shënoi edhe ardhjen e Pep Guardiolas në Manchester City.

Fundi i një gjenerate

Edicioni i ri i Premier Leagues shënon gjithashtu fundin e një epoke. Për herë të parë që nga sezoni 1985/86, kampionati anglez do të nisë pa asnjërin prej emrave më të mëdhenj të trajningut: Alex Ferguson, Arsene Wenger, Jose Mourinho, Jurgen Klopp apo Pep Guardiola.

Këta trajnerë kanë fituar së bashku 26 nga 34 titujt e Premier Leagues dhe kanë përcaktuar historinë moderne të futbollit anglez.

Ferguson vendosi standardet me dominimin e Manchester Unitedit, Wenger ndryshoi mënyrën e përgatitjes së lojtarëve te Arsenali, Mourinho solli një qasje të re taktike, Klopp transformoi Liverpoolin me futbollin intensiv, ndërsa Guardiola krijoi një nga ekipet më dominuese në historinë e ligës.

Tashmë, Mikel Arteta i Arsenalit është trajneri me qëndrimin më të gjatë në Premier League, pasi mori drejtimin e klubit në dhjetor të vitit 2019.

A sjell ndryshimi sukses?

Ndërrimi i trajnerëve shpesh shoqërohet me të ashtuquajturin “efekti i trajnerit të ri” – një përmirësim i menjëhershëm që vjen nga motivimi i ri, ndryshimet taktike dhe energjia e re brenda skuadrës.

Megjithatë, historia tregon se ndryshimi nuk garanton sukses.

Edicioni i kaluar solli 11 ndryshime trajnerësh, por jo të gjitha skuadrat patën përmirësim. Disa klube vazhduan të përballeshin me probleme, ndërsa të tjera patën rezultate pozitive menjëherë pas ndryshimit.

Shembulli më i mirë ishte Michael Carrick, i cili pati një ndikim të menjëhershëm te Manchester Unitedi, duke siguruar një mesatare prej 2.6 pikësh për ndeshje në pesë xhirot e para.

Megjithatë, studimet tregojnë se cilësia e lojtarëve, investimet dhe struktura e klubit mbeten faktorë më të rëndësishëm për sukses sesa vetëm ndërrimi i trajnerit.

Që nga krijimi i Premier Leagues në vitin 1992, vetëm gjashtë trajnerë kanë arritur ta fitojnë titullin në sezonin e tyre të parë me klubin: Jose Mourinho, Carlo Ancelotti, Manuel Pellegrini, Claudio Ranieri, Antonio Conte dhe së fundmi Arne Slot me Liverpoolin në sezonin 2025/26.

Me kaq shumë ndryshime në stol, Premier League po përgatitet për një sezon të ri plot pikëpyetje. Nëse trajnerët e rinj do të sjellin sukses apo vetëm një tjetër valë ndryshimesh, do ta tregojë koha.

D.L

Bota e arteve marciale është tronditur nga një lajm i hidhur. Luftëtari brazilian i MMA-së, Allan Nascimento, ka ndërruar jetë në moshën 35-vjeçare, pasi pësoi një atak në zemër gjatë gjumit.

Lajmi për vdekjen e tij u konfirmua përmes një deklarate zyrtare të UFC-së. Sipas informacioneve të publikuara, Nascimento u gjet pa shenja jete në mëngjesin e së hënës, më 3 gusht. Edhe pse ekipi mjekësor ndërhyri menjëherë, përpjekjet për ta rikthyer në jetë rezultuan të pasuksesshme.

“Këtë mëngjes, të hënën, më 3 gusht, i dashuri ynë Allan Nascimento u gjet pa shenja jete pasi pësoi një atak në zemër gjatë gjumit. Pavarësisht përpjekjeve të ekipit mjekësor, ai u shpall i vdekur në vendngjarje.

Mendimet dhe ngushëllimet tona më të sinqerta shkojnë për familjen, miqtë, bashkëluftëtarët dhe të gjithë ata që e deshën Allanin”, thuhet në deklaratën e UFC-së.

Gjatë karrierës së tij në UFC, Nascimento zhvilloi gjashtë duele, duke regjistruar katër fitore dhe dy humbje. Në karrierën e përgjithshme në MMA ai mbylli bilancin me 22 fitore dhe shtatë humbje.

Braziliani debutoi në UFC kundër Tagir Ulanbekov, ndërsa më pas arriti fitore ndaj Jake Hadley, Carlos Hernandez, Jafel Filho dhe Cody Durden. Ndeshjen e fundit e zhvilloi në qershor të këtij viti, kur u mposht me vendim të ndarë të gjyqtarëve nga Mitch Raposo.

Edhe pse nuk ishte pjesë e elitës së yjeve më të mëdhenj të UFC-së, Allan Nascimento konsiderohej një talent në ngritje dhe një nga luftëtarët më premtues të kategorisë së peshës flutur (flyweight), duke lënë pas një trashëgimi të respektueshme në sportin e MMA-së.

D.L