Pas seancës stërvitore të së hënës, Kombëtarja e Kosovës do të vazhdojë përgatitjet edhe sot nga ora 11:00, në stadiumin “Fadil Vokrri” në Prishtinë, në kuadër të përgatitjeve për dy ndeshjet vendimtare të kualifikimeve për Kampionatin Botëror 2026.

Në stërvitjen e parë të mbajtur një ditë më parë, nën drejtimin e përzgjedhësit Franco Foda, morën pjesë dhjetë futbollistë: Visar Bekaj, Faton Maloku, Ilir Krasniqi, Leard Sadriu, Mërgim Vojvoda, Veldin Hoxha, Valon Berisha, Milot Rashica, Edon Zhegrova dhe Fisnik Asllani.

Ndërkohë, pjesa tjetër e lojtarëve të ftuar nga Foda zhvilloi rigjenerim në palestër në hotel, pas angazhimeve me klubet e tyre gjatë fundjavës.

Dardanët do të përballen të shtunën në Lubjanë me Slloveninë, ndërsa ciklin kualifikues do ta mbyllin të martën e ardhshme me ndeshjen ndaj Zvicrës në “Fadil Vokrri”.

Pas shtatë ndeshjeve të luajtura, Kosova renditet e dyta në grup me shtatë pikë, tri më pak se Zvicra lidere. Sllovenia ndodhet e treta me tri pikë, ndërsa Suedia është e fundit me një pikë.

Vendi i parë i grupit siguron kualifikimin direkt në Botëror, ndërsa skuadra e vendit të dytë do të ketë mundësinë të garojë në fazën e ‘play-off’-it. Për të siguruar këtë fazë, Kosovës i mjafton një pikë, megjithëse ekzistojnë ende gjasa edhe për kualifikim të drejtpërdrejtë, gjithçka do të vendoset në dy ndeshjet e fundit të grupit./S.K/KP/FFK/

Presidentja e Meksikës Claudia Sheinbaum prezantoi planet e Kupës së Botës 2026 në kompleksin kulturor Los Pinos në Meksiko Siti.

Në event morën pjesë gjithashtu përfaqësuesja e qeverisë për Kupën e Botës 2026 Gabriela Cuevas, drejtori kryesor i Turneut FIFA për Meksikën Jurgen Mainka dhe sekretarja e Brendshme Rosa Icela Rodriguez.

Zyrtarët theksuan gatishmërinë e Meksikës për të bashkorganizuar turneun së bashku me Shtetet e Bashkuara dhe Kanadanë, duke përshkruar përgatitjet për infrastrukturën, sigurinë dhe mikpritjen.

Kupa Botërore 2026 do të zhvillohet nga 11 qershori deri më 19 korrik 2026, dhe do të jetë turneu i parë që organizohet nga tri shtete.

Vendi kryesor pritës i ndeshjeve është Shtetet e Bashkuara, ndërsa Kanadaja dhe Meksika do të jenë organizatorët ndihmës. /S.K/KP/

Federata e Futbollit e Kosovës, në bashkëpunim me sponsorin zyrtar të Superligës, Albi Mall, vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në Superligën e futbollit kosovar.

Për javën e trembëdhjetë të këtij edicioni, ky çmim i është ndarë futbollistit të FC Drenica, Kreshnik Uka, i cili pati një paraqitje individuale shumë të mirë për skuadrën e tij për 90 minuta të ndeshjes duke e shënuar edhe golin e dytë në fitoren e rëndësishme të skudrës së tij kunër FC Ballkanit 2:0.

Vlerësimi është bërë nga Komisioni i Veteranëve të Futbollit në përbërje të Avni Shala, Blerim Haxholli dhe Raif Nasufi.

Pasi mori këtë çmim, Uka u shpreh i lumtur që u vlerësua si lojtari më i mirë i javës:

“Ndeshjen e kemi përgatitur shumë mirë, duke pasur parasysh që kemi pasur një kundërshtar të fortë si FC Ballkani. Gjatë gjithë javës terreni ka qenë me shi dhe i rënduar, dhe njësoj ishte gjendja edhe gjatë ndeshjes, prandaj e kishim shumë të vështirë. Falënderoj bashkëlojtarët për punën që po bëjnë dhe tifozët “Shqiponjat e Zeza” për mbështetjen e vazhdueshme”, tha ai për faqen zyrtare të FFK-së./S.K/UBTNews/

Boston Celtics ka arritur një fitore të rëndësishme në udhëtim, duke mposhtur Orlando Magic me rezultatin 111:107 në një ndeshje tejet të luftuar deri në fund.

Jaylen Brown shënoi 27 pikë, ndërsa Derrick White dhe Jordan Walsh shënuan 3 pikë në minutën e fundit për t’i dërguar Boston Celtics në fitore ndaj Orlando Magic.

White, i cili përfundoi me 21 pikë, shënoi një 3 pikësh 45 sekonda para fundit për t’i dhënë Celtics një epërsi prej katër pikësh. Walsh shënoi një 3 pikësh 13 sekonda para fundit për ta zgjeruar epërsinë e Bostonit në 110-105.

Paolo Banchero, i ngadalësuar nga problemet me faullet në pjesën e dytë, shënoi 14 nga 28 pikët e tij në çerekun e katërt për Orlandon. Franz Wagner dhe Jalen Suggs shënuan nga 20 pikë secili.

Anfernee Simons i Bostonit shënoi 25 pikë në pjesën e parë. Simons shënoi tre 3 pikësh dhe shënoi 14 pikët e para të Bostonit në çerekun e dytë, duke i ndihmuar Celtics të kenë një epërsi prej 11 pikësh.

Magic barazoi rezultatin në pjesën e parë dhe kryesoi 85-83 kur Suggs shënoi me një goditje të brendshme në fillim të çerekut të katërt. Luka Garza (16 pikë, tetë rikuperime në 17 minuta) dhe Hugo Gonzalez më pas shënuan së bashku nëntë pikë si pjesë e një serie prej 13-0 në stol, duke i dhënë Bostonit një avantazh prej 11 pikësh me 5:58 minuta të mbetura.

Luka Garza zhvilloi paraqitjen e tij më të mirë me fanellën e Bostonit, ku përveç kontributit në pikë, boshnjaku shtoi 8 ribaunde, 3 asiste dhe 1 top të vjedhur, duke u shpallur lojtari më i mirë i ndeshjes nga ekspertët amerikanë të NBA-së./S.K/SWA/