Ministri i Financave, Punës dhe Transfereve, Hekuran Murati, dhe Ambasadori i Zvicrës në Kosovë, Jurg Sprecher, nënshkruan dje një marrëveshje granti me vlerë 9 milionë franga për financimin e fazës së dytë të projektit “Menaxhimi i Integruar i Burimeve Ujore në Kosovë”.

Në njoftim thuhet se programi, me një vlerë totale prej rreth 20 milionë frangash zvicerane, do të zbatohet në tri faza. Faza e parë ka patur një financim prej 8.6 milionë franga, ndërsa ky grant i ri, i ofruar nga Departamenti Federal i Punëve të Jashtme të Zvicrës përmes Agjencisë Zvicerane për Zhvillim dhe Bashkëpunim (SDC), do të mbështesë fazën e dytë të projektit.

Më tej thuhet se ky projekt ka për qëllim mbrojtjen dhe menaxhimin efikas të burimeve ujore, përmirësimin e infrastrukturës ujore, reduktimin e ndotjes së ujërave dhe rritjen e efikasitetit të përdorimit të ujit në Kosovë.

Irani konsideron se Bashkimi Evropian (BE) dhe Britania e Madhe vendosën sanksione ndaj linjës së tij të transportit bazuar në “pretendimet e rrejshme” për furnizimin e Rusisë me raketa dhe se sanksionet janë të “paarsyeshme”, tha zëdhënësi i Ministrisë së Jashtme të Iranit, Esmaeil Baghaei.

Brukseli i shtoi të hënën në listën e sanksioneve Linjën e Transportit të Republikës Islamike të Iranit (IRISL) dhe drejtorin e saj, për shkak të mbështetjes që Teherani po ia ofron Rusisë në luftën e saj kundër Ukrainës.

Në ditën e njëjtë, Britania vendosi sanksione kundër linjës ajrore kombëtare të Iranit dhe transportuesit të tij detar, duke thënë se e bëri këtë si përgjigje ndaj furnizimit të Rusisë me raketa nga Irani.

“Irani vlerëson sanksionet e reja nga Bashkimi Evropian dhe Mbretëria e Bashkuar kundër një numri individësh iranianë dhe entiteteve ligjore u vendosën bazuar në pretendimet e rrejshme për dërgimin e raketave në Rusi dhe i cilëson si veprim të paarsyeshëm që bie ndesh me normat e ligjit ndërkombëtar”, tha Baghaei.

Ai shtoi se vendet evropiane po e shkelin ligjin ndërkombëtar, përfshirë lirinë e lëvizjes dhe tregtinë detare, duke vendosur sanksione.

Prej se nisi lufta në Ukrainë më 2022, Moska dhe Teherani e kanë thelluar bashkëpunimin ekonomik dhe tregtar./REL/

Kombëtarja shqiptare e mbyll sot rrugëtimin e saj në Ligën e Kombeve me ndeshjen e dytë të nëntorit dhe të fundit në grupin B1 të UEFA Nations League ndaj Ukrainës në stadiumin “Air Albania”.

FSHF bëri dje me dije se grupi u stërvit i plotë, ndërsa Jasir Asani zhvilloi fillimisht një seancë individuale dhe më pas iu bashkua grupit. Të gjithë lojtarët gëzojnë formë të mirë fizike dhe do të jenë në dispozicion të trajnerit Silvinjo për ndeshjen ndaj Ukrainës.

Atmosfera në ekip është pozitive dhe kuqezinjtë ndihen shumë të motivuar për të përmbushur objektivin dhe për të dhënë maksimumin para tifozëve që do të jenë në stadiumin “Air Albania”.

Ndeshja Shqipëri – Ukrainë e vlefshme për grupit B1 të UEFA Nations League, do të luhet në stadiumin “Air Albania”, në orën 20:45.

Në prag të zgjedhjeve parlamentare në Kosovë, ambasadori gjerman, Jorn Rohde, ka njoftuar lidhur me rregulloren specifike të Gjermanisë për zhvillimin e fushatës.

Sipas Rohde kjo ka të bëjë me ngjarjet e fushatës për zgjedhjet në Kosovë që zhvillohen në tokën gjermane.

Ai ka potencuar se në përgjithësi, leja nuk do të jepet nëse ngjarja e fushatës zhvillohet brenda një periudhe më pak se tre muaj përpara datës së zgjedhjeve në vendin përkatës.

Përmes një postimi në rrjetin social X, Rohde ka thënë se e ka informuar Ministrinë e Punëve të Jashtme dhe partitë politike për këtë rregullore specifike.

“Në lidhje me zgjedhjet e ardhshme të përgjithshme në Kosovë, ne kemi informuar Ministrinë e Jashtme dhe partitë politike për rregulloren tonë specifike. Kjo ka të bëjë me ngjarjet e fushatës për zgjedhjet në Kosovë që zhvillohen në tokën gjermane”, tha Rohde.

Krerë të partive politike në Kosovë kanë filluar të zhvillojnë takime me diasporën përgjatë këtyre muajve.